Swivutiso Swa Vahlayi

■ A ndzi twisisa leswaku ku sukela loko munhu a wele exidyohweni Xikwembu xi tirhisane ni vanhu hi N’wana wa xona ntsena. Kutani Yehova a nga tirhisana na Sathana hi ku kongoma hi ndlela yihi, hi laha buku ya Yobo yi kombaka ha kona?

Xikwembu xi tirhisane ni vanhu hi N’wana wa xona emahlweni na le ndzhaku ka loko Adamu a dyohile kutani a humesa rixaka leri nga hetisekangiki.—Varhoma 5:12.

Vakolosa 1:16, 17 yi ri mayelana ni N’wana wa Xikwembu wa mativula: “Ha yena, Xikwembu xi tumbuluxile swilo hinkwaswo, ematiIweni ni la misaveni, swilo leswi vonekaka ni leswi nga vonekiki . . . Hinkwaswo swi tumbuluxiwile ha yena, naswona swi tumbuluxeriwele yena. Ú rhangele swilo hinkwaswo, kutani eka yena swilo hinkwaswo swi khomene swin’we.” Yohane 1:1-3 yi vula mhaka leyi fanaka, kambe hi dyondza nakambe leswaku N’wana loyi a a ri Rito, kumbe Logos. Hambi loko vanhu hinkwavo va ha hetisekile, Adamu na Evha va nga si dyoha, Xikwembu xi tirhisane ni ku vulavurisana na vona hi muvulavuleri wa Xona, Rito. Kutani a hi fanelanga ku anakanya leswaku ku tirhisana ka Xikwembu ni vanhu hi N’wana wa xona i mbuyelo wa ku wela ka vanhu exidyohweni ni ku nga hetiseki.

Bibele a yi hi nyiki vuxokoxoko lebyikulu bya hi laha Yehova Xikwembu a vulavurisanaka ni swivumbiwa swa moya ha kona. Yobo tindzima 1 na 2 ti hlamusela leswaku Sathana u tshama a humelela “emahlweni ka Yehova” enhlengeletanweni ya tintsumi etilweni. “Kutani Yehova a ku ka Satana: U huma kwihi?” (Yobo 1:6, 7) Emhakeni leyi, buku ya Yobo a yi kombisi Sathana a ri la vulavulaka na Yehova hi ku tirhisa muvulavuleri wo karhi. Naswona muprofeta Mikiya u vone xivono xa Yehova a tshame exiluvelweni Xakwe. Muprofeta loyi u vone ntsumi yi vulavula na Yehova, nakona ku hava muvulavuleri la boxiweke. (1 Tihosi 22:19-23) Logos u tshikiwile eka timhaka leti timbirhi. Hambi a a katseka a swi vuriwanga hi ndlela yo karhi.

Hambi loko endlelo ra Yehova Xikwembu ro vulavurisana na Adamu ri nga lavi ku hundzuka loko munhu wo sungula a dyohile, hakunene xiyimo xa Adamu a xi hambanile. A nga si dyoha Adamu a a ri ‘n’wana wa Xikwembu’ wa munhu. (Luka 3:38) Endzhaku ka swoleswo a a nga ri yena. Vatukulu-xinghuwe va Adamu na vona a va nga hetisekanga, a va ri na xidyoho. Xisweswo, Yehova a a nga ri eka xiyimo xo languta hambi ku ri vavanuna ni vavasati lava tshembekaka tanihi “vana” va yena, kumbe vana va vanhu. Hambi swi ri tano, u kunguhate ku cinca. Yesu u tile kutani a nyikela gandzelo ra nkutsulo, a vekela Yehova xisekelo xo rivalela swidyoho swa lava nga ni ripfumelo eka gandzelo rolero. Muapostola Pawulo u hlamusele Vakriste: “Loko ha ha ri valala eka Xikwembu, hi endliwile lava vuyelelaneke na xona hi ku fa ka N’wana wa xona.”—Varhoma 5:10; Vaefesa 1:7.

Ina, handle ka ku va yena a va la nga lulamangiki kumbe ku va la nga basangiki, endzhaku Yehova a a ta rivalela xidyoho xa vavanuna va ripfumelo ivi a va languta tanihi lava tengeke, vana va vanhu lava nga riki na xidyoho, leswaku va amukeriwa tanihi vana va moya. (Varhoma 3:25, 26; 8:15-17) Kambe hambi ku ri eka leswi, Xikwembu xi tirhise N’wana wa xona, hi laha swi kombisiweke ha kona hi mhaka yo va Yesu a chulula moya lowo kwetsima hi Pentekosta.—Mintirho 2:33.

Kutani ku tirhisana ka Xikwembu ni vanhu hi Rito a ku nga ri ku sungula hikwalaho ka xidyoho xa vanhu, naswona a ku fanelanga ku langutiwa hi ndlela leyi hambanaka ni leswi hi swi hlayaka ebukwini ya Yobo.