Hi Ta Tirhela Yehova, Xikwembu Xa Hina”

“Loko nḍi ri mina ni yindlu ya mina, hi ta tirela Yehova.”—YOXUWA 24:15.

1. Xana buku ya Yoxuwa yi tirha ku hi khutaza ni ku hi sirhelela hi ndlela yihi?

SWIENDLAKALO leswi nyanyulaka swa buku ya Yoxuwa swi rhekhoderiwe “leswaku hi dyondza ha swona” naswona tanihi ‘swikombiso’ leswi swi khutazaka ni ku sirhelela “hina lava hi nga emasikwini ya ku hetelela ka minkarhi.” (Varhoma 15:4; 1 Vakorinto 10:11) Timfanelo ta Xikwembu, to fana ni ku tiyisela, ripfumelo ni ku yingisa, ta tlakusiwa. “Hi ku pfumela, makhumbi ya rihlampfu ra Yeriko ma mbundzumukile, endzhaku ka loko ya rhendzelekeriwe hi masiku ya 7. Hi ku pfumela, Rahava nsati wa vuoswi a nga lovanga ni lava va nga ala ku yingisa, hikuva ú amukerile tinhlori hi malwandla.” (Vaheveru 11:30, 31) Ripfumelo ra Yoxuwa, Rahava ni vanhu van’wana lava tshembekaka le ndzhaku ri fanele ku hi nyanyula leswaku hi va ni xivindzi ni ku tiya, leswaku hi ta heta ntirho wa Xikwembu namuntlha.—Yoxuwa 10:25; Yohane 4:34.

2. (a) Xana Yoxuwa u kombise ku yingisa hambi ku ri eka vuxokoxoko byo hetelela hi ndlela yihi? (b) I yini leswi endlekeke entshaveni ya Ebal na Gerizim ke?

² Endzhaku ka ku hlula loku nga kanakanisiki eAi, Yoxuwa u yise mianakanyo eka swiletelo leswi xaxametiweke leswi rhekhodiweke eka Deuteronoma 27:1-28:68. Entshaveni ya Ebal u ake altari ya maribye, naswona kwalaho u hetisise xileriso lexi nge: “U ta humesa ni timhamba ta ku nkhensa, u dya kona, u tiṭakela e mahlweni ka Yehova, Šikwembu ša wena.” Maribye man’wana ma yimisiwe tanihi xitsundzuxo, ma totiwa hi mhemba kutani marito ya Nawu ma tsariwa ehenhla ka wona. Kutani tinxaka ti avanyisiwile, ntlawa wun’wana wu yima entshaveni ya Gerizim “e ku katekisa tiko” ivi lowun’wana “wu yima e nṭhav̌eni ya Ebal e ku rukana.” Hi marito lama tlakukeke Valevhi va vule mindzhukano ya ku nga yingisi, kutani vanhu hinkwavo va hlamula va ku, “Amen!” Kutani mikateko ya ku yingisa yi twarisiwile. Kambe khombo ri wele Israyele loko a tsandzeke ku ‘yingisa marito hinkwawo ya nawu ni ku chava vito leri vangamaka ni leri dzunekaka ra Yehova Xikwembu’!—Yoxuwa 8:32-35.

3, 4. (a) I dyondzo yihi ya matimba leyi mahanyelo ya Israyele ya hi nyikaka yona namuntlha? (b) Hikwalaho ka yini hi nga fanelanga ku karharisiwa hi ku twa swilo leswi fanaka nkarhi na nkarhi? (c) I yini lexi lavekaka leswaku u nghena hi “nyangwa leyo khuma”?

³ Xana Israyele u hambetile a yingisa ‘marito ya nawu’ ke? Ku nga khathariseki swikhutazo swa nkarhi na nkarhi leswi phindhaphindhiweke swa Muxe, naswona endzhakunyana swa Yoxuwa, va tsandzeke hi laha ku vavisaka. Mawaku dyondzo ya matimba leyi leswi swi hi nyikaka yona namuntlha! Ku nga khathariseki switsundzuxo leswi hambetaka, ku tshama ku ri ni lava va ehleketaka leswaku va nga sola swilaveko swa Xikwembu, ‘va tiendlela swa vona,’ hambi swi ri tano va pona. Wa nga vona vuphukuphuku lebyi! Loko a kombetela endzhaku eka mintokoto ya Israyele, Pawulo u te: “Loyi a anakanyaka leswaku wa ha yimile a a tivonele leswaku a nga wi.”—1 Vakorinto 10:12; Eklesiasta 2:13.

⁴ Van’wana va vanhu va Xikwembu va sandze switsundzuxo leswi nyikiweke, va vula leswaku va karhala ku twa swilo leswi fanaka nkarhi na nkarhi. Kambe lava hakanyingi hi vona vo sungula ku wela entlhan’wini wa Sathana. Buku leyi huhuteriweke ya Bibele ya Deuteronoma (hi Xiheveru Mish·neh’ hat·to·rahʹ leyi vulaka leswaku, “Ku phindha-phindhiwa ka Nawu”) ngopfu-ngopfu yi vumbiwa hi tinkulumo ta mune leti nyikeriweke hi Muxe; tona ti swi veke erivaleni leswaku Vaisrayele va fanele ku yingisa milawu ya Yehova leyi vuriweke eku sunguleni. Muxe u tirhise marito yo tala hi makhamba lama tlulaka mune loko a tsundzuxa hi ta ku xandzuka ni ‘mindzhukano’ leyi vaka kona ku tlula loko a hlamusela ‘mikateko.’ Entshaveni ya Ebal, Yoxuwa u tlhele a tsundzuxa Vaisrayele leswaku va fanele ku yingisa. Xana leswi a swi hi kombi ndlela leyi swi nga swa nkoka ha yona ku “nghena hi nyangwa leyo khuma” ke?—Matewu 7:13, 14, 24-27; 24:21, 22.

5. I ntwanano wihi lowu manuku wu langutaneke na Israyele, naswona i xiyimo xihi lexi fanaka lexi hi xi vonaka namuntlha?

⁵ Xiyimo lexi nga kanakanisiki manuku a xi vumbeka. Nyangwa ya muti wa Yeriko a yi pfuriwile, tanihi leswi vukhongeri byo hemba byi nga ta herisiwa loko “nhlomulo lowukulu” wu sungula. Ai ri wile. Kambe sweswi “tihosi hikwato le’ti nga haleno ka Yordan e nṭhav̌eni, ne tikweni le’ri nge hansi, ne ribuweni hikwaro ra Iwandle le’rikulu, laha ku langutaneke na Lebanon, v̌a-Het, ni v̌a-Amor, ni v̌a-Kanana, ni v̌a-Feresi, ni v̌a-Hevi, ni v̌aYebus . . . v̌a hlengeletane ŝiṅwe hikwav̌o, v̌a twanene, e ku ya Iwa na Yošua na Israel.” (Yoxuwa 9:1, 2) Eka xikombiso lexi fanaka xa manguva lawa, hi kuma matiko ya misava manuku ya hlangane kun’we tanihi lama vitaniwaka Nhlangano wa Matiko. Ya tilavela ku rhula ni nsirhelelo hi tindlela ta wona vini kambe ‘ya hlengeletane kun’we leswaku ya pfukela Yehova ni Muhlawuriwa wa yena,’ Yoxuwa Lonkulu. (Psalma 2:1, 2) Xana vuyelo ku ta va byihi ke?

Ku Endla Hi Vutlhari

6, 7. (a) Xana va-Gabaon va kombise ku tsakela yini, naswona i vukanganyisi byihi lebyi va byi tirhiseke? (b) Xana Yoxuwa u avanyise mhaka leyi hi ndlela yihi ke?

⁶ Ku fana na Rahava emahlweni ka vona, van’wana lava nga riki Vaisrayele manuku va sungule ku komba ku tsakela ku pona. Lava a va ri vaaki va Gabaon, muti lowukulu en’walungu wa Yebus, kumbe Yerusalema. A va twile hi ta swiendlo swa Yehova swa matimba kutani va tiyimisela leswaku va ta lava ku rhula ni nsirhelelo eka Yehova. Kambe njhani? Va rhumele vavanuna emixaxeni ya Vaisrayele eGilgal va rhwele timbuva to oma ni mahlanhla ni masaka ya khale ni mabodlhele ya madzovo, naswona a va ambale tinguvu ni timphaxana leti hlakaleke. Loko va tshinelela Yoxuwa, vavanuna lava va te: “Malanḍa ya wena ma sukile tikweni le’ri nge kule, ŝinene hikwalaho ka v̌ito ra Yehova, Šikwembu ša wena, hikuv̌a hi yingisile ntwalo wa yena.” Loko a twa leswi, “Yoxuwa a twanana na v̌ona, kutani a endla šinakulobye na v̌ona leŝaku v̌a ta ṭhikiwa v̌a hanya.”—Yoxuwa 9:3-15.

⁷ Hambi swi ri tano, Israyele hi ku hatlisa u swi tivile leswaku va-Gabaon kahle-kahle a va ‘tshama ekusuhi na vona’! Manuku Yoxuwa u byi langute njhani vukanganyisi bya vona? U xixime ntwanano lowu endliweke na vona eku sunguleni, wa ‘ku va tshika va hanya, va va vapandzeri va tihunyi ni vaki va mati va nhlengeletano hinkwayo.’—Yoxuwa 9:16-27; ringanisa Deuteronoma 20:10, 11.

8. Xana va-Gabaon va fanekisela “ntshungu lowukulu” hi ndlela yihi?

⁸ Vo tala va Netinim, lava emalembeni lawa ya landzeleke va tirheke etempeleni ya Yehova, hi ku fanana a va fanisela va-Gabaon. Xisweswo va-Gabaon va nga ha fanisela “ntshungu lowukulu” khwatsi lowu sweswi wu tirhelaka Xikwembu “vusiku ni nhlekanhi etempeleni ya xona.” (Nhlavutelo 7:9, 15) Hambi leswi va hanyaka etikweni leri fanaka na Kanana, lava etimbilwini “a hi va misava leyi.” Eku sunguleni, a va boheka ku amukela malunghiselelo ya moya ‘lama nga tiyangiki,’ yo fana ni lawa ya kumekaka etikerekeni ta Vujagana, naswona a va ri hava “vinyo” ya ntsako. Loko va hlangana ni vanhu va Xikwembu, va xiye leswaku Yehova u endla mintirho ya matimba hi ku tirhisa timbhoni ta yena. Va fambe riendzo ro leha va suka emisaveni ya Sathana leswaku va cinca ‘tinguvu’ leti hlakaleke leswaku va kuma ku tiveka lokuntshwa tanihi malandza lawa ya titsongahataka ya Yehova, lawa ya ambaleke munhu lontshwa.—Yohane 14:6; 17:11, 14, 16; Vaefesa 4:22-24.

Ku Seketela Ka Nhlengeletano

9. (a) I xiendlakalo xihi lexi humeleleke endzhaku ka kwalaho? (b) Yoxuwa u hlamule njhani, naswona hi ku tiyiseka kwihi?

⁹ Loko Adoni-Tsedek, hosi ya Yerusalema, a twa leswaku va-Gabaon va endle ku rhula na Israyele, “a tšhav̌a ngopfu-ngopfu, hikuv̌a Gabaon a wu ri muti lo’wukulu kukotisa muti wa tihosi, . . . kambe v̌av̌anuna v̌a wona a ti ri tinhenha.” U tihlanganise ni mavuthu lama nga ni tihosi ta mune, kutani va hlasela Gabaon. Hi ku hatlisa, va-Gabaon va rila eka Yoxuwa va ku: “Hatlisa u khanḍiya ka hina, u hi kuṭula ni ku hi pfuna.” Hi ku hatlisa, Yoxuwa a hlamula, kutani Yehova a tlhela a n’wi tiyisekisa, a ku: “U nga tšhav̌i hikuv̌a nḍi v̌a nyiketile e mav̌okweni ya wena, ku nga ka ku nga tiyi ni uṅwe e mahlweni ka wena.” Yoxuwa ni vavanuna va yena va tinhenha va fambe “v̌usiku hikwabyo” leswaku va hlamarisa valala hi laha ku heleleke.—Yoxuwa 10:1-9.

10. (a) I xiendlo xa muxaka wihi lexi fanaka ni nhlaselo wa va-Gabaon ke? (b) Xana va-Gabaon va manguva lawa va kombisa ku tiyiseka kwihi?

¹⁰ Ku fana ni tihosi letiya ta ntlhanu, varhangeri van’wana va hulumendhe namuntlha va hlundzuka loko va vona vo tala va vanhu va vona—hambi ku ri “tinhenha”—va yimelela Yoxuwa Lonkulu ni Mfumo wa yena wa misava hinkwayo wa ku lulama. Vafumi lava va tshemba leswaku mindzilakana ya vutiko yi fanele ku hlayisiwa, hambi leswi matiko ya holovaka ni ku lwisana nkarhi na nkarhi. Kutani va ringeta ku herisa mphakelo wa swakudya swa moya leswi humaka eka “ntshungu lowukulu” lowu rhandzaka ku rhula, ku yirisa minhlangano laha va dyaka kona “swakudya” leswi, ni ku va sivela ku vulavula ni van’wana hi timhaka ta moya. Kambe va-Gabaon lava va manguva lawa va yima hi ku tshembeka na Israyele wa moya, va ku: “Hi ta ya na ṅwina.”—Zakaria 8:23; ringanisa Mintirho 4:19, 20; 5:29.

11. Xana Timbhoni ta Yehova ti khoma timhangu hi ndlela yihi ke?

¹¹ Loko “ntshungu lowukulu” wu rilela mpfuno eka nhlengeletano leyi nga “mana” wa wona, leswi swi nyikeriwa hi ku hatlisa naswona hi mpimo lowunene. Tinghitsi leti Timbhoni ta Yehova ti endlaka swilo ha tona nakambe ti voniwa hi tindlela tin’wana to tala —tanihi ku lunghiselela mimpimanyeto ya mpfuno hi ku hatlisa endzhaku ka makhombo ya ntumbuluko ni le ku akeni ka Tiholo ta Mfumo leti lavekaka hi ku hatlisa ni tindhawu tin’wana ta tinhlengeletano to hangalasa “swakudya.” Loko ntsombano wu lunghiseleriwile hi June leyi hundzeke eYankee Stadium, eNew York, vuthu ra vabasisi vo tirhandzela ri ye kona nivusiku endzhaku ka ntlangu wa ’baseball’ rivala rolero a ri nga si tshama ri basa ku tlula ndlela leyi a ri ri ha yona enkarhini wa masiku wolawo ya mune lawa ya landzeleke. Nakambe vakulu lava nga ni vutihlamuleri va Timbhoni ta Yehova va ye hi ku hatlisa, va ya lulamisa swiphiqo leswi pfukaka eku chumayeleni ka mahungu lamanene.—Vafilipiya 1:6, 7.

Yehova U Lwela Israyele

12. Yehova u endle masingita wahi loko a lwela Israyele eka ku sirhelela va-Gabaon? (Ringanisa Habakuk 3:1, 2, 11, 12.)

¹² Kambe manuku languta eGabaon. Yehova u pfilunganya mavuthu wolawo ya valala. Israyele u va hlasela hi ku dlaya ka matimba. Naswona xana hi vona yini leswi lahleriweke ehansi swi huma etilweni? Maribye lamakulu ya ayisi! Vo tala va dlayiwe hi maribye lawa makulu ya xihangu ku tlula lava dlayiweke hi mavuthu ya Israyele. Manuku, yingisa. Yoxuwa u vulavula na Yehova, kutani xana u ri yini ‘emahlweni ka Israyele’? U ri: “Dyambu, yima henhla ka Gabaon na wena ṅhweti e nkov̌eni wa Ayalon.” Singita rin’wana leri chavisaka ngopfu! “Ku lav̌a ku ringana siku,” dyambu ri voningela xivandla xexo xa nyimpi ku tirihisela ka Xikwembu ku kondza ku endleka hi laha ku heleleke. A swi le ka hina ku endla njhekanjhekisano hi ndlela leyi Yehova a endleke singita rero ha yona, ku tlula leswi hi kanakanisaka swona ehenhleni ka ndlela leyi a ‘endleke’ swo voninga swimbirhi leswikulu leswaku swi voninga eka “siku” hinkwaro ra yena ra vumune ro tumbuluxa. (Genesa 1:16-19; Psalma 135:5, 6) Rhekhodo ya dlayelela: “A ku v̌anga na siku kukota siku lero, hambi ku ri mahlweni, hambi ku ri nḍaku, loko Yehova a yingisa rito ra munhu; hikuv̌a a a lwela Israel.”—Yoxuwa 10:10-14.

13. Xana Yoxuwa u khutaze tindhuna ta yena ku ya emahlweni hi ndlela yihi, naswona hi vuyelo byihi byo hetelela?

¹³ Swiendlo swo hetelela swi chaputa hi ku dlayiwa ka ntlhanu wa tihosi, eka nkarhi lowu Yoxuwa a byeleke tindhuna ta nyimpi a ku: “Mi nga tšhav̌i, mi nga ṭemeki nhlana, tiyani, mi v̌a ni mbilu, hikuv̌a Yehova o ta endlela v̌alala v̌a ṅwina hikwav̌o lava mi lwaka na v̌ona hi ŝeŝo.” Leswi ana se a swi tikombe swi ri ntiyiso malunghana ni tihosi ta nkombo ta Kanana, naswona swi hambetile swi va ntiyiso tanihi leswi mimfumo yin’wana ya 24 leyi heleleke yi hluriweke. Enkarhini wolowo ntsena endzhaku ka tsevu wa malembe ya nyimpi, hi kona tiko ri vaka ni ku wisa.—Yoxuwa 10:16-25; 12:7-24.

14. Xana hi fanele ku langutana na Armagedoni hi langutelo ni ku tiyiseka ka muxaka wihi ke?

¹⁴ Namuntlha, tanihi leswi hi langutanaka ni nyimpi yo hetelela ya Armagedoni, onge hi nga va ni xivindzi ni ku tiya ku fana na Yoxuwa, vavanuna va yena na tinhenha ni hinkwavo lava goveke va Israyele. Hi nga tiyiseka leswaku, tanihi leswi Yehova a ngheniseke timiliyoni to hlayanyana eTikweni leri Tshembisiweke va hlayisekile, kutani a nga endla masingita lama hlamarisaka leswaku a hundzisa timiliyoni ta vanhu va yena lava nga chaviki eArmagedoni va nghena emafambiselweni ya yena lamantshwa.—Nhlavutelo 7:1-3, 9, 14; 19:11-21; 21:1-5.

Ku Tiyimisela Ka Hina

15. I swiavelo swa muxaka wihi leswi “tinyimpfu tin’wana” ti nga swi langutelaka emafambiseIweni lamantshwa ya Xikwembu?

¹⁵ Hambi leswi ana se a a tshinelela 90 wa malembe hi vukhale, Yoxuwa a a langutane ni ntirho wun’wana lowukulu—lowuya wa ku avela tiko eka tinxaka ta Israyele. Leswi a swi nga vuli swona leswaku vutomi a byi ta olovela Vaisrayele. Entiyisweni, Kaleb u kombele tiko eHebron, laha xihontlovila Anakin a xi tshama kona, u lave ku hambeta a tikarhatela ku herisa valala vo hetelela va Yehova. Leswi a hi xona xikombiso xa leswaku enkarhini wa ku fuma ka Kriste ka Gidi ra Malembe ehenhla ka misava ku ta va ni valala va vanhu. Kambe ku ta va ni ntirho wo wu endla. Emafambiselweni lamantshwa ya swilo, a hi fanelanga ku langutela ndlela ya vutomi yo olova, ya vulolo. Endzhaku ko amukela swiavelo swa vona ‘emisaveni leyintshwa,’ “tinyimpfu tin’wana” ta Hosi ti ta va ni ntirho wo tala eka muako lowukulu wo xongisa misava ni ku yi hundzula Paradeyisi ya xiviri.—Yoxuwa 14:6-15; Marka 10:29, 30; Varhoma 12:11.

16. I yini lexi fanekiseriwaka hi lunghiselelo ra Yehova ra “miti ya šitšhav̌elo” namuntlha?

¹⁶ Loko a ava tiko, Yoxuwa u vekele miti ya tsevu ya va-Levhi etlhelo leswaku yi va “miti ya šitšhav̌elo,” minharhu eka tlhelo rin’wana ni rin’wana ra Yordan. Leri a ku ri lunghiselelo ra Yehova ro sirhelela mudlayi la nga dlayangiki ha vomu loyi a nga ha balekelaka eka wun’wana wa miti leyi. Mudlayi wo tano a a fanele ku kombisa leswaku a a ri na ripfalo ro tenga emahlweni ka Xikwembu, naswona leswi a a swi endla hi ku tshama emutini wolowo ku ko ku fa muprista lonkulu. Hi ku fanana, hikwalaho ka ku hlanganyela ka vona ko sungula ni misava leyi nga ni nandzu wa ngati, “ntshungu lowukulu” wu fanele ku lava ripfalo lerinene na Xikwembu namuntlha. Va kuma ripfalo rolero lerinene hi ku vula swidyoho swa vona, va hundzuka, va tisola, va tinyiketela eka Yehova, kutani va khuvuriwa hi mati. Kutani va fanele ku hlayisa xiyimo xexo. “Ntshungu lowukulu” wu fanele ku tshama ‘emutini’ ku fikela loko Yesu a fa hi ndlela yo fanekisela ehenhleni ka ntirho wa yena lowukulu wa vuprista, eku heteleleni ka ku Fuma ka Yena ka Gidi ra Malembe.—Yoxuwa 20:1-9; Nhlavutelo 20:4, 5; 1 Vakorinto 15:22, 25, 26.

17. I vuyelo byihi lebyi tsakisaka lebyi hi byi rindzelaka namuntlha?

¹⁷ Mawaku ndlela yo hlamarisa leyi Yehova a katekiseke vanhu va yena va Israyele ha yona! Ndlela leyi a yi nonon’hwa, naswona miringo a yi tele. Kambe eku heteleleni va nghene eTikweni leri Tshembisiweke ivi va tshamiseka kwalaho. Timbilu ta vona ti fanele ti tatiwe swonghasi hi ku nkhensa Yehova! Kutani loko hi kombisa ku tshembeka eka Xikwembu xa hina, hi nga ha va ni ntsako lowu fanaka loko hi ri karhi hi nghena emafambiselweni ya yena lamantshwa, lawa ya katsaka “misava leyintshwa.” Hakunene, swi ta va ntiyiso eka hina, tanihi leswi a swi ri ntiyiso esikwini ra Yoxuwa: “A ku wanga na rito riṅwe ra marito hikwawo yo saseka lawa Yehova a ma byeleke yindlu ya Israel: hikwaŝo ŝi humelele.” (Yoxuwa 21:45) Onge u nga va ni ku hlanganyela loku tsakisaka kwalaho!

18. (a) I yini lexi Yoxuwa a xi tsundzuxeke vakulu va Israyele? (b) I ku navela kwihi loku hi faneleke ku va na kona malunghana ni mafambiselo lamantshwa ya Yehova?

¹⁸ Eku heteleleni, loko a ri ni malembe ya 110 hi vukhale, Yoxuwa u hlengelete vakulukumba va Israyele. A va tsundzuxa ndlela yo hlamarisa leyi Yehova a katekiseke vanhu va yena vo tshembeka ku sukela enkarhini wa Abrahama ku ta fika esikwini rolero. Manuku Yehova a va byela a ku: “Nḍi mi nyikile tiko leri mi nga tirangiki ka rona ni miti leyi mi nga yi akangiki; ŝeŝi mi akile kona, mi dya mihanḍu ya tivinya ni mitlhwari, ŝi ri leŝi mi nga ŝi byalangiki.” Hi lunghiselelo leri rikulu, entiyisweni Israyele a a ta lava ku ‘chava Yehova ni ku n’wi tirhela hi ku hetiseka ni ntiyiso’ minkarhi hinkwayo. Naswona loko hi languta emahlweni eka mafambiselo lamantshwa yo kwetsima ya Yehova hi misava leyi, entiyisweni un’wana ni un’wana wa hina u fanele ku va ni ku navela loku fanaka.—Yoxuwa 24:13, 14.

19. (a) I ku hlawula kwihi loku Yoxuwa manuku a ku vekeke eka vanhu, naswona va hlamule hi ndlela yihi? (b) Hi fanele hi lava ku fana na vamani? (c) I ku hlawula kwihi loku hi faneleke ku ku endla, naswona hi ku tiyimisela kwihi?

¹⁹ Kutani Yoxuwa a swi vekela vanhu erivaleni a ku: “Kambe loko ŝi bihile mahlweni ya ṅwina e ku tirela Yehova, hlawulani namuntlha loyi mi ranḍaka ku ṅwi tirhela, . . . LOKO NḌI RI MINA NI YINDLU YA MINA, HI TA TIRELA YEHOVA.” Xana marito lawa ya nga phindhiwa hi un’wana ni un’wana wa hina hi munhu hi xiyexe, hi swirho leswi pfumelaka swa mindyangu ya hina, hi mabandlha ya hina, hi ‘ndyangu wa Xikwembu’ wa misava hinkwayo? Entiyisweni va nga ma vula! (Vaefesa 2:19) Vanhu esikwini ra Yoxuwa va n’wi hlamurile, vaku: “Hi ta tirela Yehova, Šikwembu ša hina, hi ta yingisa rito ra šona.” (Yoxuwa 24:15, 24) Kambe, lexi khomisaka gome, emalembeni ya le ndzhakunyana va tsandzeke ku endla tano. A hi swi lavi ku fana ni lava tsandzekeke. Hi lava ku fana na Yoxuwa ni ndyangu wa yena, ku fana na Kaleb, ku fana ni va-Gabaon ni ku fana na Rahava. Ina, “HI TA TIRELA YEHOVA.” Onge hi nga endla leswi hi xivindzi na hi ku tshemba loku heleleke ka leswaku ku hava lexi nga ta “kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.”—Varhoma 8:39.

Xana Hi Dyondza Yini eBukwini Ya Yoxuwa—

◻ Malunghana ni ku pfuneka eswitsundzuxweni leswi phindha-phindhiwaka?

◻ Malunghana ni ku hlayisa va-Gabaon va manguva lawa?

◻ Malunghana ni ndlela leyi Yehova a nga ta Iwa ha yona eArmagedoni?

◻ Malunghana ni xilaveko xo tsutsumela “e mutini wa šitšhav̌elo”?

◻ Malunghana ni ku hlawula loyi hi faneleke ku n’wi tirhela?