Nkambisiso Wa Mahungu

Ti Faneriwa Hi Ku Tekeleriwa

Papila ra sweswinyana leri humesiweke eka New Haven Register, phepha-hungu ra le Connecticut, ri nyikele malangutelo yo hlawuleka ehenhleni ka mintsombano leyi khomiweke hi Timbhoni ta Yehova. Loko ri kongomisiwe eka muhleri, papila leri ri te: “Timbhoni ta Yehova ta ha ku khoma tinhlengeletano ta tona ta lembe na lembe eNdlwini ya mintlangu. Eka mintlawa hinkwayo leyi humelelaka, a va kona lava va amukelekaka swinene kumbe lava laviwaka swinene ku tlula vona. Yindlu ya mintlangu a yi nge basisi xiswona leswi, loko va nga si hlangana, kumbe yi basa swinene loko va famba tanihi leswi a yi ri xiswona ku sukela eku endzeni ka vona loku hundzeke.”

Loko a kombetela eka ntsombano lowu khomiweke hi Timbhoni malembe yo karhi lama hundzeke, mutsari wa papila u tlhandlekele leswaku “Timbhoni ta 75 000 a ti hlengeletane eYankee Stadium. ni van’wana va 20 000 ehandle va yingisela swikurisa-mpfumawulo enkhubyeni wa vugandzeri lowu hlamariseke New York. Maphorisa ya madzana mambirhi ya tisiwile hi siku ro sungula, nhlayo leyi tolovelekeke leyi averiwaka ntshungu wo tano. I vambirhi ntsena lava rhumeriweke masiku lama tlhandlameke ku ya nyikela vukongomisi. New York City yi rhumele vativi va rihanyo, vaphameri va swakudya, maphorisa ni tindzawulo ta ndzilo ku ta kambisisa endlelo leri, leri humelelaka hi laha ku nga khorwisiki ni ku dyondza eka rona. A ku ri hava ni xiphemunyana xin’we xa swakudya kumbe litara leswi a swi vonaka loko va fambile, ku nga khathariseki ku phamela swirho swa vona. Hambi u mupfumeri wa xivumbeko xin’wana xa dyondzo ya ntivo-vukwembu kumbe u yi ala hinkwayo, . . . u boheka ku hlamala ku tinyiketa ka vona, ku tenga ka vona, xikombiso xa vona lexi xiyekaka xa mahanyelo ya vanhu ni ku hanya loku tengeke. Hi ta va hi endla kahle ku landzela ni ku endla timfanelo leti hlamarisaka leti vanhu lava lava titsongahataka ni lava tinyiketeke va ti kombisaka.”

Hambi loko vo tala va languta mahanyelo ya Timbhoni ta Yehova ya ri lama nga bohiki, Timbhoni hi toxe ta swi tiva leswaku Vakriste va ntiyiso va fanele ‘ku hanya hi moya’ naswona va fanele ku ‘hambeta va famba hi ku hleleka na hi moya.’ Moya wa Xikwembu hi wona lowu humesaka eka vona mihandzu ya “rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma.” Timfanelo to tano hakunene ti faneriwa hi ku tekeleriwa.—Vagalatiya 5:22, 23, 25.

Xidlodlo Xa Xikhunguvanyiso

Madzana ya vaaki va le Málaga, eSpain, va seketele nhlengo wa mani na mani ku hakelela xidlodlo lexikulu xa nsuku hi vukheta xa nhwana la dumeke wa kwalaho, “Wansati wa Hina Wa Ntshembo.” “Giramu yin’we ya nsuku ya [nhwana]” a ku ri marito lama vumbiweke malembe mambirhi lama hundzeke ku endla matshalatshala yo kuma minyikelo. Ku sukela kwalaho, swingwavila swa tindleve, timendlele, swingwavila swa vukati naswona hambi ku ri meno ya nsuku swi nyikeriwile. Swilo leswi swi n’okisiwile swi va nsuku lowu tengeke wa 1,5 wa tikhilogramu, lowu aneleke ku endla xidlodlo xa nsuku lexi tiyeke xa xifaniso.

Enkhubyeni lowu xiximekaka swinene, lowu a wu ungameriwe hi ntlawa wa vaphophu ni vabixopo vo hlayanyana lava tlakukeke le Spain, “Wansati Wa Hina Wa Ntshembo” u nyikiwe xidlodlo hi June 1988. Hambi swi ri tano, a ku ri hava Makhatoliki lama veke ni ku kanakana swinene hi ku ambexa loku. Phepha-hungu ra le Spain leri nge El País ri vika leswaku epapileni ra mani na mani swichudeni swa kwalomu ka 20 a swi vutisa swi ku: “Xana na hina a hi ribye ra xikhunguvanyiso leri hlamarisaka eka vapfumeri ni lava nga riki vapfumeri hi mihivani ya hina leyi nga pfuniki nchumu?” Mintlawa yin’wana ya Khatoliki yi kombetele eka papila ra sweswinyana ra phophu ro ya eka mani na mani leri bumabumelaka leswaku lava tshembekaka “va yisa rifuwo ra vona eka swisiwana.” Hikwalaho ka leswi. Makhatoliki ma phofule “ku ala ka wona loku nga hundzukiki hikwalaho ka ripfalo malunghana ni nkhuvo lowukulu lowu navetisiweke” ni “xidlodlo lexi durhaka.”

A swi hlamarisi leswi vanhu lavanene va kumaka ku khavisa xifaniso lexi nga hanyiki ku ri loku nga amukelekiki. Xikwembu hi xoxe xi titwa hi ndlela leyi fanaka. Malembe xidzana lama hundzeke, xi xupule Vaisrayele hikwalaho ka xiendlo lexi xi fanaka. Yehova hi ku tirhisa muprofeta wa yena Ezekiyele u te: “V̌a tibombisa hi minsuku ni masinḍa ya v̌ona; v̌a foroma hi ŝona e ŝifaniso ŝa tingana ni ŝikwembu ŝa v̌ona.” (Ezekiel 7:20) Hikwalaho ka xivangelo lexi, varhandzi va ntiyiso hi vutlhari va yingisa xitsundzuxo lexi nga enkarhini xa Bibele xa ku “chava ku phahla swikwembu swa hava.”—1 Vakorinto 10:14.