Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
JULY 7-13
LESWI HI SWI DYONDZAKA EBIBELENI SWIVURISO 21
Misinya Ya Milawu Ya Vutlhari Leyi Nga Endlaka Leswaku Vukati Byi Tsakisa
U Nga Swi Endla Njhani Swiboho Swa Vutlhari?
Swiboho leswi endliwaka hi magugu a swi nge teki nkarhi swi nga si vonaka leswaku i swa vuphukuphuku. Swivuriso 21:5 ya tsundzuxa: “Kunene makungu ya lava va gingiritekaka ma endla leswi pfunaka, kambe un’wana ni un’wana la hatlisaka ngopfu, hakunene u ta wela eku pfumaleni.” Hi xikombiso, vantshwa a va fanelanga va hatlisela ku teka xiboho xo nghenela vukati hambiloko va sungule ku rhandza. Loko vo hatlisela ku tekana, va nga ha vona ntiyiso wa marito ya William Congreve, mutsari wa mintlangu wa Munghezi la hanyeke eku sunguleni ka lembe-xidzana ra vu-18, loyi a nga te: “Ku tsutsumela ku tekana, swi nga endla vanhu va tisola vutomi bya vona hinkwabyo.”
Ndlela Yo Endla Swilo Swi Famba Kahle eVukatini
Titsongahate. “Mi nga endli nchumu hi ku kanetana kumbe hi ku tikurisa, kambe hi mianakanyo yo titsongahata mi teka van’wana va ri lava tlakukeke.” (Vafilipiya 2:3) Timholovo to tala evukatini ti va kona hileswi vanghana va vukati va kombetelanaka hi tintiho ematshan’weni yo lava tindlela to tlhantlha mholovo ya kona hi ku titsongahata. Mianakanyo yo titsongahata kumbe ku titsongahata, swi nga ku pfuna leswaku loko mi ri eku holoveni u nga sindzisi leswaku wena a wu na nandzu.
“Tsaka Hi Nsati Wa Vuntshwa Bya Wena”
13 Ku vuriwa yini loko evukatini ku ri ni swiphiqo hikwalaho ka ndlela leyi vanghana va vukati va khomanaka ha yona? Ku laveka matshalatshala leswaku va kuma ntlhantlho. Hi xikombiso, swi nga ha endleka leswaku ku tlhavana hi marito se i nchumu lowu tolovelekeke evukatini bya vona. (Swivuriso 12:18) Hilaha ku buriweke hakona exihlokweni lexi hundzeke, leswi swi nga ha va ni vuyelo byo biha. Xivuriso xa le Bibeleni xi ri: “Swa antswa ku tshama etikweni leri nga mananga ematshan’weni ya ku tshama ni nsati wa timholovo, la dyisaka mbitsi.” (Swivuriso 21:19) Loko ku ri wena wansati la nga le vukatini bya muxaka wolowo, tivutise, ‘Xana vumunhu bya mina byi endla leswaku nuna wa mina a nga swi tsakeli ku heta nkarhi na mina?’ Bibele yi byela vavanuna yi ku: “Tshamani mi ri karhi mi rhandza vasati va n’wina naswona mi nga va hlundzukeli ku tlula mpimo.” (Vakolosa 3:19) Loko u ri wanuna, tivutise, ‘Xana leswi endlaka leswaku nsati wa mina a ya lava nchavelelo kun’wana hileswi ndzi nga n’wi kombisiki rirhandzu?’ Ina, a wu nge tiyimeleli loko u tikhome hi ndlela yo biha hi tlhelo ra rimbewu. Kambe, xivangelo lexinene xo bula hi swiphiqo sweswo hi ku kongoma hi leswi khombo ro tano ri nga ha humelelaka.
Endla Ndzavisiso
Ku Hetiseka Ka Swikombiso Swa Mfumo Wa Xikwembu
9 Sweswi Yesu i Hosi ya matimba a nga ha ri munhu wa nyama la khandziyeke ximbhongolwana. U hlamuseriwa a ri la khandziyeke hanci—xikombiso xa le Bibeleni xa nyimpi. (Swivuriso 21:31) Nhlavutelo 6:2 yi ri: “Waswivo, ku humelela hanci yo basa; ehenhla ka yona a ku tshame un’wana a ri ni vurha; hiloko a nyikiwa harhi, a huma a ri karhi a hlula, ni ku hetisa ku hlula ka yena.” Ku tlula kwalaho, mupisalema Davhida u tsarile malunghana na Yesu a ku: “Nhonga ya ntamu wa wena Yehovha u ta yi humesa eSiyoni, a ku: ‘Famba u ya hlula exikarhi ka valala va wena.’”—Pisalema 110:2.
JULY 14-20
LESWI HI SWI DYONDZAKA EBIBELENI SWIVURISO 22
Misinya Ya Milawu Ya Vutlhari Leyi U Nga Yi Tirhisaka Loko U Kurisa Vana
Xana Vana Va Wena Va Ta Tirhela Xikwembu Niloko Se Va Kurile?
7 Loko mi catile naswona mi lava ku va ni vana tivutiseni leswi: ‘Xana hi vanhu lava rhandzaka Yehovha lerova a nga hi hlawula leswaku hi kurisa n’wana?’ (Ps. 127:3, 4) Loko u ri mutswari, tivutise: ‘Xana ndza va dyondzisa vana va mina mitirho?’ (Ekl. 3:12, 13) ‘Xana ndza va letela vana va mina ku tisirhelela eka mahanyelo yo biha lawa va nga ha langutanaka na wona?’ (Swiv. 22:3) A wu nge swi koti ku sirhelela vana va wena eka mitlhontlho hinkwayo. Sweswo a swi koteki. Kambe u nga swi kota ku va letela ni ku va hlomisa leswaku va titshega hi Rito ra Xikwembu loko va langutana ni mitlhontlho. (Hlaya Swivuriso 2:1-6.) Hi xikombiso, loko xaka ri tshika ku tirhela Yehovha, pfuna vana va wena hi ku tirhisa Rito ra Xikwembu va tiva leswaku hikwalahokayini swi ri swa nkoka ku tshama va tshembekile eka Yehovha. (Ps. 31:23) Loko mi loveriwa, komba vana va wena ndlela leyi Rito ra Xikwembu ri nga va chavelelaka hayona.—2 Kor. 1:3, 4; 2 Tim. 3:16.
Vatswari Letelani Vana Va N’wina Leswaku Va Rhandza Yehovha
17 Sungula ku letela vana va ha ri vatsongo. Loko vatswari va sungula ku letela vana va ha ri vatsongo swa pfuna swinene. (Swiv. 22:6) Ehleketa hi Timotiya, loyi hi ku famba ka nkarhi a fambafambeke na muapostola Pawulo. Mana wakwe Yunisi ni kokwa wakwe Luwisa, va sungule ku n’wi letela a ha ri “ricece.”—2 Tim. 1:5; 3:15.
18 Vatekani van’wana va le Côte d’Ivoire, ku nga Jean-Claude na Peace, va kote ku kurisa vana va vona va tsevu hinkwavo leswaku va rhandza Yehovha va tlhela va n’wi tirhela. I yini lexi va pfuneke va kota ku endla tano? Va tekelele Yunisi na Luwisa. Va ri: “Loko vana va hina va ha ku velekiwa, hi sungule ku va dyondzisa Rito ra Xikwembu va ha ri tincece.”—Det. 6:6, 7.
19 Swi vula yini ku “dyondzisa” vana va wena Rito ra Yehovha? Ku “dyondzisa” swi vula ku “letela ni ku tsundzuxa hi ku phindhaphindha.” Leswaku vatswari va kota ku endla leswi, nkarhi ni nkarhi va fanele va tinyika nkarhi wo tshama ni vana va vona. Mikarhi yin’wana swi nga vonaka swi heta matimba ku tshamela ku tsundzuxa vana xilo xin’we. Kambe vatswari va ta teka leswi tanihi ndlela yo pfuna vana va vona leswaku va twisisa ni ku hanya hi Rito ra Xikwembu.
Vatswari—Vanani Xikombiso Lexinene Eka Vana Va N’wina
Entiyisweni vana va tikhoma hi ndlela ya vun’wana naswona van’wana va ome tinhloko, va tseme mibya. (Genesa 8:21) Xana vatswari va nga endla yini? Bibele yi ri: “Vuphukuphuku byi tsimbiwe embilwini ya mufana; nhonga ya ndzayo hi yona yi nga ta byi susa byi ya ekule na yena.” (Swivuriso 22:15) Van’wana va teka ndzayo yo tano yi ri leyi tikaka ni leyi hundzeriweke hi nkarhi. Entiyisweni, Bibele yi sola madzolonga ni muxaka wun’wana ni wun’wana wa tihanyi. Hambileswi minkarhi yin’wana “nhonga” yi vulaka ku xupula hi xiviri, kahle-kahle yi vula vulawuri bya vatswari lebyi tiyeke kambe bya rirhandzu, lebyi va byi tirhisaka hi mfanelo hileswi va khumbekaka hi vuhlayiseki bya vana va vona.—Vaheveru 12:7-11.
Endla Ndzavisiso
Tsaka Hi Leswi U Kotaka Ku Swi Endlela Yehovha Sweswi
11 Hilaha ku fanaka, na hina hi nga endla tano hi ku tirha hi matimba leswaku hi endla ntirho lowu Yehovha a hi nyikeke wona. Tiyimisele ku “khomeka ngopfu” entirhweni wo chumayela ni ku tirha hi matimba eka mitirho leyi endliwaka evandlheni. (Mit. 18:5; Hev. 10:24, 25) Lunghiselela leswaku u ta nyikela tinhlamulo leti akaka loko u ya etinhlengeletanweni ta vandlha. Yi teke yi ri ya nkoka mitirho leyi u nyikiweke yona etinhlengeletanweni ta vandlha ta le xikarhi ka vhiki. Loko u komberiwe ku pfuna hi mitirho yo karhi evandlheni, fika ka ha ri ni nkarhi u tlhela u yi endla kahle mitirho ya wena. U nga yi tekeli ehansi mitirho leyi u nyikiweke yona. Tikarhatele ku antswisa vuswikoti bya wena. (Swiv. 22:29) Loko u tinyiketela ku tirhela Yehovha, u ta va ni vuxaka lebyinene na yena naswona u ta va ni ntsako. (Gal. 6:4) Nakambe swi ta ku olovela ku tsaka ni van’wana loko va kuma vutihlamuleri lebyi na wena a wu navela ku byi kuma. I yini swin’wana leswi u nga tsakelaka ku swi fikelela.—Rhom. 12:15; Gal. 5:26.
JULY 21-27
LESWI HI SWI DYONDZAKA EBIBELENI SWIVURISO 23
Misinya Ya Milawu Ya Vutlhari Ya Ma Tirhiselo Ya Byala
Vana Ni Langutelo Leri Faneleke Hi Swakunwa Swa Xihoko
5 Ku vuriwa yini loko munhu a kukutlela byala kambe a va ni vukheta leswaku a nga nwi ku fikela laha swi voniwaka hi mani na mani leswaku se byi n’wi hahele ematihlweni? Van’wana a va tikombi leswaku va pyopyiwile ni loko va nwe swikalo swo hlayanyana. Kambe ku anakanya leswaku mukhuva wo tano a wu na khombo i ku tixisa. (Yeremiya 17:9) Hakatsongo-tsongo munhu a nga godzomberiwa hi byala kutani a va “[hlonga ra] vhinyo yo tala.” (Tito 2:3) Malunghana ni swilo leswi yisaka eku godzomberiweni hi byala, mutsari la vuriwaka Caroline Knapp u ri: “Swi endleka hakatsongo-tsongo hi ndlela leyi tumbeleke.” Ku nwa ku tlula mpimo i xirimbana lexi nga ni khombo swinene!
6 Nakambe xiya xilemukiso xa Yesu: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu. Hikuva ri ta wela hinkwavo lava tshamaka emisaveni hinkwayo.” (Luka 21:34, 35) Munhu a nga khudzehela ni ku ngheniwa hi vulolo bya xiviri ni bya moya hambiloko a nga nwanga a dakwa. Ku vuriwa yini loko siku ra Yehovha ri n’wi fikela a ri exiyin’weni xo tano?
it-1 E 656
Vudakwa
Byi Yirisiwile eBibeleni. Bibele yi yirisa ku nwa xihoko ku tlula mpimo. Mutsari wa Swivuriso wo tlhariha u swi veka erivaleni swi ta ndzhaku swa ku nwa ngopfu xihoko. U ri: “I vamani lava nga ni khombo? I vamani lava karhatekaka? I vamani lava nga ni timholovo? I vamani lava vilelaka? I vamani lava nga ni timbanga ku nga ri na xivangelo? I vamani lava nga voniki kahle? Hi lava hetaka nkarhi wo tala va ri karhi va nwa vhinyo; lava lavisisaka vhinyo leyi pfanganisiweke. U nga yi languti vhinyo yo tshwuka, loko yi ri karhi yi vangama exinwelweni” [loko vhinyo yi koka rinoko, yi humesa swimbyarumbyaru], kutani yi rhelela kahle [enkolweni]. “Hikuva eku heteleleni yi luma ku fana ni nyoka, naswona yi humesa vuxungu ku fana ni mhiri” [yi nga endla munhu a vabya (hi xikombiso, yi nga n’wi vangela mavabyi ya xivindzi) ni mavabyi ya miehleketo (lama endlaka munhu a rhurhumela), naswona yi nga n’wi dlaya]. Matihlo ya wena ma ta vona swilo leswi nga tolovelekangiki [byala byi kota ku lawula byongo leswi endlaka leswaku munhu a vona swilo leswi nga vonakiki ni ku kota ku vulavula mitokoto yo hlamarisa hi ndlela leyi twalaka swinene ni ku kombisa mahanyelo yo biha a nga chavi nchumu], naswona mbilu ya wena yi ta vulavula swilo leswi humeke endleleni [u kota ku vula leswi a swi navelaka ni ku swi ehleketa a ntshunxekile].”—Swiv 23:29-33; Hs 4:11; Mt 15:18, 19.
Mutsari u ya emahlweni a vulavula hi leswi xidakwa xi langutanaka na swona, u ri: “Kutani u ta fana ni munhu loyi a etleleke exikarhi ka lwandle [a twa onge wo nwela, endzhaku a nga ha twi nchumu], ku fana ni munhu loyi a etleleke ehenhla ka maseyila ya xikepe [hilaha xikepe xi vonakaka onge xi famba kahle, vutomi bya xidakwa na byona byi vonaka byi ri byinene kambe byi va byi ri ekhombyeni hikuva xi nga khomiwa hi vuvabyi byo oma swirho, xi va ni madzolonga ni swin’wana]. ‘Va ndzi bile kambe a ndzi twanga nchumu; va ndzi bile kambe a ndza ha swi tsundzuki [ku vula xidakwa xi ri karhi xi vulavula xi ri xoxe; xi nga swi tsundzuki leswi a swi humelela ni nxupulo lowu xi wu kumeke]. Ndzi ta pfuka rini? Ndzi lava yin’wana, [sweswi u fanele a etlela hikwalaho ka vuyelo byo nwa ku tlula mpimo, kambe leswi a nga hlonga ra byala u swi langutele emahlweni ku nwa nakambe loko swi koteka].’” Loko a heta nkarhi wo tala a ri karhi a nwa byala u ta hetelela a va xisiwana, a nga tshembeki ni ku va a nga swi koti ku titirhela.—Swiv 23:20, 21, 34, 35.
Endla Ndzavisiso
Swivutiso Swa Vahlayi
Hi xikombiso, ku nyuhela ku nga kombisa makolo, kambe hayi eka vanhu hinkwavo. Mavabyi ma nga endla leswaku munhu a nyuhela. Swilo swa xitekela swi nga va swin’wana swa swilo leswi endlaka leswaku munhu a nyuhela. Nakambe hi fanele hi tsundzuka leswaku ku nyuhela i xiyimo xa miri, kambe makolo i xiyimo xa mianakanyo. Ku nyuhela ku hlamuseriwa tanihi “miri lowu taleriweke hi mafurha,” kasi makolo i “ku dya hi ndlela ya makwanga kumbe leyi hundzeletiweke.” Xisweswo, makolo a ma voniwi hi xiyimo xa miri kambe hi langutelo ra munhu hi swakudya. Munhu a nga ha va a nga nyuhelanga kumbe a ondzile, kambe a ri ni makolo. Ku tlula kwalaho, leswaku miri wu va lowu ringaneleke ni lowu nga ni xivumbeko lexinene loko swi te yini, swi langutiwa hi ndlela leyi hambaneke hi ku ya hi tindhawu.
JULY 28–AUGUST 3
LESWI HI SWI DYONDZAKA EBIBELENI SWIVURISO 24
Tshama U Lunghekele Swiyimo Swo Tika
it-2 E 610 ¶8
Nxaniso
Vakreste va yi langutele hi mahlongati hakelo leyi nga ta kumiwa hi lava va tiyiselaka. Mayelana ni vuyelo lebyi, Yesu u te: “Va tsaka lava xanisiweke hikwalaho ka leswo lulama, hikuva Mfumo wa matilo i wa vona.” (Mt 5:10) Ku tiva hi ntshembo wa ku pfuxiwa ka vafi ni ku tiva Loyi a nga ni Matimba yo swi endla swa va tiyisa. Swi va nyika matimba yo ya emahlweni va tshembeka eka Xikwembu hambiloko va xungetiwa hi rifu hi vaxanisi lava nga ni tihanyi. Hikwalaho ka ripfumelo leri va nga na rona eka leswi rifu ra Yesu ri swi hetisiseke, va ntshunxiwile eka ku chava rifu ra tihanyi. (Hv 2:14, 15) Langutelo ra Mukreste i ra nkoka ngopfu leswaku a ta kota ku tshama a tshembekile loko a langutane ni ntshikilelo wo kanetiwa. “Vanani ni mianakanyo yo fana ni ya Kreste Yesu, loyi . . . a yingis[eke] ku ya fika eku feni, u fele emhandzini ya nxaniso.” (Flp 2:5-8) “Hikwalaho ka ntsako lowu a wu vekiwe emahlweni ka [Yesu] u tiyisele mhandzi ya nxaniso, a nga vanga na mhaka loko a khomisiwa tingana.”—Hv 12:2; nakambe vona 2Ko 12:10; 2Te 1:4; 1Pe 2:21-23.
Tshama U Tsakile Hambiloko U Ri Ni Swiphiqo
12 Swivuriso 24:10 yi ri: “Xana u tikombise u hele matimba hi siku ra maxangu? Matimba ya wena ma ta va matsongo.” Xivuriso xin’wana xi ri: “Moya wa tshoveka hikwalaho ka ku vava ka mbilu.” (Swiv. 15:13) Vakreste van’wana va hele matimba lerova va kala va tshika ku hlaya Bibele ni ku anakanyisisa hi Rito ra Xikwembu. Swikhongelo swa vona swo va swa ku hetisa nawu ntsena, naswona va nga ha tihambanisa ni vagandzeri-kulobye. Swi le rivaleni leswaku ku tshama u ri ni gome swi nga va ni khombo.—Swiv. 18:1, 14.
13 Hi hala tlhelo, langutelo lerinene ri ta hi pfuna leswaku hi dzika eka swilo leswi nga hi tiselaka ntsako evuton’wini. Davhida u tsarile: “Oho Xikwembu xanga, ndzi tsakisiwe hi ku endla ku rhandza ka wena.” (Ps. 40:8) Loko swilo swi nga fambi kahle evuton’wini bya hina, a hi fanelanga hi tshika xiyimiso lexinene xa vugandzeri bya hina. Entiyisweni, ndlela leyinene yo lwisana ni gome i ku endla mintirho leyi tisaka ntsako. Yehovha u hi byela leswaku hi nga kuma ntsako hi ku hlaya Rito ra yena ni hi ku ri kambisisa nkarhi ni nkarhi. (Ps. 1:1, 2; Yak. 1:25) EMatsalweni yo Kwetsima ni le minhlanganweni ya Vukreste, hi kuma “marito lamanene” lama nga hi khutazaka ma tlhela ma tsakisa timbilu ta hina.—Swiv. 12:25; 16:24.
Swivutiso Swa Vahlayi
Swivuriso 24:16 yi ri: “Lowo lulama a nga ha wa ka nkombo kambe u ta tlhela a pfuka.” Xana yi vulavula hi munhu loyi a tshamelaka ku endla xidyoho kutani a rivaleriwa hi Xikwembu?
Ndzimana leyi a yi vuli swona sweswo. Kurinasweswo, yi vulavula hi munhu loyi a tshamelaka ku langutana ni maxangu kambe a kotaka ku tiyisela
Ematshanweni yo vulavula hi “ku wa,” ku nga ku endla xidyoho, Swivuriso 2:16, yi vulavula hi ku langutana ni swiphiqo kumbe swiyimo swo tika, ku nga ha va hi ku phindhaphindha. Emisaveni leyi yo homboloka, munhu wo lulama a nga langutana ni swiphiqo swa rihanyo kumbe swiphiqo swin’wana swa vutomi. A nga tlhela a xanisiwa swinene hi mfumo. Kambe a nga tshemba leswaku Xikwembu xi ta n’wi seketela naswona xi ta n’wi pfuna a kota ku tiyisela ni ku hlula ndzingo wolowo. Tivutise, ‘Xana a ndzi si tshama ndzi swi xiya leswaku mikarhi yo tala vanhu va Xikwembu va humelela?’ Hikwalahokayini? Ha tiyiseka leswaku “Yehovha u seketela hinkwavo lava waka, naswona u yimisa hinkwavo lava khinsameke.”—Ps. 41:1-3; 145:14-19.
Endla Ndzavisiso
Swivutiso Swa Vahlayi
Eminkarhini ya Bibele, loko wanuna a lava ku “aka vandyangu wa [yena],” kumbe ku sungula ndyangu hi ku teka nsati a a fanele a tivutisa xivutiso lexi nge, ‘Xana ndzi swi lunghekerile ku khathalela ni ku hlayisa nsati swin’we ni vana lava hi nga ha vaka na vona?’ Loko a nga si sungula ndyangu, a ku ri ni ntirho lowu a a fanele a wu endla, wa ku khathalela masimu ni ntshovelo. Hikwalaho, Bibele ya Mahungu Lamanene yi hundzuluxele ndzimana leyi yi ku: “Rhanga u dyondza ku ti tirhela, u lulamisa ni masimu ya wena, hi kona u nga ta aka muti.” Xana nawu lowu wa ha tirha ninamuntlha?
Ina. Wanuna loyi a lavaka ku teka nsati u fanele a byi lunghekela kahle vutihlamuleri byebyo. Loko rihanyo ra yena ri n’wi pfumelela, u fanele a tirha leswaku a wundla ndyangu wa yena. Entiyisweni, loko a endla tano u ta swi kota ku wu khathalela hi swilo leswi vonakaka. Rito ra Xikwembu ri kombisa leswaku wanuna loyi a nga riki na mhaka ni ndyangu wa yena, a nga khathaliki hi ndlela leyi wu titwaka ha yona naswona a nga wu hlayisiki hi tlhelo ra moya u bihe ngopfu ku tlula munhu la nga riki na ripfumelo! (1 Tim. 5:8) Ku tlula kwalaho, loko jaha ri lava ku va ni ndyangu ri fanele ri tivutisa swivutiso leswi landzelaka: ‘Xana ndzi swi lunghekerile hakunene ku wundla ndyangu? Xana ndzi swi lunghekerile ku rhangela ndyangu wa mina loko swi ta etimhakeni ta vugandzeri? Xana ndzi ta byi hetisisa vutihlamuleri bya mina bya ku fambisa dyondzo ya Bibele nkarhi na nkarhi ni ndyangu wa mina?’ Rito ra Xikwembu ri kandziyisa vutihlamuleri lebyi bya nkoka swinene.—Det. 6:6-8; Efe. 6:4.
Hikwalaho, jaha leri lavaka nsati ri fanele ri ehleketisisa kahle hi nawu lowu kumekaka eka Swivuriso 24:27. Hilaha ku fanaka, ni wanhwana u ta va a endla kahle ku tivutisa loko a byi lunghekerile vutihlamuleri bya ku tekiwa kumbe ku va mutswari. Mpatswa lowu wa ha ku tekanaka wu nga ha tivutisa swivutiso leswi fanaka loko wu ehleketa hi ku kurisa vana. (Luka 14:28) Ku landzela nawu wolowo lowu huhuteriweke swi nga pfuna vanhu va Xikwembu leswaku va papalata ku vilela ngopfu naswona va tiphina hi vutomi bya ndyangu lebyi tsakisaka.
AUGUST 4-10
LESWI HI SWI DYONDZAKA EBIBELENI SWIVURISO 25
Misinya Ya Milawu Ya Vutlhari Leyi U Nga Yi Tirhisaka Loko U Vulavula
Ri Tirhise Kahle Ririmi Ra Wena
6 Ha yini swi ri swa nkoka ku hlawula nkarhi lowunene wo vulavula? Swivuriso 25:11 yi ri: “Rito leri vuriweke hi nkarhi wa kona ri fana ni maapula ya nsuku exibyeni xa silivhere.” Maapula ya nsuku ma sasekile, kambe ma saseke swinene loko ma ri exibyeni xa silivhere. Hilaha ku fanaka, hi nga ha va hi ri ni mhaka leyi khutazaka yo yi byela van’wana. Kambe loko hi hlawula nkarhi lowunene wo vulavula, hi nga ha n’wi pfuna swinene munhu loyi hi nga ta n’wi byela yona. Hi nga swi endla njhani leswi?
7 Loko hi nga vulavuli hi nkarhi lowunene, vanhu a va nge swi twisisi kumbe a va nge swi amukeli leswi hi va byelaka swona. (Hlaya Swivuriso 15:23.) Hi xikombiso, ku tsekatseka ka misava ni tsunami swi hlasele madoroba yo tala ya le vuxeni bya Japani hi March 2011. Ku fe vanhu vo tlula 15 000. Hambileswi Timbhoni ta Yehovha to tala ti feriweke hi swirho swa mindyangu ya tona ni vanghana, a ti lava ku tirhisa Bibele leswaku ti chavelela lava a va ri eka xiyimo lexi fanaka ni xa tona. Kambe a ti swi tiva leswaku vo tala va vanhu lava a va ri Mabudha naswona a va nga tivi swo tala hi Bibele. Hikwalaho, ematshan’weni yo va byela hi ku pfuka ka vafi hi nkarhi wolowo, vamakwerhu lava va va chavelerile ni ku tlhela va va hlamusela leswi endlaka leswaku swilo swo tano swo biha swi humelela vanhu lavanene.
Ri Tirhise Kahle Ririmi Ra Wena
15 Ndlela leyi hi vulavulaka ni vanhu van’wana ha yona i ya nkoka ku katsa ni leswi hi nga ta swi vula. Vanhu a va tsakela ku yingisela Yesu hileswi a a vulavula na vona hi “tintswalo,” kumbe hi musa. (Luka 4:22) Loko hi vulavula hi musa, vanhu va ta tsakela ku hi yingisela ni ku amukela leswi hi swi vulaka. (Swivuriso 25:15) Hi ta swi kota ku vulavula ni van’wana hi musa loko hi va xixima ni loko hi khathala hi ndlela leyi va titwaka ha yona. Yesu u endle tano. Hi xikombiso, loko a vona mintshungu yi endla matshalatshala yo n’wi yingisela, a a swi tsakela ku heta nkarhi na yona a yi dyondzisa. (Marka 6:34) Hambiloko vanhu va n’wi tseketsela, Yesu a nga va tseketselanga.—1 Petro 2:23.
16 Hambileswi hi rhandzaka vandyangu ni vanghana va hina, hi nga ha vulavula na vona hi marito lama tlhavaka hileswi hi va tivaka kahle. Hi nga ha tibyela leswaku a swi kali swi lava leswaku hi anakanya hi ndlela leyi hi faneleke hi vulavula na vona ha yona. Kambe Yesu a nga ma tirhisanga marito yo tlhava loko a vulavula ni vanghana va yena. Loko vadyondzisiwa wakwe va phikizana hi leswaku i mani lonkulu, u va lulamise hi ndlela leyinene a tlhela a tirhisa xikombiso xa n’wana leswaku a va pfuna va cinca ndlela leyi a va anakanya ha yona. (Marka 9:33-37) Vakulu va nga tekelela xikombiso xa Yesu hi ku nyika van’wana ndzayo hi ndlela leyinene.—Vagalatiya 6:1.
Ku Pfuxana eRirhandzwini Ni Le Mintirhweni Leyinene—Njhani?
8 Loko hi tirhela Xikwembu xa hina, hinkwerhu hi nga tiyisana hi ku veka xikombiso lexinene. Yesu hakunene a a tiyisa vayingiseri vakwe. A a rhandza ntirho wa vutirheli bya Vukreste naswona a a xixima vutirheli. U vule leswaku a byi fana ni swakudya eka yena. (Yohane 4:34; Varhoma 11:13) Ku hiseka ko tano ku nga tlulela ni le ka van’wana. Xana na wena u nga kombisa ntsako wa wena evutirhelini hi laha ku fanaka? U ri karhi u papalata ku vulavula hi ku tikukumuxa, rungulela van’wana evandlheni mintokoto ya wena leyinene. Loko u rhamba van’wana leswaku va tirha na wena, kuma ndlela ya ku va pfuna leswaku va kuma ntsako wa xiviri hi ku vulavula ni van’wana malunghana ni Muvumbi wa hina Lonkulu, Yehovha.—Swivuriso 25:25.
Endla Ndzavisiso
it-2 E 399
Ku Va La Rhuleke
Munhu loyi a kotaka ku va la rhuleke hambiloko a langutane ni swiyimo swo tika, u swi kota hikwalaho ka leswi a nga ni ripfumelo ni hi leswi a kumaka matimba yo tiyisela kun’wana. A nga ndlengandlengisiwi kumbe ku hlundzukisiwa hi ku olova. Kasi munhu loko a nga swi koti ku va la rhuleke hi mikarhi yo tika, swi ta endla leswaku a nga titshembi, a pfilunganyeka, a yingayinga a heleriwa hi ripfumelo ni ntshembo. Munhu loyi a nga riki wo rhula u hlamuseriwe eka swivuriso leswaku i: “Munhu la nga swi kotiki ku lawula ku hlundzuka kakwe, u fana ni muti lowu khumbi ra wona ri mbundzumuxiweke.” (Swiv 25:28) Swa n’wi olovela ku ehleketa hi swilo swo biha leswi nga ha n’wi susumetelaka ku va a endla leswi nga riki swinene.
AUGUST 11-17
LESWI HI SWI DYONDZAKA EBIBELENI SWIVURISO 26
Fambela eKule Ni “Xiphukuphuku”
it-2 E 729 ¶6
Mpfula
Tinguva. ETikweni leri Tshembisiweke a ku ri na tinguva timbirhi leti a ti tekiwa ti ri ta nkoka swinene, ku nga ximumu na xixika naswona a ti tlhela ti vitaniwa nguva leyi nga riki na mpfula ni nguva ya mpfula. (Ringanisa na Ps 32:4; Ris 2:11, nhlamuselo ya le hansi.) Ku sukela exikarhi ka April ku ya fikela exikarhi ka October ku va na mpfula yitsongo. Mpfula ya kala hi nkarhi lowu wa ku sungula ka ntshovelo. Swivuriso 26:1 yi kombisa leswaku mpfula a yi nga tolovelekanga hi nkarhi wa ntshovelo. (Ringanisa na 1Sa 12:17-19.) Hi nguva ya mpfula, mpfula a yi tshameli ku na mikarhi hinkwayo. Leswi hi nguva yoleyo ku vaka ku titimela, loko wo ti kuma u ri empfuleni yi ta ku titimeta. (Ezr 10:9, 13) Hikwalaho, ku va ni ndhawu yo tifihla leyi kufumelaka swi va swi ri swinene.—Esa 4:6; 25:4; 32:2; Yb 24:8.
Ku Laya Ku Veka Mihandzu Ya Ku Rhula
12 Eka vanhu van’wana magoza yo vavisa swinene ya nga ha laveka, hi laha Swivuriso 26:3 yi kombaka ha kona: “Nkharisa wu fanele hantši, ni tomo e mbongolo, ni nhonga e nhlana wa šihunguki.” Hi makhamba man’wana Yehova u tshike tiko rakwe ra Israyele ri hluriwa hi swiphiqo leswi va tivangeleke swona: “Hikwalaho ka ku tiarisa ka v̌ona e timhakeni ta Šikwembu, loko v̌a sanḍa ku ṭunḍuša ka Muungameri wa le henhla, a ṭongahata timbilu ta v̌ona hi ku v̌a v̌av̌isa; V̌a tikeriwa, v̌a nga pfuniwi hi munhu. Kav̌a loko v̌a huwelela ka Yehova e mapfalweni ya v̌ona, kutani a v̌a ponisa e ku ṭanḍekeni ka v̌ona.” (Psalma 107:11-13) Van’wana vo rivala, hambi swi ri tano, va tinonon’hwisa ku fikela laha ku nga hava ndzayo yo hanyisa leyi nga swi kotaka: “Munhu l’a fanelaka hi ku tshinyiwa, kutani a nonoṅhwisa nhamu, o ta ṭhov̌eka kaṅwe-kaṅwe, a ku nga ri na muri wo ṅwi dyaha.”—Swivuriso 29:1.
it-2 E 191 ¶4
Xilema
Ndlela leyi mutsari wa Swivuriso a tirhiseke rito leri hayona. Hosi Solomoni wo tlhariha u te: “Loyi a tamerisaka xiphukuphuku timhaka u fana ni munhu loyi a titsemaka milenge kutani a tivavisa [leswi nga n’wi endlaka xilema].” I ntiyiso leswaku loko munhu a nyika xiphukuphuku ntirho swi fana ni loko a tivavisa. U fanele a swi tiva leswaku ntirho wa yena a wu nge fambi kahle naswona sweswo swi ta n’wi vavisa.—Swiv 26:6.
Endla Ndzavisiso
it-1 E 846
Xiphukuphuku
Ku hlamula xiphukuphuku “hi ku ya hi vuphukuphuku bya xona” swi nga endla leswaku u hetelela u fana na xona. Leswaku hi nga fani ni xiphukuphuku, swivuriso yi hi byela leswi: “U nga hlamuli xiphukuphuku hi ku ya hi vuphukuphuku bya xona.” Hi hala tlhelo, Swivuriso 26:4, 5 yi kombisa leswaku loko hi xi hlamula “hi ku ya hi vuphukuphuku bya xona” hi swi endla hi xikongomelo xo xi pfuna ku vona leswaku swiendlo swa xona swi hoxile naswona swi xi endla xiphukuphuku.
AUGUST 18-24
LESWI HI SWI DYONDZAKA EBIBELENI SWIVURISO 27
Leswi Hi Vuyeriwaka Hi Swona Loko Hi Ri Ni Vanghana Va Ntiyiso
Yehovha U Ma Teka Ma Ri Ya Risima Malandza Yakwe Lama Titsongahataka
Munhu wa ku titsongahata wa tlangela loko a tsundzuxiwa. Hi xikombiso: A hi nge u le tidyondzweni naswona endzhaku ko vulavula ni vamakwerhu vo hlaya, un’wana wa vona u ku kokela etlhelo kutani a ku byela leswaku ku namarhele swakudya emenweni ya wena. Swi nga ha ku khomisa tingana sweswo. Kambe a swi kanakanisi leswaku u ta n’wi khensa hi leswi a ku byeleke. Entiyisweni u nga ha navela onge loko un’wana a ku byele khale! Hilaha ku fanaka, hi ku titsongahata hi fanele hi tlangela loko makwerhu wo karhi a kanya xivindzi a hi nyika ndzayo. Swi vula leswaku makwerhu yoloye i munghana wa xiviri, ku nga ri nala wa hina.—Hlaya Swivuriso 27:5, 6; Gal. 4:16.
it-2 E 491 ¶3
Muakelani
Hambiswiritano, ku va ni munghana loyi u n’wi tshembaka, loyi u tsutsumelaka eka yena hi nkarhi wa maxangu, hi loyi Swivuriso yi vulavulaka ha yena loko yi ku: “U nga n’wi rivali munghana wa wena kumbe wa tata wa wena, naswona u nga ngheni endlwini ya makwenu hi siku ra wena ra khombo. Wa antswa muakelani [sha·khenʹ] la nga ekusuhi ku tlula makwenu loyi a nga le kule.” (Swiv 27:10) Laha mutsari a ringeta ku vula leswaku munghana wa le kusuhi i wa nkoka naswona u fanele u ya eka yena loko u lava mpfuno ematshan’weni ya xaka ra le kusuhi ku fana ni makwenu, hikuva loko a ri ekule na wena swi nga tika ku va a ku pfuna hi ndlela leyi munghana a nga ku pfunaka hayona.
Vantshwa, Xana Mi Ta Va Vanhu Va Njhani Loko Mi Kula?
7 Dyondzo yin’wana leyi hi yi kumaka eka xiboho xo biha xa Yehowaxi, i ya leswaku hi fanele hi hlawula vanghana lava nga ta hi kucetela ku endla leswinene, ku nga vanghana lava rhandzaka Yehovha ni lava lavaka ku n’wi tsakisa. A swi bohi leswaku hi va vanghana va tintangha ta hina ntsena. Tsundzuka leswaku Yehowaxi a a ri ntsongo swinene eka munghana wakwe Yoyada. Loko swi ta eka ku hlawula vanghana, tivutise leswi: ‘Xana vanghana lava, va ndzi pfuna leswaku ndzi va ni ripfumelo leri tiyeke eka Yehovha? Xana va ndzi khutaza leswaku ndzi hanya hi milawu ya Xikwembu? Xana va vulavula hi Yehovha ni hi swilo leswi hi swi dyondzaka eka nhlangano wakwe? Xana va yi xixima milawu ya Xikwembu? Xana va ndzi byela ntsena leswi ndzi lavaka ku swi twa kumbe a va chavi ku ndzi tsundzuxa loko ndzi nga swi endli kahle swilo?’ (Swiv. 27:5, 6, 17) Loko vanghana va wena va nga n’wi rhandzi Yehovha, fambela ekule na vona. Kambe loko u ri ni vanghana lava rhandzaka Yehovha, va namarhele, va ta ku pfuna.—Swiv. 13:20.
Endla Ndzavisiso
Tinhla-nkulu Ta Buku Ya Swivuriso
27:21. Ku dzunisa ka hina ku nga paluxa leswi hi nga swona. Ku titsongahata ku vonaka loko ku dzunisa ka hina ku hi susumetela ku tsundzuka leswaku hi ni xikweleti eka Yehovha naswona ku hi khutaza leswaku hi hambeta hi n’wi tirhela. Loko hi nga titsongahati swi ta vonaka loko ku dzunisa ka hina ku hi susumetela ku titwa hi ri lava tlakukeke.
AUGUST 25-31
LESWI HI SWI DYONDZAKA EBIBELENI SWIVURISO 28
Ku Hambana Exikarhi Ka Munhu Wo Homboloka Ni Wo Lulama
Xana U Landzela Yehovha Hi Laha Ku Heleleke?
“LO’WO lulama o ṭakile kukota šinghalana.” (Swivuriso 28:1) Va kombisa ripfumelo, hi ku tiyiseka va titshega hi Rito ra Xikwembu, naswona va ya emahlweni ni ntirho wa Yehovha hi vurhena, ku nga khathariseki khombo leri va nga ha langutanaka na rona.
it-2 E 1139 ¶3
Ku Twisisa
Lava balekelaka ku yingisa Xikwembu. Munhu loyi a balekelaka ku yingisa Xikwembu u sungula ku nga ha yi kambisisi milawu ya Xona loko a endla swiboho ni loko a kunguhata swo karhi. (Yobo 34:27) Munhu wo tano u pfumelela mbilu yakwe yi n’wi pfala matihlo, a nga ha swi voni swiendlo swakwe leswi hoxeke naswona sweswo swi endla a lahlekeriwa hi vuswikoti byo twisisa. (Ps 36:1-4) Hambiloko a endla onge u gandzela Xikwembu, u rhangisa vonelo ra vanhu ematshan’weni ya milawu ya Xona. (Esa 29:13, 14) Wa tiyimelela eka matikhomelo yakwe lama nga riki manene, a tibyela leswaku ko va ku ‘tlanga’ (Swiv 10:23) u tshova nawu, a hanya tanihi xiharhi, miehleketo yakwe i ya vuphukuphuku lero u ehleketa leswaku Xikwembu lexi nga vonakiki, a xi swi voni swilo swo biha leswi a swi endlaka, onge hi loko Xi tsandzeka ku vona swiendlo swakwe. (Ps 94:4-10; Esa 29:15, 16; Yr 10:21) Ndlela leyi a endlaka swilo hayona ni matikhomelo yakwe swi fana ni loko a ku “Yehovha a nga kona” (Ps 14:1-3) kutani a n’wi susa ‘embilwini yakwe.’ Loko a nga kongomisiwi hi misinya ya milawu ya Xikwembu, a nge swi koti ku avanyisa ni ku vona timhaka hi ndlela leyinene ni ku kambisisa swivangelo kutani a fikelela swiboho leswinene.—Swiv 28:5.
it-1 E 1211 ¶4
Ku Tshembeka
Hi nga swi kota ku tshembeka loko hi nga titshegi hi matimba ya hina kambe loko ntsena hi ri ni ripfumelo leri tiyeke, ku tshemba Yehovha ni le ka matimba Yakwe yo ponisa. (Ps 25:21) Xikwembu xi tshembisa leswaku xi ta va “xitlhangu” ni “khokholo” ni ku sirhelela lava fambaka hi ku tshembeka. (Swiv 2:6-8; 10:29; Ps 41:12) Loko va tirha hi matimba leswaku va tsakeriwa hi Yehovha swi endla leswaku va va ni mahanyelo lamanene, swi va pfuna leswaku va kota ku fikelela swikongomelo swa vona. (Swiv 2:6-8; 10:29; Ps 41:12) Hambileswi hi ku pfilunganyeka Yobo a xiyeke leswaku vanhu lava nga riki na nandzu va xaniseka hikwalaho ka mufumi lowo biha naswona va fa xikan’we na lavo homboloka, Yehovha u tiyisekisa leswaku wa ku vona ku fa ka vanhu lava nga riki na nandzu naswona u tshembisa leswaku vanhu vo tano a va nge rivariwi naswona mitirho ya vona leyinene yi ta sala yi tsundzukiwa hambiloko va nga ha ri kona, va ta va ni vumundzuku byo rhula, va tlhela va tiphina hi mikateko. (Yb 9:20-22; Ps 37:18, 19, 37; 84:11; Swiv 28:10) Hilaha swi veke hakona emhakeni ya Yobo, ku va munhu wo tshembeka, ematshan’weni ya rifuwo, hi swona swi endlaka munhu a va wa nkoka ni ku xiximiwa. (Swiv 19:1; 28:6) Eka vana lava nga ni vatswari vo tano i njombo eka vona naswona va fanele va tsaka (Swiv 20:7), va dyondza eka swikombiso leswinene swa va tata wa vona ni ku vuyeriwa eka ndhuma ya vona leyinene.
Endla Ndzavisiso
U Nga Byi Papalata Vuvabyi Bya Mbilu Hi Tlhelo Ra Moya
Ku tiyiseka ku tlula mpimo. Vanhu vo tala lava khomiweke hi vuvabyi bya mbilu a va tiyiseka ku tlula mpimo hi xiyimo xa vona xa rihanyo loko byi nga si va khoma. Hakanyingi a va nga swi lavi ku ya kamberiwa naswona a va swi teka swi ri ku tlanga hi nkarhi. Hilaha ku fanaka, van’wana va nga anakanya leswaku leswi se swi hlayaka malembe va ri Vakreste, a ku na nchumu lexi nga endlekaka eka vona. Va nga tshika ku tikambela hi tlhelo ra moya ku kondza va fikeriwa hi khombo. I swa nkoka leswaku hi tshama hi ri karhi hi anakanya hi xitsundzuxo lexinene xa ku lwisana ni ku titshemba ku tlula mpimo, lexi vuriweke hi muapostola Pawulo, lexi nge: “Loyi a ehleketaka leswaku u yimile a a tivonele leswaku a nga wi.” I vutlhari ku xiya leswaku a hi hetisekanga kutani hi kambisisa vumoya bya hina nkarhi na nkarhi.—1 Vakorinto 10:12; Swivuriso 28:14.