Wa Tsundzuka Xana?

Xana u nyikele mianakanyo ya vukheta eka minkandziyiso ya sweswinyanana ya Xihondzo xo Rindza? Loko swi ri tano, kumbexana u ta kota ku tsundzuka leswi landzelaka:

◻ Hi le ka mianakanyo yihi leyi ha yona Pawulo a tirhiseke rito “muyimeri” loko a kombetela eka Yesu eka 1 Timotiya 2:5, 6?

Eka ndzimana leyi, Pawulo u tirhisa rito ra Xigriki me·siʹtes eka “muyimeri,” rito leri nga ni nhlamuselo ya le nawini, kutani a nga tirhisi rito leri hi ndlela yo anama leyi tolovelekeke eka tindzimi to tala. Hikwalaho, Pawulo a nga vuli swona leswaku Yesu i Muyimeri exikarhi ka Xikwembu ni vanhu hinkwavo. Ematshan’wini ya sweswo, u kombetela eka Kriste tanihi Muyimeri wa le nawini wa ntwanano lowuntshwa, lowu vekeke xisekelo xa leswaku valandzeri lava totiweke va Kriste va hlangayela na yena eMfun’weni wakwe wa le tilweni. (2 Vakorinto 5:1, 5; Vaefesa 1:13, 14; Vaheveru 8:7-13)—8/15, matluka 30, 31.

◻ Eka Matewu 25:34, Yesu u vula yini eka tinyimpfu tin’wana loko a ku: “Amukelani Mfumo lowu nga lunghiseriwa n’wina hi mpfhuka misava yi tumbuluka?”

Yesu a a nga vuli swona leswaku tinyimpfu leti tin’wana ti ta fuma na yena etilweni. Ematshan’wini ya sweswo, tinyimpfu ti ta dya ndzhaka ya xivandla xa le misaveni xa Mfumo lowu lunghiseriweke vona “hi mpfhuka misava yi tumbuluka” eka vanhu lava kutsulekaka. Hi ndlela leyi va va vana va laha misaveni va Hosi, leyi vaka ‘Tata wa vona la nga Heriki,’ Kriste Yesu. (Esaya 9:6, 7)—9/1, tluka 20.

◻ Xana swi ta va swa nkoka leswaku masalela ya vatotiwa ma va kona emisaveni leswaku ma amukela vanhu vo tshembeka lava pfuxiweke lava feke emahlweni ka 33 C. E. ke?

Doo, a swi nge bohi. Vunyingi bya ntshungu lowukulu lebyi nga ta pona nhlomulo lowukulu sweswi byi karhi byi dyondzisiwa ku khathalela vutihlamuleri bya ku hlela. Hikwalaho, va ta swi kota ku khathalela xiyimo xexo ni ku toloveta lava pfuxiweke “misava leyintswa” ehansi ka “matilo lamantshwa.” (2 Petro 3:13)—9/1, matluka 20, 21.

◻ Hi swihi leswi katsekaka eku kumeni ka ku “ponisiwa”? (Mintirho 16:30)

Xilaveko lexikulu i ku: “Pfumela eka Hosi Yesu, kutani u ta ponisiwa.” (Mintirho 16:31) Leswi swi katsa ku nghenisa vutivi lebyinene bya swikongomelo swa Xikwembu ni ndlela ya xona ya ku ponisa. Kutani ripfumelo ri fanele ri kombisiwa eka Yesu Kriste tanihi Munyiki Lonkulu wa nkutsulo. (Yohane 3:16; Tito 2:14) Leswi swi veka Mukriste eka xiyimo xa ku ponisiwa, kambe sweswi u fanele ku tiyisela eku endleni ka ku rhandza ka Xikwembu kutani a ya emahlweni a namarhela swilaveko hinkwaswo swa Xikwembu evuton’wini bya yena hinkwabyo. Hi kona a nga ta poniseriwa eka vutomi lebyi nga heriki. (Matewu 24:13)—9/15 tluka 7.

◻ Xana ripfumelo ra Nowa ri yi avanyise njhani misava? (Vaheveru 11:7)

Ku yingisa ka Nowa ni swiendlo swa yena swo lulama swi kombise leswaku van’wana handle ka yena ni ndyangu wa yena a va ta va va pone Ndhambi loko a va tiyimiserile ku cinca mahanyelo ya vona. Ku nga khathariseki mintshikilelo leyi humaka eka nyama ya yena leyi nga hetisekangiki, misava leyi n’wi rhendzeleke na Diyavulosi, Nowa u kombise leswaku a swi koteka ku hanya vutomi lebyi tsakisaka Xikwembu.—10/1, tluka 11.

◻ Hikwalaho ka yini hi fanele ku tivonela hambi ku ri eka rihlevo ro olova?

Hi nga vula swo karhi hi nga tiyimiselanga ku khunguvanyisa munhu, kambe ku hleva loku vonakalaka ku nga ri na khombo ku nga ha va xikhunguvanyiso loko ku engetiwa, ku sasekisiwa kumbe ku soholotiwa leswaku ku onha ndhuma ya loyi ku vulavuriwaka hi yena, swi onha vito ra yena lerinene. (Swivuriso 20:19)—10/15, tluka 13.

◻ I mimpfuno yihi leyi nga kona loko vatekani va fana?

Wanuna na wansati va le ka xiyimo xo khutazana eku gandzeleni ka Xikwembu xa vona. Nakambe, va nga ya eMatsalweni ku kuma nkongomiso leswaku va tlhantlha swiphiqo swa vona.—11/1, tluka 20.

◻ Xana Milawu ya Khume yi nga hi pfunisa ku yini namuntlha?

Yi paluxa langutelo ra Yehova hi swilo swo karhi kutani yi tirha tanihi switsundzuxo swa ndzwalo wa hina wo rhandza Xikwembu na muakelani. (Matewu 22:37-39; 2 Timotiya 3:16, 17)—11/15, matluka 5, 6.

◻ Hi le ka swiendlakalo swihi swinharhu laha Xikwembu xi vulavuleke xi ri karhi xi twiwa hi Yesu ni vanhu van’wana?

Xiendlakalo xo sungula a ku ri enkarhini wa ku khuvuriwa ka Yesu hi Yohane Mukhuvuri (Matewu 3:17); xa vumbirhi hi loko Yesu a hundzuriwile emahlweni ka Yakobo, Yohane na Petro (Matewu 17:5); kutani xa vunharhu a ku ri hi Nisan 10, mune wa masiku emahlweni ka rifu ra Yesu, loko rito ra Xikwembu ri twiwe hi ntshungu lowu yimeke etempeleni. (Yohane 12:28)—12/1, tluka 8.