Ngalava Ya Nowa

Hi ku famba ka nkama, misava yi sungule ku tala hi vanhu. Kambe vanhu va vanyingi a va yendla swilo swa ku biha. Phela hambi hi tintsumi tin’wani ti sungule ku yendla minchumu ya ku biha. Ti sukile tilweni ti ta lani misaveni, ti titxintxa ti va vavanuna. Wa swi tiva swaku hi mhaka muni ti yendle leswo? Hi mhaka a ti lava ku chada ni vavasati.

Tintsumi letiyani ti game ti va ni vana. Vana va kona a va ni ntamu wawukulu. Kambe a va nga yendli swaswinene. A va tshamela ku rhuketela, va tlhela va betetela vanhu ni ku va vavisa. Yehovha a game a tisa ndhambi leswaku a helisa vanhu hinkwavu lava a va yendla swilo swa ku biha. Wa swi tiva swaku ndhambi i yini? Ndhambi ku ve mpfula yayikulu leyi nga yendla swaku misava hinkwayu yi tala hi mati.

Kambe lani misaveni a ku ni wanuna lweyi a a rhandza Yehovha. Vito la yena i Nowa. Nowa a a chadile, funtshi a a ni vana vanharhu, ku nga Xemi, Hamu na Yafeti. Vana va Nowa na vona a va chadile. Yehovha a a lava ku ponisa Nowa ni ndjangu wa yena leswaku va nga fi ka Ndhambi. Hi mhaka leyo, a byele Nowa swaku a yaka ngalava. Wa swi tiva swaku i yini ngalava? I kaxa lalikulu la ku yendliwa hi mapulangu, leli a li ta tshama henhla ka mati. Yehovha a tlhele a byela Nowa swaku a peta swiharhi ka ngalava leswaku swi nga fi hi mati ya ndhambi.

Nowa ni ndjangu wa yena va tekele ku sungula ntirho, va yaka ngalava. Vona va yakise xileswi Yehovha a nga va rhumisa xiswona. Naswona va hete kolomuyani ka 50 wa malembe na va yaka ngalava. Ka nkama wolowo, Nowa a a ngo yaka ngalava ntsena, yena a a tlhela a byela vanhu hi ndhambi leyi a yi ta va kona. Kambe a ku vanga ni munhu ni mun’we lweyi a nga kholwa ka leswi Nowa a nga swi vula.

Siku la ku nghena ka ngalava se a li fikile. Wa swi tiva leswi nga gama swi yendleka? Hi ta swi vona ka xitoriya lexi landzelaka.