Jovhem Leli Nga Yingisa Xikwembu

Yosefa a a li mun’we wa vana vavatsongo va Yakobe, funtshi Yakobe a a mu rhandza hintamu. Hi mhaka leyo vamakwavu va yena vavakulu a va ni invheja kumbe wukwele funtshi a va nga mu rhandzi. Siku lin’wani, Yosefa a lorhe minchumu leyi a a nga yi twisisi, a suke a ya byela vamakwavu va yena leswi a nga swi lorha. Kambe vona a va swi tsakelanga leswi a nga swi lorha. Wa swi tiva swaku va pimise yini? Va pimise swaku Yosefa a a lava ku va hosi ya vona. Se va sungule ku mu nyenya hintamu Yosefa.

Siku lin’wani, vamakwavu va Yosefa a va li kule ni kaya na va lusa tinyempfu. Wa swi tiva swaku swi vula yini ku lusa? I ku heleketa swifuyu leswaku swi ya dla byanyi akhwatini. Se Yakobe a kombele swaku a va yela a ya vona swaku va kahle ke? Nkama va nga vona Yosefa na a fika va kwate hintamu va gama va ku:

— Hi lwiyani n’wamilorho wa ta. Kasi hi mhaka muni hi nga mu dlayi?

Se nkama Yosefa a nga fika, va mu khoma va mu txukumetela ka xikhele xa ku yenta na va lava ku mu dlaya. Hi nkama wolowo a ku hundza vavanuna lava a va ya ka tiko la Gibita. Se mun’wani wa vamakwavu va Yosefa ku nga Yuda, a te:

— Swi siza yini ku dlaya Yosefa, swi ngo yini hi mu xavisa a va xikravhu?

Se vamakwavu va Yosefa va mu xavisa hi 20 wa mamoweda. Va gama va teka mpahla ya yena va yi tsakamisa hi ngati swaku swi tikomba ingi a dlayiwile hi xiharhi. Se va teka mpahla ya yena va muka na yona va fika va vutisa Yakobe va ku:

— Indjhe a mpahla leyi a hi yona ya Yosefa?

Se Yakobe a sungula ku vaviseka hintamu, a rila hikusa a a pimisa leswaku n’wana wa yena a file. A ku nga na munhu lweyi a a swi kota ku miyeta Yakobe.

Nkama Yosefa a nga fika Gibita a xaviwile hi wanuna wa lisima hintamu swaku a va xikravhu xa yena. Vito la wanuna yelweyo a ku li Potifaru. Yehovha a a tama a mu pfuna Yosefa. Se Potifaru a vone swaku Yosefa a a swi rhandza ku tirha, hi mhaka leyo, a sungule ku mu tshemba a tlhela a mu veka swaku a hlayisa swilo swa yena hinkwaswu.

Se nsati wa Potifaru a sungule ku vona swaku Yosefa a a sasekile a tlhela a tshamiseka. Naswona siku ni siku a a tshamela ku mu byela swaku a famba masangu na yena. Se i mpsini leswi Yosefa a a swi yendla? Minkama hinkwayu, yena a a ku:

— A ni nge swi yendli leswo. Swi bihile hintamu hikusa wena u nsati wa Potifaru naswona yena wa ni tshemba. Funtshi loko no famba masangu na wena, Yehovha a ta ni kwatela hintamu. Mina a ni swi lavi swaku leswo swi yendleka.

Siku lin’wani nsati wa Potifaru a zame ku sindzisa Yosefa swaku a famba masangu na yena. Nsati wa Potifaru a mu khome hi mpahla se Yosefa a huma hi ku tsutsuma a baleka. Nkama Potifaru a nga vuya kaya, nsati wa yena a mu byele a ku:

— Yosefa a zame ku ni pfinya.

Se Potifaru a kwata hintamu, a peta Yosefa djele. Kambe ku nga va swaku Yehovha a mu khohlwile Yosefa? Hi ta swi vona ka xitoriya lexi landzelaka.