Yehovha A Nga Mu Khohlwanga Yosefa

Nkama lowu Yosefa a a li djele, Faru hosi ya Gibita a lorhile minchumu leyi a ku nga na munhu lweyi a a kota ku yi tlhamusela. Kambe mun’wani ka vavanuna lava a va li na Faru, a byele Faru leswaku Yosefa a a ta swi kota ku mu tlhamusela. Se hi ku kahlula, Faru a rhume vanhu swaku va ya vitana Yosefa adjele.

Se Yosefa a fika a tlhamusela a ku:

— Ku ta va ni 7 wa malembe lawa ku nga ta va ni swakudla swa swinyingi ka tiko hinkwalu la Gibita, kambe loko ma ta hundza ku ta gama ku va ni 7 wa malembe ya ndlala. Se langa wanuna lweyi a nga ni wutlharhi, lweyi a nga ta swi kota ku hlayisa swakudla ka malembe lawa. Se xitshungu xa wena a xi nga ta fa hi ndlala.

Faru a tsake hintamu hileswi Yosefa a nga mu pfuna ku twisisa leswi a nga swi lorha, lakaku a za a mu langa leswaku ku va yena lweyi a a ta hlayisa swakudla. Faru a tlhele a veka Yosefa leswaku a rhangela tiko hinkwalu la Gibita, a va wanuna wa wumbirhi wa lisima hintamu aGibita. Yosefa a swi kotise ku yini ku tlhamusela leswi Faru a nga swi lorha? A swi kotile hikusa Yehovha a mu pfunile.

Yosefa a tame a hlayisa swakudla ku ringana 7 wa malembe. Se ku game ku va ni ndlala amisaveni hinkwayu. Vanhu va matiko ya manyingi a va ya Gibita swaku va ya xava kona swakudla. Hambi hi Yakobe lweyi a a tshama kule aKanana a swi tivile swaku aGibita a ku ni swakudla, se a rhuma vana va yena swaku va ya xava swakudla.

Loko va fikile Gibita, vamakwavu va Yosefa va fambe va ya vulavula ni wanuna lweyi a a xavisa swakudla. Nkama va nga mu vona, va fike va khizama phambheni ka yena. A va nga swi tivi swaku wanuna lwiyani a a li Yosefa. Kambe Yosefa a a va tiva vamakwavu va yena, naswona a khumbuke leswi a a tshamela ku swi lorha. Leswaku Yosefa a tiva swaku vamakwavu va yena a va txintxile kumbe a va nga txintxanga a te:

— N’wina mi swipiyao. Mi lava ku ta dumela tiko la Gibita.

Vona va ku:

— Hina hi vatirhi va wena, a hi li 12 wa vana. Hi vana va papayi mun’we, hi ta hi ka tiko la Kanana. A wa xigumandzeni a sale na papayi se lweyi mun’wani a nga ha li kona.

Se Yosefa a ku:

— Loko mi tisa makwenu wa n’wina wa xigumandzeni lani, hi kona ni nga ta swi kholwa leswi mi swi vulaka.

Vamakwavu va Yosefa va game va tlhela va ya Kanana. Loko se ku hundze nkamanyana, va tlhele va ya Gibita va ya xava swakudla swin’wani. Funtshi va fambe na Benjamini makwavu wa vona wamutsongo. Nkama va nga fika, va tlhele va mu vona Yosefa kambe a va swi tsumbulanga swaku hi yena. Kambe Yosefa a va ringile, a fihle kopo ya prata ka saka leli a li na Benjamini, a gama a ku:

— Vavanuna lava, va yive kopo ya mina ya prata, yi laveteleni ka masaka ya vona.

Se vatirhi va Yosefa va yendle leswi a nga va byela swona. Va fike va kambetela kopo ya yena ya prata ka masaka ya vona, se va yi kuma ka saka la Benjamini. Vamakwavu va Yosefa va sungula ku chava hintamu kambe vona a va mu yendlanga swilo swa ku biha Benjamini ku fana ni leswi va nga yendla Yosefa. Se va kombele Yosefa va ku:

— Ha ku kombela, u nga khatisi Benjamini, khatisa hina.

Leswo swi yendle swaku Yosefa a tiyiseka swaku vamakwavu va yena se a va txintxile. Kambe Yosefa se a a nga ha gwenti ku tikhoma hi ku rila. A za a ku:

— Hi mina Yosefa, makwavu wa n’wina. Indjhe papayi wa ha hanya? Kambe vamakwavu va Yosefa a va nga kholwi leswaku Yosefa wa ha hanya. Ku nga va swaku Yosefa a wa ha va kwatelile vamakwavu va yena? Nada. Leswaku a kombisa leswaku a a va rivalelile Yosefa a te:

— Mi nga titwi nandzu hi leswi mi nga ni yendlela swona, Xikwembu xi ni rhume lani leswaku ni ta ponisa wutomi la n’wina. Kambe na mi kombela, tisani papayi lani.

Vamakwavu va Yosefa va game va tlhela va ya Kanana va ya byela Yakobe hinkwaswu leswi nga yendleka. Se ndjangu hinkwawu wu game wu rhurha wu ya tshama Gibita. Phela Yosefa ni papayi wa yena va tlhele va va xikan’we hambileswi ku nga hundza malembe ya manyingi na va nga vonani.