Setembro

Xikwembu xi nyike Yesu matimba swaku a helisa swikarhatu leswi hluphaka vanhu. Masingita lawa Yesu a nga ma yendla ma kombisa swaku a ni matimba ya ku helisa swikarhatu leswi hina hi hoxe a hi nge te swi kota ku swi lunghisa. Hi xikombiso, a ni matimba ya ku hi chunsa ka xidjoho ni hinkwaswu leswi vangiwaka hi xidjoho, swa ku fana ni mavabyi ni lifu. (Mat. 9:1-6; Rom. 5:12, 18, 19) Masingita lawa Yesu a nga ma yendla ma kombise swaku a nga swi kota ku daha mavabyi hinkwawu hambi hi ku pfuxa vanhu lava nga fa. (Mat. 4:23; Yoh. 11:43, 44) Yesu a nyikiwe ni matimba ya ku nyimisa swidzedze, ni ku chunsa vanhu ka madimoni. (Mar. 4:37-39; Luk. 8:2) Ha tsaka hi ku tiva swaku Yehovha a nyike N’wana wa yena Yesu matimba yamakulu ya ku fana ni lawa. Ha tiyiseka swaku Mfumu wa Xikwembu wu ta tisa minkateko ya yinyingi amisaveni. Masingita lawa Yesu a nga ma yendla nkama a a li lani misaveni ma kombisa leswi a nga ta swi yendla amisaveni hinkwayu loko a va Hosi ka Mfumu wa Xikwembu. Murindzi 04/23 paj. 3 mapar. 5-7

Loko u li ka bandla leli ku nga ni vanhu va vanyingi kumbe vachumayeli va vanyingi naswona u nga kombetiwi swa ku u hlamula u nga ha pimisa ni ku godola ku nyikela tinhlamulu. Kambe u nga tshiki ku tama u zama ku hlamula. I yini lexi nga ku pfunaka? Lunghiselela tinhlamulu ta tinyingi ka xiyenge xin’wani ni xin’wani xa ntlhanganu. Loko u nga kombetiwi na djondzo ya ha sungula u nga ha kombetiwa swaku u hlamula ka swiyenge swin’wani. Loko u lunghisela Djondzo Ya Murindzi pimisa hi ndlela leyi paragrafu lin’wani ni lin’wani li yelanaka hi yona ni nhlokomhaka leswaku u ta kota ku nyikela tinhlamulu tatinene ka djondzo hinkwayu. Xin’wani lexi u nga xi yendlaka i ku tilunghiselela kahle swaku u hlamula ka maparagrafu lawa ma vulavulaka hi swilo swa ku karhata. Hikusa ka maparagrafu wolawo i vatsongo lava va tlakusaka voko leswaku va hlamula. Se loko swi nga koteki swaku u hlamula mintlhanganwini u nga yendla yini? Bula ni lweyi a nga ta fambisa xiyenge xolexo u mu byela lani a wu tsakela ku hlamula kona. Murindzi 04/23 mapaj. 21-22 mapar. 9-10

Yosefa minkama hinkwayu a a tivekisele ku yingisa nkongomiso lowu a wu ta hi ka Yehovha, naswona ku va a yendle leswo swi yendle swaku a va nuna wa kahle. Bibele li vulavula hi makhambi manharhu lawa Yehovha a nga mu nyika nkongomiso, naswona ka makhambi hinkwawu lawa, Yosefa a vhele a yingisa leswi Yehovha Xikwembu a nga mu byela swona hambiloko swi mu karhatela. (Mat. 1:20; 2:13-15, 19-21) Ku va Yosefa a yingise nkongomiso wa Yehovha swi yendle leswaku a vhikelela Mariya, a mu seketela ni ku tlhela a mu hlayisa. Naswona ha tiyiseka swaku ku ve Mariya a vone nuna wa yena na a yendla leswo, swi nga va swi yendle leswaku a tama a mu rhandza ni ku tlhela a mu hlonipha. Na vona vavanuna lava nga chada namuntlha, va nga tekelela xikombiso xa Yosefa hi ku va minkama hinkwayu va hlayisa mindjangu hi ku landza nkongomiso lowu nga ka Bibele. Loko va yendla leswo hambiloko minkama yin’wani swi karhata, va ta va va kombisa swaku va va rhandza vasati va vona naswona va ta tiyisa muchadu wa vona. Makwerhu mun’wani wa xisati wa le Vanuatu lweyi a nga ni ku tlula 20 wa malembe na a chadile a li: “Loko ni vona nuna wa mina na a landza nkongomiso wa Yehovha, swi ni yendla ni tama ni mu hlonipha, ni titwa ni vhikelelekile ni tlhela ni tshemba swiboho leswi a swi yendlaka.” Murindzi 05/23 paj. 21 par. 5

Vayuda lava a va ta tlhelela aYerusalema a va ta va “vanhu va ku kwetsima” ka Yehovha. (Det. 7:6) Se leswaku va tsakisa Yehovha a va fanele va txintxa mahanyelo ya vona. Ku tala ka Vayuda lavayani, a va psaliwe Babilona naswona swi tikomba a va tolovele mahanyelo ya Vababilona funtshi a va pimisa ku fana ni Vababilona. Loko se ku hundze kolomuyani ka 70 wa malembe na ntlawa wa ku sungula wa Vayuda wu vuyile aIsrayele, Govhernadori Nehemiya a kwatile nkama a nga tsumbula swaku vana van’wani lava a va psaliwe aYerusalema a va nga li tivi lirimi la Vayuda. (Det. 6:6, 7; Neh. 13:23, 24) Se leswi ku tala ka Rito la Xikwembu a li tsaliwe hi Xiheberu, a swi ta kotekisa ku yini swaku vana lavayani va djondza hi Yehovha va tlhela va mu gandzela kuve Xiheberu a va xi tivi ke? (Ezr. 10:3, 44) Se swa twisiseka swaku Vayuda lavayani a va fanele va txintxa swilo swa swinyingi ka wutomi la vona, kambe a swi ta va vevukela kuva va txintxa na va li Israyele lani vanhu hi kutsongokutsongo a va tlhela va sungula ku gandzela Yehovha. — Neh. 8:8, 9. Murindzi 05/23 paj. 15 mapar. 6-7

Hambiloko hi ni matimba kumbe hi swi yendla kahle swilo, swi nga yendleka hi kumana ni swikarhatu leswi nga hi sivelaka ku fikelela leswi hi swi lavaka. Hi xikombiso, ku nga ha tshuka ku humelela minchumu leyi hi kalaka hi nga yi nyimelanga leyi nga ha hi dlelaka nkama lowu lavekaka swaku hi fikelela leswi hi swi lavaka. (Ekl. 9:11) Kumbexana ku nga ha tshuka ku humelela xikarhatu lexi nga ha hi yendlaka hi godola kumbe xi hi heta matimba. (Swiv. 24:10) Funtshi leswi hi kalaka hi nga hetisekanga, hi nga ha yendla swihoxo leswi nga yendlaka swaku swi karhata kuva hi fikelela leswi hi swi lavaka. (Rom. 7:23) Kumbe hi nga ha va hi karhalile. (Mat. 26:43) Se i yini lexi nga hi pfunaka ku fikelela leswi hi swi lavaka loko hi kumana ni swikarhatu kumbe li nga hi xelanga kahle? U nga pfumeleli swikarhatu swi ku heta ntamu swaku u nga fikeleli leswi u nga tivekisela swona. Bibele li hi byela swaku hambi hi kumana ni swikarhatu makhambi ya manyingi, hi nga swi kota ku tama hi zama. Loko hi tama hi yendla minzamu hambiloko hi kumana ni swikarhatu, hi komba Yehovha swaku ha swi lava ku mu tsakisa, naswona Yehovha a tsaka swinene loko a hi vona hi yendla minzamu ya ku fikelela leswi hi nga tivekisela swona. Murindzi 05/23 mapaj. 30-31 mapar. 14-15

Ku va mupfuli wa ndlela swi nga pfuna jovhem swaku li tiva ku bula ni vanhu va ku hambanahambana, swi tlhela swi li pfuna kuva li tirhisa kahle male; li nga yi gaxtari. (Filp. 4:11-13) Ndlela yin’wanyani ya ku nghenela ntirho wa nkama hinkwawu i ku rhanga hi ku va mupfuli wa ndlela wa nkamanyana. Leswo swi pfuna vanhu swaku va lunghekela ku va vapfuli va ndlela va nkama hinkwawu. Na wona ntirho wa ku va mupfuli wa ndlela wa nkama hinkwawu wu tlhela wu va pfulela swipfalu swaku va nghenela ntirho wa ku hlawuleka wa ku fana ni ku ya tirha Betele kumbe va nghenela ntirho wa ku yaka. Vamakwerhu hinkwavu va xinuna va fanele va tikarhatela ku va madoda leswaku va va tirhela hintamu vamakwerhu amabandleni. Bibele li vula swaku vavanuna lava va tikarhatelaka ku kuma mintirho ya yinyingi amabandleni va “navela ntirho wawunene.” (1 Tm. 3:1) Ku sungula, makwerhu wa xinuna a fanele a vekiwa leswaku a va mupfunisi wa bandla. A vapfunisi va bandla va ma pfuna hintamu madoda leswaku ma yendla mintirho ya ku hambanahambana amabandleni. Funtshi wona madoda ni vapfunisi va bandla i vamakwerhu lava va tivekaka hansi nkama lowu va tirhelaka vamakwerhu va tlhela va hisekela ntirho wa ku chumayela. Murindzi 12/23 paj. 28 mapar. 14-16

Hosi Yosiya a sungule ku kulisa wunghanu la yena na Yehovha na a ni 16 wa malembe. A a swi lava ku djondza hi Yehovha ni ku yendla leswi Yehovha a a swi lava. Kambe minkama yin’wani swilo a swi nga mu fambeli kahle. Hi nkama wolowo vanhu va vanyingi a va gandzela swikwembu swa mavunhwa funtshi a swi lava Yosiya a tiya a nga chavi nchumu swaku a seketela wugandzeli la Yehovha. Phela Yosiya a a tinyimiselile ku yendla leswo. Hi mhaka leyo, na a nga se va ni 20 wa malembe, a sungule ku susa swilo hinkwaswu leswi a swi fambisana ni wugandzeli la mavunhwa atikweni. (2 Tik. 34:1, 2) Hambiloko wa ha li mutsongo, u nga swi kota ku tekelela xikombiso xa Yosiya hi ku djondza hi Yehovha ni wumunhu la yena la ku xonga. Phela hi leswo swi nga ta ku pfuna swaku u lava ku tinyiketela ka Yehovha. Se xiboho lexo xi ta li khumbisa ku yini wutomi la wena? Luke lweyi a nga tsakamisiwa na a ni 14 wa malembe a vule leswi: “Ku sukela swoswi, ka wutomi la mina ni lava ku rhangisa ntirho lowu ni wu yendlelaka Yehovha ni tlhela ni tikarhatela ku yendla hinkwaswu swaku ni mu tsakisa.” (Mar. 12:30) Loko u yendla leswi nga yendliwa hi Luke, tiyiseka swaku na wena Yehovha a ta ku katekisa! Murindzi 09/23 paj. 11 mapar. 12-13

A nkama Pawulo a nga tsala karta, a tsalela bandla la Tesalonika, ni lembe a li nge se hundza na bandla leli li pfuliwile. Naswona swi nga yendleka vavanuna lava a va rhangela bandleni a va nga na xiperiyensiya funtshi a va phazama. Kambe hambileswo, a va fanele va hloniphiwa. Na hina, leswi nhlomulu wawukulu ku nga li khale wu nga ta sungula, swi lava hi tshemba madoda ya le bandleni ni minkongomiso leyi va hi nyikaka yona. Swi nga yendleka nkama wolowo swi nga koteki swaku vamakwerhu va sede mundial kumbe va Betele va vulavulisana na hina, se i swa lisima ka ha li swoswi hi djondza ku rhandza ni ku hlonipha madoda ya le bandleni. Ku nga na mhaka swaku ku yendleka yini, a hi tameni hi tshama na hi rindzile, hi nga tshameli ku vona swihoxo swa vamakwerhu va hina. Lexi hi faneleke hi xi khumbuka hileswaku Yehovha na Yesu va tirhisa vavanuna lava swaku va hi kongomisa. Ku fana ni leswi kapaseti li vhikelaka nhloko ya musonchwa, a ntshembo wa hina wu vhikela mimpimiso ya hina. Wu hi yendla hi swi vona swaku a misava leyi a yi na nchumu lowu yi nga hi nyikaka wona. (Filp. 3:8) Wu tlhela wu hi pfuna swaku hi tama hi rhula hi tlhela hi tiya. Murindzi 06/23 mapaj. 11-12 mapar. 11-12

Lava va twaka “wansati wa xiphunta” va fanele va langa ku yamukela kumbe va yala xirhambu xa yena. Hi ni swivangelo leswi twalaka swa ku fambela kule ni wuntunga la swa masangu. “Wansati wa xiphunta” a tlhamuseliwa na a vula leswi: “A mati ya ku yiviwa ma lombela.” (Swiv. 9:17) Kasi mati wolawo ya ku yiviwa i yini? Bibele li vula leswaku i wanuna ni wansati lava nga chada ntsena va nga fambaka masangu naswona leswo swi fanisiwa ni mati lawa ma pepisaka. (Swiv. 5:15-18) Wanuna ni wansati lava nga chada, va chunsekile kuva va famba masangu. Kambe a mati ya ku yiviwa ke, wona ma fanekisela yini? Ma fanekisela ku famba masangu ni munhu lweyi u kalaka u nga chadanga na yena. Minkama ya yinyingi vanhu lava yendlaka leswi, va swi yendla xihundleni, ku fana ni leswi muyivi a fikaka niwusiku a yivetela swilo hinkwaswu na a nga voniwi hi munhu. A mati wolawo ya ku yiviwa ma nga ha tikomba ma lombela hikusa lava fambaka masangu na va nga chadanga xikan’we, va nga ha pimisa leswaku a va voniwi hi munhu funtshi a ku nga ta yendleka nchumu hi vona. Kambe vo tihembela, Yehovha wa swi vona hinkwaswu. Funtshi loko va tama va yendla leswo, va ta luzekeliwa hi wunghanu la vona na Yehovha. Se wa yi vona mhaka ya kona! A ku na xa ku “lombela” ka leswo, swa vava leswo. — 1 Ko. 6:9, 10. Murindzi 06/23 paj. 22 mapar. 7-9

Se u ta ku yini loko swi ku minkama yin’wani swikhongelo leswi u swi yendlaka a swi sukeli mbilwini, kumbe u nga ha swi hisekeli ku chumayela? U nga pimisi leswaku moya wa ku kwetsima a wa ha tirhi ka wena. Phela leswo swi nga ha yendlekela mun’wani ni mun’wani wa hina hikusa a hi hetisekanga naswona ndlela leyi hi titwaka hi yona yi nga ha txintxatxintxa. Naswona loko u li ka xiyimu lexo, pimisa hi xikombiso xa mupostolo Pawulo. Hambileswi a a lwa hi matimba swaku a tekelela Yesu, minkama yin’wani a a nga swi naveli ku yendla leswi a a fanele a swi yendla. Pawulo a kombisile swaku a a tinyimiselile ku tama a yendla ntirho wa ku chumayela hambiloko minkama yin’wani a nga swi naveli. Se na wena tinyimiseli ku yendla swilo swaswinene hambiloko minkama yin’wani u nga swi naveli ku swi yendla. Phela loko minkama hinkwayu u tinyimisela ku yendla swilo swaswinene hambiloko u nga swi naveli, hi ku famba ka nkama u nga ha txintxa ndlela leyi u titwaka hi yona. — 1 Ko. 9:16. Murindzi 03/24 mapaj. 11-12 mapar. 12-13

Hi nga kombisa swaku ha va rhandza vamakwerhu hi ku va vanghanu va vona ni ku heta nkama na vona. (2 Ko. 6:11-13) Vanyingi va hina hi le ka mabandla lawa ku nga ni vamakwerhu va wumunhu la ku hambanahambana ni va ku ta hi ka tindhawu ta ku hambanahambana. Hambileswo, hi nga swi kota ku kulisa lirhandzu leli hi nga na lona hi vona hi ku pimisa hi wumunhu la vona lalinene. Loko hi djondza ku vona vanhu van’wani hi ndlela leyi Yehovha a va vonaka hi yona, swi kombisa leswaku ha va rhandza. Ka nhlomulu wawukulu swi ta laveka hintamu swinene swaku hi komba vamakwerhu swaku ha va rhandza. Hi mhaka muni hi vula leswo? Hi mhaka Yehovha a ta tirhisa vamakwerhu leswaku a hi vhikela. Hi xikombiso, vona leswi Yehovha a nga byela Vayisrayele leswaku va swi yendla loko Babilona a va hlasela. Yena a te: “Nghenani vanhu va mina ka makwartu ya n’wina. Pfalani swipfalu mi tumbela kona swa nkamanyana, anze ku kwata ka mina ku hundza.” (Esa. 26:20) Swi tikomba ingaku marito lawa ma ta tirha ni ka hina ka nhlomulu wawukulu. Murindzi 07/23 mapaj. 6-7 mapar. 14-16

Tiviwa hi ku va munhu lweyi a twisisanaka a tlhela a twelana. Tivutisi leswi: ‘Ni tiviwa hi kuva munhu wa ku twisisana, wa ku twelana, kumbe ni tiviwa ni li munhu wa nkanu lweyi a womelelaka ka leswi ni kholwaka ka swona? Na va yingisa van’wani ni tlhela ni pfumela mavonelo ya vona hambiloko ma hambanile ni ya mina?’ Phela loko hi ya hi va vanhu va ku twelana ni va ku twisisana hi ta ya hi fana na Yehovha na Yesu. Loko swilo swi txintxa swi lava swaku na hina hi txintxa hi pfumelelana na swona. I ntiyiso swaku loko minchumu yi txintxa, swilo swi hi tikela hintamu hi tindlela ta ku a hi nga ti nyimelanga. Hi xikombiso, na hi nga swi nyimelanga hi nga ha sungula ku vabya hintamu swinene naswona mpfilumpfilu ya politika kumbe ku wa ka ikonomiya swi nga yendla swaku wutomi li karhata hintamu swinene lomu hi tshamaka kona. (Ekl. 9:11) Phela hambiloko nhlengeletanu yi hi kombela swaku hi ya tirha ka ndhawu yin’wani kumbe hi yendla swilo hi ndlela ya ku kala hi nga yi tolovelanga, swi nga hi karhatela hintamu swinene. Kambe hi nga swi kota ku rhula hi tlhela hi tsaka loko hi yendla 4 wa minchumu: 1) Hi fanele hi pfumela swaku swilo se swi txintxile, 2) hi fanele hi pimisa hi leswi hi nga swi yendlaka swoswi, ku nga li hi leswi hi nga swi yendla hala ndzhaku, 3) hi fanele hi pimisa hi swilo swaswinene leswi hi nga na swona, hi nga tshameli ku veka tihlo ka minchumu leyi yi kalaka yi nga li yinene, kasi xa wu 4) i ku pfuna van’wani. Murindzi 07/23 mapaj. 21-22 mapar. 7-8

Muprofeta Daniyele a a ha li jovhem nkama a nga tekiwa swaku a ya va xikarawa aBabilona, ku nga ndhawu leyi a yi li kule swinene ni kaya ka yena. Kambe hambileswi a a li jovhem, leswi a a tshamise xiswona swi va hlamalise swinene vanhu lava a va tirhela hosi. Vona va vone swaku Daniyele a a sasekile ni leswaku a a vuya hi ka ndjangu wa lisima. (1 Sa. 16:7) Hi mhaka leyo, Vababilona va mu tekile va tlhela va mu djondzisa leswaku a ya tirha ka yindlo ya wuhosi. (Dan. 1:3, 4, 6) Yehovha a a mu rhandza Daniyele hileswi Daniyele a nga langa ku va ni mahanyelo yamanene. Swi nga yendleka Daniyele a a ni kolomuyani ka 20 wa malembe nkama Yehovha a nga vula swaku a a li munhu wa ku tshembeka ku fana na Nowa na Yobo, ku nga vavanuna lava nga tirhela Yehovha malembe ya manyingi. (Gen. 5:32; 6:9, 10; Yob. 42:16, 17; Eze. 14:14) Daniyele a ve ni wutomi la ku tsakisa swinene naswona Yehovha a tame a mu rhandza wutomi la yena hinkwalu. — Dan. 10:11, 19. Murindzi 08/23 paj. 2 mapar. 1-2

Loko u lava ku xava yindlo, ha tiyiseka swaku na u nga se yi xava a wu ta tsakela ku famba lomu yi nga kona, u fika u nghena ka yona u vona makwartu, u vonavona ni minchumu yin’wani leyi nga kona ka yona ni leswi yi nga tshamisa xiswona. Na lona Bibele li ni swilo swa swinyingi leswi swi lavaka swaku hi swi djondza kahle swaku hi swi tiva hi tlhela hi swi twisisa. Loko ho li lerha ntsena swaku hi hundzisa nkama hi to tiva ntsena “swilo swa ku sungula” swa Rito la Xikwembu. (Heb. 5:12) Ndlela ya kahle ya ku djondza Bibele i ku vona ndlela leyi rungula la Bibele li twananaka hi yona. Zama ku tiva leswi u kholwaka ka swona ni leswaku hi mhaka muni u kholwa ka swona. Swaku hi li twisisa kahle Rito la Xikwembu swi lava hi djondza ntiyiso wa ku yenta wa Bibele. Mupostolo Pawulo a kutxe Vakreste swaku va li djondza kahle Bibele kuva va “twisisa ku yanama ni ku leha ni ku tlakuka ni ku yenta ka ntiyiso.” Leswo a swi ta tiyisa lipfumelo la vona. (Efe. 3:14-19) Na hina hi lava ku yendla swa ku fana. Murindzi 10/23 paj. 18 mapar. 1-3

Bibele li tale hi swikombiso swa vanhu lava va nga swi kota ku lehisa mbilu. Swi ngo yini u tinyimisela ku djondza hi vona? Hi xikombiso, Davhida a wa ha li xidjahani nkama a nga langiwa swaku a ta va hosi ya Israyele kambe swi lave a nyima malembe ya manyingi swaku a vekiwa ku va hosi. Xikombiso xin’wani i xa Simiyoni na Ana. A va gandzela Yehovha hi ku tshembeka na va nyimela ku ta ka Mesiya lweyi a a tshembisiwile. (Luk. 2:25, 36-38) Loko u djondza hi swikombiso leswi, zama ku hlamula swivutiso leswi nge: I mpsini swi nga pfuna munhu lweyi swaku a lehisa mbilu? Hi mhaka muni swi ve swinene ku va a lehise mbilu? Mina ni nga mu tekelelisa ku yini? U nga tlhela u djondza ka vanhu lava va nga tsandzeka ku lehisa mbilu. (1 Sa. 13:8-14) Loko u djondza hi swikombiso swoleswo, tivutisi: ‘Hi mhaka muni munhu lweyi a tsandzekile ku lehisa mbilu? Hi swini swilo swa ku biha swi nga yendleka hi mhaka leyo?’ Murindzi 08/23 paj. 25 par. 15

Mupostolo Pedru a a tshembeka, naswona a nga pfumelelanga nchumu kumbe munhu a mu yendla a tshika ku landzela Yesu. Hi xikombiso, khambi lin’wani a swi kombisile swaku a a tshembeka nkama lowu vadjondzisiwa va kalaka va nga swi twisisanga leswi Yesu a nga swi vula. (Yoh. 6:68) Hi nkama wolowo, vanhu va vanyingi va tshike ku landzela Yesu naswona a va lavanga ku nyimela ntlhamuselo wa leswi a nga swi vula kambe Pedru a nga swi yendlanga leswo. Leswi a a tshembeka, a byele Yesu leswaku hi yena lweyi ‘a a ni marito lama nga ni wutomi la ku kala li nga heli.’ Yesu a a swi tiva swaku Pedru ni vadjondzisiwa va yena a va ta mu tshika. Hambileswo, a byele Pedru swaku a a swi tiva swaku yena a a ta tama a tshembeka. (Luk. 22:31, 32) Yesu a a swi tiva swaku “mbilu ya swi lava kambe miri lowu nga ni xidjoho a wu tiyanga.” (Mar. 14:38) Se Yesu a nga mu tshikanga Pedru hambileswi yena a a mu yalile swaku a a mu tiva. Naswona loko Yesu a pfuxiwile swi tikomba ingaku a humelele ka Pedru, na Pedru a li yexe. (Mar. 16:7; Luk. 24:34; 1 Ko. 15:5) Se ku va Pedru a vone leswo swi nga yendleka swi mu tiyise hintamu ngopfungopfu leswi a a hele matimba hileswi a a swi yendlile. Murindzi 09/23 paj. 22 mapar. 9-10

Yehovha wa swi rivalela swidjoho swa munhu lweyi a nga ni lipfumelo ka yena, wa mu rivalela a tlhela a swi rivala. (Ps. 32:1, 2) Loko munhu a ni lipfumelo ka Yehovha, Yehovha a mu vona na a lulamile. I ntiyiso swaku Abrahamu, Davhida ni vatirheli van’wani va ku tshembeka va Yehovha va vitaniwe va ku lulama hambileswi a va ni xidjoho. Kambe hi mhaka ya lipfumelo, Yehovha a va vone na va li va ku lulama loko a va fananisa ni vanhu va ku a va nga mu tirheli. (Efe. 2:12) Ka karta leli a nga li tsalela Varoma, mupostolo Pawulo a tiyisekise swaku hi fanele hi va ni lipfumelo loko hi lava ku va vanghanu va Xikwembu. Se, ku fana na Abrahamu na Davhida, loko hi va ni lipfumelo ka Yehovha, na hina hi nga swi kota ku va vanghanu va yena. Murindzi 12/23 paj. 3 mapar. 6-7

Leswi hi nga Vakreste, hinkwerhu hi nga swi kota ku nyikela magandzelo ka Yehovha hi ku tirhisa nkama wa hina, ntamu wa hina ni male ya hina leswaku hi seketela Mfumu wa Xikwembu. Hi nga kombisa swaku i swa lisima ku gandzela Yehovha hi ku yendla hinkwaswu leswi hi nga swi kotaka leswaku hi mu yendlela magandzelo. Mupostolo a vulavule hi swilo swa ku hambanahambana leswi hi faneleke hi tama hi swi yendla loko hi gandzela Yehovha, swilo leswo swa ku fana ni ku khongela, ku chumayela vanhu van’wani, ku ya mintlhanganwini nkama ni nkama ni ku tiyisa vanhu van’wani, ngopfungopfu leswi hi hanyaka ka masiku ya wugamu. (Heb. 10:22-25) Naswona buku la Nhlawutelo loko li li ku heleni ka lona, li vulavula hi ntsumi leyi yi nga vula kambirhi yi ku: “Gandzela Xikwembu!” Yona yi ze yi swi vula kambirhi hikusa ku gandzela Xikwembu i nchumu wa lisima. (Nhl. 19:10; 22:9) Se, a hi fanelanga hi khohlwa ntiyiso lowu hi nga wu djondza lowu fambisanaka ni tempele yayikulu ya Xikwembu hi tlhela hi tama hi nyika lisima a lunghelo leli hi nga na lona la ku gandzela Yehovha. Murindzi 10/23 paj. 29 mapar. 17-18

Hinkwerhu ha swi lava ku “tama hi rhandzana.” Kambe i swa lisima ku khumbuka leswi Yesu a nga swi vula loko a ku “lirhandzu la va ku tala li ta pumbeka.” (Mat. 24:12) Yesu a a nga lavi ku vula swaku ku tala ka vadjondzisiwa va yena a nkameni wa hina a va nga ta rhandzana. Kambe a a lava ku vula swaku hi nga tekeleli vanhu va misava leyi va ku kala va nga na lirhandzu. Se swoswi a hi voneni swaku hi nga tikambelisa ku yini ku vona swaku lirhandzu la hina hi vamakwerhu li tiyile kumbe nada? Ndlela yin’wani ya ku vona kumbe lirhandzu la hina la ha tiyile i ku va hi kambela ndlela leyi hi hlamulaka hi yona loko ku humelela swiyimu swa ku karhi. (2 Ko. 8:8) Xin’wani xa swiyimu swa kona hi lexi xi nga vuliwa hi mupostolo Pedru loko a ku: “Kambe ka hinkwaswu rhandzanani swinene, hikusa lirhandzu li mbhonya swidjoho swa swinyingi.” (1 Pe. 4:8) Se leswi hi swi yendlaka loko vamakwerhu va hi djohela swi nga hi pfuna ku vona swaku lirhandzu la hina la ha tiyile ke. Murindzi 11/23 paj. 10 mapar. 12-13

Phela hi ta va hi nga swi yingisi leswi Yesu a nga hi byela swona loko hi rhandza vanhu van’wani bandleni kambe van’wani hi nga va rhandzi. I ntiyiso swaku hi nga ha va vanghanu vavakulu va vamakwerhu van’wani ku tlula van’wani. Phela hambi hi Yesu swi mu yendlekelile leswo. (Yoh. 13:23; 20:2) Kambe mupostolo Pedru a hi byela swaku hi fanele hi tikarhatela ku kombisa lirhandzu lalikulu ka vamakwerhu hinkwavu abandleni hikusa na vona va lumba ndjangu wa Yehovha, hambiloko hi nga na wunghanu lalikulu na vona. (1 Pe. 2:17) Pedru a kombise swaku i swa lisima hintamu swinene ku va hi rhandzana na swi sukela mbilwini. (1 Pe. 1:22) Leswo swi vula leswaku hi fanele hi kombisa lirhandzu hambiloko hi li ka swiyimu swa ku karhata hintamu swinene. A hi nge hi xikombiso, munhu a yendla nchumu lexi xi ku kwatisaka hintamu swinene. I mpsini leswi u nga ta swi yendla? A xa ku sungula lexi vanyingi va xi yendlaka i ku lava ku tlhelisela, kambe a hi swona leswi Yehovha a lavaka leswaku hi swi yendla. Pedru a swi djondzile ka Yesu Kreste swaku a hi swinene ku va hi yendla leswo. (Yoh. 18:10, 11) Yena a tsale leswi: “Mi nga tlheliseli swa ku biha hi swa ku biha kumbe mi rhuketela lweyi a mi rhuketelaka, kambe tlheliselani hi ku mu katekisa.” (1 Pe. 3:9) Loko u va rhandza hintamu vamakwerhu na swi sukela mbilwini u ta va khoma kahle u tlhela u zama ku va twisisa. Murindzi 09/23 paj. 29 mapar. 9-11

Ya hlamalisa ndlela leyi n’wana a kulaka hi yona; a kula hi ku kahlula ingi nkama wo kala wu nga hundzanga funtshi a swi zi swi lava a yendla minzamu leswaku a kula. Kambe swa hambana ni leswi wunghanu la hina na Yehovha li kulisaka xiswona. (1 Ko. 13:11; Heb. 6:1) Swaku munhu a va ni wunghanu la ku tiya na Yehovha swi lava a yendla minzamu, handle ka ku yendla minzamu, swi lava a pfuniwa hi moya wa ku kwetsima hikusa hi wona lowu nga ta mu pfuna ku va ni wumunhu lalinene, ku yendla swilo swin’wani ni ku tilunghiselela swaku a yendla mintirho leyi lavekaka ka nkama lowu taka. (Swiv. 1:5) Nkama Yehovha a nga hamba vanhu, a yendle wanuna ni wansati. (Gen. 1:27) I ntiyiso leswaku a wanuna ni wansati va hambanile funtshi hambi swilo leswi va swi yendlaka a swi fani. Hi xikombiso, Yehovha a yendle wanuna ni wansati na va ni mintirho ya ku hambana funtshi a swi yendlise xileswo leswaku va swi kota ku hetisisa mintirho leyi a nga va nyika yona. — Gen. 2:18. Murindzi 12/23 paj. 18 mapar. 1-2

Ku nga va swaku Yesu a a lava swaku vanhu van’wanyani va li tirhisa vito la Papayi wa yena? Ina a a swi lava. Hambileswi vafundhisi van’wani va wukhongeli la Xiyuda a va vula leswaku a ku nga fanelanga ku tirhisiwa vito la Xikwembu hikusa ku yendla leswo a swi ta kombisa swaku a li hloniphiwi, Yesu a nga zanga a pfumelela swaku leswi vona a va swi kholwa swa ku kala swi nga humi ka Matsalwa swi mu sivela kuva a tirhisa vito la Papayi wa yena. Xikombiso xa leswo hi leswi nga yendleka khambi lin’wani nkama Yesu a nga susa madimoni wanuna mun’wani lweyi a a hanya ka doropa la Vajerasi. Hambileswi vanhu va doropa leliyani va nga mu chava hintamu Yesu, va tlhela va kombela swaku a suka ka doropa leliyani, Yesu a byele wanuna lweyi a a mu suse madimoni leswaku a byela vanhu van’wanyani hi leswi Yehovha a a mu yendlele swona. (Mar. 5:16, 17, 19) Se leswo swi kombisa swaku Yesu a a swi lava swaku vanhu va ndhawu liyani va tiva vito la Xikwembu. Ninamuntlha Yesu wa ha lava swaku vanhu amisaveni hinkwayu va tiva vito la Papayi wa yena. (Mat. 24:14; 28:20) Se a nkama hi byelaka vanhu van’wanyani hi vito la Yehovha, hi tsakisa Yesu Kreste Hosi ya hina. Murindzi 02/24 paj. 10 par. 10

Hi kateke hintamu hi ku va ka nhlengeletanu ya Yehovha ka masiku lawa ya ku karhata. Phela wutomi ka misava leyi li ya li karhata siku lin’wani ni lin’wani, kambe Yehovha a hi nyika vamakwerhu swaku va hi pfuna. (Ps. 133:1) Yena a hi pfuna leswaku hi tama hi tsaka amindjangwini ya hina. (Efe. 5:33–6:1) A tlhela a hi nyika wutlharhi leli hi li lavaka leswaku hi hlula swikarhatu hi tlhela hi va ni ku rhula ka ntiyiso. Hambileswo, hi fanele hi yendla hinkwaswu leswi hi nga swi kotaka swaku hi tirhela Yehovha hi ku tshembeka. Hi mhaka muni? Hikusa minkama yin’wani hi nga ha kwatisiwa hi swilo leswi van’wani va swi yendlaka kumbe va swi vulaka. Funtshi hi nga ha hela ntamu hi mhaka ya swihoxo leswi hina hi swi yendlaka, ngopfungopfu loko ku li swihoxo leswi hi tshamelaka ku swi yendla. Hi fanele hi tama hi tiyisela hi tlhela hi tshemba Yehovha 1) loko makwerhu a hi kwatisa, 2) loko lweyi hi nga chada na yena a yendla swilo leswi hi vavisaka ni 3) loko hi hela ntamu hi mhaka ya swihoxo leswi hi swi yendlaka. Murindzi 03/24 paj. 14 mapar. 1-2

Minkama yin’wani, u ta twa swiperiyensiya swa vamakwerhu lava va nga yengetela ntirho wa vona ka Yehovha. Swi nga yendleka va ye ka Xikola xa Vachumayeli va Mfumu kumbe va rhurhile va ya lomu ku nga ni xilaveko. Loko swiyimu swa wena swi ku pfumelela swi nga va kahle swinene ku tivekela mintirho yoleyo. Phela vanhu va Yehovha va swi rhandza hintamu ku yengetela ntirho wa vona wa ku chumayela. (Min. 16:9) Kambe u nga yendla yini loko u nga swi koti ku fikelela mintirho yoleyo? U nga pimisi swaku a wu pfuni nchumu, kambe xa lisima i ku tama u tiyisela. (Mat. 10:22) U nga khohlwi swaku u nga yendla swaku Yehovha a tsaka hi ku yendla hinkwaswu leswi u nga swi kotaka ni leswi xiyimu xa wena xi ku pfumelelaka ku yendla swona. Phela leyo i ndlela ya lisima hintamu leyi u nga tamaka u landzela Yesu Kreste hi yona loko se u tsakamisiwile. — Ps. 26:1. Murindzi 03/24 paj. 10 par. 11

Yehovha a tshembisa swaku a tinyimisele ku hi rivalela loko hi tisola. (Ps. 86:5) Se loko hi tisolile hi mbilu ya hina hinkwayu ka swidjoho swa hina, hi nga tiyiseka swaku Yehovha se a hi rivalelile hilani Bibele li vulaka hi kona. Khumbuka swaku Yehovha wa va pimisela vanhu va yena. Yehovha a nge hi londzi ku yendla swilo leswi yena a swi tivaka swaku a hi nge swi koti ku swi yendla. Handle ka leswo, Yehovha a tsaka hintamu loko a hi vona hi yendla hinkwaswu leswi hi nga swi kotaka swaku hi mu tirhela. Pimisa hi swikombiso swa Bibele swa vanhu lava a va tirhela Yehovha hi mbilu ya vona hinkwayu. Hi xikombiso, mupostolo Pawulo a tirhele Yehovha hi ku hiseka ku ringana malembe ya manyingi. A yendzile a ya ka tindhawu ta kule hintamu a tlhela a tirha hi matimba leswaku ku va ni mabandla ya nyuwani. Kambe nkama swiyimu swa Pawulo swi nga txintxa a nga ha swi koti ku yendla leswi a a swi yendla khale ka ntirho wa ku chumayela, a nga zanga a pimisa swaku Yehovha a nga ha mu yamukeli, kambe yena a tame a yendla leswi a a swi kota ndzeni ka swiyimu swa yena naswona Yehovha a mu katekisile. (Min. 28:30, 31) Hi ku fana, na hina minkama yin’wani leswi hi kotaka ku mu yendlela swona Yehovha swi nga ha txintxa; kambe xa lisima ka Yehovha hi leswaku hi tama hi mu tirhela hi mbilu ya hina hinkwayu. Murindzi 03/24 paj. 27 mapar. 7, 9

Yesu a hi siyele xikombiso xaxinene ka swikhongelo leswi a nga swi yendla. Nkama na a li lani misaveni a a khongela nkama ni nkama. Leswi vanhu a va tshamela ku mu talela a tlhela a ni swilo swa swinyingi swa ku swi yendla, a swi lava a yendla hi ku tivekela nkama lowu a a ta khongela hi wona. (Mar. 6:31, 45, 46) A a pfuka ni mpundzu a ya tshama ka ndhawu ya yena yexe swaku a khongela. Khambi lin’wani a khongele wusiku hinkwalu na a nge se yendla xiboho xa lisima. (Luk. 6:12, 13) Hi wusiku lin’wani na a ku mundzuku ka kona a ta dlayiwa, Yesu a khongele hi ku phindhaphindha hikusa a a swi tiva swaku a ta kumana ni xikarhatu xaxikulu hintamu ka ntirho wa yena wa lani misaveni. (Mat. 26:39, 42, 44) A xikombiso xa Yesu xi hi djondzisa swaku hi fanele hi tivekela nkama wa leswaku hi khongela hambiloko hi ni swilo swa swinyingi swa ku swi yendla. Loko hi swi vona hi nga ha hantla hi pfuka kumbe hi hlwelanyana ku yetlela leswaku hi khongela. Loko hi yendla leswo, hi ta va hi kombisa swaku hi yi nyika lisima nyiko leyi ya ku khongela. Murindzi 5/23 paj. 3 mapar. 4-5

Ndzimana leyi yi tirhisa marito lama nge ku ‘hi nyika moya wa ku kwetsima.’ Buku lin’wani loko li tlhamusela marito lawa li li “o hi chululela a moya wa ku kwetsima ku fana ni nambu.” Marito lawa ma li kombisa kahle lirhandzu lalikulu leli Yehovha a li kombaka vatotiwa! Vatotiwa va swi tiva kahle swaku Yehovha wa va rhandza. (Yud. 1) Loko a kombisa ndlela leyi vatotiwa va titwaka hi yona, mupostolo Yohani a tsale leswi: “Hi nga vonani leswi Papayi a nga hi rhandzisa xiswona, hi za hi vitaniwa vana va Xikwembu!” (1 Yo. 3:1) Indjhe a lirhandzu la Yehovha lo gamela ka vatotiwa? Nada! Yehovha a swi kombisile swaku wa hi rhandza hinkwerhu. Hi wini nchumu wawukulu hintamu lowu kombisaka swaku Yehovha wa hi rhandza? I nkutsulu! Phela a ku na nchumu xa lisima lexi hi nga tshama hi nyikiwa xona ku tlula nkutsulu. — Yoh. 3:16; Rom. 5:8. Murindzi 01/24 paj. 28 mapar. 9-10

A ndzimana leyi yi kombisa nchumu lexi nga pfuna Davhida swaku a nga chavi hintamu hambiloko a li ka xiyimu xa ku tika hintamu swinene: Ku nga ku pimisa hi leswi Yehovha a a tshembise ku mu yendlela swona ka nkama lowu taka. Davhida a a swi tiva swaku Yehovha a a ta mu ponisa ka xikarhatu lexi a a kumana na xona hi nkama wa kona hikusa se a a mu tshembisile swaku a ta va hosi aIsrayele. (1 Sa. 16:1, 13) Se, ka Davhida loko Yehovha a za a hlaya nchumu a swo fana ni loko se xi yendlekile. Se wena ke, i mpsini leswi Yehovha a nga ta ku yendlela swona? Ha swi tiva swaku Yehovha a nga ta hi vhikela ka swikarhatu hinkwaswu leswi hi kumanaka na swona. Hambileswo, ku nga na mhaka swaku swikarhatu leswi hi kumanaka na swona swi gama kwini, Yehovha a ta swi helisa hinkwaswu ka misava ya nyuwani. (Esa. 25:7-9) Yena a ni matimba ya ku pfuxa lava nga fa, a hi daha ka mavabyi lawa hi nga na wona a tlhela a helisa vakaneti va hina. — 1 Yo. 4:4. Murindzi 01/24 paj. 6 mapar. 12-13

Pimisa hi leswi swi nga ku yendla u tinyiketela ka Yehovha ni ku tsakamisiwa. Phela wena u yendle leswo hileswi u lavaka ku va munghanu wa Yehovha. Zama ku khumbuka leswi nga yendla leswaku u tiyiseka swaku a wu wu kumile ntiyiso. U sungule hi ku tiva swaku i mani Yehovha u gama u sungula ku mu rhandza u tlhela u mu hlonipha. U ve ni lipfumelo naswona leswo swi yendle leswaku u lava ku txintxa wutomi la wena. Naswona lirhandzu leli u nga na lona hi yena hi lona li nga ku susumetela ku tshika ku yendla swilo swa ku biha ivi u sungula ku yendla swilo leswi tsakisaka Yehovha. Handle ka leswo, nkama u nga vona swaku Xikwembu xi ku rivalelile u ve ni ku rhula ka mbilu ya wena. (Ps. 32:2) U tlhele u sungula ku ya mintlhanganwini ni ku byela van’wani hi leswi se a wu swi djondza. Se namuntlha leswi u nga Mboni ya Yehovha, u le ka ndlela leyi yisaka wuton’wini naswona u tinyimisele ku yendla hinkwaswu leswi u nga swi kotaka swaku u tama u famba ka yona. (Mat. 7:13, 14) Se a hi tameni hi yendla hinkwaswu leswi hi nga swi kotaka swaku hi nyima hi tiyile, hi ku tama hi rhandza Yehovha hi tlhela hi mu yingisa. Murindzi 07/23 paj. 17 par. 14; paj. 19 par. 19

Ku pimisa hi xikhongelo lexi u nga xi yendla nkama u nga tinyiketela ka Yehovha u tshembisa ku mu tirhela, swi nga ku nyika ntamu swaku u hlula mindzingo leyi u nga ha kumanaka na yona. Hi xikombiso, ha tshemba swaku a wu nga ta tlanga hi ku gangisana ni nsati wa vanhu kumbe nuna wa vanhu, hikusa u ta va se u tiyendlele xiboho xa leswi u nga ta swi yendla ka mhaka leyi. Hi mhaka leyo, a wu nga ha ta tinyika nkama wa ku pimisa hi swaku u ta yendla yini ka xiyimu xa ku fana ni lexi hikusa u ta va se u tiyendlele xiboho xa ku kala u nga “fambi ka ndlela ya lava yendlaka swa ku biha.” (Swiv. 4:14, 15) Phela ku pimisa hi xikombiso xa Yesu swi nga hi pfuna swinene. Yena a a tinyimisele ku yendla hinkwaswu leswaku a tsakisa Papayi wa yena. Ku fana na Yesu tinyimiseli ku yendla hinkwaswu leswi u nga swi kotaka leswaku u mu tsakisa. (Mat. 4:10; Yoh. 8:29) Loko hi kumana ni mindzingo kumbe swikarhatu hi kota ku kombisa swaku hi tinyimiselile ku tama hi landzela Yesu. Naswona loko hi yendla leswo, hi nga tiyiseka swaku Yehovha a ta hi pfuna. Murindzi 03/24 mapaj. 9-10 mapar. 8-10