Agosto

Ndzimana leyi yi vulavula hi tipontu timbirhi ta lisima: 1) Vanhu va ku lulama va kumana ni swikarhatu, 2) Yehovha wa hi chunsa ka swikarhatu leswo. Kambe Yehovha a swi yendlisa ku yini leswo? Ndlela ya ku sungula i ku hi pfuna ku va ni mavonelo yamanene hi leswi wutomi la hina li nga ta tshamisa xiswona ka misava leyi. Yehovha a hi tshembisa swaku hi ta tsaka loko hi mu tirhela, kambe a nga hi tiyisekisi swaku hi nga ta kumana ni swikarhatu. (Esa. 66:14) Yehovha a hi byela swaku hi tshama na hi pimisa hi nkameni lowu taka, loko hi ta va ni wutomi leli a a hi navelele lona ku sukela ku sunguleni, ku nga wutomi la ku tsakisa la ku kala li nga heli. (2 Ko. 4:16-18) Na ha ha rindzela nkama lowo, Yehovha a ta hi pfuna swaku hi tama hi mu tirhela siku ni siku hambi hi kumana ni swikarhatu swa ku fikela kwini. (Swir. 3:22-24) Hi nga djondza yini ka swikombiso swa vanhu va Yehovha lava nga hanya ka minkama ya khale ni swoswi? Hi nga djondza swaku hinkwerhu hi nga ha kumana ni swikarhatu swaku a hi nga swi nyimelanga a wuton’wini, kambe loko hi mu tshemba Yehovha, minkama hinkwayu a ta hi pfuna. — Ps. 55:22. Murindzi 04/23 mapaj. 14-15 mapar. 3-4

Xikombiso xa Yosefa na Mariya xi nga hi djondzisa swilo swa lisima ka mhaka ya ku yingisa mfumu hambiloko swi nga vevuki ku yendla leswo. (Luk. 2:1-6) Vona xiyimu xin’wani lani swi nga lava swaku Mariya na Yosefa va kombisa swaku a va yingisa. Hi nkama wolowo Hosi Auguxtu a veke nawu wa leswaku a vanhu hinkwavu lava a va tshama ka ndhawu leyi a yi fumiwa hi mfumu wa Roma a va fanele va ya ka ndhawu leyi va nga psaliwa ka yona swaku va ya titsalisa. Phela leswo swi yendle swaku Yosefa na Mariya va yendza va ya ka ndhawu ya kule, lani a va ta famba 150 wa makilometru ni ku tlula swaku va ya fika ka doropa la Betlehema kuva va titsalisa hambileswi ndlela leyi a va famba hi yona a yi tale hi maganga ni minkova. Phela liyendzo lolelo a li karhata hintamu, ngopfungopfu ka Mariya hikusa a a ni nyimba ya 9 wa tiwheti. Ha tiyiseka swaku Mariya na Yosefa a va vilela hintamu hi swaku ku ta yendleka yini loko Mariya o sungula ku lun’wa ngopfungopfu leswi a n’wana lweyi Mariya a a ta mu psala a a ta va Mesiya. Phela loko a vo lava ku tinyimelela ina va nga wu yingisanga nawu lowo wa mfumu. Hambileswi Yosefa na Mariya a va ni xivangelo xa ku twala xa ku va va karhateka va wu yingisile nawu. Yehovha a va katekise hintamu hi mhaka leswi va nga yingisa. Mariya a fike Betlehema na a hlayisekile a tlhela a psala xin’wanani xa ku hanya kahle a tlhela a pfunisa swaku wuprofeta la Bibele li hetiseka. — Mik. 5:2. Murindzi 10/23 paj. 8 mapar. 9, 11; paj. 9 par. 12

U nga yendla yini loko u chava ku hlamula amintlhanganwini? Tilunghiseleli kahle. (Swiv. 21:5) Loko u swi tiva kahle leswi nga ta djondziwa amintlhanganwini swi ta ku vevukela ku nyikela nhlamulu. Xin’wani lexi u nga xi yendlaka i ku nyikela nhlamulu ya ku goma. (Swiv. 15:23; 17:27) Ku nyikela nhlamulu ya ku goma swi ta ku pfuna swaku u nga chavi hintamu. Phela loko u nyikela nhlamulu ya ku goma hi marito ya wena u ta kombisa swaku u tilunghiselele kahle naswona u yi twisise kahle mhaka leyi djondziwaka. Loko ku li swaku u zame ku yendla hinkwaswu leswi kambe swi tama swi ku karhatela ku hlamula amintlhanganwini, tiyiseka swaku Yehovha a yi nyika lisima minzamu ya wena. (Luk. 21:1-4) Ku va hi yendla leswi hi nga swi kotaka swaku hi hlamula a swi vuli swona swaku hi ta kota ku yendla leswi kalaka swi nga li ka matimba ya hina. (Filp. 4:5) Leswi u nga swi yendlaka i ku tivekela xikongomelo lexi u lavaka ku xi fikelela u tlhela u kombela Yehovha a ku pfuna swaku u tama u rhula. Xin’wani xa swikongomelo lexi u nga xi fikelelaka i ku lwela ku nyikela nhlamulu ya ku goma. Murindzi 04/23 paj. 21 mapar. 6-8

Mupostolo Pawulo a fananise Vakreste ni masonchwa lawa ma tshamaka na ma pfule matihlo naswona ma tshamaka ma lunghile swaku ma lwa. Loko sonchwa li li nyimpini li fanele li tshama li lungile swaku li lwa nkama wun’wani ni wun’wani. Swa fana na hina. Leswaku hi tshama na hi lunghekele siku la Yehovha, hi fanele hi yambala mpahla leyi vhikelaka xifuva, leyi fanekiselaka lipfumelo ni lirhandzu hi tlhela hi yambala kapaseti, leli fanekiselaka ntshembo lowu hi nga na wona. Mpahla leyi vhikelaka xifuva a yi vhikela mbilu ya musonchwa. Lipfumelo ni lirhandzu na swona swi vhikela mbilu ya hina ya ku fanekisela. Swilo leswimbirhi swi ta hi pfuna swaku hi tama hi tirhela Yehovha ni ku landzela Yesu Kreste. Lipfumelo li hi yendla hi tiyiseka swaku Yehovha a ta hakela hinkwavu lava mu tirhelaka hi mbilu hinkwayu. (Heb. 11:6) Li tlhela li hi nyika matimba ya ku tama hi tshembeka ka Murhangeli wa hina Yesu Kreste hambiloko hi kumana ni swikarhatu. Se leswaku hi tiyisa lipfumelo la hina ni ku tama hi tiyisela, hi fanele hi djondza hi vamakwerhu lava tamaka va tshembeka hambiloko va hluphiwa kumbe va li wusiwanini, naswona hi nga tekelela xikombiso xa vamakwerhu lava va nga vevukisa wutomi la vona hi ku kala hi nga rhandzi male ni swilo swa misava leyi, kambe hi rhangisa Mfumu wa Xikwembu ka wutomi la hina. Murindzi 06/23 paj. 10 mapar. 8-9

Moya wa ku kwetsima wu nga hi pfuna swaku hi va ni wumunhu leli nga ta hi pfuna kuva hi tirha leswaku hi fikelela leswi hi nga tivekisela swona, ngopfungopfu loko ku li nchumu xa ku karhata kumbe loko hi godola ku xi yendla. Hi mhaka leyo, khongela ka Yehovha u mu kombela swaku a ku nyika moya wa ku kwetsima. (Luk. 11:13; Gal. 5:22, 23) U nga nyimeli swaku swilo swi va kahle. Ka misava leyi hi hanyaka ka yona a hi wutlharhi kuva hi nyimela swaku swilo hinkwaswu swi va kahle leswaku hi fikelela leswi hi swi lavaka, hikusa loko hi yendla leswo swi nga yendleka ni siku ni lin’we hi nga swi fikeleli leswi hi swi lavaka. Swi nga yendleka u titwa u hele matimba swaku u fikelela leswi u nga tivekisela swona hikusa swi tikomba ingi i swikulu hintamu. Loko swi tshamise xileswo, u swi vonisa ku yini ku swi yava u swi yendla hi switsongoswitsongo? Kumbe loko u lava ku yampsisa wumunhu la ku karhi, u swi vonisa ku yini ku zama ku li kombisa siku ni siku ka minchumu yayitsongo? Kumbe loko u lava ku lerha Bibele hinkwalu, swi ngo yini u heta maminutunyana na u li lerha siku ni siku? Murindzi 05/23 mapaj. 29-30 mapar. 11-13

Yehovha a tiyiseka swaku vanhu va tama va va ni leswi va swi lavaka leswaku va tiyisa wunghanu la vona na yena ka masiku lawa ya wugamu, naswona swi tlhela swi yendla swaku hinkwerhu hi tama hi famba ka “Ndlela Ya Ku Kwetsima”. (Esa. 35:8; 48:17; 60:17) Loko munhu a sungula ku djondza Bibele na hina, a sungula ku famba ka “Ndlela [leyi] Ya Ku Kwetsima”. I ntiyiso swaku van’wani va famba hi nkama wawutsongo va gama va yi tshika ndlela leyi, kambe van’wani va famba ka yona anze va fika lomu ndlela leyi yi gamaka kona. Kasi ndlela leyi yi gama kwini? Ka lava nga ni ntshembo wa ku ya hanya tilweni, yi gama ka “paradesi ya Xikwembu” ku nga tilweni. (Nhl. 2:7) Kasi ka lava nga ni ntshembo wa ku hanya lani misaveni, yi gama loko se Mfumu wa Yesu wa 1.000 wa malembe se wu helile lani hinkwerhu hi nga ta va na hi nga ha na xidjoho. Se loko ku li swaku u sungule ku famba ka ndlela leyi, u nga languti ndzhaku naswona u nga tshiki nchumu xi ku phazamisa lakakuva u nga fiki lomu ndlela leyi yi gamelaka kona, ku nga ka misava ya nyuwani. Murindzi 05/23 paj. 17 par. 15; paj. 19 mapar. 16-18

Swin’wani swi nga ku pfunaka swaku u tinyiketela ka Yehovha i ku va u pimisa hi hinkwaswu leswi a nga ku yendlela swona. (Ps. 116:12-14) Bibele li vula swaku “nyiko yin’wani ni yin’wani yayinene, ni nyiko yin’wani ni yin’wani ya ku hetiseka” yi ta hi ka Xikwembu. (Yak. 1:17) Phela nyiko yayikulu leyi Xikwembu xi nga hi nyika yona hina vanhu, i ku va xi rhumele N’wana wa xona Yesu Kreste swaku a ta fela swidjoho swa hina. Pimisa hi leswi lifu la Yesu li ku pfunisaka xiswona. Phela li yendla swaku swi koteka swaku u va ni wunghanu la le kusuhi na Yehovha, u tlhela u va ni ntshembo wa ku hanya wutomi la ku kala li nga heli. (1 Yo. 4:9, 10) Se ku tinyiketela ka Yehovha i ndlela ya ku mu khensa u tlhela u kombisa swaku wa swi khensa swilo hinkwaswu leswi a nga ku yendlela swona. — Det. 16:17; 2 Ko. 5:15. Murindzi 03/24 paj. 5 par. 8

Loko hi vona mahanyelo ya ku biha lawa vanhu va nga na wona namuntlha, hi titwa ku fana na Lota lweyi “a a karhateka hintamu hi mhaka mahanyelo ya tingana ya vanhu lava delelaka nawu” hikusa a a swi tiva swaku Yehovha a ma mu nyenyentsa mahanyelo wolawo. (2 Pe. 2:7, 8) Leswi Lota a a mu rhandza Yehovha a tlhela a mu hlonipha a nga ma tekelelanga mahanyelo ya vanhu lava a a hanya na vona. Na hina hambileswi hi hanyaka xikarhi ka vanhu lava va kalaka va nga hanyi hi minawu ya Yehovha, hi ta tama hi va ni mahanyelo yamanene, loko hi tama hi rhandza Yehovha hi tlhela hi mu hlonipha swinene. Xa ku tsakisa hileswaku Yehovha wa hi pfuna swaku hi yendla leswo hi ku tirhisa switsundzuxu leswi kumekaka ka buku la Swivuriso. Vakreste hinkwavu, ku nga na mhaka swaku i vavanuna, vavasati, majovhem kumbe lava se va nga kula, va nga pfuneka loko va kambisisa marito ya wutlharhi lawa ma kumekaka ka buku leli. Loko hi chava Yehovha a hi nga ta tlanga ni vanhu lava yendlaka swilo swa ku biha. Murindzi 06/23 paj. 20 mapar. 1-2; paj. 21 par. 5

Leswi u nga Mboni ya Yehovha swi nga yendleka maxaka ya wena ma ku hlupha, kumbe swi nga yendleka u tshike ku lavetela male ni tshomba hileswi u lavaka ku rhangisa Mfumu wa Xikwembu ku sungula. (Mat. 6:33) Tiyiseka leswaku Yehovha wa swi vona hinkwaswu leswi u nga mu yendleka swona. (Heb. 6:10) Phela u swi vonile leswaku marito lawa Yesu a nga ma vula i ntiyiso. A te: “A nga kona lweyi a nga tshika yindlo kumbe vamakwavu va xinuna kumbe vamakwavu va xisati kumbe mamani kumbe papayi kumbe vana kumbe masimu hi mhaka ya mina ni hi mhaka ya mahungu ya ku tsakisa lweyi swoswi a nga ta kala a nga kumi leswi nga phindhiwa ka 100, tiyindlo, vamakwavu va xinuna, vamakwavu va xisati, vamamani, vana, masimu xikan’we ni ku xanisiwa, se ka nkama lowu taka a kuma wutomi la ku kala li nga heli.” (Mar. 10:29, 30) Phela minkateko leyi u nga yi kuma hileswi u nga Mboni ya Yehovha yi tlula minchumu hinkwayu leyi u nga yi tshika swaku u va mulandzeli wa Kreste. — Ps. 37:4. Murindzi 03/24 paj. 9 par. 5

Nkama Vakreste va le Yudiya va nga kumana ni ndlala yayikulu swinene, vamakwerhu va bandla la le Antiyokiya va rhumele leswi va nga swi kota swaku va pfuna vamakwavu lava tshamaka Yudiya. (Min. 11:27-30) Hambileswi vamakwerhu lava a va kumana ni ndlala yayikulu swinene a va tshama kule, Vakreste va bandla la le Antiyokiya a va tinyimisele ku yendla hinkwaswu leswi va nga swi kotaka swaku va va pfuna. (1 Yo. 3:17, 18) Na hina hi nga kombisa ntwelawusiwana namuntlha loko hi twa swaku vamakwerhu va kumane ni tinghozi. Hi ku kahlula hi nga tinyimisela ku pfunisa hi ku va hi vutisa madoda. Tindlela tin’wani ta ku pfunisa, i ku humesa minyikelo kumbe ku khongelela vamakwerhu lava nga weliwa hi nghozi. Vamakwerhu va hina swi nga ha yendleka va ta lava swilo leswaku va tama va hanya. Se loko Yesu Kreste Hosi ya hina a vuya leswaku a yavanyisa misava, a hi kuma na hi kombisa ntwelawusiwana wa ku fana ni lowu, a ta hi rhamba leswaku hi dla tshomba la Mfumu wa yena. — Mat. 25:34-40. Murindzi 07/23 paj. 4 mapar. 9-10; paj. 6 par. 12

Yesu a tekelele xikombiso xa Papayi wa yena Yehovha hi ku twisisana ni ku twelana. Phela yena a rhumiwe lani misaveni leswaku a chumayela “tinyempfu leti nga lahleka ta yindlo ya Israyele.” Kambe a kombise swaku a a va twisisa van’wani hi ku chumayela vanhu hinkwavu. Hi xikombiso, ka khambi lin’wani wansati mun’wani lweyi a a nga li Muyuda a kombele Yesu swaku a daha n’wana wa yena, lweyi a a ‘hlupheka hintamu hileswi a a ni dimoni.’ Yesu a kombise ntwelawusiwana hi ku va a daha n’wana wa wansati lwiya. (Mat. 15:21-28) Ka khambi lin’wani loko a ha li ku sungula ntirho wa yena wa ku chumayela, Yesu a te: “Lweyi a ni yalaka . . . na mina ni ta mu yala”. (Mat. 10:33) Kambe loko Pedru a mu yalile makhambi manharhu, Yesu a nga vulanga swaku a nga mu tivi, kumbe ku mu tsukula a nga ha mu rivaleli. Kambe a vone swaku Pedru a a tisolile ni leswaku a a li munhu wa ku tshembeka. Se ndzhaku ka loko a pfuxiwile, Yesu a humelele ka Pedru a vulavula na yena naswona swi nga yendleka a mu byele swaku wa mu rivalela ni swaku wa mu rhandza. (Luk. 24:33, 34) Yehovha na Yesu Kreste i swikombiso swikulu swa vanhu lava twelanaka va tlhela va twisisana. Kambe swi li yini hi hina? Yehovha a lava swaku na hina hi va vanhu va ku twisisana ni va ku twelana. Murindzi 07/23 paj. 21 mapar. 6-7

Hi fanele hi yendla yini loko vanhu van’wani va nga kholwi swaku misava leyi hikakunene yi ta va paradesi ka nkama lowu taka? Xin’wani hi nga xi yendlaka i ku va pfuna va twisisa swaku lweyi a yendlaka xitshembiso lexi i Yehovha. Ka buku la Nhlawutelo hi kuma marito lawa ma nge: “Kutani Lweyi a nga tshama ka xitshamu xa wuhosi a ku: ‘Vona, ni yendla swilo hinkwaswu swi va swa nyuwani.’” Se, Yehovha a ni wutivi, matimba naswona a swi lava hintamu ku hetisisa xitshembiso lexi. Xin’wani hi nga va pfunaka swaku va swi twisisa lava va kalaka va nga kholwi swaku misava leyi yi ta va paradesi, hi leswaku ka Yehovha xitshembiso lexi xo fana ni loko se xi yendlekile. Hikusa yena a te: “Marito lawa ma tshembeka naswona i ya ntiyiso.” A tlhela a ku: “Swi yendlekile!” Kasi xa wugamu hi nga bula hi xona xi nga hi pfunaka ku tama hi tiyiseka swaku misava leyi yi ta va paradesi, hileswaku Yehovha a tlhele a vula swaku hi yena “Alfa na Omega.” (Nhl. 21:6) Leswi kombisaka swaku hinkwaswu leswi a swi sungulaka a gama a swi hetisisa. Se hi nga tiyiseka swaku Yehovha a ta swi kota ku komba Sathana swaku a hi wa nchumu ni swaku i muhembi. Loko munhu a ku: “Leswo i swinene, kambe a swi nga ta tshuka swi yendleka,” mu lerheli buku la Nhlawutelo 21:5, 6 u gama u mu byela swaku a tindzimana leti ti fana ni sinatura la Yehovha. Funtshi li komba swaku a swi nga ta phazama leswi Yehovha a nga hi tshembisa swona. Swi ta yendleka hikakunene. — Esa. 65:16. Murindzi 11/23 paj. 7 mapar. 18-19

Yehovha a yendle Abrahamu xitshembiso lexi nkama a a ni 75 wa malembe. Ku nga va swaku Abrahamu a swi vonile leswi na swi yendleka? A swi vonenyana. Loko se a tsemakanye Lwandle la Ewufrata ni loko se ku hundze 25 wa malembe, Abrahamu a ve ni n’wana lweyi a nga mu chula Izaki. Phela lelo ku ve singita la ku hlamalisa hintamu swinene hikusa se a a gugile. Funtshi loko se ku hundze 60 wa malembe a vone vatukulu va yena Esawu na Yakobo na va psaliwa. (Heb. 6:15) Kambe Abrahamu a nga va vonanga vatukulu va yena hinkwavu va hanya ka Tiko la Xitshembiso va tlhela va va tiko lalikulu hi ku ya hi leswi Yehovha a a swi tshembisile. Hambileswo a tame a tshembeka a tlhela a va ni wunghanu lalikulu swinene na Yehovha. (Yak. 2:23) Phela nkama lowu Abrahamu a nga ta pfuxiwa, a ta hlamala hintamu loko a vona swaku lipfumelo la yena ni ku lehisa ka yena mbilu swi yendle swaku misava hinkwayu yi katekisiwa. (Gen. 22:18) Hi djondza yini? Swi nga yendleka hi nga voni switshembiso swa Yehovha hinkwaswu na swi yendleka namuntlha. Kambe loko ku fana na Abrahamu na hina hi lehisa mbilu, hi nga tiyiseka swaku Yehovha a ta hi katekisa swoswi, a tlhela a hi katekisa ka nkama lowu taka loko se hi li ka paradesi. — Mar. 10:29, 30. Murindzi 08/23 paj. 24 par. 14

A nkama na wa ha li mutsongo Hosi Uziya a a tiveka hansi naswona a a “hlonipha Xikwembu xa ntiyiso.” Hosi Uziya a fe na a ni 68 wa malembe funtshi Yehovha a katekise swilo swa swinyingi ka wutomi la yena. (2 Tik. 26:1-4) Yena a hlule matiko ya manyingi lawa a ma nga mu tirheli Yehovha, naswona a yendle swaku Yerusalema a tshama na a vhikelekile. (2 Tik. 26:6-15) Ha tiyiseka swaku Hosi Uziya a tsakile hintamu hi swilo hinkwaswu leswi a nga swi yendla hi ku pfuniwa hi Yehovha. (Ekl. 3:12, 13) Leswi Uziya a a li hosi a a tolovele ku manda. Funtshi swi nga yendleka leswo swi yendle swaku a sungula ku tibyela lakakuva a nga lavi ku twa van’wani loko va mu kawuka kumbe loko va mu byela nchumu. Hi xikombiso, ka khambi lin’wani a nghene ka tempele na a lava ku hisa magandzelo ka altari, ku nga nchumu lowu tihosi a ti nga na mfanelo ya ku wu yendla. (2 Tik. 26:16-18) A nkama Muprista Wamukulu Azariya a nga mu kawuka, Uziya a kwatile funtshi a nga lavanga ku twa nchumu hi swona. Leswi swi kombisa swaku hambileswi ku sunguleni a a li munhu wamunene ni wa ku yingisa Xikwembu, hi ku famba ka nkama a game a tshika ku tshembeka ka Yehovha. Funtshi Yehovha a game a mu ba hi mavabyi ya nhlokonho. (2 Tik. 26:19-21) Hinkwaswu leswo ina swi nga mu yendlekelanga loko yena a a ve munhu wa ku tiveka hansi. Murindzi 09/23 paj. 10 mapar. 9-10

Hambiloko Pedru se a totiwile swi lave a ha tama a lwisana ni swilo swa ku kala swi nga li swinene leswi a a swi yendla. Hi xikombiso hi lembe la 36 ka nguva ya hina, Xikwembu xi rhume Pedru leswaku a ya kaya ka Korneliyo lweyi a a nga li Muyuda. Korneliyo a game a totiwa hi moya wa ku kwetsima, se swi tikomba swaku “Xikwembu a xi na xikheto” ni leswaku vanhu lava a va nga li Vayuda na vona loko va swi tsakela a va ta lumba bandla la Wukreste. (Min. 10:34, 44, 45) Ndzhaku ka leswo Pedru a sungule ku dla ni vanhu lava a va nga li Vayuda, ku nga nchumu lexi a a nga tshami a xi yendla ka wutomi la yena. Kambe a ku ni Vakreste van’wani lava a va li Vayuda, lava a va pimisa swaku a ku dla ni vanhu va ku kala va nga li Vayuda a swi bihile. Se nkama Vakreste lava a va pimisisa xileswo va nga ya Antiyokiya, Pedru a nyime ku dla ni Vakreste lava a va nga li Vayuda hileswi a a chava. Mupostolo Pawulo a swi vonile swaku leswi Pedru a a swi yendla a swi bihile, a tlhela a mu kawuka phambheni ka vanhu hinkwavu. (Gal. 2:13, 14) Hambileswi a a yendle xihoxo lexi, Pedru a nga godolanga ku tama a yampsisa. Murindzi 09/23 paj. 22 par. 8

Swi nga yendleka u tsumbule swaku ku ni swilo swin’wani leswi u kalaka u nga swi yendli kahle kambe u nga godoli, “Hosi yi ni timpsalu,” naswona yi ta ku pfuna swaku u txintxa lani swi lavekaka kona. (1 Pe. 2:3) Se, loko ku ni lomu u faneleke u yampsisa kona, tiyiseka hi leswi: ‘Xikwembu . . . xi ta hetisa ku trenariwa ka wena. Xi ta ku tiyisa.’ A ku sunguleni Pedru a a tivona na a nga faneleki ku va kusuhi na Yesu. (Luk. 5:8) Kambe leswi Yehovha na Yesu va nga mu pfuna, Pedru a tiyiselile a tama a va mulandzeli wa Yesu. Leswo swi yendle swaku Yehovha a pfumelela Pedru “ku nghena ka Mfumu wa Hosi ni Muponisi wa hina Yesu Kreste.” (2 Pe. 1:11) Phela a ku na nchumu wa lisima wa ku tlula lowo. Se loko na wena u fana na Pedru, u tiyisela u tlhela u pfumela ku djondzisiwa hi Yehovha u ta kuma wutomi la ku kala li nga heli u tlhela u ‘kuma hakelo ya lipfumelo la wena, ku nga ku ponisiwa.’ — 1 Pe. 1:9. Murindzi 09/23 paj. 31 mapar. 16-17

Ka tabernakela a ku ni kintari wa ku pfuleka lowu a wu biyeliwile lani vaprista a va tirhela kona. Ndzeni ka wona a ku ni altari la kobre ni baziya, lani vaprista a va tibasisa kona na va nga se nyikela magandzelo ya ku kwetsima. (Eks. 30:17-20; 40:6-8) Namuntlha, vatotiwa lava nga sala lani misaveni va tama va tshembeka ka Yehovha va tlhela va mu tirhela ka kintari wa le ndzeni wa tempele yayikulu ya Xikwembu leyi fanekiselaka lani misaveni. Se kuva ku kombisiwa swaku ku ni baziya lalikulu la mati swi khumbukisa vatotiwa swaku ku fana ni leswi Vakreste hinkwavu va faneleke va tama va tirhela Yehovha hi ku tshembeka naswona na va basile, na vona Vakreste lava va nga totiwa va fanele va yendla swoleswo. Se vona lava va “xitshungu xaxikulu” va gandzela Yehovha na va li kwini? Mupostolo Yohani a vone vanhu lava na va “nyime phambheni ka xitshamu xa wuhosi” lexi xi nyimelaka kintari wa le handle, naswona vanhu lava va gandzela Yehovha ‘wusiku ni nhlikanhi . . . ka tempele ya yena.’ (Nhl. 7:9, 13-15) Se hina ha swi tlangela leswi Yehovha a nga hi pfumelela ku mu gandzela ka tempele ya yena yayikulu. Murindzi 10/23 paj. 28 mapar. 15-16

Yehovha a tlhela a tirhisa madoda leswaku a hi tiyisa. (Esa. 32:1, 2) Hi mhaka leyo loko u karhatekile, byela madoda hi leswi u kumanaka na swona funtshi u nga yali loko madoda ma lava ku ku pfuna. Yehovha a nga tirhisa madoda swaku a ku tiyisa. Ntshembo lowu hi wu kumaka ka Bibele wa ku hanya wutomi la ku kala li nga heli, ku nga va aparadesini lani misaveni kumbe atilweni wu nga hi tiyisa wu tlhela wu hi nyika ntamu. (Rom. 4:3, 18, 19) Ntshembo lowu hi nga na wona wu hi pfuna ku tiyisela swikarhatu, ku chumayela mahungu ya ku tsakisa ni ku yendla mintirho leyi hi nga ha vaka na yona bandleni. (1 Tes. 1:3) Phela ku ve ntshembo wolowo wu nga tiyisa mupostolo Pawulo. Pawulo a ‘manyiwile’, a ‘karhateka’, a ‘hluphiwa’ naswona a titwe na a “tlatlalatiwa”. Funtshi makhambi ya manyingi a ku yo sala kutsongo swaku a fa. (2 Ko. 4:8-10) Lexi nga pfuna Pawulo ku va a tiyisela ku ve ku tshamela ku pimisa hi ntshembo wa yena. (2 Ko. 4:16-18) Pawulo a a tshamela ku pimisa hi ntshembo wa yena wa ku hanya wutomi la ku kala li nga heli amatilweni. Hi mhaka leyo, siku lin’wani ni lin’wani a a titwa na a ni “ntamu”. Murindzi 10/23 mapaj. 15-16 mapar. 14-17

Loko u khongela, tivutisi leswi: ‘Ku nga va swaku i nkama wawunene wa leswaku Yehovha a hlamula xikhongelo xa mina?’ Minkama yin’wani hi nga ha pimisa swaku xikhongelo xa hina xi fanele xi tekela ku hlamuliwa kambe Yehovha a wu tiva kahle nkama wawunene wa ku va a hi pfuna. (Heb. 4:16) Loko hi nga tekeli ku hlamuliwa hi nga ha tsutsumela ku pimisa swaku nhlamulu ya Yehovha i ‘ihim.’ Kambe nhlamulu ya Yehovha ka xikhongelo xa hina ku nga ha va ‘swoswi a hi wona nkama wawunene wa ku ku nyika nchumu lexi u xi lavaka.’ Hi xikombiso, pimisa hi makwerhu wa xinuna lweyi a khongelaka swaku a dahiwa ka mavabyi ya yena. Kambe mavabyi ya yena a ma yampsi. Loko Yehovha a a yo mu daha hi ndlela ya singita, Sathana a a ta vula swaku makwerhu lweyi a a tama a tirhela Yehovha hileswi Yehovha a nga mu daha. (Yob. 1:9-11; 2:4) Phela, Yehovha se a wu vekile nkama wa ku helisa mavabyi hinkwawu. (Esa. 33:24; Nhl. 21:3, 4) Kambe na wu nga se fika nkama lowu, a hi fanelanga hi nyimela swaku Yehovha a hi daha ka mavabyi ya hina hi ndlela ya singita. Hi mhaka leyo, makwerhu a a ta va a khongelile a kombela Yehovha swaku a mu nyika ntamu ni ku rhula ka mimpimiso swaku a kota ku tiyisela mavabyi ya yena ni ku tama a mu tirhela hi ku tshembeka. Murindzi 11/23 paj. 24 par. 13

Samsoni a phazame hintamu kambe a nga tshikanga ku tama a tirhela Yehovha. Yena a lavetele tindlela tin’wani ta ku a yendla leswi Yehovha a swi lava, ku nga ku lwa ni Vafilista. (Vay. 16:28-30) Samsoni a kombele Yehovha a ku: “[Ni tshiki] ni tirihisela ka Vafilista.” Yehovha a xi hlamulile xikombelo xa Samsoni hi ku mu nyika ntamu lowu se a a wu luzile. Leswo swi yendle swaku Samsoni a dlaya Vafilista va vanyingi hi nkama lowuyani ku tlula lava a a va dlayile ka nkama lowu a wu hundzile. Samsoni a tshovele ku vava hi mhaka swilo leswi a nga swi yendla. Kambe ku ni nchumu xin’we xa ku a nga xi tshikanga ku xi yendla, ku nga ku tama a tirhela Yehovha. Se na hina minkama yin’wani hi nga ha djoha kumbe hi phazama, hi gama hi layiwa kumbe hi luzekeliwa hi mintirho yin’wani leyi a hi li na yona abandleni. Kambe ku ni nchumu xin’we xa ku na hina a hi fanelanga hi xi yendla, ku nga ku tshika ku tirhela Yehovha. Phela hambiloko hi djohile kumbe hi phazamile, Yehovha wa ha hi rhandza funtshi a hi vona hi li va lisima ka yena. (Ps. 103:8, 9) Se, a hi khumbukeni leswaku ku fana na Samsoni, ha ha li va lisima ka yena hambiloko hi pfana hi phazama. Murindzi 09/23 paj. 6 mapar. 15-16

Loko hi tiyisela Yehovha wa hi tsakela. Kambe a swi lavi ku vula swaku Yehovha wa tsaka loko a hi vona hi hlupheka kumbe loko hi kumana ni swikarhatu, kambe yena wa hi yamukela. Se ku va Yehovha a hi yamukela i nkateko wawukulu swinene. (Ps. 5:12) Khumbuka swaku Yehovha a tsake hintamu hi leswi Abrahamu a nga swi kota ku tiyisela ka swikarhatu swa swinyingi leswi a nga kumana na swona. Phela ku ve leswo swi nga yendla swaku Yehovha a vona Abrahamu na a li munghanu wa yena a tlhela a vula swaku i munhu wa ku lulama. (Gen. 15:6; Rom. 4:13, 22) Swi hi ku fana ni ka hina namuntlha, leswaku Yehovha a hi tsakela, a swi yi hi swaku hi mu yendlela ntirho wa wunyingi kumbe wawutsongo kumbe swi ya hi mintirho leyi hi nga na yona ka nhlengeletanu ya Yehovha, kambe Yehovha a tsakisiwa hintamu loko a hi vona na hi tiyisela hi tlhela hi va ni lipfumelo ka yena. Se, swi nga na mhaka swaku hi vakulu kumbe hi vatsongo, kumbe swiyimu leswi hi kumanaka na swona, hinkwerhu hi nga swi kota ku tama hi tiyisela. Se loko ku li swaku ku ni xikarhatu lexi u kumanaka na xona, lexi swi lavaka swaku u tiyisela, khumbuka swaku minkama hinkwayu nkama lowu u tiyiselaka, u tsakisa Yehovha. Funtshi nkama lowu hi swi vonaka swaku Yehovha wa tsaka hi ku hi vona na hi tiyisela, a ntshembo wa hina wu ya wu tiya hintamu hi tlhela hi ya hi tiyiseka swaku a ta swi hetisisa switshembiso hinkwaswu leswi a hi yendlelaka swona. Murindzi 12/23 paj. 11 mapar. 13-14

Mukreste a fanele a tiva ku bula kahle ni vanhu van’wanyani. A wanuna lweyi a tivaka ku bula ni vanhu van’wani, a yingisela kahle leswi va swi vulaka. Leswo swi yendla swaku a twisisa ndlela leyi va titwaka hi yona ni leswi va swi pimisaka. (Swiv. 20:5) Naswona a tlhela a twisisa mavulavulelo ya vona hi ndlela leyi va vulavulaka hi yona ni leswi va timexisaka xiswona. Loko a nga tinyiki nkama wa ku va ni vanhu, a bula na vona, a nge swi koti ku swi twisisa leswo. Loko jovhem li heta nkama na li mandara mamensaji kumbe na li mandara ma e-mail, leswo swi ta yendla swaku li nga swi koti ku bula ni vanhu van’wanyani. Leswaku li swi kota leswo li fanele li tinyika nkama wa ku va ni vanhu leswaku li bula na vona. (2 Yo. 12) Mukreste lweyi a nga wupfa a fanele a swi kota ku tihlayisa a tlhela a hlayisa ni ndjangu wa yena. (1 Tm. 5:8) I swa lisima hintamu kuva u djondza ku yendla swilo leswi swi nga ta ku pfuna kuva u kuma ntirho ka nkama lowu taka. (Min. 18:2, 3; 20:34; Efe. 4:28) Se, minkama hinkwayu lwela kuva munhu lweyi a tiviwaka hi ku rhandza ku tirha hi matimba, u tlhela u tiviwa na u li munhu lweyi a swi hetaka swilo hinkwaswu leswi a sungulaka ku swi yendla. Loko u yendla leswo, swi ta ku vevukela ku kuma ntirho u tlhela u nga hlongoliwi ntirhweni. Murindzi 12/23 paj. 27 mapar. 12-13

Loko Bibele li tirhisa marito lama nge: “siku la Yehovha”, li vulavula hi nkama lowu Yehovha a yavanyisaka valala va yena a tlhela a ponisa vanhu va yena. Leswo se swi yendlekile ka nkama lowu nga hundza. (Esa. 13:1, 6; Eze. 13:5; Sof. 1:8) Ka nkama wa hina, “siku la Yehovha” li ta sungula loko vafumi va misava va hlasela Babilona Wamukulu, naswona li ta hela ka nyimpi ya Armajedoni. Leswaku hi pona ka “siku” leli swi lava hi tilunghiselela ka ha li swoswi. Yesu a djondzise swaku hi fanele hi tshama na hi lunghekele “nhlomulu wa wukulu”. Leswo swi lava ku vula swaku masiku hinkwawu hi fanele hi ‘tshama na hi lunghile’. (Mat. 24:21; Luk. 12:40) Ka karta la ku sungula leli a nga li tsalela vamakwerhu va le Tesalonika, mupostolo Pawulo a tirhise swikombiso swinyingi swaku a pfuna vamakwerhu kuva va tshama va lunghekele siku la ku yavanyisa la Yehovha. Pawulo a a swi tiva swaku siku la Yehovha a li nga ta fika hi nkama lowuyani. (2 Tes. 2:1-3) Hambileswo, a kutxe vamakwerhu leswaku va tshama va li lunghekelile siku leliyani ingi hi loko se a lo va kusuhi hintamu. Marito lawa Pawulo a nga ma tsalela vamakwerhu va le Tesalonika ma tirha ni ka hina namuntlha. Murindzi 06/23 paj. 8 mapar. 1-2

Hi 1978, ka doropa la Tóquio aJapão ku yakiwe prediyu la ku leha swinene. Se a nkama a li yakiwa vanhu a va tivutisa swaku indjhe prediyu leli li nga ta gama li dilika, leswi lomu va li yakaka kona ku nga ndhawu leyi ku tolovelaka ku tsekatseka misava? Kambe leswo a swi zanga swi yendleka. Hi mhaka muni? Lava va nga li hamba va vula swaku leswo a swi koteka hikusa a li yakiwe hi ndlela ya kuva li kota ku tiya li ku roo, kambe hi hala tlhelo li tlhela li kota ku titwananisa ni swiyimu swa ku hambanahambana leswi a li ta kumana na swona. Phela Vakreste namuntlha va fana ni prediyu loleliyani. Hi mhaka muni? Mukreste a fanele a nyima a ku dzii, kambe minkama yin’wani a tlhela a swi kota ku titwananisa ni swiyimu. Loko swi ta ka ku khomelela ka minawu ya Yehovha a fanele a nyima a ku roo a womelela ka yona. Minkama hinkwayu ‘a tinyimisele ku yingisa’ naswona a nga pfumeleli nchumu xi mu tshikisa ku yendla ku rhandza ka Yehovha. Kambe hi tlhelo lelin’wani yena a fanele ‘a vevuka’, hi marito man’wani leswi vulaka swaku a fanele a titwananisa ni swiyimu loko swi boha. (Yak. 3:17) Mukreste lweyi a kotaka ku yendla swilo leswi, a nga ta womelela hintamu ka minawu naswona a nga ta hanya ingi hiloko o kala a nga yi tivi minawu leyi nga kona. Murindzi 07/23 paj. 14 mapar. 1-2

Yesu a tame a tshembeka ka Yehovha loko Sathana a mu ringa. (Mat. 4:1-11) Phela Sathana a a tinyimisele ku yendla Yesu a djoha, swaku a nga swi koti ku hi fela. Nkama lowu a a yendla ntirho wa yena wa ku chumayela, Yesu Kreste a kumane ni swikarhatu swin’wani. Hi xikombiso valala va yena a va mu hlupha va tlhela va mu chavisela swaku va ta mu dlaya. (Luk. 4:28, 29; 13:31) Vadjondzisiwa va yena minkama yin’wani a va tshamela ku phazama. (Mar. 9:33, 34) Siku leli a nga thethisiwa hi lona, a bukuteliwile a tlhela a poyiliwa hi vanhu, funtshi a game a dlayiwa ka mhandzi ya nxaniso. A ve ni lifu la ku vava hintamu swinene. (Heb. 12:1-3) Funtshi Yehovha a nga yendlanga nchumu swaku a mu vhikela ka swikarhatu leswi a nga kumana na swona ka masiku ya yena ya wugamu. (Mat. 27:46) Impela, Yesu a hlupheke hintamu swinene swaku a hi fela. Se ku pimisa hi leswi Yesu a nga hluphekisa xiswona swaku a hi fela swi hi yendla hi mu rhandza hintamu swinene. Murindzi 01/24. mapaj. 10-11 mapar. 7-9

Ku lehisa mbilu ku hi pfuna swaku hi hanyisana kahle ni van’wani. Ku hi pfuna ku hi va yingisela kahle van’wani nkama lowu va vulavulaka. (Yak. 1:19) Handle ka leswo, ku lehisa mbilu ku hi pfuna swaku hi hanyisana hi ku rhula ni vanhu van’wani. Loko hi lehisa mbilu, hambiloko hi biwa hi xitresi a hi nga ta yendla nchumu na hi nga rhanganga hi ku pimisa kumbe ku vula nchumu lexi nga ta kwatisaka munhu mun’wani. Naswona a hi nga ta yendla nchumu na hi kwatile hambiloko munhu a yo hi kwatisa. Naswona hi nga ta tlhelisela, kambe hi ta tama hi ‘lehiselana mbilu hi tlhela hi rivalelana hi ku chunseka.’ (Kol. 3:12, 13) Ku lehisa mbilu ku nga hi pfuna swaku hi yendla swiboho swaswinene. Loko hi lehisa mbilu a hi nga ta gigiseka, kumbe ku yendla swilo na hi nga rhanganga hi ku pimisa, kambe hi ta tinyika nkama wa ku kambela kahle na hi nge se yendla xiboho. Hi xikombiso, loko hi nga lehisi mbilu, loko hi lavetela ntirho hi nga ha pfumela wun’wani ni wun’wani lowu taka. Kambe loko hi lehisa mbilu, hi ta nyima hi pimisa hi swaku ku pfumela ntirho wolowo swi nga wu khumbisa ku yini ndjangu wa hina ni wunghanu la hina na Yehovha. Loko hi lehisa mbilu, hi ta swi kota ku yendla swiboho swaswinene. Murindzi 08/23 paj. 22 mapar. 8-9

Loko u hela ntamu hi mhaka ya leswi minkama yin’wani u phazamaka, lexi nga ta ku pfuna i ku pimisa hi xitshembiso lexi u nga xi yendlela Yehovha nkama u nga yendla xikhongelo u tinyiketela ka yena. Hi mhaka muni? Phela loko u tinyiketela ka Yehovha u fanele u titshika. Leswo swi vula swaku a wu fanelanga u rhangisa ku navela ka wena kumbe maplanu ya wena lawa ma nga ha kalaka ma nga mu tsakisi Yehovha. (Mat. 16:24) Naswona loko u kumana ni mindzingo a wu nga ta tihetela nkama wa wena na wu pimisa swaku u ta yendla yini. U ta va se u tiyendlele xiboho xa leswaku minkama hinkwayu u ta tshama u tshembekile ka Yehovha. Naswona u ta yendla hinkwaswu swaku u mu tsakisa. Ku fana na Yobo, u nga swi kota ku tshama na u tshembekile. Phela hambileswi a nga kumana ni mindzingo ya ku karhata swinene a tshame a tshembekile minkama hinkwayu, naswona a game a vula leswi: “Ni ta za ni ya fa na na ha tshembekile!” — Yob. 27:5. Murindzi 03/24 paj. 9 mapar. 6-7

Hinkwaswu leswi se hi nga swi djondza swi swi kombise kahle swaku Yehovha “Xikwembu xa lirhandzu,” a na hina! (2 Ko. 13:11) Yena a rhandza mun’wani ni mun’wani wa hina. Hi nga tiyiseka swaku ‘wa hi rhandza.’ (Ps. 32:10) Nkama lowu hi yaka hi pimisa hi leswi Yehovha a swi yendlaka swaku a hi komba swaku wa hi rhandza hi ta ya hi swi vona swaku impela minkama hinkwayu Yehovha wa hi hlayisa naswona wunghanu la hina na yena li ta ya li tiya. Hi nga tshinela ka yena hi xikhongelo na hi nga chavi, hi mu byela hinkwaswu leswi swi hi karhataka, hi tlhela hi mu byela swaku hi swi lava hintamu swaku a hi komba a lirhandzu la yena na hi tiyiseka swaku yena wa hi twisisa funtshi a swi lava hintamu ku hi pfuna. (Ps. 145:19) Ku fana ni leswi hi swi lavaka hintamu ku worha ndzilu hi siku la xirhami swaku hi ku kufumela, ni lirhandzu la Yehovha li tshamise xileswo. Hi swi lava hintamu ku kufumetiwa hi lona. Naswona lirhandzu la Yehovha i likulu hintamu swinene. Hi mhaka leyo, pfumelela Yehovha a ku kufumeta hi lirhandzu la yena ka wutomi la wena. Naswona onge hinkwerhu hi nga vula leswi: “Na mu rhandza Yehovha.” — Ps. 116:1. Murindzi 01/24 paj. 31 mapar. 19-20

Yesu a nga yo djondzisa vanhu ntsena swaku vito la Xikwembu i Yehovha, kambe a tlhele a yendla swilo swin’wani swaku a dzunisa Papayi wa yena. Vayuda lava Yesu a a tolovela ku bula na vona a va swi tiva swaku vito la Xikwembu i Yehovha, kambe Yesu a va tlhamusele swaku i mani Yehovha. (Yoh. 1:17, 18) Hi xikombiso, Matsalwa ya Xiheberu ma vula swaku Yehovha a ni timpsalu naswona a ni ntwelawusiwana. (Eks. 34:5-7) Kambe Yesu a swi kombisile leswo ka xikombiso lexi a nga xi nyikela xa ku vulavula hi n’wana lweyi a nga suka kaya. Ka xikombiso lexi, Yesu a vula swaku loko papayi a vona n’wana na a tlhelela kaya, wa tsutsuma a mu tlhangaveta, a fika a mu barasara a tlhela a mu rivalela hi mbilu hinkwayu. Phela leswo swi hi pfuna ku vona swaku na yena Yehovha a ni timpsalu naswona a tinyimisele ku hi rivalela. (Luk. 15:11-32) Phela Yesu a swi kombisile hi ku helela swaku Papayi wa yena Yehovha i Xikwembu xa ku tshamisa ku yini. Murindzi 02/24 paj. 10 mapar. 8-9

Se Yehovha na yena wa va pfuna vanhu lava va kumanaka ni swikarhatu. Hina ke hi nga mu tekelelisa ku yini Yehovha? Swin’wani hi nga swi yendlaka swaku hi mu tekelela i ku lwela ku va ni wumunhu lalinene leli li nga ta hi pfuna ku va hi tiyisa vanhu van’wani. Swoswi a hi kambisiseni lin’wani la wumunhu lolelo leli nga hi pfunaka kuva hi va twela wusiwana van’wani. I yini xi nga hi pfunaka ku kombisa lirhandzu hi ku va hi tiyisa van’wani siku ni siku? (1 Tes. 4:18) Swi lava hi va ni ntwelawusiwana ni wunene. (Kol. 3:12; 1 Pe. 3:8) Se li ta hi pfunisa ku yini wumunhu leli? Phela loko hi va twela wusiwana vanhu van’wani, swi ta hi vevukela ku pfuna lava va nga ka swiyimu swa ku tika. Hilani Yesu a nga vula hi kona, “munhu a vulavula leswi swi nga tala ka mbilu. Munhu wamunene a humesa swilo swaswinene ka xuma xa yena xaxinene.” (Mat. 12:34, 35) Ku tiyisa vamakwerhu va hina i nchumu xa lisima xi lavekaka swaku hi kombisa lirhandzu. Murindzi 11/23 paj. 10 mapar. 10-11

Swaku hi twisisa wuprofeta la Bibele, swi lava hi kombela ku pfuniwa. Hi xikombiso, a hi nge u yendza u ya ka ndhawu leyi u kalaka u nga yi tivi, kambe munghanu wa wena lweyi u yendzaka na yena a yi tiva kahle ndhawu yoleyo. A swi tiva kahle swaku hi kwini lomu mi nga kona ni swaku hi yini ndlela leyi mi nga yi tirhisaka swaku mi fika lomu mi yaka kona. A hi kanakani swaku a wu ta tsaka hi ku yendza ni munghanu yelweyo. Yehovha a fana ni munghanu yelweyo. A swi tiva kahle swaku hi wini nkama lowu hi hanyaka ka wona ni swaku ku ta yendleka yini ka nkama lowu taka. Se, leswaku hi twisisa wuprofeta la Bibele swi lava hi tiveka hansi hi kombela ku pfuniwa hi Yehovha. (Dan. 2:28; 2 Pe. 1:19, 20) Ku fana ni leswi vapsali va va navelelaka swilo swaswinene vana va vona, Yehovha na yena a lava swaku vana va yena swi va fambela kahle ka nkama lowu taka. (Yer. 29:11) Kambe ku hambana ni vapsali va hina, Yehovha a hi byela hi swilo leswi nga ta yendleka ka nkama lowu taka. Phela a rhume vanhu swaku va tsala wuprofeta leli nga ka Bibele kuva hi tiva swilo swa lisima leswi nga ta yendleka na ka ha chota nkama wa wunyingi. — Esa. 46:10. Murindzi 08/23 paj. 8 mapar. 3-4