Hi Mhaka Muni Jardim La Edeni Li Li La Lisima Ka Wena?

TINTIVI ta tinyingi ti vula swaku mhaka ya jardim la Edeni, leyi nga tsaliwa ka buku la Genesa a hi ntiyiso hikusa a yi fambisani ni Bibele hinkwalu. Hi xikombiso, Paul Morris lweyi a nga Mudjondzisi wa swa Wukhongeli a li: “A wugamu ka lona Bibele a li vulavuli hi jardim la Edeni.” Swi nga yendleka “tintivi” tin’wani ti nyima ni mavonelo wolawo kambe a hi ntiyiso.

Ku vula ntiyiso Bibele li vulavula hintamu hi jardim la Edeni, Adamu na Evha ni nyoka.a Kambe xihoxo xa tintivi leti, a hi xa nchumu loku xi pimanisiwa ni xihoxo lexi yendliwaka hi varhangeli va wukhongeli ni vakaneti va Bibele, hikusa loko va phika mhaka ya jardim la Edeni leyi nga tsaliwa ka buku la Genesa va phika Bibele hinkwalu. Hi mhaka muni?

Ku twisisa leswi nga yendleka ka jardim la Edeni, i swa lisima swaku hi kota ku twisisa Bibele hinkwalu. Hi xikombiso, Rito la Xikwembu li nga hi pfuna ku kuma tinhlamulu ta swivutiso swa lisima hintamu leswi vanhu va nga na swona. Kambe loko Bibele li hlamula swivutiso swoleswo, li vulavula hi leswi nga yendleka ka jardim la Edeni. A hi voneni swikombiso swin’wani.

● Hi mhaka muni hi guga hi tlhela hi fa? Adamu na Evha a va ta tama va hanya va nga fi loko a vo yingisa Yehovha. A va to fa ntsena loko va nga xi yingisi Xikwembu. Naswona siku leli va kalaka va nga xi yingisanga Xikwembu va sungule ku fa. (Genesa 2:16, 17; 3:19) Va ngheniwe hi xidjoho va tlhela va tluleta vana va vona xidjoho ni ku kala ku hetiseka. Hi mhaka leyo, Bibele li li: “Leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho, se lifu li tlulele vanhu hinkwavu hikusa hinkwavu va djohile.” — Varoma 5:12.

● Hi mhaka muni Xikwembu xi pfumelela swaku swilo swa ku biha swi yendleka? Ka jardim la Edeni, Sathana a vule swaku Xikwembu i muhembi funtshi xi tsona vanhu swilo swaswinene. (Genesa 3:3-5) Hi mhaka leyo a vule swaku mafumelo ya Yehovha a hi manene. Adamu na Evha va nyime na Sathana ka mhaka leyi, na vona a va pfumelanga ku fumiwa hi Yehovha, hi marito man’wani a va vula swaku munhu a fanele a tilangela leswi nga swaswinene ni leswi nga swa ku biha. Leswi Yehovha a nga Xikwembu lexi nga ni wutlharhi ni lexi nga ni wululami, a vone swaku a ko va ni ndlela yin’we ntsena ya ku lunghisa mhaka leyi: Ku nga ku nyika vanhu nkama swaku va tifuma hi lani va nga tilangela hi kona. Wubihi leli tamaka li va kona hileswi Sathana a fumaka misava li kombisa swaku marito lawa ma landzelaka i ntiyiso: Munhu a nge swi koti ku tifuma na a nga kongomisiwi hi Xikwembu. — Yeremiya 10:23.

● Hi mhaka muni Xikwembu xi yendle misava? Yehovha a a lava swaku misava yi saseka hintamu ku fana ni jardim la Edeni. A byele Adamu na Evha swaku va psala vana va tata misava va tlhela va “yi fuma,” va tlhela va yendla swaku misava hinkwayu yi saseka yi fana ni jardim la Edeni. (Genesa 1:28) Se Xikwembu a xi lava swaku misava yi va paradesi naswona ku tshama vana va Adamu na Evha na va twanana funtshi na va nga na xidjoho. Bibele li vulavula ngopfu hi leswi Xikwembu xi nga ta swi yendla swaku misava yi va paradesi.

● Hi mhaka muni Yesu a te misaveni? Leswi Adamu na Evha va kalaka va nga yingisanga swi yendle swaku vona ni vana va vona va fa, kambe Xikwembu hi lirhandzu xi nyika vanhu ntshembo. Xi rhume n’wana wa xona a ta misaveni swaku a ta ponisa vanhu. (Matewu 20:28) Swi vula yini swoleswo? Phela Yesu a ve “Adamu wa wugamu” naswona a yendle leswi Adamu a nga tsandzeka ku swi yendla. Leswi Yesu a nga yingisa Yehovha a nga vanga ni xidjoho. Hi ku swi rhandza a nyikele wutomi la yena swaku a ponisa vanhu, a yendla swaku vanhu hinkwavu va ku tshembeka va rivaleliwa swidjoho swa vona naswona hi ku famba ka nkama va kuma wutomi leli Adamu na Evha a va tikhorisa hi lona ka jardim la Edeni na va nga se djoha. (1 Vakorinto 15:22, 45; Yohani 3:16) Hi mhaka leyo Yesu a kombise swaku leswi Yehovha a a swi lava swaku misava leyi yi va paradesi la ku fana ni jardim la Edeni swi ta yendleka hikanunene.b

Leswi Xikwembu xi lavaka ku swi yendla hi misava, a hi mavunhwa naswona a hi djondzo ya wukhongeli ya wukanganyisi. Swi ta yendleka hikakunene. Ku fana ni leswi jardim la Edeni a li li kona lani misaveni, a li ni swiharhi ni vanhu va hikanunene, leswi Xikwembu xi swi tshembisaka hi nkama lowu taka swi ta yendleka. Indjhe na wena u ta va kona? U ta swi vona? Swi li ka wena. Kambe Xikwembu xi lava swaku vanhu va vanyingi va va ka paradesi, hambi lava a ku sunguleni a va yendla minchumu ya ku biha. — 1 Timotiya 2:3, 4.

Nkama Yesu na a fa, a vulavule ni wanuna lweyi a a ni mahanyelo ya ku biha. Wanuna lweyi a a li xigevenga funtshi a a swi tiva swaku a a fanele a dlayiwa. Kambe a kombele Yesu swaku a mu tiyisa, hi ku mu nyika ntshembo. Se Yesu a te yini? A te: “U ta va na mina aParadesini.” (Luka 23:43) Leswi Yesu a a lava swaku wanuna lweyi a a li xigevenga a pfuxiwa a tlhela a kuma wutomi la ku kala li nga heli aparadesi na wena a swi lava hintamu swaku u va kona! Phela Yesu ni Papayi wa yena va swi lava leswo! Loko na wena u swi navela, yendla hinkwaswu u nga swi kotaka swaku u djondza hi Xikwembu lexi nga yendla jardim la Edeni.

[Tinhlamuselo]

[Kwadru/Mufoto ka pajina]

WUPROFETA LELI TLHANGANISAKA BIBELE HINKWALU

“Ni ta yendla leswaku wena [ku nga nyoka] ni wansati mi nyenyana ni leswaku vana va wena ni n’wana wa wansati va nyenyana. N’wana wa wansati a ta ku pfotlosa nhloko kasi wena u ta mu luma xirhendze.” — Genesa 3:15.

Leli i wuprofeta la ku sungula la Bibele leli nga vuliwa hi Xikwembu ajardim la Edeni. I mani wansati, n’wana wa wansati, nyoka ni vana va nyoka? Naswona a va ta “nyenyana” hi ndlela yini?

NYOKA

I Sathana Davulosi. — Nhlawutelo 12:9.

WANSATI

I nhlengeletanu ya Yehovha ya le matilweni. (Vagalatiya 4:26, 27) Esaya a hlaye swaku “wansati” a a ta psala vanhu lava a va ta va tiko la Xikwembu. — Esaya 54:1; 66:8.

VANA VA NYOKA

I vanhu lava langaka ku yendla ku rhandza ka Sathana. — Yohani 8:44.

N’WANA WA WANSATI

Ku vuliwa Yesu Kreste lweyi a taka hi ka nhlengeletanu ya Yehovha ya le matilweni. A rito leli nge “n’wana” li vula ni vamakwavu va Kreste lava va nga ta fuma na yena amatilweni. Vakreste volavo lava nga langiwa swaku va ya hanya amatilweni va tlhela va vuliwa swaku i “Israyele wa Xikwembu”. — Vagalatiya 3:16, 29; 6:16; Genesa 22:18.

KU LUMIWA XIRHENDZE

I ku vavisiwa ka Mesiya swa nkamanyana. Sathana a yendle leswo nkama a nga yendla leswaku Yesu a dlayiwa. Kambe Yesu a game a pfuxiwa.

KU PFOTLOSIWA KA NHLOKO

Swi vula ku helisiwa ka Sathana. Yesu a ta helisa Sathana, naswona a nge he phindi a va kona. Kambe na a nga se yendla leswo, Yesu a ta rhanga hi ku helisa wubihi hinkwalu leli Sathana a nga li sungula aEdeni. — 1 Yohani 3:8; Nhlawutelo 20:10.

Leswaku u vona leswi Bibele li vulavulaka hi swona lerha broxura leli nge: Bibele—Yi Tamele Rungula Rihi? (hi Xitsonga) leli nga yendliwa hi Timboni ta Yehovha

[Mufoto ka pajina]

Adamu na Evha va hlupheke hintamu hi mhaka ya leswi va nga djoha.