Indjhe “Vakreste” Hinkwavu I Vakreste Va Ntiyiso?

I VAKRESTE vangaki lava nga kona? Hi ku ya hi buku leli nge Atlas do Cristianismo Global, hi 2010 a ku ni kolomu ka 2.3 bilhões wa Vakreste amisaveni hinkwayu. Buku loleli la lin’we li tlhela li kombisa swaku Vakreste lava, va lumba ku tlula 41.000 wa tikereke ta ku hambana, lani kereke yin’wani ni yin’wani yi nga ni tidjondzo ta yona ni minawu ya yona ya mahanyelo. Hi mhaka leyo swa twala ku va van’wani va karhateka. Swi nga yendleka van’wani va tivutisa leswi: ‘Indjhe tikereke leti hinkwatu ti vulaka swaku i Vakreste, i Vakreste va ntiyiso hikakunene?’

A hi kambisiseni mhaka leyi hi ndlela yin’wani. Hi xikombiso loko munhu a yendza a ya ka tiko lin’wani a fanele a byela lava tirhelaka ka mfumu swaku a ta hi ka tiko lini naswona a fanele a kombisa mapasi kumbe pasaporti lawa ma kombisaka swaku hi yena mani ni swaku a ta hi kwini. Hi ku fanana, leswaku munhu a va Mukreste wa ntiyiso a swi yenelanga ku va a vula ntsena swaku a ni lipfumelo ka Yesu, kambe ku ni swin’wani swi lavekaka! I mpsini swi lavekaka?

Rito leli nge “Mukreste” li sungule ku tirhisiwa loko se ku hundze lembe la 44 E.C. Luka lweyi a nga mun’we wa vatsali va Bibele a te: “Le Antiyokiya, hi kona lomu vadjondzisiwa va nga sungula ku vitaniwa Vakreste hi ku kongomisiwa hi Xikwembu.” (Mintirho 11:26) Phela lava a va vitaniwa swaku i Vakreste a va li vadjondzisiwa va Kreste. I mpsini swi yendlaka swaku munhu a va mudjondzisiwa wa Kreste? Buku lin’wani leli tlhamuselaka marito ya Bibele li li: “Ku va mulandzeli wa Yesu swi vula swaku munhu a tinyimisela ku yendla hinkwaswu leswi a nga swi kotaka leswaku a landzela Yesu wutomi la yena hinkwalu . . . ku nga na mhaka swaku ku yendleka yini.” Mukreste wa ntiyiso hi lweyi a landzelaka tidjondzo ta Yesu ni leswi a nga hi byela swona minkama hinkwayu, ku nga na mhaka swaku ku yendleka yini.

Indjhe swa koteka ku kuma vanhu va ku tshamisa xileswo ka hinkwavu lava vulaka swaku i Vakreste namuntlha? Kasi yena Yesu a vule swaku a hi ta va tivisa ku yini valandzeli va yena va ntiyiso? Ha ku rhamba swaku u kuma nhlamulu ya Bibele ya swivutiso leswi. Ka tinhlokomhaka leti landzelaka hi ta kambisisa 5 wa swilo leswi Yesu a nga swi vula leswi tlhamuselaka swi tlhela swi hi pfuna ku tsumbula Vakreste va ntiyiso. Hi ta kambisisa swaku i mpsini leswi Vakreste va minkameni ya vapostolo a va swi yendla ku va va kombisa swaku i Vakreste va ntiyiso. Hi ta tlhela hi zama ku tsumbula swaku i vamani lava namuntlha va nga Vakreste va ntiyiso.