‘Yingisani Leswi Ni Swi Vulaka’
“Loko mi yingisa leswi ni swi vulaka mi vadjondzisiwa va mina hikakunene, mi ta tiva ntiyiso kutani ntiyiso wu ta mi chunsa.” — YOHANI 8:31, 32.
Swi Vula Yini Leswo? Leswi Yesu a nga swi ‘vula’ ku hlayiwa tidjondzo hinkwatu ta yena leti a nga ti kuma ka Papayi wa yena lweyi a nga matilweni. Yesu a te: “Papayi lweyi a nga ni rhuma a ni byelile leswi ni nga ta swi vula ni leswi ni nga ta swi djondzisa.” (Yohani 12:49) Nkama na a khongela ka Yehovha Papayi wa yena lweyi a nga matilweni, Yesu a te: “Rito la wena i ntiyiso.” Phela Yesu minkama ya yinyingi a a tirhisa Rito la Xikwembu loko a djondzisa vanhu. (Yohani 17:17; Matewu 4:4, 7, 10) Hi mhaka leyo Vakreste va ntiyiso va fanele va yingisa leswi Yesu a nga ‘swi vula’ hi ku va va kholwa swaku Bibele ku nga Rito la Xikwembu, hi lona li djondzisaka ntiyiso naswona va fanele va li tirhisa leswaku va hanya hi leswi li swi djondzisaka ka wutomi la vona la siku na siku.
Vakreste Va Minkama Ya Vapostolo Va Swi Tirhisise Ku Yini Leswo? Mupostolo Pawulo lweyi ku nga yena a nga tsala mabuku ya manyingi ya Bibele a a li hlonipha hintamu Rito la Xikwembu ku fana na Yesu. Yena a te: “Matsalwa hinkwawu ma huma ka Xikwembu naswona ma pfuna”. (2 Timotiya 3:16) Vavanuna lava nga langiwa swaku va djondzisa Vakreste van’wani a va fanele va ‘namarhela rito la ku tshembeka loko va djondzisa leswaku va ta kota ku tiyisa hi djondzo yayinene’. (Tito 1:7, 9) Vakreste va minkama ya vapostolo va byeliwe swaku va fanele va tivonela leswaku va nga phasiwi hi “wutlharhi la misava leyi ni marito ya wukanganyisi, leswi sekeliwaka ka swihena swa vanhu, ka swilo swa masungulo swa misava ku nga li ka Kreste.” — Vakolosa 2:8.
I Vamani Lava Yingisaka Leswi Yesu A Nga Swi Vula Namuntlha? Buku leli nge A Constituição Dogmática Dei Verbum sobre a Revelação Divina la Vaticano leli nga sungula ku tirhisiwa hi 1965 naswona ku tlhelaka ku vulavuliwa hi lona ka buku la tidjondzo ta kereke ya katolika li vule leswi: “A hi hinkwaswu leswi kereke [ya katolika] yi swi djondzisaka yi swi kumaka ka Matsalwa ya Ku kwetsima. Hi mhaka leyo a swihena leswi yendliwaka akerekeni ni Matsalwa ya Ku kwetsima swi fanele swi hloniphiwa swi tlhela swi voniwa na swi fana.” A revhixta la Maclean li vulavule hi mufundhisi mun’wani wa xisati wa Toronto, aCanadá lweyi a nga vutisa leswi: “Hi mhaka muni hi fanele hi yingisa leswi nga vuliwa ka ku tlula 2.000 wa malembe lawa se ma nga hundza? Hi ni mavonelo ya hina yamanene kambe minkama hinkwayu a ma tirhisiwi hikusa hi tshamela ku ma twananisa na Yesu ni Matsalwa.”
Buku leli nge Nova Enciclopédia Católica li vule leswi hi Timboni ta Yehovha: “Leswi Timboni ta Yehovha ti kholwaka ka swona ni leswi ti hanyisaka xiswona ti swi kuma ka Bibele.” Ka malembe ya swoswinyana, Mboni ya Yehovha ya le Canadá a yi byela wanuna mun’wani swaku hi yona mani, se a yi tsemerhisa ku vulavula a ku: “Na swi tiva swaku hi wena mani” a gama a kombeta Bibele leli a li tameliwe hi Mboni ya Yehovha se a ku: “N’wina hi mi tiva hi Mabibele.”