BIBELE LI TXINTXA WUTOMI LA VANHU

I MPSINI leswi nga pfuna wansati lweyi a nga hluphiwa na wa ha li mutsongo swaku a tsaka ka wutomi la yena? Naswona i mpsini leswi nga yendla swaku wanuna lweyi a a terekela mfumu a va munhu wa ku rhula a tlhela a sungula ku djondzisa van’wani hi Xikwembu? Leswaku u kuma tinhlamulu ta swivutiso leswi, lerha switoriya leswi landzelaka.

“A ni swi lava hintamu ku rhandziwa.” — INNA LEZHNINA

LEMBE LA KU PSALIWA: 1981

TIKO LA KU PSALIWA: RÚSSIA

XITORIYA XA YENA: A HLUPHIWILE NKAMA NA A LI MUTSONGO

LESWI A NI HANYISA XISWONA: Vapsali va mina i timbheveve se na mina ni psaliwe na ni li mbheveve. Nkama na na ha li mutsongo anze nkama lowu ni nga tlhanganisa 6 wa malembe, wutomi a li tsakisa kambe hi ku tsopeta ka tihlo swilo swi txintxile. Vapsali va mina va divhorsiyarile. Hambileswi a na ha li mutsongo a ni swi tiva swaku i yini divhorsiyu, se leswo swi ni hete matimba. Leswi vapsali va mina a va nga ha li xikan’we, papayi ni makwenu wa mina wamukulu va sale ka doropa la Troitsk, se mina ni mamani wa mina hi ye ka doropa lin’wani leli vitaniwaka Chelyabinsk. Hi ku famba ka nkama, mamani a tlhele a chada kambe padraxtu wa mina a a li phuza hintamu byala funtshi a a tshamela ku ba mamani a tlhela a ba na mina.

Hi 1993, makwenu wa mina wamukulu a mbombomelile matini a gama a fa. Leswo swi wu khumbe hintamu ndjangu wa mina. Naswona leswi mamani a a vavisekile hi mhaka lifu la makwenu wa mina, a sungule ku phuza, se ku fana ni nuna wa yena, a sungule ku ni hlupha. Phela a ni swi lava hintamu ku rhandziwa. Se, ni ye ka tikereke ta ku hambanahambana leswaku ni kuma nchumu lexi a xi ta ni tiyisa ka swikarhatu leswi a ni kumana na swona kambe leswo a swi zanga swi yendleka.

LESWI BIBELE LI NGA LI TXINTXISA XISWONA WUTOMI LA MINA: Nkama a ni ni 13 wa malembe, mun’we wa lava a ni fundha na vona xikolweni, lweyi a a li Mboni ya Yehovha, a ni djondzise hi switoriya swa vanhu lava ku vulavuliwaka hi vona ka Bibele. Ni swi rhandze hintamu ku djondza hi vanhu va ku fana na Nowa na Yobo, lava nga tama va tirhela Xikwembu hambileswi va nga kumana ni swikarhatu ka wutomi la vona. Se, ni yo vhela ni sungula ku djondza Bibele ni Timboni ta Yehovha ni ku ya ka mintlhanganu ya tona.

Ku djondza Bibele swi ni pfune ku vona mintiyiso ya ku hlamalisa. Ni tsake hintamu hi ku tiva swaku Xikwembu xi ni vito. (Tipisalema 83:18) Ku vona leswi Bibele li nga swi vula swaku a swi ta yendleka “ka masiku ya wugamu” na swi hetiseka swi ni hlamalise hintamu. (2 Timotiya 3:1-5) Funtshi ku djondza hi ntshembo wa ku pfuxiwa ka vafi swi ni tsakisile. Phela ni ta tlhela ni mu vona makwenu wa mina! — Yohani 5:28, 29.

Hambileswo, a hi hinkwavu a va tsaka na mina. Mamani wa mina ni nuna wa yena a va tshamela ku holovisa Timboni ta Yehovha funtshi a va ni sindzisa ku nyima ku djondza Bibele. Kambe a ni swi rhandza hintamu leswi a ni swi djondza lakaku a ni nga pimisi hi ku nyima ku djondza.

Leswi ndjangu wa mina a wu nga swi lavi swaku ni djondza Bibele, a swi ni vevukelanga ku tama ni yendla leswo. Kambe ku yendleke nchumu xin’wani lexi nga ni tshova mbilu. Makwenu wa mina wamutsongo lweyi a ni famba na yena mintlhanganwini, na yena a mbombomelile ka mati a gama a fa. Kambe Timboni ta Yehovha ti ni pfunile, tona ti ni tiyisile ka nkama lowu wa ku karhata. Phela lirhandzu leli a ni nga li voni ka ndjangu wa mina, ni li vonile ka tona. Leswi swi ni pfune ku vona swaku a Timboni ta Yehovha hi tona Vakreste va ntiyiso. Se hi 1996, ni tsakamisiwile ni va Mboni ya Yehovha.

SWI NI PFUNISE KU YINI: Se ni ni 6 wa malembe na ni chade ni wanuna lweyi a ni rhandzaka hintamu lweyi a vitaniwaka Dmitry naswona havambirhi hi tirha abetel la Rússia. Funtshi swoswi vapsali va mina a va ha lwisani ni leswi ni kholwaka ka swona.

Ni mu khensa hintamu Yehovha hileswi a nga ni pfuna swaku ni mu tiva, funtshi ku mu tirhela swi ni yendla ni ya ni tsaka ka wutomi la mina.

“A ni ni swivutiso swa swinyingi leswi a swi ni karhata.” — RAUDEL RODRÍGUEZ RODRÍGUEZ

LEMBE LA KU PSALIWA: 1959

TIKO LA KU PSALIWA: CUBA

XITORIYA XA YENA: A A TEREKELA MFUMU

LESWI A NI HANYISA XISWONA: Ni psaliwe Havana, aCuba, ka ndhawu leyi ku tala ka vanhu a va li swisiwana naswona a swi tolovelekile swaku vanhu va lwa switaratwini. Hi ku famba ka nkama ni sungule ku rhandza ntlangu lowu ku lwaka vanhu vambirhi lowu vitaniwaka judu ni mintlangu yin’wani leyi fambisanaka ni ku lwa.

Axikolweni a ni tiva naswona vapsali va mina a va ni byela swaku ni fanele ni nghena univhersidadi. Ni sungule ku vona swaku a swilo atikweni a swi lava ku yampsisiwa se hi mhaka leyo ni sungule ku terekela mfumu. Mina ni kolega wa mina hi dumele phoyisa, swaku hi li yivela xibamu. Hi li bile hi gama hi li siya na li vavisiwe swinene ka nhloko. Se hi khomiwile hi pfaleliwa djele naswona loko hi thethisiwile hi byeliwe swaku a hi fanele hi dlayiwa hi ku duvuliwa. A no va ni 20 wa malembe ntsena kambe se a ni li kusuhi ni ku fa!

Nkama na ni li djele, a ni ensayara leswi a ni ta swi yendla phambheni ka maphoyisa. A ni nga lavi ku kombisa swaku na chava kambe a ni ni swivutiso swa swinyingi leswi a swi ni karhata, swa ku fana ni leswi nge: ‘Hi mhaka muni ku nga li na wululami amisaveni? Indjhe ku ni wutomi la ku yampsa ku tlula leli?’

LESWI BIBELE LI NGA LI TXINTXISA XISWONA WUTOMI LA MINA: Hi ku famba ka nkama va txintxe xiboho lexi a va xi yendlile xa leswaku hi dlayiwa, va gama va vula swaku hi ta tshama djele 30 wa malembe. Ku ve hi nkama wolowo ni nga tiva Timboni ta Yehovha leti a ti pfaleliwe djele hi mhaka lipfumelo la tona. Ni hlamalisiwe hintamu hi mahanyelo ya tona, a ti nga chavi nchumu kambe a ti swi yendla hi ndlela ya ku rhula. Ti khomiwe na ti nga na nandzu kambe a ti tshama na ti tsakile.

Timboni ta Yehovha ti ni djondzise swaku hi mhaka muni Xikwembu xi yendle vanhu. Hi ku tirhisa Bibele ti ni pfune ku vona swaku Xikwembu xi ta txintxa misava yi va paradesi lani ku nga ta va ni vanhu lava yendlaka swilo swaswinene ntsena. Funtshi ni tlhele ni djondza swaku misava yi ta tala hi vanhu lava va nga ta hanya hi masiku ni masiku na va nga hlupheki. — Tipisalema 37:29.

A ni swi rhandza leswi a ni swi djondza ni Timboni ta Yehovha, kambe wumunhu la mina a li hambanile swinene ni la tona. A ni pimisa swaku a ni nge te swi kota ku kala ni nga tipeti ka swa politika kumbe loko munhu a ni yendlela swa ku biha ni nga mu tlheliseli hi swa ku biha. Hi mhaka leyo ni tinyimisele ku lerha Bibele hi noxe. Loko ni hetile ni swi vonile swaku Timboni ta Yehovha o va tona ntsena leti hanyaka ku fana ni Vakreste va ku sungula.

Djondzo ya Bibele yi ni pfune ku vona swaku a ku ni swa swinyingi leswi a ni fanele ni swi txintxa. Hi xikombiso, a ni fanele ni tshika ku rhuketela kambe ni vulavula kahle ni vanhu. Naswona a ni fanele ni tshika ku dzaha, funtshi a swi nga ha lavi ni tipeta ka swa politika. A swi ni vevukelanga ku txintxa kambe hi ku pfuniwa hi Yehovha ni swi kotile hi kutsongokutsongo.

Naswona leswi nga ni karhatela hintamu ku txintxa i ku djondza ku tikhoma. Ni swoswi na ha khongela ka Yehovha swaku ni kota ku tikhoma. Ni pfuniwa hintamu hi tindzimana ta Bibele ta ku fana ni Swivuriso 16:32, leyi nge: “Lweyi a hlwelaka ku kwata wa yampsa ku tlula wanuna wa matimba, ni lweyi a tikhomaka ku tlula lweyi a hlulaka doropa.”

Hi 1991 ni tsakamisiwile ni va Mboni ya Yehovha. Ni tsakamisiwe ka tanki la mati adjele. Hi lembe leli li nga landzela, mina ni van’wani lava a hi khomiwile hi humesiwe djele hi ya Espanha lani maxaka ya hina a ma li kona. Nkama ni nga fika, hi xihantla ni sungule ku ya ka mintlhanganu ya Timboni ta Yehovha. Timboni ta Yehovha ti ni yamukele kahle ingi se i khale na hi tivana, ti ni pfunile swaku ni sungula wutomi la nyuwani.

SWI NI PFUNISE KU YINI: Swoswi ni tsakile hi ku tirhela Xikwembu ni nsati wa mina ni vana va mina va tintombhi. Ni ni nkateko wa ku tirhisa nkama wa mina swaku ni pfuna vanhu swaku va djondza Bibele. Minkama yin’wani ni tshuka ni khumbuka nkama na ni li jovhem funtshi na ni li kusuhi ni ku fa. Phela na yi khensa minkateko hinkwayu leyi ni nga yi kuma. Naswona a ni wu voni nkama wa ku hanya ka misava ya nyuwani lani ku nga ta va ni ku lulama naswona “lifu a li nga ha ta va kona”. — Nhlawutelo 21:3, 4.

[Marito Ka Pajina]

“Ni tsake hintamu hi ku tiva swaku Xikwembu xi ni vito”

[Foto Ka Pajina]

Mina ni nuna wa mina ha swi rhandza ku chumayela timbheveve ni ku tlhela hi ti komba mavhidiyo ya lirimi la mavoko