‘Mi Nga Fani Ni Vanhu Va Misava’

“Misava yi va nyenyile hileswi va kalaka va nga fani ni vanhu va misava.” — YOHANI 17:14.

Swi Vula Yini Leswo? Leswi a a nga fani ni vanhu va misava, Yesu a nga zanga a nghena ka maguwa ya politika ya vanhu va nkameni wa yena. Yesu a te: “Loko [Mfumu wa mina] a wo fana ni mimfumu ya misava leyi, valandzeli va mina a va ta va va ni lwelile swaku ni nga khomiwi hi Vayuda. Kambe ntiyiso hi leswaku Mfumu wa mina a hi wa misava leyi.” (Yohani 18:36) A tlhele a byela vadjondzisiwa va yena swaku va fambela kule ni mavulavulelo ni mahanyelo lawa ma kalaka ma nga fambisani ni Rito la Xikwembu. — Matewu 20:25-27.

Vakreste Va Minkama Ya Vapostolo Va Swi Tirhisise Ku Yini Leswo? Jonathan Dymond, lweyi a tsalaka timhaka leti fambisanaka ni swa wukhongeli a vule swaku Vakreste va minkameni ya vapostolo “a va nga pfumeli ku ya anyimpini hambileswi a va swi tiva swaku a ku ta vulavuliwa ku biha hi vona, va khomiwa va petiwa djele kumbe va dlayiwa.” A va vona swi yampsa ku xanisiwa ku tlula ku va va tipeta ka swilo swa politika. Mahanyelo ya vona yamanene a ma yendla swaku va hambana ni vanhu van’wani. Phela Vakreste a va byeliwe leswi: “Swa va hlamalisa leswi mi kalaka mi nga ha yendli swilo swa manyala ku fana na vona, se va vulavula swa ku biha hi n’wina.” (1 Pedru 4:4) Will Durant lweyi a tsalaka swilo leswi nga yendleka khale a vule swaku “mahanyelo yamanene ya Vakreste ni leswi a va kombisa ntwelawusiwana a swi yendla swaku va nyenyiwa hi Varoma lava a va ni mahanyelo ya ku biha.”

I Vamani Lava Yingisaka Leswi Yesu A Nga Swi Vula Namuntlha? Loko li vulavula hi mhaka ya ku kala hi nga tipeti ka tinyimpi a Nova Enciclopédia Católica li li: “Ku va munhu a nga yi nyimpini hi mhaka ya lipfalu la yena a swi pfumeleliwi.” A jornali la Reformierte Presse li vulavula hi relatoriyu la timfanelo ta vanhu, leli vitaniwaka Timfanelo ta Vanhu va Afrika. Lona li vula swaku tikereke hinkwatu tive kona ka nyimpi ya ku dlayana ka vanhu hi tinxaka aRuanda hi 1994 “ko va Timboni ta Yehovha ntsena ti kalaka ti nga lwanga ka nyimpi leyi.”

Profesori mun’wani nkama na a vulavula hi leswi nga yendleka nkama na ku dlayeteliwa Vayuda ankameni wa Manazi a vule swaku “a ku nga na munhu lweyi a nga phikiza mavunhwa lawa Vayuda a va lumbetiwa hi wona kumbe ku va vhikela ka swilo swa ku biha leswi a swi va yendlekela naswona leswo a swi nga li swinene.” Kambe loko se a ye ka Muzewu lowu nga Estados Unidos de América lowu kombisaka leswi nga yendleka nkama na ku dlayeteliwa Vayuda a game a tsala leswi: “Swoswi na swi tiva swaku leswi a ni swi pimisa a hi swona swi nga yendleka.” A tsumbule swaku Timboni ta Yehovha ti tame ti khomelela ka tidjondzo ta tona ni ka leswi ti kholwaka ka swona hambileswi a ti xanisiwa hi mhaka ya ku yendla leswo.

Hi nga ku yini hi mahanyelo ya Vakreste? A revhixta la U.S. Catholic li vula swaku ku tala ka majovhem lawa se ma nga kula ya kereke ya katolika, a ma pfumelelani ni tidjondzo ta wukhongeli ka timhaka ta ku fana ni ku vanhu vambirhi va tshama xikan’we na va nga se chada ni ku va vanhu vambirhi va famba masangu xikan’we na va nga se chada. Li vulavula hi mufundhisi mun’wani lweyi a nga te: “Ni nga vula swaku ku tala ka vanhu va tshama xikan’we na va nga chadanga.” A Nova Enciclopédia Britânica li vula swaku ko va Timboni ta Yehovha ntsena “leti tamaka ti va ni mahanyelo yamanene.”