‘Va Rhandzana’

“Ni mi nyika nawu wa nyuwani wa leswaku mi rhandzana; ku fana ni leswi na mina ni nga mi rhandza, na n’wina rhandzanani. Hinkwavu va ta tiva swaku mi vadjondzisiwa va mina loko mi rhandzana.” — YOHANI 13:34, 35.

Swi Vula Yini Leswo? Yesu a vule swaku a valandzeli va yena a va fanele va rhandzana ku fana ni leswi yena a nga va rhandza. A lirhandzu leli Yesu a a a li na lona a li nga na xikheto ku fana ni leswi vanhu a va hanyisa xiswona ka masiku ya yena. (Yohani 4:7-10) A lirhandzu li yendle swaku Yesu a nyikela hi nkama wa yena, matimba ni ku tlhela a pfumela ku xaniseka leswaku a pfuna van’wani. (Marka 6:30-34) Hi wugamu Yesu a kombise lirhandzu lalikulu hintamu swinene. Yena a te: “Hi mina murisi wamunene; murisi wamunene a nyikela wutomi la yena swaku a fela tinyempfu.” — Yohani 10:11.

Vakreste Va Minkama Ya Vapostolo Va Swi Tirhisise Ku Yini Leswo? Ka minkama ya vapostolo, Vakreste a va vitanana swaku i “vamakwerhu.” (Filimoni 1, 2) Vanhu va matiko hinkwawu a va yamukeliwa abandleni hikusa Vakreste a va kholwa swaku “a ku na ku hambana xikarhi ka Muyuda ni Mugriki. Hinkwavu va ni Hosi yin’we”. (Varoma 10:11, 12) Loko se ku hundze pentekoxta ya lembe la 33 ka nguva ya hina, vadjondzisiwa lava a va tshama aYerusalema “a va xavisa minchumu ya vona va gama va phakelana male ya kona hi ku ya hi ku pfumala ka munhu.” A va yendla leswo swaku lava a va ha ku tsakamisiwa va kota ku tama va tshama aYerusalema “va tinyiketela ka leswi vapostolo a va swi djondzisa.” (Mintirho 2:41-45) Hi mhaka muni va yendle leswo? Na ku nga se hundza 200 wa malembe na vapostolo va file, Tertulliano a vule leswi vanhu a va swi vula hi Vakreste, a te: “A va rhandzana . . . funtshi a va tinyimisele ku fa va fela van’wani.”

I Vamani Lava Yingisaka Leswi Yesu A Nga Swi Vula Namuntlha? Buku leli nge A História do Declínio e Queda do Império Romano la 1837 li vule swaku ndzeni ka malembe ya manyingi vanhu lava vulaka swaku i Vakreste “va hluphane hintamu hi xivona ku tlula leswi va nga hluphisiwa xiswona hi vanhu van’wani lava kalaka va nga khongeli.” Ka pexkiza leli nga yendliwa swoswinyana a Estados Unidos de América, ku kumiwe swaku vanhu lava nga ni xikheto minkama ya yinyingi i vanhu lava khongelaka naswona va tivulaka Vakreste. Vanhu va wukhongeli la kukarhi va tshamaka ka tiko lin’we a va twanani ni vanhu va wukhongeli loleli la lin’we kambe va tshamaka ka tiko lin’wani hi mhaka leyo, loko ku tshuka ku humelela swiyimu leswi lavaka swaku va pfunana, swa va karhatela ku va va pfunana.

Hi 2004, nkama ku nga va ni xidzedze xaxikulu aFlórida ku ringana tiwheti timbirhi, lweyi a a vonelela ntirho wa ku lamulela tingozi aFlórida a a lava ku vona swaku swilo leswi a swi ta pfuna vanhu a swi phakeliwa kahle ke? Se a vule swaku a ku nga na ntlawa wun’wani lowu a wu tilulamisele kahle ku tlula Timboni ta Yehovha naswona a tinyikelile leswaku a va pfuna hi leswi a va ta swi lava. Hi 1997, a ntlawa wa vamakwerhu va ku lamulela tinghozi wu yendzile wu ya aRepública Democrática do Congo naswona a wu ni mimirhi, swakudla ni mpahla leswaku va pfuna vamakwerhu ni vanhu lava a va ta lava ku pfuniwa. Handle ka leswo a Timboni ta Yehovha aEuropa ti nyikele hi minchumu leyi yi ringanaka 1 milhão wa madolari.