“Mahungu Lawa Ya Ku Tsakisa Ya Mfumu Ma Ta Chumayeliwa”

“Mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu; kutani hi kona magamu ma nga ta fika.” — MATEWU 24:14.

Swi Vula Yini Leswo? Luka lweyi a nga mun’we wa lava nga tsala Bibele a vule leswi: “Yesu a gama a famba hi madoropa ni swidoropani, a chumayela mahungu ya ku tsakisa ya Mfumu wa Xikwembu.” (Luka 8:1) Yesu hi yexe a te: “Ni fanele ni ya chumayela mahungu ya ku tsakisa ya Mfumu wa Xikwembu ni le ka madoropa man’wani, hikusa hi swona ni nga rhumiwa swona.” (Luka 4:43) Yesu a game a rhuma vadjondzisiwa va yena swaku va chumayela mahungu ya ku tsakisa ka madoropa ni ka swi doropani naswona hi ku famba ka nkama a va byele leswi: “Mi ta va timboni ta mina . . . anze amagamu ya misava.” — Mintirho 1:8; Luka 10:1.

Vakreste Va Minkama Ya Vapostolo Va Swi Tirhisise Ku Yini Leswo? Vadjondzisiwa va Yesu va tekele ku yendla leswi a nga va rhuma. “Naswona siku ni siku a va nga tshiki ku djondzisa ni ku chumayela atempeleni ni hi yindlo ni yindlo hi ta mahungu ya ku tsakisa ya leswaku Yesu hi yena Kreste.” (Mintirho 5:42) Ntirho wa ku chumayela a wu nga yendliwi hi vanhu lava a va voniwa na va li va lisima ntsena. Wanuna mun’wani lweyi a vuliwaka August Neander a vule swaku “Celso, ku nga wanuna wa ku sungula lweyi a nga tsala swilo swa ku biha hi Vakreste a yi tekele hansi mhaka ya leswaku varhungi va mpahla, varhungi va swifambu, varimi, lava va ku kala va nga djondzanga, ni vanhu lava a va nga li va lisima hi vona a va chumayela mahungu ya ku tsakisa hi ku hiseka.” Ka buku la yena leli nge Os Primeiros Séculos da Igreja, Jean Bernardi a tsale leswi: “[Vakreste] a va fanele va bula ni vanhu hinkwavu ka tindhawu hinkwatu. A switaratwini, amadoropeni, ka tindhawu ta ku tala hi vanhu ni le makaya ya vona. Va yamukeliwa kumbe a va yamukeliwi. . . . A va fanele va chumayela anze amagamu ya misava.”

I Vamani Lava Yingisaka Leswi Yesu A Nga Swi Vula Namuntlha? David Watson lweyi a nga mufundhisi ka wukhongeli la Anglicano a tsale leswi: “Leswi tikereke ti tsandzekaka ku chumayela ni ku djondzisa hi ndlela yayinene swi yendla swaku vanhu va nga vi ni mahanyelo yamanene namuntlha.” José Luis Pérez Guadalupe a tsale leswi ka buku la yena leli nge Porque é Que os Católicos Estão a Ir-se Embora? A va wukhongeli la Evangélico ni va Adventista ni vanhu va wukhongeli lin’wani “a va chumayeli hi munti ni munti.” Kambe loko a vulavula hi Timboni ta Yehovha a te: “Timboni ta Yehovha ti yendla ntirho wa tona wa ku chumayela hi munti ni munti.”

Ka buku leli nge Cato Supreme Court Review, 2001-2002 ku tsaliwe marito ya Jonathan Turley lawa ma nge: “Loko u vulavula hi Timboni ta Yehovha ku tala ka vanhu va ta tsutsumela ku pimisa hi vachumayeli lava hi yendzelaka makaya hi nkama wa ku kala wu nga li kahle. Timboni ta Yehovha a to chumayela hi munti ni munti swaku ti djondzisa vanhu leswi ti kholwaka ka swona ntsena, kambe ti yendla leswo leswaku ti kombisa lipfumelo la tona.”

[Kwadru leli nga ka pajina]

Se Wa Va Tiva Vakreste Va Ntiyiso?

Hi ku ya hi leswi u nga swi djondza ka Bibele leswi nga kombisiwa ka tinhlokomhaka leti, hi mavonelo ya wena, i vamani Vakreste va ntiyiso? Hambileswi ku nga ni wukhongeli la linyingi leli tivulaka swaku i Vakreste kambe khumbuka leswi Yesu a nga swi vula ka vadjondzisiwa va yena, a te: “A hi vanhu hinkwavu lava ni vitanaka va ku: ‘Hosi, Hosi,’ lava nga ta nghena ka Mfumu wa matilo, kambe ku ta nghena ntsena lava yendlaka ku rhandza ka Papayi wa mina lweyi a nga matilweni.” (Matewu 7:21) Ku tiva lava yendlaka ku rhandza ka Papayi lweyi a nga matilweni, leswi kombisaka swaku hi vona Vakreste va ntiyiso u tlhela u tipatsa na vona swi ta ku pfuna swaku u kuma minkateko leyi nga ta tisiwa hi Mfumu wa Xikwembu. Hi kombela swaku u vulavula ni Timboni ta Yehovha leti nga ku nyika revhixta leli swaku ti ku byela swin’wani leswi nga ta yendliwa hi Mfumu wa Xikwembu ni minkateko leyi nga ta tisiwa hi Mfumu lowu. — Luka 4:43.