Mfumu Wa Xikwembu Wu Li Wa Lisima Ka Yesu?

Hilani hi nga swi vona hi kona ka nhlokomhaka leyi nga hundza, Yesu a a rhangisa ku “chumayela mahungu ya ku tsakisa ya Mfumu wa Xikwembu.” (Luka 8:1) A tirhe hi matimba, a fambe mpfhuka wa ku leha swinene aIsrayele swaku a djondzisa vanhu hi Mfumu wa Xikwembu. Ntirho wa yena wu tsaliwe ka 4 wa Tievhangeli leti vulavulaka hi Mfumu wa Xikwembu makhambi ya ku tlula 100. Makhambi ya manyingi i marito ya yena Yesu, hi mhaka leyo i switsongo leswi swi nga tsaliwa mayelana ni leswi yena a a nga swi vula hi Mfumu wa Xikwembu! — Yohani 21:25.

Hi mhaka muni Mfumu a wu li wa lisima ka Yesu nkama lowu a ha li lani misaveni? Xivangelo xin’wani hi leswaku yena a a swi tiva swaku a a langiwe hi Xikwembu swaku a va Hosi ya Mfumu lowu. (Esaya 9:6; Luka 22:28-30) Kambe xikongomelo xa Yesu a ku nga li ku kuma matimba kumbe ku dzunisiwa. (Matewu 11:29; Marka 10:17, 18) Yesu a nga vulavulanga hi Mfumu na pimisa hi yena ntsena. Kambe Mfumu wa Xikwembua a wu li wa lisima hintamu ka Yesu, ngopfungopfu hi mhaka ya swilo leswi wu nga ta swi yendlela vanhu lava a va rhandzaka ku nga Papayi wa yena ni vadjondzisiwa va yena va ku tshembeka.

I YINI LESWI MFUMU WU NGA TA SWI YENDLELA PAPAYI WA YESU?

Yesu a mu rhandza hintamu Papayi wa yena wa le tilweni. (Swivuriso 8:30; Yohani 14:31) Phela wa li rhandza wumunhu la Papayi wa yena la ku fana ni lirhandzu, ntwelawusiwana ni wululami. (Deteronoma 32:4; Esaya 49:15; 1 Yohani 4:8) Hi mhaka leyo, hi nga tiyiseka swaku Yesu, wa ma nyenya mavunhwa lawa Papayi wa yena a hembeliwaka wona ya ku fani ni: Swaku Xikwembu a xi na mhaka ni ku hlupheka ka hina vanhu, ni leswaku xi lava swaku hi hlupheka. Lexi i xivangelo xin’wani xi nga yendla swaku Yesu a chumayela hi ku hiseka “mahungu ya ku tsakisa ya Mfumu.” Yena a a swi tiva swaku Mfumu a wu ta lwela vito la Papayi wa yena. (Matewu 4:23; 6:9, 10) Mfumu a wu ta swi yendlisa ku yini leswo?

Hi ku tirhisa Mfumu, Yehovha a ta txintxa ndlela leyi vanhu va hanyisaka xiswona. A ta “limpa mihloti hinkwayu” ka matihlo ya vanhu va ku tshembeka. Yehovha a ta yendla leswo hi ku helisa swilo leswi yendlaka vanhu va rila “lifu a li nga ha ta va kona, hambi nkosi, ku rila ni ku twa ku vava a swi nge he vi kona.” (Nhlawutelo 21:3, 4) Hi ku tirhisa Mfumu, Xikwembu xi ta helisa ku hlupheka hinkwaku.b

Se a swi hi hlamalisi leswi Yesu a a swi rhandza hintamu ku chumayela vanhu hi Mfumu! Yena a a swi tiva swaku Mfumu a wu ta komba leswaku Papayi wa yena a ni matimba ni ntwelawusiwana. (Yakobe 5:11) Naswona Yesu a a swi tiva swaku Mfumu a wu ta pfuna vanhu va ku tshembeka.

I YINI LESWI MFUMU WU NGA TA SWI YENDLELA VANHU VA KU TSHEMBEKA?

Na a nga se ta lani misaveni, Yesu a a tshama matilweni ni Papayi wa yena. Papayi a tirhise N’wana swaku a yendla swilo hinkwaswu ku sukela ka matilo, tinyeleti, ma galáxia ya manyingi hambi hi planeta ya hina ya ku saseka; a tlhele a yendla ni swiharhi swaku swi tshama ka lona. (Vakolosa 1:15, 16) Kambe ka hinkwaswu, Yesu a “rhandza swinene vanhu” ku tlula hinkwaswu. — Swivuriso 8:31.

Ntirho lowu Yesu a nga wu yendla wu kombisa swaku a a va rhandza vanhu. Ku sukela ku sunguleni, Yesu a swi kombisile swaku a tile lani misaveni swaku a ta “chumayela mahungu ya ku tsakisa ka swisiwana.” (Luka 4:18) Kambe Yesu a swi kombisile swaku wa va rhandza vanhu hi marito ni hi swiyendlo makhambi ya manyingi. Hi xikombiso, nkama xitsungu xaxikulu xi nga ta swaku xi ta mu yingisa, Yesu a xi twele “wusiwana; se a hanyisa va ku vabya xikarhi ka xona.” (Matewu 14:14) Nkama wanuna lweyi a a ni mavabyi ya ku bola xikhumba a nga kombisa swaku a ni lipfumelo la leswaku Yesu a a ta mu hanyisa loko a swi lava, hi lirhandzu Yesu a mu hanyisile. Nkama a nga hanyisa wanuna lweyo a te: “Na swi lava! Hanyisiwa.” (Luka 5:12, 13) Khambi lin’wani nkama a nga vona munghanu wa yena Mariya na a rila hi mhaka ya leswi makwenu wa yena Lazaru a nga fa, Yesu ‘a tlhaveke swinene mbilwini,’ naswona “a vaviseka ngopfu,” se “a xiririka mihloti.” (Yohani 11:32-36) Yesu a game a yendla nchumu xa ku hlamalisa, a pfuxe Lazaru hambileswi se a ku hundza 4 wa masiku na a file! — Yohani 11:38-44.

I ntiyiso leswaku Yesu a a swi tiva swaku leswi a nga swi yendla hi nkama wolowo a swi li swa nkamanyana. A a swi tiva swaku hi ku famba ka nkama, hinkwavu lava a nga va hanyisa a va ta tlhela va vabya naswona hinkwavu lava a nga va pfuxa a va ta tlhela va fa. Hi mhaka leyo, Yesu a a swi tiva swaku Mfumu wa Xikwembu hi wona lowu a wu ta helisa swikarhatu leswi hi ku helela. Se Yesu a nga yo yendla masingita ntsena, kambe a tlhele a chumayela hi ku hiseka “mahungu ya ku tsakisa ya Mfumu.” (Matewu 9:35) Masingita lawa Yesu a nga ma yendla mo va swikombiso ntsena swa leswi Mfumu wa Xikwembu wu nga ta swi yendla ku nga li khale amisaveni hinkwayu. A hi voneni switshembiso swin’wani swa Bibele swa nkama lowu taka.

• 

  Mavabyi ma ta hela.

  “Ka nkama wolowo, lava va nga fa matihlo va ta vona, ni lava nga fa tindleve va ta yingisa. Ka nkama wolowo, lweyi a nga limala a ta tlula ku fana ni mhunti, ni mbeveve yi ta huwelela hi ku tsaka.” Naswona, “a ku na munhu lweyi a tshamaka kona lweyi a nga ta ku: ‘Na vabya.’” — Esaya 33:24; 35:5, 6.

• 

  A lifu li ta hela.

  “Lava ku lulama va ta tshama amisaveni, va ta hanya ka yona hi masiku ni masiku.” — Tipisalema 37:29.

  “A ta minta lifu li nga ha vi kona, Yehovha Hosi Leyikulu a ta limpa mihloti ka matihlo hinkwawu.” — Esaya 25:8.

• Lava nga fa va ta pfuxiwa.

  “Hinkwavu lava nga ka masirha va . . . ta twa rito la yena se va huma.” — Yohani 5:28, 29.

  Vanhu “va ta pfuxiwa.” — Mintirho 24:15.

• 

  Hinkwavu va ta va ni makaya ni mintirho.

  “Va ta yaka tiyindlo va tshama ka tona, va ta byala masimu ya mawuvha va dla mihandzu ya kona. A va nga ha ta yaka ku gama ku tshama mun’wani, a va nga ha ta rima ku gama ku dla mun’wani. . . . Vanhu va mina lava ni nga va langa va ta tikhorisa swinene hi mintirho ya mavoko ya vona.” — Esaya 65:21, 22.

• 

  Tinyimpi ti ta hela.

  “A helisa tinyimpi amisaveni hinkwayu.” — Tipisalema 46:9.

  “Tiko a li nge he lwi ni tiko lin’wani, naswona a va nge he djondzeli ku lwa nyimpi.” — Esaya 2:4.

• 

  Ndlala yi ta hela.

  “Misava yi ta humesa mihandzu ya yona; Xikwembu, Xikwembu xa hina, xi ta hi katekisa.” — Tipisalema 67:6.

  “Ku ta va ni swakudla swa swinyingi amisaveni; swi ta va swinyingi ni le henhla ka tintshava.” — Tipisalema 72:16.

• Wusiwana li ta hela.

  “Swisiwana a swi nge khohlwiwi hi ku helela.” — Tipisalema 9:18.

  “Yi ta pfuna swisiwana leswi kombelaka ku pfuniwa, ni lava kalaka va nga na nchumu ni hinkwavu lava kalaka va nga na wa ku va pfuna. Yi ta swi twela wusiwana swisiwana ni lava pfumalaka, yi ta vhikela wutomi la swisiwana.” — Tipisalema 72:12, 13.

Loko u vona switshembiso leswi, se wa swi twisisa swaku hi mhaka muni Mfumu wu li wa lisima ka Yesu? Nkama na a li lani misaveni, Yesu a a hisekela ku vulavavula hi Mfumu wa Xikwembu ka vanhu hinkwavu lava a va lava ku mu yingisela, hikusa a a swi tiva swaku Mfumu hi wona lowu a wu ta helisa swikarhatu hinkwaswu swa vanhu.

Swi ku tsakisile ku tiva switshembiso swin’wani swa Bibele mayelana ni Mfumu? Se u nga yendla yini swaku u djondza swin’wani mayelana ni Mfumu? U nga yendla yini swaku u kuma minkateku leyi? Nhlokomhaka leyi landzelaka, yi ta hlamula swivutiso leswi.