Mina A No Pimisa Hi Mina Ntsena

WUTOMI LA MINA LA KHALE:

Nkama na na ha li mutsongo, ndjangu wa mina wu tshame aLeipzig aAlemanha Oriental kusuhi ni frontera la Checa ni Polaca. Se loko ni hambe 6 wa malembe, hi rhurhile hi ya tshama ka tiko lin’wani hi mhaka ya ntirho wa papayi wa mina, ku sungula hi tshame Brazil hi gama hi ya aEquador.

Nkama na ni ni 14 wa malembe ni yisiwe a internatu aAlemanha. Leswi vapsali va mina a va li América do Sul ni sindziseki ku djondza ku tihlayisa hi noxe, hi mhaka leyo ni sungule ku kala ni nga ha yingisi munhu. A ni nga na mhaka ni leswi vanhu a va pimisa swona hi wumunhu la mina.

Loko ni ni 17 wa malembe vapsali va mina va tlhelele aAlemanha. Ku sunguleni ni ye ni ya tshama na vona. Kambe se a ni nga ha swi koti ku hanya hi minawu ya vona. Nkama ni nga hamba 18 wa malembe ni rhurhile.

A ni tshama na ni ni swilo swa ku tala swa ku swi yendla, a ni zama ku kuma xikongomelo xa wutomi. Ni kambisise tinhlengeletanu ta tinyingi ni mahanyelo ya ku hambanahambana, se ni gama ni tiyiseka swaku a xa ku yampsa ni nga xi yendlaka i ku tirhisa wutomi la mina hi ku yendzela misava hinkwayu ni vona ku saseka ka yona na vanhu va nga se yi hohlota.

Ni suke hi Alemanha ni ya Afrika hi monta. Kambe ni sindziseke ku tlhela ni ya Ewuropa swaku ni ya wu lunghisisa. Loko ku hundzenyana nkama, ni ye ka praya la Portugal. Ku ve hi nkama wolowo ni nga gama ni teka xiboho xa ku tshika ku yendza hi mimonta ni sungula ku yendza hi maboti.

Ni nghene ka ntlawa wa majovhem lawa a ma tilunghiselela ku tlulela a Oceano Atlântico. Ka ntlawa lowu, ni tive nsati wa mina Laurie. Ku sungula, mina na yena hi yendzile hi ya ka ma ilhas das Caraíbas. Ka liyendzo lelo hi nyimenyana a Porto Rico, se hi gama hi tlhela hi ya aEwuropa. A hi lava ku kuma boti leli a hi ta li txintxa li va la motori leswaku hi tshama ka lona. Kambe loko se ku hundze 3 wa tiwheti swi bohi hi nyima ku lavetela hikusa ni vitaniwe swaku ni ya wusonchweni ka tiko la mina.

Ni hete lembe ni tiwheti tinharhu na ni li musonchwa wa ku tirhela amatini aAlemanha. Hi nkama wolowo mina na Laurie hi chadile ivi hi sungula ku tilunghiselela swaku hi yendzela misava hinkwayu. Nkama na ni nge se ya a wusonchweni a hi xave boti leli a li tirhiseliwa ku ponisa vanhu hi lona. Se nkama na ni li wusonchweni, ni sungule ku li txintxa leswaku li va boti la ku yendza hi lona. A hi tinyimisele ku tshama ka lona ni ku tlhela hi tama hi yendzela misava hinkwayu. Na ha lunghiselela leswo, se na ni humile ka ntirho wa wusonchwa kambe ni nge se heta ku lunghiselela boti la ku yendza hi lona, ku ve hi nkama wolowo Timboni ta Yehovha ti nga sungula ku djondza Bibele na hina.

BIBELE LI TXINTXE WUTOMI LA MINA:

Ku sunguleni, a ni nga voni xilaveko xa ku txintxa wutomi la mina. Se a ni chadile hi nawu, naswona a ni nyime ku dzaha. (Vaefeza 5:5) Leswi a hi ni xikongomelo xa ku yendzela misava hinkwayu a ni pimisa swaku ku vona swilo swa ku hlamalisa leswi Xikwembu xi nga swi yendla a ku li nchumu xa lisima hintamu.

Kambe ku vula ntiyiso a swi lava swaku ni txintxa ka wutomi la mina ngopfungopfu wumunhu la mina. A ni li munhu wa ku tibyela ni tlhela ni titshemba, leswo a swi ni yendla ni pimisa ntsena hi leswi a ni kota ku swi yendla ni leswi a ni humelela ka swona. Phela mina a no pimisa hi mina ntsena.

Siku lin’wani ni lerhi hi Dixkursu la le Ntshaveni. (Matewu tindzima 5-7) Ku sunguleni swi ni hlamalisile leswi Yesu a nga swi vula hi ku tsaka. Hi xikombiso a vule swaku vanhu va ku tsaka hi lava va nga ni ndlala ni torha. (Matewu 5:6) Kambe mina a ni nga swi twisisi swaku swi nga kotekisa ku yini ku va ndlala ni torha swi yendla munhu a tsaka. Ka djondzo ya mina ya Bibele, ni twisise swaku Yesu a a vulavula hi ku tikarhatela ku va ni wunghanu ni Xikwembu, kambe leswaku swoleswo swi koteka ku sungula hi fanele hi twisisa swaku xilaveko lexo i xa lisima, phela leswo hi leswi Yesu a nga swi vula: “Va tsaka lava va lwelaka ku va vanghanu va Xikwembu, hikusa Mfumu wa matilo i wa vona.” — Matewu 5:3.

Nkama hi nga sungula ku djondza Bibele aAlemanha hi rhurhile hi ya França hi gama hi ya Itália. Hinkwaku lomu a hi ya kona, a hi kumana ni Timboni ta Yehovha. Ni hlamalisiwe hi lirhandzu la tona la ntiyiso ni ku twanana loku a ku li kona xikarhi ka tona. Ni twisise swaku hikakunene tona i ndjangu wa misava hinkwayu. (Yohani 13:34, 35) Hi ku famba ka nkama mina na Laurie hi tsakamisiwile hi va Timboni ta Yehovha.

Loko se ni tsakamisiwile ni tame ni txintxa wumunhu la mina. Mina na Laurie hi yendle xiboho xa ku yendzela Afrika hi boti, hi tlulela hi ya Oceano Atlântico hi gama hi ya Estados Unidos. Loko se hi li xikarhi ka mati, na hi rhendzeliwe hi mati ya manyingi, ku ve hi nkama wolowo ni nga pimisa swaku hikakunene a ni nchumu loko ni fananisiwa ni Lweyi a nga yendla minchumu hinkwayu. Leswi a hi ni nkama wa wunyingi (a ku nga na swilo swa swinyingi swa ku swi yendla xikarhi ka lwandle), ni hete nkama wu wunyingi na ni lerha Bibele. Ni hlamalisiwile hi ku djondza hi wutomi la Yesu nkama na a li lani misaveni. Yena a a nga na xidjoho, a a kota ku yendla minchumu ya ku hlamalisa kambe hambileswo a a nga titlakusi. A a nga pimisi hi yena ntsena kambe a a lava swaku ku dzunisiwa Papayi wa yena a nga matilweni.

Loko ni pimise hi xikombiso xa Yesu, ni twisise swaku a ni fanele ni rhangisa Mfumu wa Xikwembu ku sungula ka wutomi la mina, ku tlula ku zama ku wu lavela ndhawu ndzeni ka swilo swa ku tala leswi a ni lava ku swi yendla. (Matewu 6:33) Loko se hi fike Estados Unidos hi bohe ku tshama kona se hi yendla hinkwaswu swaku hi rhangisa ku tirhela Yehovha.

NI PFUNEKISE KU YINI:

Khale a ni titshemba hintamu naswona minkama ya yinyingi a ni kanakana hi swiboho leswi a ni swi yendla. Kambe swoswi, ni kume xihlovo xa wutivi la ntiyiso lexi xi ni kongomisaka. (Esaya 48:17, 18) Naswona ni sungule ku va ni xikongomelo ka wutomi ku nga ku gandzela Yehovha ni ku pfuna vanhu van’wani swaku va djondza hi yena.

Hi ku tirhisa matshinya ya minawu ya Bibele, mina na Laurie hi wu tiyise swinene muchadu wa hina. Naswona hi katekisiwile hi ku kuma n’wana wa ntombhi lweyi a tivaka Yehovha a tlhela a mu rhandza.

A hi minkama hinkwayu minchumu a yi hi fambela kahle ka wutomi la hina. kambe hi ku pfuniwa hi Yehovha hi tinyimisele ku kala hi nga tshiki ku mu gandzela ni ku mu tshemba. — Swivuriso 3:5, 6.