Bibele Li Txintxa Wutomi La Vanhu

IMPSINI leswi nga pfuna wanuna lweyi a a rhandza ku bedja ni ku yiva leswaku a tshika mahanyelo ya yena ya ku biha a tlhela a txintxa wutomi la yena? Lerha xitoriya xa yena.

“A ni wu rhandza hintamu a mpalisanu wa makavhalu.” — RICHARD STEWART

LEMBE LA KU PSALIWA: 1965

TIKO LA KU PSALIWA: JAMAICA

XITORIYA XA YENA: A A RHANDZA KU BEDJA A TLHELA A YIVA

LESWI A NI HANYISA XISWONA: Ni kulele aKingston, ku nga doropa la Jamaica lani a ku ni vanhu va vanyingi lava a va li swisiwana. A ku ni swigevenga swa swinyingi naswona mintirho a yi kala. Phela vanhu a va chava ku hlaseliwa hi swigevenga. Siku ni siku a ni twa na va duvulela swibamu.

Mamani wa mina a a tirha hintamu naswona a yendle hinkwaswu leswaku a hlayisa mina ni vamakwerhu va mina vambirhi vavatsongo. A a lava swaku hi djondza ka xikola xaxinene. Kambe mina a ni nga swi rhandzi ku ya xikola a ni wu rhandza hintamu mpalisanu wa makavhalu. A ni lovha xikolweni swaku ni ya lomu a ku ni makavhalu naswona a ni swi rhandza ku famba hi wona.

Hi nkamanyana wawutsongo ni sungule ku bedja ka mpalisanu wa makavhalu. A ni ni mahanyelo ya ku biha naswona a ni rhandza vavasati. A ni dzaha mbangi naswona a ni yiva leswaku ni ta kuma male ya ku xava mbangi. A ni ni swibamu swa swinyingi, kambe namuntlha na tsaka hi ku tiva leswaku a ku zanga ku fa munhu nkama na hi gwadjisa vanhu.

Ni khomiwile hi maphoyisa ni ya pfaleliwa djele. Nkama ni nga huma, ni tame ni va ni mahanyelo ya ku biha. Ku vula ntiyiso mahanyelo ya mina a ma bihile hintamu ku tlula ku sunguleni. Hambileswi a swi tikomba ingaku ni munhu wamunene kambe a ni ni nkanu, a ni nga hlweli ku kwata funtshi a ni ni mona. A ni nga na mhaka ni munhu, a no va ni mhaka na mina ntsena.

LESWI BIBELE LI NGA TXINTXISA XISWONA WUTOMI LA MINA: Ka nkama wolowo wa ku karhata ka wutomi la mina, mamani wa mina a sungule ku djondza Bibele funtshi a ve Mboni ya Yehovha. A txintxile a va ni mahanyelo yamanene, se leswo swi ni hlamalisile. A ni lava ku tiva swaku i ntxini xi nga yendla leswaku mamani wa mina a txintxa, se ni sungule ku djondza Bibele ni Timboni ta Yehovha.

Ni tsumbule swaku Timboni ta Yehovha a ti djondzisa swilo leswi a swi hambanile ni tikereke tin’wani naswona hinkwaswu leswi a ti swi djondzisa a ti swi kuma ndzeni ka Bibele. A ko va Timboni ta Yehovha ntsena leti a ti chumayela hi munti ni munti ku fana ni Vakreste va khale. (Matewu 28:19; Mintirho 20:20) Nkama ni nga vona swaku Timboni ta Yehovha ta rhandzana hikakunene ni kholwe swaku a ni kume wukhongeli la ntiyiso. — Yohani 13:35.

Nkama ni nga djondza Bibele, ni vone swaku a ni fanele ni txintxa minchumu ya yinyingi ka wutomi la mina. Ni vone swaku Yehovha wa va nyenya lava va hanyaka hi wuntunga la swa masangu naswona leswaku ni mu tsakisa a ni fanele ni tshika minchumu hinkwayu leyi a yi chakisa muzimbha wa mina. (2 Vakorinto 7:1; Vaheberu 13:4) Ni hlamale swinene nkama ni nga tiva swaku ni nga yendla leswaku Yehovha a tsaka kumbe a kwata. (Swivuriso 27:11) Hi mhaka leyo, ni tshike ku dzaha mbangi, ni tshike swibamu ni tlhela ni zama ku txintxa wutomi la mina, ni yendla hinkwaswu swaku ni tshika mahanyelo ya mina ya ku biha. Leswi a swi karhata hintamu a ku li ku tshika wuntunga ni ku bedja.

A ku sunguleni a ni nga swi lavi swaku vanghanu va mina va swi tiva swaku ni djondza Bibele ni Timboni ta Yehovha. Kambe ni txintxile nkama ni nga lerha buku la Matewu 10:​33, lani Yesu a nga te: “Lweyi a ni yalaka ka vanhu, na mina ni ta mu yala ka Papayi wa mina lweyi a nga matilweni.” Se hi mhaka leyo, ni byele lava a ni tirha na vona swaku a ni djondza Bibele ni Timboni ta Yehovha. Va hlamale hintamu. A va nga kholwi swaku ni lava ku va Mukreste. Kambe ni va byele swaku mina a ni nga ha lavi ku yendla nchumu ka leswi a ni swi yendla ka wutomi la mina la khale.

LESWI SWI NGA NI PFUNISA XISWONA: Nkama ni nga sungula ku hanya hi minawu ya Bibele mamani wa mina a tsakile swinene. A swi nga ha lavi a karhateka kumbe a pimisa swaku ni ta yendla minchumu ya ku biha. Naswona mina na yena a hi bula hi leswi swi hi tlhanganisaka ku nga ku rhandza Yehovha. Minkama yin’wani loko ni pimisa leswi a ni hanyisa xiswona, swa ni hlamalisa leswi ni nga swi kota ku txinta wutomi la mina hi ku pfuniwa hi Yehovha. A na ha li naveli wutomi leliyani la ku biha ni ku navela ku ganya.

Loko a ni nga djondzanga ntiyiso, nkama lowu a ni ta va djele kumbe ni file. Kambe swoswi ni ni ndjangu wawunene funtshi wu tsakile. Swi ni tsakisa hintamu ku tirhela Yehovha ni nsati wa mina ni n’wana wa mina wa ntombhi. Na mu khensa Yehovha hileswi a nga ni pfumelela swaku ni lumba ndjangu lowu wa misava hinkwayu. Naswona ni khensa swinene leswi ku nga va ni munhu lweyi nga yendla minzamu swaku a ni djondzisa Bibele. Ni swi rhandza swinene ku pfuna van’wani swaku na vona va djondza leswi Bibele li swi djondzisaka. Ni mu khensa swinene Yehovha hi wunene la yena leli a nga li kombisa ka mina hi ku ni kokela ka yena.

[Marito ka Pajina]

“Ni hlamale swinene nkama ni nga tiva swaku ni nga yendla leswaku Yehovha a tsaka kumbe a kwata”

[Foto ka Pajina]

Ni vone mamani wa mina na a txintxa a va ni mahanyelo yamanene

[Foto ka Pajina]

Mina ni nsati wa mina ni n’wana wa hina wa ntombhi