Ni Djondze Swaku Yehovha A Ni Timpsalu Naswona Wa Rivalela

LESWI A NI HANYISA XISWONA:

Ni psaliwe ka doropa la Montreal lani vanhu va kona a va li swisiwana. Nkama na ni ni 6 wa tiwheti, papayi wa mina a file, se mamani hi yena a nga sala a hi hlayisa. Naswona a ni li xigumandzeni ka 8 wa vana.

Hi ku famba ka nkama, ni sungule ku tlanga ni swigevenga se a ni dzaha, ni bedja ni tlhela ni rhandza ku lwa. Nkama na ni ni 10 wa malembe, ni sungule ku tirhisana ni tinghwavani ni lava a va txenekisa male hi majuru. A ni hemba hintamu funtshi a ni swi rhandza ku kanganyisa vanhu. Ka mina leswo a swi fana ni vhisiyu.

Nkama na ni ni 14 wa malembe, a ni tiva tindlela ta tinyingi ta ku kanganyisa vanhu. Hi xikombiso, a ni ghweva mawachi ya manyingi, mapulsera ni maaneli ya banyadu. A ni gama ni swi tsala marka lowu wu kombisaka swaku swi durha hintamu ni gama ni ya swi xavisa a switaratwini ni ka maparki ya mimovha aswitolo. A swi ni tsakisa hintamu ku kuma male hi ndlela ya ku vevuka. Siku lin’wani, ni kume male ya 10.000 wa madolari ya Canadá!

Nkama na ni 15 wa malembe ni hlongoliwe ka xikola lexi a xi djondzisa vanhu mahanyelo yamanene, se a ni nga ha na ka ku tshama kona. A ni yetlela tindleni, maparki kumbe kaya ka munhu lweyi ni mu tivaka.

Makhambi ya manyingi ni thethisiwe hi maphoyisa hi mhaka ya ntirho lowu a ni wu yendla. Kambe leswi a ni nga xavisi minchumu ya ku yiviwa a ni zanga ni khomiwa. Hambileswo, ni hakelisiwe male ya yinyingi ya multa hileswi a ni kanganyisa ni tlhela ni xavisa minchumu na ni nga na mpfumelelo. Leswi a ni nga chavi munhu, a ni famba ni kobrara male ya lava a va txenekisa male hi majuru. Leswo a swi ni ngozhi hi mhaka leyo a ni famba ni xibamu. Minkama yin’wani a ni lumba ntlawa wa swigevenga.

LESWI BIBELE LI NGA LI TXINTXISA XISWONA WUTOMI LA MINA:

Ni sungule ku tiva Bibele nkama na ni ni 17 wa malembe. Namorada wa mina lweyi a ni tshama na yena a sungule ku djondza Bibele ni Timboni ta Yehovha. Hambileswo, a ni nga mpfumelelani ni minawu ya mahanyelo ya Bibele. Hi mhaka leyo, ni mu tshikile ni ya tshama ni wansati mun’wani lweyi a ni rhandzana na yena.

Namorada wa mina wawumbirhi na yena a sungule ku djondza Bibele ni Timboni ta Yehovha, se minchumu yi sungule ku txintxa kolanu! A ni hlamalisiwa hi leswi ku djondza Bibele a swi li txintxisa xiswona a wutomi la yena. A a ya a va munhu wa ku rhula a tlhela a lehisa mbilu. Hi mhaka leyo ni pfumelile ku ya ka mintlhanganu ka Yindlo ya Wungandzeli ya Timboni ta Yehovha. Ni yamukeliwe kahle hi vanhu vavanene va lirhandzu. Leswo a swi hambanile hintamu ni leswi a ni swi tolovelile! A ni nga se tshama ni titwa na ni rhandziwa ni tlhela ni kombiwa timpsalu a kaya, kambe lirhandzu leli Timboni ta Yehovha ti nga ni komba lona, hi lona leli a ni li lava. Nkama Timboni ta Yehovha ti nga ni kombela swaku ni djondza na tona Bibele ni pfumelile hi ku tsaka.

Leswi ni nga swi djondza ka Bibele swi ponise wutomi la mina. A ni lava ku ya yiva ni vanghanu va mina vambirhi leswaku ni kuma male ya ku hakela swikweneti leswi a swi tlula 50.000 wa madolari. Kambe ni tsakile hikusa a na ha zanga ni ya ku yiveni! Vanghanu va mina va yile ku yiveni. Mun’we wa vona a khomiwile kasi mun’wani a dlayiwile.

Nkama ni nga djondza Bibele, ni swi vonile swaku swi lave ni txintxa a wutomi la mina. Hi xikombiso, ni djondze leswi Bibele li swi vulaka ka buku la 1 Vakorinto 6:10 leyi nge: “Vayivi, vanhu va makwanga, swidakwa, lava rhuketelaka ni vakanganyisi, a va nge dli tshomba la Mfumu wa Xikwembu.” Nkama ni nga lerha marito lawa, ni xiririke mihloti. Ni swi vonile swaku ni fanele ni txintxa mahanyelo ya mina hi ku helela. (Varoma 12:2) A ni rhandza ku lwa naswona a ni hanya hi ku hemba.

Ni djondze ka Bibele leswaku Yehovha a ni timpsalu naswona wa rivalela. (Esaya 1:18) Ni khongele hi mbilu hinkwayu, ni kombela Yehovha swaku a ni pfuna ku va ni tshika mahanyelo ya mina ya ku biha. Hi mhaka ya ku pfuniwa hi Yehovha ni swi kotile ku tshika mahanyelo ya mina ya ku biha hi ku tsongokutsongo. Nchumu wa ku sungula lowu ni nga wu yendla i ku va mina ni lweyi a ni namorara na yena hi tsalisa muchadu.

Nkama na ni 24 wa malembe se a ni chadile naswona a ni ni vana vanharhu. Hi nkama wolowo swi lave ni lava ntirho wawunene. Kambe a ni nga hetanga xikola naswona a ni nga tivi munhu lweyi a a ta byela vatholi swaku ni munhu wa ku tshamisa ku yini. Ni tlhele ni kombela ku pfuniwa hi Yehovha ni gama ni sungula ku lavetela ntirho. A ni byela vatholi swaku ni lava ku txintxa wutomi la mina naswona ni ta tirha hi ku tshembeka. Minkama yin’wani, a ni va byela swaku ni djondza Bibele naswona ni navela ku va munhu wamunene. Vatholi va vanyingi a va nga ni tholi kambe hi wugamu ni tlhamusele mutholi mun’wani swikarhatu swa mina hi ku kongoma naswona nkama na hi vulavula a ni byele leswi: “A ni swi tivi swaku hi mhaka muni ni titwa hi ndlela leyi, kambe mbilu ya mina yi ni byela swaku ni fanele ni ku thola.” Hikanunene leyi ku ve nhlamulu ya xikhongelo xa mina. Hi ku famba ka nkama, mina ni nsati wa mina hi tsakamisiwile hi va Timboni ta Yehovha.

LESWI NI NGA PFUNEKISA XISWONA:

Namuntlha ni hanya wutomi lalinene hileswi ni hanyaka hi minawu ya Bibele naswona ni hanya tanihi Mukreste. Ni ni ndjangu lowu nga tsaka. Na tiyiseka swaku Yehovha a ni rivalelile naswona ni ni lipfalu la ku basa.

Ni ni 14 wa malembe na ni li ka ntirho wa nkama hinkwawu wa ku chumayela mahungu ya ku tsakisa ni djondzisa vanhu Bibele. Ni va pfuna leswaku va tiva leswi Bibele li swi djondzisaka naswona nsati wa mina na yena a heta nkama wa wunyingi na a djondzisa vanhu Bibele. Ka 30 wa malembe lawa ma nga hundza, swi ni tsakisile hintamu ku pfuna 22 wa vanhu lava ni tirhaka na vona leswaku na vona va tirhela Yehovha. Ni swoswi na ha ya ka switolo kambe a na ha yeli ku ya kanganyisa vanhu hilani a ni swi yendla hi kona khale. Swoswi loko ni ya ka switolo ni bulisana ni vanhu hi Bibele ni tlhela ni va nyika nchumu wa lisima ku nga ntshembo wa ku hanya ka misava ya nyuwani lani ku nga ta kalaka ku nga ha na vakanganyisi. — Tipisalema 37:10, 11.