Bibele Li Hi Djondzisa Yini Hi Yehovha?

1. Hi mhaka muni u mu khensa Yehovha hileswi a nga ku nyika Bibele?

HI MU khensa hintamu Yehovha hileswi a nga hi nyika Bibele hikusa lona li hi pfuna ku lwisana ni swikarhatu leswi hi kumanaka na swona namuntlha, li tlhela li hi komba swilo swa ku tsakisa leswi nga ta yendleka ka nkama lowu taka. Naswona xa lisima, Yehovha a tlhela a li tirhisa swaku a hi djondzisa hi wumunhu la yena. Ku pimisa hi wumunhu lolelo swi hi khumba mbilu swi tlhela swi hi yendla hi lava ku va vanghanu va yena. — Pis. 25:14.

2. I yini leswi Yehovha a nga swi tirhisa swaku a pfuna vanhu kuva va mu tiva?

² Yehovha a lava swaku vanhu va mu tiva. Khale, a a tirhisa milorho, tintsumi ni swivono swaku a pfuna vanhu va mu tiva. (Tinhl. 12:6; Mint. 10:3, 4) Loko milorho yoleyo, swivono ni leswi tintsumi ti nga swi byela lava va nga tsala Bibele a swi nga tsaliwanga, a swi nge te koteka swaku hi swi djondza. Hi mhaka leyo Yehovha a nga tirhisa vanhu swaku va swi tsala hikusa a lava swaku hi swi tiva. (Yer. 30:2) Se hi nga tiyiseka swaku ndlela leyi Yehovha a nga yi langa swaku a vulavula na hina, ku nga Bibele, i ndlela ya kahle. Leswo swa fambisana ni wumunhu la yena hikusa Bibele li li: “Ndlela ya Xikwembu xa ntiyiso yi hetisekile”. — Pis. 18:30.

3. Yehovha a yendle yini swaku Bibele li nga helisiwi? (Esaya 40:8)

³ Lerha Esaya 40:8. Leswi nga tsaliwa Bibeleni, se swi pfune vanhu vanyingi naswona swa ha va pfuna ku ta fikela namuntlha. Kambe, swi kotekise ku yini swoleswo kuve a ku sunguleni Bibele a li tsaliwe ka swilo leswi hantlaka swi wonheka? I Yehovha lweyi a nga yendla swaku makopiya lawa ma nga yendliwa ma nga helisiwi. Hambileswi lava nga kopiyara Bibele a va nga hetisekanga, a va yendla minzamu ya kuva va nga txintxi nchumu ka leswi a swi tsaliwile. Mutsali mun’wani a vule leswi hi Matsalwa ya Xiheberu: “Hi nga vula na hi tiyisekile swaku a ku na buku lin’wani la khale la ku tshembeka la ku fana ni Bibele leli ku kalaka ku nga yengeteliwanga kumbe ku pumbiwa nchumu.” I ntiyiso swaku Bibele li tsaliwe khale ka swilo leswi swi hantlaka swi wonheka, funtshi li tsaliwe hi vanhu lava kalaka va nga hetisekanga, kambe hi nga tiyiseka swaku leswi swi nga tsaliwa ka Bibele i mimpimiso ya Yehovha hikakunene.

4. Hi ta djondza hi yini ka nhlokomhaka leyi?

⁴ “Nyiko yin’wana ni yin’wana ya yinene ni xihiwa xin’wana ni xin’wana lexi nga hetiseka” swi ta hi ka Yehovha. Hi xikombiso, Bibele i yin’wani ya tinyiko ta lisima leyi taka hi ka Yehovha. (Yak. 1:17) Hi nga tiva swaku munhu a hi tiva ku fikela kwini hileswi a hi nyikaka swona. Hi nga vula leswi fanaka hi Yehovha. Ku va a hi nyike Bibele swi kombisa swaku wa hi tiva funtshi wa swi tiva leswi hi swi lavaka. Ka nhlokomhaka leyi hi ta djondza hi minchumu yinharhu, ku nga wutlharhi, ku lulama ni lirhandzu la Yehovha. Hi ta sungula hi ku vona leswi Bibele li swi vulaka hi wutlharhi la Xikwembu.

BIBELE LI KOMBISA SWAKU YEHOVHA A NI WUTLHARHI

5. Bibele li swi kombisa ku yini swaku Yehovha a ni wutlharhi?

⁵ Yehovha wa swi tiva swaku ha li lava wutlharhi la yena, hi mhaka leyo a nga hi nyika Bibele leli nga tala hi switsundzuxu swa wutlharhi. Bibele li ni matimba ya ku txintxa wutomi la vanhu. Buku la Deteronoma li hi byela swaku Moxe a byele Vayisrayele a ku: “Marito lawa i ya lisima swinene, ma nyika wutomi.” (Det. 32:47) Loko hi hanya hi leswi Bibele li swi vulaka hi ta tsaka. (Pis. 1:2, 3) Funtshi hambileswi Bibele li nga tsaliwa khale, li ni matimba ya ku txintxa wutomi la vanhu. Hi xikombiso, loko u nghena ka site la hina la jw.org, ka nhlokomhaka leyi nge: “Bibele La Txintxa Wutomi La Vanhu,” u ta kuma switoriya swa ku tlula 50 swa vanhu lava nga txintxa wutomi la vona hileswi va nga tirhisa minawu ya Bibele. — 1 Tes. 2:13.

6. Hi mhaka muni Bibele li nga fani ni mabuku man’wani?

⁶ Bibele li hambane swinene ni mabuku man’wani. Hi mhaka muni hi vula leswo? Hikusa Yehovha lweyi a nga li tsala a ni wutlharhi, a ni matimba hinkwawu, funtshi a kona minkama hinkwayu. Mabuku manyingi, ma talisa ku tiviwa ku tlula lava va nga ma tsala funtshi switsundzuxu swa wona swi gama swi hundzeliwa hi nkama, kambe leswi nga ka Bibele swa tirha minkama hinkwayu naswona se i khale na vanhu va pfuneka hi switsundzuxu swa lona. Nkama hi lerhaka hi tlhela hi pimisa hi leswi hi swi djondzaka ka Bibele, Yehovha a tirhisa moya wa yena wa ku kwetsima swaku a hi pfuna ku tirhisa leswi hi swi lerhaka. (Pis. 119:27; Mal. 3:16; Heb. 4:12) Ha tiyiseka swaku Yehovha, Mutsali wa Bibele, wa swi lava ku ku pfuna. Se ku tiva leswo a swi fanelanga swi ku yendla u lava ku li lerha siku ni siku?

7. Bibele li va pfunise ku yini vanhu va Xikwembu ka nkama lowu nga hundza swaku va twanana?

⁷ A wutlharhi la Bibele li pfuna vanhu va Xikwembu swaku va twanana. Hi xikombiso, nkama Vayisrayele va nga nghena ka Tiko la Xitshembiso va ye ka tindhawu ta ku hambana naswona va sungule ku yendla mintirho ya ku hambanahambana ya ku fana ni ku phasa tihlampfi, ku fuya ni ku rima. Se a swi ta va vevukela kuva va nga ha vonani kumbe va nga na mhaka ni Vayisrayele van’wani. Kambe Yehovha a a va vekele masiku lembe ni lembe leswaku va kumana kuva va yingisela Nawu va tlhela va tlhamuseliwa wona. (Det. 31:10-13; Neh. 8:2, 8, 18) Pimisa hi ndlela leyi Muyisrayele a a titwa hi yona loko a fika Yerusalema ivi a vona Vayisrayele van’wani vavanyingi lava a va ta hi tikweni hinkwalu! Leswo swi yendle leswaku vona va tama va twanana. Hi ku famba ka nkama, loko ku vekiwe bandla la Wukreste, vanyingi a va vulavula tirimi ta ku hambanahambana naswona a va li vanhu va ku hambanahambana, van’wani a va ganyile kasi van’wani a va li swisiwana kambe hinkwavu a va rhandza Matsalwa. Se leswo a swi yendla swaku va gandzela Yehovha hi ku twanana. Hambi lava a va ya va nghena ka bandla la Wukreste a va ya va li twisisa Rito la Xikwembu loko va tlhangana ni Vakreste van’wani lava a va tlhela va va pfuna ku li twisisa. — Mint. 2:42; 8:30, 31.

8. Yehovha a li tirhisisa ku yini Bibele swaku a hi tlhanganisa?

⁸ Yehovha a tirhisa Bibele swaku a pfuna vanhu va yena swaku va mu tirhela hi ku twanana. Bibele li ni mintiyiso yayinyingi hi Yehovha. Ha djondzisiwa hi Bibele amintlhanganwini, a masembleya ni makongresu. Se, hi nga vula swaku Yehovha a tirhisa Bibele swaku a hi tlhanganisa. — Sof. 3:9.

9. Ku laveka hi va vanhu va ku tshamisa ku yini swaku hi twisisa Bibele? (Luka 10:21)

⁹ Xin’wani lexi kombaka leswaku Yehovha a ni wutlharhi i ndlela leyi a nga tsala hi yona Bibele. Yena a tsale Bibele hi ndlela ya ku i vanhu va ku tiveka hansi ntsena lava nga li twisisaka. (Lerha Luka 10:21.) I ntiyiso swaku Bibele li lerhiwa hi vanhu vanyingi misaveni, kambe twana leswi ntivi yin’wani yi nga swi vula mayelana ni leswo: “Bibele a hi buku leli lerhiwaka ku tlula mabuku man’wani misaveni ntsena, kambe loko vanhu va li lerha, va zama ku twisisa leswi va swi lerhaka.” Hambileswo ko va vanhu va ku tiveka hansi ntsena lava va nga li twisisaka ni ku tlhela va tirhisa leswi va swi djondzaka. — 2 Kor. 3:15, 16.

10. Hi wini nchumu wun’wani lowu kombaka swaku Yehovha a tlharihile?

¹⁰ Ndlela yin’wani leyi hi vonaka swaku hikakunene Yehovha i Xikwembu xa ku tlhariha i ndlela leyi a hi djondzisaka hi yona. Yena a nga hi djondzisi tanihi ntlawa ntsena kambe mun’wani ni mun’wani wa hina wa khumbeka hi leswi Yehovha a hi djondzisaka swona. Phela nkama lowu hi lerhaka Bibele ha swi vona swaku Yehovha a ni mhaka na hina. (Esa. 30:21) Hi xikombiso loko hi djondza Bibeleni hi nga ha kuma tindzimana leti hi nga ha tibyelaka swaku a ndzimana leyi, kumbe mhaka leyi nga la, hi yona leyi a ni yi lava. Se hi nga ha tivutisa swaku swi nga yendlekisa ku yini swaku a buku leli lerhiwaka hi vanhu hinkwavu amisaveni li hi khumba hi ndlela yoleyo kumbe li hi nyika leswi hi swi lavaka ka nkama wa kona ke? Mhaka hi leswaku Yehovha, Mutsali wa Bibele, a tlharihile ku tlula vanhu hinkwavu. — 2 Tim. 3:16, 17.

BIBELE LI KOMBISA SWAKU XIKWEMBU XI LULAMILE

11. A nkama lowu ku nga tsaliwa Bibele, Yehovha a swi kombise ku yini swaku a nga na xikheto?

¹¹ Yehovha a lulamile. (Det. 32:4) Se leswi a nga lulama swi lava ku vula swaku a nga na xikheto. (Mint. 10:34, 35; Rom. 2:11) Ha swi vona swaku Yehovha a nga na xikheto ka ndlela leyi Bibele li nga tsaliwa hi yona. Hi xikombiso, ka 39 wa mabuku ya ku sungula lama nga tsaliwa, manyingi ya wona ma tsaliwe hi Xiheberu hikusa vanhu va Xikwembu ka nkama wolowo a va vulavula lirimi lolelo. Kambe, se ka nkama wa Vakreste, Xigriki hi xona lexi a xi vulavuliwa hintamu, hi mhaka leyo ku tala ka 27 wa mabuku lawa ma nga tsaliwa, ma tsaliwe hi Xigriki. Se leswo swi kombisa swaku Yehovha a nga tirhisanga lirimi lin’we leswaku a tsala Bibele. Namuntlha, vanhu va kolomo ka 8 bilhões amisaveni hinkwayu va vulavula tirimi ta ku hambanahambana. Se vanhu volavo va nga djondzisa ku yini hi Yehovha?

12. Wuprofeta la Daniyele 12:4 li hetisekisa ku yini ka masiku ya namuntlha?

¹² A wuprofeta la Daniyele li vule swaku ka nkama wa wugamu a ‘ntiyiso a wu ta tala,’ leswi vulaka swaku vanhu a va ta ya va swi twisisa hintamu leswi kumekaka ka Bibele. (Lerha Daniyele 12:4.) Leswo ha swi vona namuntlha hikusa Bibele ni mabuku lama seketeliwaka ka Bibele i manyingi swinene. Hi xikombiso, Bibele hi lona buku leli hundzuluxeliwaka hintamu naswona li nyikeliwaka hintamu ka vanhu amisaveni hinkwayu. Kambe lexi twisaka ku vava hileswaku vanhu van’wani vo ma xavisa maBibele naswona ma durha hintamu. Lexi tsakisaka hileswaku nhlengeletanu ya Xikwembu se yi hundzuluxele Bibele hinkwalu kumbe hi swiyenge hi tirimi ta ku tlula 240, kambe a Bibele a li xavisiwi naswona mun’wani ni mun’wani a nga tikumela lona mahala. Leswo swi yendla swaku vanhu vavanyingi va yamukela ‘mahungu ya ku tsakisa ya Mfumu wa Xikwembu’ na magamu ma nge se fika. (Mat. 24:14) Phela Yehovha Xikwembu xa ku lulama a lava ku pfuna vanhu swaku va mu tiva ni ku djondza hi yena ka Bibele. Swa tikomba swaku Yehovha wa hi rhandza hintamu.

BIBELE LI KOMBISA SWAKU XIKWEMBU XA HI RHANDZA

13. Bibele li swi kombisisa ku yini swaku Yehovha wa hi rhandza? (Yohani 21:25)

¹³ Bibele li hi pfuna ku twisisa swaku Yehovha a hi rhandza swinene. (1 Yoh. 4:8) Leswo swa tikomba ka leswi Yehovha a nga swi langa swaku swi va kona ka Bibele ni leswi a kalaka a nga swi petanga ka Bibele. Ka Bibele Yehovha a hi nyike leswi hi swi lavaka swaku hi va vanghanu va yena, hi kuma wutomi la ku kala li nga heli hi tlhela hi tsaka. Hileswi a hi rhandzaka, a nga hi tatelanga timhaka tatinyingi aBibeleni kambe a yo hi nyika ntsena leswi hi swi lavaka swaku hi kota ku mu tirhela. — Lerha Yohani 21:25.

14. I yini xin’wani xi kombisaka swaku Yehovha wa hi rhandza?

¹⁴ Xin’wani lexi kombisaka swaku Yehovha wa hi rhandza ka ndlela leyi a nga tsala hi yona Bibele, hileswaku a nga hi nyikanga lixta la swinawanawani leswi hi byelaka xin’wani ni xin’wani lexi hi faneleke hi xi yendla ka wutomi la hina, kambe hi ku tirhisa switoriya swa wutomi swa vanhu va khale, wuprofeta ni switsundzuxu wa hi pfuna swaku hi tirhisa mimpimiso ya hina nkama hi lavaka ku teka swiboho. Hi ndlela leyo, a hi nyika lisima a tlhela a kombisa swaku a lava swaku hi mu rhandza ni ku mu yingisa hi mbilu hinkwayu.

15. a) Bibele li swi kombisa ku yini swaku Yehovha wa hi rhandza? b) Ka mufoto, a ximininani, jovhem la xinuna, ni makwerhu wa xisati lweyi a nga guga va pimisa hi swikombiso swini swa le Bibeleni? (Gen. 39:1, 10-12; 2 Tiho. 5:1-3; Luk. 2:25-38)

¹⁵ Yehovha wa hi rhandza. Hi vula leswo hikusa Bibele li tale hi swikombiso swa vanhu lava va titwaka hi ndlela leyi na hina hi titwaka hi yona. Se nkama hi lerhaka Bibele swa vevuka ku va twisisa hikusa vona va fana na hina. (Yak. 5:17) Loko hi vona ndlela leyi Yehovha a nga hanyisana hi yona ni vanhu lava va nga kumana ni swiyimu swa ku fana ni swa hina, swi hi yendla hi vona swaku ‘Yehovha a ni ntwelawusiwana naswona a ni timpsalu.’ — Yak. 5:11.

16. Yehovha a va vonisa ku yini vanhu lava va djohaka va gama va tisola? (Esaya 55:7)

¹⁶ Bibele li kombisa swaku Yehovha wa hi rhandza hi ndlela yin’wani. Lona la hi tiyisekisa swaku hambiloko ho djoha, Yehovha a nge te hi tsukula. Hi xikombiso, nkama Vayisrayele va nga djohela Yehovha makhambi ya manyingi, loko va tisolile Yehovha a va rivalelile. (Lerha Esaya 55:7.) Hambi Vakreste va ku sungula a va swi tiva swaku Yehovha wa va rhandza. Hi xikombiso, ka nkama wa vapostolo, loko Mukreste mun’wani a yendle xidjoho xaxikulu, hi ku tirhisa Pawulo, Yehovha a byele bandla leswaku li mu rivalela li tlhela li mu tiyisa hikusa wanuna yelweyo se a a tisolile. (2 Kor. 2:6, 7; 1 Kor. 5:1-5) Se leswo swi hi pfuna ku vona swaku Yehovha a nga va tsukuli vanhu va yena loko va phazama, kambe hi lirhandzu wa va pfuna a tlhela a va laya ni ku va pfumelela swaku va tlhela va va vanghanu va yena. Yehovha a tshembisa swaku ni namuntlha a ta yendla leswi fanaka ka lava va yendlaka swidjoho kambe va gama va tisola. — Yak. 4:8-10.

LI NYIKI LISIMA RITO LA XIKWEMBU

17. Hi mhaka muni Bibele ku li nyiko ya lisima?

¹⁷ A Bibele i nyiko ya lisima leyi taka hi ka Yehovha. Hi ku tirhisa yona Yehovha a kombisa swaku wa swi lava leswaku hi mu tiva. Hi mhaka ya Bibele hi tiva swaku Yehovha a ni wutlharhi, i Xikwembu xa ku lulama naswona wa hi rhandza. Leswo swi kombisa leswaku hakunene Yehovha a lava leswaku hi va vanghanu va yena.

18. Hi nga swi kombisisa ku yini swaku hi li nyika lisima Bibele?

¹⁸ A hi yendleni hinkwaswu leswaku hi tama hi yi nyika lisima “nyiko” leyi hi nga nyikiwa yona hi Yehovha, ku nga Bibele. (Yak. 1:17) Hi nga kombisa swaku hi li nyika lisima hi ku li lerha ni ku pimisa hi leswi hi swi lerhaka. Loko hi yendla leswo, Yehovha a ta hi katekisa funtshi hi ta kuma “wutivi la Xikwembu.” — Swi. 2:5.