Khongela Ka Yehovha Hi Mbilu Hinkwayu

1-2. a) Hi mhaka muni swi nga hi karhatelaka ku byela Yehovha leswi hi titwisaka xiswona? b) Hi swi tivisa ku yini swaku Yehovha wa swi yingisela swikhongelo swa hina?

U VONA swaku loko u yendla swikhongelo u vula swilo swoleswi swa swin’we, kumbe swa ku karhatela ku byela Yehovha leswi u titwisaka xiswona hikakunene? Loko u titwisa xileswo, a wu wexe! Leswi hi tshamaka na hi khomekile hi mintirho ya siku ni siku, minkama yin’wani hi nga ha yendla swikhongelo na hi djahile. Loko u pimisa swaku a swi ku faneli ku khongela ka Yehovha, swi nga yendleka swi ku karhatela ku mu byela leswi u titwisaka xiswona.

² Bibele li hi djondzisa swaku a xa lisima ka Yehovha a hi ku langa marito ya ku xonga, kambe i ku khongela na swi sukela mbilwini. Yena a “twa xikombelo xa lava ku rhula.” (Ps. 10:17) Yehovha a swi yingisela kahle swikhongelo swa hina hikusa a ni mhaka na hina. — Ps. 139:1-3.

3. Hi swini swivutiso leswi hi nga ta swi hlamula ka nhlokomhaka leyi?

³ Ka nhlokomhaka leyi hi ta hlamula swivutiso leswi: Hi mhaka muni hi nga fanelanga hi chava ku khongela ka Yehovha? Hi nga yendla yini kuva hi khongela na swi sukela mbilwini? Swikhongelo leswi nga ka Bibele swi nga hi pfunisa ku yini kuva hi khongela na swi sukela mbilwini? I yini leswi nga hi pfunaka loko hi karhatekile lakaku swi hi karhatela ku byela Yehovha leswi hi titwisaka xiswona?

U NGA CHAVI KU KHONGELA KA YEHOVHA

4. I mpsini swi nga hi pfunaka ku khongela ka Yehovha na hi nga chavi? (Tipisalema 119:145)

⁴ Yehovha i Munghanu wa ku tshembeka lweyi a hi navelelaka swilo swaswinene. Loko hi swi twisisa leswo, hi ta chunseka kuva hi mu kontarela leswi hi titwisaka xiswona ni leswi hi swi pimisaka. Mutsali wa Tipisalema 119 a a zama ku mu vonisa xileswo Yehovha. Ka wutomi la yena, a kumane ni swikarhatu swa swinyingi; hi xikombiso, vanhu va ku biha a va vulavula mavunhwa hi yena. (Ps. 119:23, 69, 78) Handle ka leswo, a a tshuka a godolisiwa hi swihoxo swa yena. (Ps. 119:5) Kambe a a nga chavi ku mu pfulela xifuva Yehovha, a mu byela leswi a a titwisa xiswona. — Lerha Tipisalema 119:145.

5. a) Hi mhaka muni hi nga fanelanga hi pfumelela nchumu xi hi sivela ku yendla xikhongelo? b) Nyikela xikombiso lexi kombisaka swaku a hi fanelanga hi dana ku khongela.

⁵ Yehovha a rhamba hinkwavu swaku va khongela ka yena, hambi hi lava nga yendla swidjoho swaswikulu. (Esa. 55:6, 7) Hi mhaka leyo, a hi fanelanga hi pfumelela ndlela leyi hi titwaka hi yona yi hi sivela ku khongela ka Yehovha. Pimisa hi xikombiso lexi: Mufambisi wa avião wa swi tiva swaku loko a kumana ni xikarhatu a nga kombela ku pfuniwa hi lava va vonelelaka ma avião. Kambe a hi nge a yendle xihoxo kumbe a lahlekile! U pimisa leswaku a swi ta twala ku chava kumbe ku dana ku kombela ku pfuniwa hi lava va vonelelaka ma avião? A swi nga ta twala leswo! Hilani ku fanaka, na hina loko hi tshuka hi yendla xiboho xa ku kala xi nga li xinene kumbe hi yendle xidjoho, a hi fanelanga hi tshika ku khongela ka Yehovha hi mu byela leswi nga mbilwini. — Ps. 119:25, 176.

LESWI NGA KU PFUNAKA KU KHONGELA NA SWI SUKELA MBILWINI

6-7. I yini lexi nga hi pfunaka leswaku hi byela Yehovha leswi hi titwisaka xiswona? Nyikela xikombiso. (Vona ntlhamuselo.)

⁶ Loko hi mu pfulela xifuva Yehovha, hi mu byela leswi hi swi pimisaka ni leswi hi titwisaka xiswona, hi ya hi va kusuhi na yena. I mpsini leswi nga hi pfunaka ku yendla leswo?

⁷ Pimisa hi wumunhu la Yehovha.a Loko hi ya hi pimisa hi wumunhu la Yehovha, swi ta hi vevukela ku mu byela leswi hi swi pimisa ni leswi hi titwisaka xiswona. (Ps. 145:8, 9, 18) Hi leswo swi nga pfuna makwerhu Kristine, lweyi papayi wa yena a a karhata funtshi a a banana, yena a te: “A swi nga vevuki ku vona Yehovha na a li Papayi ni ku mu byela leswi a ni titwisa xiswona. A ni pimisa leswaku leswi ni tshukaka ni yendla swihoxo, Yehovha a ta gama a ni tshika.” Hi lini wumunhu la Yehovha leli nga pfuna makwerhu Kristine leswaku a txintxa mapimiselo ya yena? Yena a tlhele a ku: “Ku pimisa hi lirhandzu lalikulu la Yehovha swi ni tiyisekisa leswaku wa ni rhandza. Na swi tiva leswaku minkama hinkwayu a ta va na mina leswaku a ni seketela. Hambiloko no tshuka ni yendla xihoxo a ta tama a ni rhandza a tlhela a ni pfuna. Ku tiva leswo swi ni pfuna ku chunseka ku mu byela leswi ni yendlaka ni tsaka ni leswi ni karhataka.”

8-9. Hi mhaka muni swi li swinene ku rhanga hi ku pimisa hi leswi hi nga ta swi vula na hi nge se khongela? Nyikela xikombiso.

⁸ Pimisa hi leswi u nga ta swi vula. Na u nge se khongela, u nga ha tiyendla swivutiso swa ku fana ni leswi: ‘Hi swini swikarhatu leswi ni kumanaka na swona swoswi? Indjhe ku ni lweyi swi lavaka ni mu rivalela? Hi xini xikarhatu lexi na ha ku kumanaka na xona lexi ni lavaka swaku Yehovha a ni pfuna ku xi hlula?’ (2 Tih. 19:15-19) Tekelela ndlela leyi Yesu a nga khongela hi yona hi ku pimisa hi leswi u nga swi vulaka ka swikhongelo swa wena leswi yelanaka ni vito la Yehovha, Mfumu wa Yena ni ku rhandza ka Yena. — Mat. 6:9, 10.

⁹ Makwerhu mun’wani wa xisati lweyi a vitaniwaka Aliska a tsumbule leswaku nuna wa yena a ni kankru ka cérebro naswona a a ta fa hi nkama wawutsongo. A ku sunguleni a swi nga mu vevukeli Aliska ku khongela ka Yehovha, yena a te: “A ni karhatekile swinene lakaku a swi ni karhatela hambi hi ku pimisa hi leswi a ni ta swi vula loko ni yendla xikhongelo.” I yini lexi nga pfuna makwerhu Aliska? Yena a tlhele a ku: “Na ni nge se yendla xikhongelo ni rhanga hi ku tinyika nkama wa ku pimisa hi leswi ni nga ta swi vula. Leswo swi ni pfuna kuva ni nga tshameli ku vulavula hi mina kumbe hi mavabyi ya nuna wa mina; swi tlhela swi ni pfuna kuva ni rhula ni ku vulavula na Yehovha hi swilo swa ku hambanahambana.”

10. Hi mhaka muni swi li swinene ku khongela na hi nga djahanga? (Vona mafoto.)

¹⁰ Khongela na u nga djahanga. I ntiyiso swaku hambi hi swikhongelo swa ku goma swa hi pfuna kuva hi tshinela ka Yehovha, kambe loko hi tinyika nkama wa ku yendla swikhongelo swa ku leha hi nga kota ku mu byela swilo swa swinyingi Yehovha hi leswi hi swi pimisaka.b Elijah nuna wa Aliska, a li: “Ni zama ku khongela ka kunyingi hi siku, naswona loko ni tinyika nkama wa ku yendla swikhongelo swa ku leha ni vona swaku wunghanu la mina na Yehovha li ya li tiya. Phela Yehovha a ni lehisela mbilu, a nga kolwi hi ku ni yingisela; se ni nga mu byela hinkwaswu leswi ni swi pimisaka.” Zama ku yendla leswi: Tivekeli nkama ni ndhawu ya ku rhula swaku u khongela, ku nga ha va hi rito la ku tlakuka na u nga djahanga; zama ku yendla leswo nkama ni nkama.

PIMISA HI SWIKHONGELO LESWI NGA TSALIWA KA BIBELE

11. Hi mhaka muni swi li swinene ku pimisa hi swikhongelo leswi nga ka Bibele? (Vona kwadru leli nge “Indjhe U Titwa Ku Fana Na Vona?”)

¹¹ Nchumu wun’wani wu nga ku pfunaka ka mhaka leyi, i ku pimisa hi leswi vanhu va Yehovha va minkameni ya Bibele va nga swi vula ka swikhongelo swa vona ni ka tinsimu leti a va ti yimbelela kuva va dzunisa Yehovha. Ku pimisa hi ndlela leyi va nga tiphofula hi yona swi nga ku pfuna swaku na wena u khongela ka Yehovha na swi sukela mbilwini. Swikhongelo swa vona swi nga ku pfuna leswaku u kuma marito ya nyuwani lawa u nga ta ma vula loko u yendla xikhongelo. Swi nga yendleka u kuma swikhongelo swa vanhu va Yehovha lava a va li ka xiyimu xa ku fana ni xa wena.

12. Hi swini swivutiso leswi hi nga pimisaka hi swona loko hi lerha xikhongelo lexi nga tsaliwa ka Bibele?

¹² Loko u lerha hi xikhongelo lexi nga ka Bibele, pimisa hi swivutiso leswi: ‘I mani lweyi a nga yendla xikhongelo lexi naswona a ku yendleka yini ka wutomi la yena? Indjhe leswi a a titwisa xiswona swa fana ni leswi mina ni titwisaka xiswona? Ni nga djondza yini ka xikhongelo lexi?’ Swi nga yendleka swi lava u hamba mapexkiza kuva u kota ku hlamula swivutiso swoleswo, kambe loko u yendla leswo u ta pfuneka. Swoswi a hi buleni hi swikombiso swin’wani.

13. U nga djondza yini ka xikhongelo xa Ana? (1 Samuwele 1:10, 11) (Vona mufoto.)

¹³ Lerha 1 Samuwele 1:10, 11. Nkama Ana a nga yendla xikhongelo lexi, a a kumana ni swikarhatu swimbirhi swaswikulu. Xa ku sungula a a nga psali, kasi xa wumbirhi hileswi nkatikuloni wa yena Penina a a tshamela ku vulavula swilo leswi a swi mu susela ku rhula. (1 Sa. 1:4-7) Kambe Ana a khongele ka Yehovha na a nga djahanga, a mu byela hinkwaswu leswi na swi li mbilwini. Leswo swi yendle leswaku a pepa mbilwini. (1 Sa. 1:12, 18) Loko ku li swaku u kumana ni xikarhatu lexi ku suselaka ku rhula u nga djondza yini ka xikhongelo xa Ana? Phela u nga rhula mbilwini loko u “hoxa ndzhwalu wa wena ka Yehovha,” u mu byela hinkwaswu leswi ku humelelaka ni leswi u titwisaka xiswona. — Ps. 55:22.

14. a) Hi nga djondza yini swin’wani ka xikombiso xa Ana? b) I mpsini leswi kombisaka swaku ku pimisa hi swikhongelo swi nga ka Bibele swi nga yampsisa swikhongelo swa hina? (Vona ntlhamuselo.)

¹⁴ Ndzhaku ka malembenyana na Samuwele a psaliwile, Ana a mu tekile a mu yisa ka Muprista Wamukulu Eli. (1 Sa. 1:24-28) Ka xikhongelo lexi a nga xi yendla na xi sukela mbilwini, Ana a khense Yehovha hileswi a a vhikela vanhu va yena va ku tshembeka a tlhela a va hlayisa.c (1 Sa. 2:1, 8, 9) I ntiyiso swaku a swikarhatu swa Ana a swi nga helanga, kambe a a pimisa hi minkateko leyi Yehovha se a a mu nyike yona. Hi djondza yini? Hi to kota ku tiyiselela swikarhatu leswi hi kumanaka na swona ntsena loko hi pimisa hi leswi Yehovha se a hi pfunisaka xiswona.

15. Hi nga djondza yini ka xikhongelo xa muprofeta Yeremiya? (Yeremiya 12:1)

¹⁵ Lerha Yeremiya 12:1. Yeremiya a godolile swinene nkama a nga vona swaku vanhu lava a va yendla swilo swa ku biha, a swi tikomba swi va fambela kahle awuton’wini. A tlhele a godolisiwa hileswi Vayisrayele van’wani a va mu poyilela. (Yer. 20:7, 8) Kambe a nga zanga a lumbeta Xikwembu hileswi a swi mu humelela, a khongelile ka Yehovha a mu byela leswi a a titwisa xiswona. Hi ku famba ka nkama Yeremiya a vone ndlela leyi Yehovha a nga va khatisa hi yona Vayisrayele lava a va nga yingisi. Phela leswo swi yendle swaku Yeremiya a ya a tshemba wululami la Xikwembu. (Yer. 32:19) Na hina, hi nga ha godola loko hi vona vanhu lava va yendlaka swilo swa ku biha na swi va fambela kahle kumbe loko hi poyileliwa, kambe ku fana na Yeremiya na hina hi nga khongela ka Yehovha hi mu byela hinkwaswu leswi hi titwisaka xiswona, na hi tshemba leswaku hi nkama wa kona Yehovha a ta helisa swikarhatu hinkwaswu leswi vangiwaka hi ku kala wululami.

16. Hi nga djondza yini ka xikhongelo xa Mulevhi lweyi a a navela ku gandzela Yehovha atempeleni? (Tipisalema 42:1-4) (Vona mafoto.)

¹⁶ Lerha Tipisalema 42:1-4. Ndzima leyi ya Tipisalema yi tsaliwe hi Mulevhi lweyi a swi nga koteki kuva a ya gandzela Yehovha atempeleni ni Vayisrayele van’wani. Leswi a nga swi vula swi kombisa leswi a a titwisa xiswona. Loko ku li leswaku hi pfaleliwe djele hi mhaka lipfumelo la hina kumbe hi ni mavabyi lawa ma yendlaka swaku hi nga humahumi kaya, swi nga yendleka hi titwa ku fana ni Mulevhi lweyi. Phela hambiloko ndlela leyi hi titwaka hi yona yi tshamela ku txintxa i swinene ku byela Yehovha leswi hi titwisaka xiswona. Loko hi yendla leswo, hi ta vona swilo hi ndlela ya ku yampsa. Hi xikombiso, Mulevhi a game a swi twisisa swaku a a ta pfulekeliwa hi tindlela tin’wani ta ku dzunisa Yehovha. (Ps. 42:5) A tlhele a tinyika nkama wa ku pimisa hi leswi Yehovha a a mu hlayisisa xiswona. (Ps. 42:8) Ku khongela na swi sukela mbilwini, swi ta hi pfuna kuva hi yi twisisa kahle ndlela leyi hi titwaka hi yona hi tlhela hi rhula ni ku kuma ntamu wa ku tiyisela.

17. a) Hi nga djondza yini ka xikhongelo xa muprofeta Yonasi? (Yonasi 2:1, 2) b) Loko hi kumana ni swikarhatu hi mhaka muni swi li swinene ku khumbuka marito lawa ma nga ka Tipisalema? (Vona ntlhamuselo.)

¹⁷ Lerha Yonasi 2:1, 2. Muprofeta Yonasi a yendle xikhongelo lexi na a li ka khwirhi la hlampfi yayikulu. Hambileswi a a nga mu yingisanga Yehovha, a a tshemba swaku loko a yendla xikhongelo, Yehovha a a ta mu twa. Ka xikhongelo xolexo, Yonasi a tirhise marito ya manyingi lawa ma nga ka Tipisalema.d Leswo swi kombisa swaku a a ti tiva kahle Tipisalema. Ku pimisa hi marito wolawo swi mu tiyisekise swaku minkama hinkwayu Yehovha a a ta mu pfuna. Leswo swi hi pfuna ku vona swaku i swinene kuva hi vekisa tindzimana ta Bibele ka nhloko, leswo swi ta yendla swaku nkama hi yendlaka swikhongelo loko hi kumana ni swikarhatu, hi ti khumbuka tindzimana toleto ti tlhela ti hi tiyisa.

TAMA U TSHINELA KA YEHOVHA HI XIKHONGELO

18-19. Varoma 8:26, 27 yi hi tiyisekisa hi yini? Nyikela xikombiso.

¹⁸ Lerha Varoma 8:26, 27. Minkama yin’wani hi karhateka hintamu lakakuva ni swaku hi ta mu byelisa ku yini Yehovha leswi hi titwisaka xiswona hi nga swi tivi. Kambe hi ni mupfunisi. Ka minkama yoleyo, moya wa ku kwetsima wa Xikwembu “wa hi kombelela”. Swi yendlekisa ku yini leswo? Hi ku tirhisa moya wa yena wa ku kwetsima, Yehovha a kongomise vatsali va Bibele swaku va tsala swikhongelo swa swinyingi. Loko hi nga swi koti ku mu byela Yehovha leswi hi swi pimisaka, yena a nga ha vona swikhongelo swin’wani leswi swi nga tsaliwa ka Rito la yena ingaku i swikombelo swa hina, se a gama a swi hlamula ingaku hi hina hi nga swi yendla.

¹⁹ Ku pimisa hi leswo swi pfune makwerhu mun’wani wa Rússia lweyi a vitaniwaka Yelena. Yena a petiwe djele hi mhaka leswi a khongelaka a tlhela a lerha Bibele. Makwerhu lweyi a vaviseke swinene lakaku swi mu karhatela ku yendla swikhongelo, yena a te: “Ni khumbuke leswaku loko ni karhatekile hintamu lakakuva ni nga xi tivi xa ku xi vula ka xikhongelo, Yehovha a nga yamukela swikhongelo swa vanhu va yena va ku tshembeka va khale . . . ingaku hi mina ni nga swi yendla. Phela ku tiva leswo swi ni tiyisile swinene ka nkama lowuyani wa ku karhata.”

20. Loko hi karhatekile hi nga yi lunghiselelisa ku yini mimpimiso ya hina swaku hi khongela?

²⁰ Loko hi khongela na hi karhatekile, minkama yin’wani mimpimiso ya hina yi nga hangalaka, hi sungula ku pimisa hi swilo swa swinyingi. Swaku hi lunghiselela mimpimiso ya hina leswaku hi khongela, hi nga yingisela audiyo la ku gravhariwa la tindzimana tin’wani ta buku la Tipisalema. Hi nga tlhela hi zama ku tsala leswi hi titwisaka xiswona, hilani Davhida a nga yendla hi kona. (Ps. 18, 34, 142; swingheniso.) I ntiyiso swaku a ku na swinawanawani swa ndlela leyi hi faneleke hi yi lunghiselela hi yona mimpimiso swaku hi khongela, hi mhaka leyo, zama ku vona leswi swi tirhaka ka xiyimu xa wena. — Ps. 141:2.

21. Hi mhaka muni hi nga khongelaka ka Yehovha hi mbilu hinkwayu?

²¹ Swi tiyisa ndjhani ku tiva swaku Yehovha wa swi twisisa leswi hi titwisaka xiswona hambiloko hi nge se mu byela! (Ps. 139:4) Hambileswo, Yehovha wa tsaka swinene hi ku hi yingisela loko hi khongela, hi kombisa swaku ha mu tshemba hi ku helela. Se u nga chavi ku khongela ka Papayi wa wena Yehovha; tirhisa swikhongelo leswi swi nga tsaliwa ka Bibele leswaku u tiva swa ku swi vula. Khongela ka yena na swi sukela ambilwini. Mu byeli leswi swi ku tsakisaka ni leswi swi ku karhataka. Phela a ku na munghanu wa ku yampsa ku fana na Yehovha! Minkama hinkwayu a ta va na wena.