U Nga Khohlwi Ku Khongelela Van’wani

1. Hi swi tivisa ku yini swaku swikhongelo swa hina i swa lisima ka Yehovha?

XIKHONGELO i nyiko ya ku hlawuleka swinene. Pimisa hi mhaka leyi: Yehovha a nyike tintsumi mintirho ya ku hambanahambana. (Ps. 91:11) A tlhele a nyika N’wana wa yena Yesu mintirho ya lisima swinene. (Mat. 28:18) Kambe a nga langanga munhu leswaku a twa swikhongelo swa hina a tlhela a swi hlamula. Bibele li vula leswaku Yehovha i “Mutwi wa xikhongelo.” (Ps. 65:2) Phela Yehovha a lange ku yingisa swikhongelo swa hina hi yexe.

2. Hi mhaka muni Pawulo a li xikombiso xaxinene ka mhaka ya ku khongelela van’wani?

² Hi nga chunseka ku vulavula na Yehovha hi xin’wani ni xin’wani lexi hi karhataka, kambe hi fanele hi tlhela hi khongelela van’wani. Mupostolo Pawulo i xikombiso xaxinene ka mhaka leyi. Yena a tsalele bandla la Efeza a ku: “Ni tshamela ku vulavula hi n’wina ka swikhongelo swa mina.” (Efe. 1:16) Pawulo a a tlhela a khongelela vanhu van’wani hi ku kongoma. Hi xikombiso, a byele Timotiya a ku: “Ni khensa Xikwembu . . . a ni nga tshiki ku ku khongelela wusiku ni nhlikanhi”. (2 Tm. 1:3) Pawulo a a kumana ni swikarhatu swa swinyingi funtshi a a khongela hi swona. (2 Ko. 11:23; 12:7, 8) Hambileswo, a a tinyika nkama wa ku khongelela van’wani.

3. Hi mhaka muni hi nga ha khohlwaka ku khongelela van’wani?

³ Minkama yin’wani hi nga ha khohlwa ku khongelela van’wani. Hi mhaka muni? Makwerhu mun’wani lweyi a vitaniwaka Sabrinaa a vule xivangelo xin’wani, a te: “Wutomi ka misava leyi, li yendla hi tshama na hi khomekile swinene. Hi nga ha tshamela ku pimisa ntsena hi swikarhatu swa hina lakakuva hi khongela hi swona ni leswi hi swi lavaka ntsena.” Indjhe leswo swa ku yendlekela na wena? Loko swi ku yendlekela, djondzo leyi yi ta ku pfuna leswaku 1) u vona swaku hi mhaka muni swi li swa lisima ku khongelela van’wani ni 2) leswi u nga swi yendlisaka swona leswo.

HI MHAKA MUNI SWI LI SWA LISIMA KU KHONGELELA VAN’WANI?

4-5. Hi mhaka muni hi nga vulaka swaku ku khongelela van’wani swi ni “matimba”? (Yakobe 5:16)

⁴ Swikhongelo leswi hi swi yendlelaka van’wani ‘swi ni matimba.’ (Lerha Yakobe 5:16.) Swikhongelo leswi hi swi yendlelaka van’wani swi nga ha khumba wutomi la vona. Leswi Yesu a a swi tiva leswo, nkama a nga tiva swaku Pedru a a ta mu yala a mu byele a ku: “Ni ku khongelelile swaku lipfumelo la wena li nga holi.” (Luk. 22:32) Pawulo na yena a a swi tiva swaku swikhongelo swi ni matimba. Nkama na a pfaleliwe djele aRoma na a nga dlanga xa munhu, a tsalele Filimoni a ku: “Na tshemba swaku ni ta vuyisiwa ka n’wina hi mhaka ya swikhongelo leswi mi swi yendlaka.” (Flm. 22) Hi swoleswo swi nga gama swi yendleka! Pawulo a humesiwile djele funtshi a tlhelele ka ntirho wa yena wa ku chumayela.

⁵ Leswo a swi lavi ku vula swona swaku swikhongelo swa hina swi nga sindzisa Yehovha ku yendla swilo swaku a nga swi lavi. Yehovha a ni mhaka ni leswi vanhu va yena va titwisaka xiswona funtshi minkama yin’wani a yendla leswi va mu kombelaka swona. Ku tiva leswo swi nga hi pfuna leswaku hi khongela ka yena na swi sukela mbilwini loko hi kumana ni xikarhatu hi tlhela hi mu tshemba hi ku swi tshika mavokweni ya yena. — Ps. 37:5; vona 2 Vakorinto 1:11.

6. Ku yendleka yini loko hi khongelela van’wani? Nyikela swikombiso. (1 Pedru 3:8)

⁶ Ku khongelela van’wani swi hi yendla hi va ni ‘ntwelawusiwana.’ (Lerha 1 Pedru 3:8.) Munhu lweyi a nga ni ntwelawusiwana wa swi vona loko munhu mun’wani a hlupheka a tlhela a swi lava hintamu ku yendla xan’wanchumu leswaku a mu pfuna. (Mar. 1:40, 41) Phela ku khongelela van’wani swa pfuna swinene. Hi xikombiso, doda lin’wani leli vitaniwaka Michael li li: “Loko ni khongelela van’wani hi mhaka xikarhatu lexi va kumanaka na xona, ni ya ni xi twisisa xiyimu xa vona naswona leswo swi yendla swaku ni ya ni va rhandza. Ku yendla leswo swi tlhela swi ni pfuna swaku ni ya ni va kusuhi hintamu na vona, hambiloko vona va nga swi tivi leswo.” Doda lin’wani leli vitaniwaka Richard li li: “Loko hi khongelela munhu, swi hi yendla hi swi lava hintamu ku mu pfuna funtshi loko hi mu pfuna, hi ndlela ya ku karhi hi va nhlamulu ya xikhongelo xolexo.”

7. Ku khongelela van’wani swi hi pfuna ku swi vonisa ku yini swikarhatu swa hina? (Vafilipiya 2:3, 4) (Vona mafoto.)

⁷ Ku khongelela van’wani swi hi pfuna ku ringanisela ka ndlela leyi hi swi vonaka hi yona swikarhatu swa hina. (Lerha Vafilipiya 2:3, 4.) Hi hanya ka misava leyi fumiwaka hi Sathana. Leswo swi yendla leswaku hi kumana ni swikarhatu. (1 Yo. 5:19; Nhl. 12:12) Se ku tolovela ku khongelela van’wani swi hi pfuna ku vona leswaku ni “vamakwerhu amisaveni hinkwayu va kumana ni mahlomulu ya ku fana ni ya [hina].” (1 Pe. 5:9) Mupfuli wa ndlela mun’wani lweyi a vitaniwaka Katherine a li: “Ku khongelela van’wani swi ni pfuna ku vona swaku a hi mina noxe ni kumanaka ni swikarhatu funtshi leswo swi ni pfuna kuva ni nga tshameli ku pimisa hi swikarhatu swa mina.”

VA SWI LAVA KU KHONGELELIWA

8. I vamani lava hi nga va khongelelaka?

⁸ I vamani lava hi nga va khongelelaka? Hi nga khongelela vamakwerhu va ku hambanahambana. Hi xikombiso, hi nga khongelela lava va vabyaka, majovhem lawa ma xengeteliwaka ku yendla swilo swa ku biha axikolweni, lava hluphekaka hileswi va nga guga ni vamakwerhu lava xanisiwaka hi maxaka kumbe hi mimfumu hi mhaka ya leswi va nga Timboni ta Yehovha. (Mat. 10:18, 36; Min. 12:5) Vamakwerhu van’wani swi bohe va baleka makaya ya vona hi mhaka ya mpfilumpfilu ya politika; kasi van’wani va humeleliwe hi tinghozi ta ntumbuluku. Phela hambiloko hi nga va tivi vamakwerhu volavo, loko hi va khongelela hi va hi kombisa leswaku hi yingisa nawu wa Yesu wa leswaku hi fanele ‘hi rhandzana.’ — Yoh. 13:34.

9. Hi mhaka muni swi li swa lisima ku khongelela lava rhangelaka ka nhlengeletanu ni vasati va vona?

⁹ Van’wani lava hi nga va khongelelaka i vamakwerhu lava rhangelaka ka nhlengeletanu ya Yehovha. Leswo swi patsa vamakwerhu va Ntlawa Lowu Rhangelaka ni vapfunisi va vona, va ma comissão ya Betele, varhangeli va madepartamentu ya Betele, vadjikelezi, madoda ni vapfunisi va bandla. Vamakwerhu lava, va yendla hinkwaswu va nga swi kotaka leswaku va hi hlayisa hambiloko va kumana ni swikarhatu swa vona vinyi. (2 Ko. 12:15) Hi xikombiso, mudjikelezi mun’wani lweyi a vitaniwaka Mark a li: “Xikarhatu xa mina xaxikulu i ku va kule ni vapsali va mina. Vona se va gugile naswona va vabya. Na swi tiva swaku makwenu wa mina wa xisati ni nuna wa yena va va hlayisa kahle, kambe swa ni vava ku vona leswaku a ni nge yendli swilo swa swinyingi swaku ni pfuna vapsali va mina.” A hi minkama hinkwayu leyi hi tivaka swikarhatu leswi vamakwerhu lava va kumanaka na swona, hambileswo, ku va patsa ka swikhongelo swa hina swi nga va pfuna swinene. (1 Tes. 5:12, 13) Hi nga tlhela hi khongelela vasati va vona lava va va seketelaka leswaku va tama va yi yendla kahle mintirho ya vona.

10-11. Indjhe Yehovha wa swi yamukela swikhongelo leswi hi swi yendlelaka vamakwerhu hinkwavu? Tlhamusela.

¹⁰ Hilani hi nga swi vona hi kona, minkama yin’wani hi khongelela vamakwerhu va vanyingi lava kumanaka ni xiyimu xa ku karhi. Hi xikombiso, hambiloko hi nga pimisi hi munhu wa ku kongoma, minkama yin’wani hi nga ha kombela Yehovha leswaku a pfuna vamakwerhu lava nga pfaleliwa madjele kumbe lava nga feliwa. Doda lin’wani leli vitaniwaka Donald li li: “Hi ni vamakwerhu va vanyingi lava kumanaka ni swikarhatu swaswikulu lakaku minkama yin’wani hi khongela ka Yehovha hi mu kombela leswaku a pfuna lava hluphekaka.”

¹¹ Indjhe Yehovha wa swi yamukela swikhongelo swoleswo? Ina! Phela a hi swi tivi hi ku kongoma leswi makwerhu mun’wani ni mun’wani a swi lavaka ka xiyimu lexi a kumanaka na xona. Se a swi bihanga ku va hi khongela hi kombela swaku Yehovha a pfuna vamakwerhu hinkwavu lava kumanaka ni swikarhatu. (Yoh. 17:20; Efe. 6:18) Phela swikhongelo swoleswo swi kombisa leswaku ha va rhandza ‘vamakwerhu va hina amisaveni hinkwayu.’ — 1 Pe. 2:17.

KHONGELELA VAMAKWERHU VA KU KONGOMA

12. Ku tiva swikarhatu swa vamakwerhu swi nga swi yampsisisa ku yini swikhongelo swa hina?

¹² Zama ku tiva swaku i mani lweyi a nga ku karhatekeni. Hambileswi swi nga swinene ku kombela swaku Yehovha a pfuna vamakwerhu hinkwavu lava nga ku hluphekeni, i swinene ku khongelela makwerhu lweyi hi tivaka swaku a kumana ni swikarhatu. Hi xikombiso, ku nga va leswaku ka bandla la wena ku ni makwerhu lweyi a tshamelaka ku vabya? Ku ni jovhem leli xengeteliwaka ku yendla swilo swa ku biha xikolweni? U tiva mupsali lweyi a nga yexe, lweyi a yendlaka hinkwaswu swaku a wundla n’wana wa yena hi ku mu “djondzisa minawu ya Yehovha”? (Efe. 6:4) Phela loko u zama ku tiva swaku i mani makwerhu lweyi a nga ku karhatekeni, swi ta yendla leswaku u ya u mu rhandza u tlhela u zama ku tiveka ka ndhawu ya yena. Leswo swi ta ku pfuna swaku ka swikhongelo swa wena u kombela Yehovha a mu pfuna ka xikarhatu xa yena.b — Rom. 12:15.

13. I yini xi nga hi pfunaka swaku hi vula mavito ya vamakwerhu lava hi kalaka hi nga va tivi ka swikhongelo swa hina?

¹³ Vula mavito ya vamakwerhu ka swikhongelo swa wena. U nga yendla leswo hambiloko makwerhu wa kona u nge se tshama u va na yena. Hi xikombiso, vamakwerhu va vanyingi aCrimeia, Eritreia, Rússia ni Singapura va pfaleliwile amadjele. Ka jw.org hi nga kuma lixta la mavito ya vamakwerhu volavo.c Mudjikelezi mun’wani lweyi a vitaniwaka Brian, a te: “Ni tsumbule leswaku loko ni tsala vito la makwerhu lweyi a nga djele ni tlhela ni li vula hi rito la ku twala, swi ni pfuna leswaku ni li khumbuka nkama ni khongelaka.”

14-15. I yini xi nga hi pfunaka ku khongelela swilo swa ku kongoma?

¹⁴ Kombela swilo swa ku kongoma. Makwerhu Michael lweyi hi nga vulavula hi yena a te: “Loko ni lerha swiperiyensiya leswi nga ka site la jw.org, swa vamakwerhu lava nga pfaleliwa madjele, ni zama ku pimisa hi leswi mina a ni ta titwisa xiswona loko a ni yo pfaleliwa djele. Phela a ni ta karhateka hi nsati wa mina ni tlhela ni navela leswaku ku va ni munhu lweyi a a ta mu pfuna. Leswo swi ni pfuna leswaku ni khongelela vamakwerhu lava nga chada lava nga madjele hi ndlela ya ku kongoma.” — Heb. 13:3.

¹⁵ Ku zama ku pimisa hi leswi wutomi la siku ni siku la vamakwerhu lava nga djele li nga tshamisa xiswona, swi nga hi pfuna leswaku hi kombela swilo swa ku kongoma nkama lowu hi khongelaka. Hi xikombiso, hi nga khongelela leswaku maphoyisa lawa ma va vonelelaka, ma va khoma hi ndlela yayinene ni leswaku tihosi ti va pfumelela ku tirhela Yehovha na va chunsekile. (1 Tm. 2:1, 2) Hi nga tlhela hi khongela hi kombela swaku xikombiso xa vamakwerhu volavo va ku tshembeka, xi tiyisa mabandla ya vona ni leswaku vanhu lava kalaka va nga mu tirheli Yehovha, loko va vona mahanyelo ya vona va navela ku yingisa mahungu ya ku tsakisa. (1 Pe. 2:12) Hi nga tlhela hi kombela swa ku fana loko hi khongelela vamakwerhu lava kumanaka ni swikarhatu swin’wanyani. Loko hi zama ku tiva leswi vamakwerhu va kumanaka na swona, hi vula mavito ya vona ka swikhongelo swa hina hi tlhela hi kombela swilo swa ku kongoma, hi va na hi kombisa leswaku ndlela leyi hi rhandzanaka hi yona ‘yi ya yi kula’ swinene. — 1 Tes. 3:12.

RINGANISELA KA NDLELA LEYI U SWI VONAKA HI YONA SWIKHONGELO SWA WENA

16. Hi fanele hi swi vonisa ku yini swikhongelo swa hina? (Matewu 6:8)

¹⁶ Hilani se hi nga swi vona hi kona, swikhongelo swa hina swi nga ha khumba wutomi la van’wani. Kambe hi fanele hi ringanisela ka ndlela leyi hi swi vonaka hi yona swikhongelo swa hina. Loko hi khongela, a hi byeli Yehovha swilo leswi a kalaka a nga swi tivi funtshi a hi fanelanga hi mu nyika switsundzuxu leswaku a vona ndlela leyi a nga lulamisaka xikarhatu hi yona. Phela hambiloko hina kumbe lweyi a kumanaka ni xikarhatu hi nga se swi tiva leswi nga mu pfunaka, Yehovha se wa swi tiva. (Lerha Matewu 6:8.) Se hi mhaka muni hi fanele hi khongela? Ku yengesela ka leswi se hi nga swi vona, ku yendla xikhongelo i ndlela yin’wani ya ku kombisa lirhandzu naswona Yehovha wa tsaka loko a vona vanhu va yena na va kombisa lirhandzu ku fana na yena.

17-18. Nyikela xikombiso lexi hi pfunaka ku ringanisela ka ndlela leyi hi swi vonaka hi yona swikhongelo swa hina.

¹⁷ Minkama yin’wani swi nga ha tikomba ingaku swikhongelo swa hina a swi pfuni nchumu. Hambileswo, loko hi khongelela vamakwerhu hi kombisa leswaku ha va rhandza funtshi Yehovha wa swi vona leswo. Hi xikombiso, pimisa hi ndjangu lowu nga ni vana vambirhi: Djaha ni ntombhi. Se djaha li sungula ku vabya swinene; ntombhi yi kombela papayi wa yona yi ku: “Papayi, ni kombela u pfuna makwerhu, phela a twa ku vava swinene.” Papayi lweyi a mu rhandza swinene n’wana wa yena wa djaha naswona se a yendla hinkwaswu leswaku a mu hlayisa, kambe a tsaka swinene hi ku vona swaku n’wana wa yena wa ntombhi a karhateke hintamu hi makwavu wa yena lakaku a kombela leswaku a pfuniwa.

¹⁸ Yehovha a lava leswaku hi yendla swa ku fana. A lava leswaku hi va ni mhaka ni vamakwerhu va hina hi tlhela hi khongelelana. Loko hi yendla leswo, hi kombisa swaku a hi pimisi hi hina ntsena ni leswaku ha va rhandza swinene vamakwerhu na swi sukela mbilwini funtshi Yehovha wa swi vona leswo a tlhela a swi nyika lisima. (2 Tes. 1:3; Heb. 6:10) Hilani hi nga swi vona hi kona ka djondzo leyi, swikhongelo swa hina swi nga khumba wutomi la van’wani; hi mhaka leyo, hi nga khohlweni ku khongelela van’wani.