Vamakwerhu Vambirhi Va Vekiwa Swaku Va Va Va Ntlawa Lowu Rhangelaka
HI 5 KA OUTUBRO wa 2024 ka ntlhanganu wa lembe, ku nyikeliwe xitiviso xa ku hlawuleka: Makwerhu Jody Jedele na Jacob Rumph va vekiwile swaku va va va Ntlawa Lowu Rhangelaka wa Timboni ta Yehovha. Vamakwerhu lava va vambirhi va ni malembe ya manyingi na va tirhela Yehovha hi ku tshembeka.
Jody Jedele ni nsati wa yena Damaris
Makwerhu Jedele a psaliwe Missouri, aEstados Unidos naswona a kulisiwe hi vapsali lava nga Timboni ta Yehovha. Ndjangu wa vona a wu tshama ka ndhawu leyi a ku ni xilaveko xa vachumayeli. Leswo swi yendle leswaku a tiva vamakwerhu va vanyingi va ku ta hi ka tindhawu ta ku hambanahambana ka tiko leliyani, lava a va ya pfunisa ku chumayela mahungu ya ku tsakisa. Ku vona ndlela leyi vamakwerhu volavo a va rhandzana hi yona ni ku twanana swi mu khumbile swinene. A game a tsakamisiwa na a ha li mutsongo, hi 15 ka Outubro wa 1983. Leswi a a swi rhandza ku chumayela, nkama a nga heta xikola a sungule ku va mupfuli wa ndlela wa nkama hinkwawu hi Setembro wa 1989.
Nkama lowu Makwerhu Jedele a ha li jovhem, vapsali va yena a va tolovela ku mu teka yena ni makwavu wa yena wa xisati va famba na vona va ya pfuxela Betele. Leswo swi yendle leswaku Makwerhu Jedele ni makwavu wa yena va swi navela hintamu ku ya tirhela Betele, funtshi hi wugamu va swi kotile ku ya tirhela kona. Makwerhu Jedele a sungule ntirho wa yena aBetele aWallkill hi Setembro wa 1990. Nkama a nga fika a tirhele ka Departamentu la Limpeza naswona a game a ya tirhela ka Departamentu la swa Wudahu.
Hi nkama wolowo, mabandla ya Xipanyoli lawa a ma li kusuhi a ma ya ma kula, funtshi a ku ni xilaveko xa vamakwerhu va xinuna. Se Makwerhu Jedele a yile ka lin’we la mabandla wolawo naswona a sungule ku djondza Xipanyoli. Na swi nga se ya kwini, a tive Damaris, mupfuli wa ndlela lweyi a a li ka sirkwitu la yena. Hi ku famba ka nkama, va chadile naswona Damaris a rhambiwile swaku na yena a ya tirhela Betele.
Hi 2005 va hume Betele swaku va ya hlayisa vapsali va vona. Hi nkama wolowo a va tirha tanihi vapfuli va ndlela va nkama hinkwawu. Makwerhu Jedele a ve mudjondzisi ka swikola swa vapfuli va ndlela naswona a ve mun’we wa vamakwerhu va Comissão La Ku Vulavulisana Ni Swibelhela a tlhela a tirha ka Comissão la Swa Ku Yaka.
Hi 2013, Makwerhu Jedele ni nsati wa yena va tlhele va rhambiwa leswaku va tlhelela Betele swaku va ya tirha ka projetu la ku yaka la Warwick. Ku sukela kolanu va tirhele aPatterson ni Wallkill. Makwerhu Jedele a tirhe a LDC ni ka Ntirho wa Ku Tendera Timhaka ta Ku Fambisana ni Swibelhela. Hi Março wa 2023, a vekiwe swaku a va mupfunisi wa Comissão la Ntirho la Ntlawa Lowu Rhangelaka. Loko a vulavula hi mintirho hinkwayu leyi a nga yi yendla, a vula leswi: “Loko u nyikiwa xiyavelo xa nyuwani u nga ha karhateka, se hi lanu swi lavaka u tshemba Yehovha hikusa hi yena a hi pfunaka ku hetisisa hinkwaswu leswi a hi kombelaka swona.”
Jacob Rumph ni nsati wa yena Inga
Makwerhu Rumph a psaliwe Califórnia, aEstados Unidos. Nkama lowu a ha li mutsongo, mamani wa yena a a holile, hambileswo a yendle hinkwaswu leswi a nga swi kota swaku a mu djondzisa ntiyiso. Lembe ni lembe, Makwerhu Rumph a a ya pfuxela vhovho wa yena wa xisati lweyi a a li Mboni ya Yehovha ya ku tshembeka. Vhovho wa yena a mu pfunile swaku a ya a wu rhandza ntiyiso naswona nkama lowu a a li ni 13 wa malembe, a kombele ku djondzeliwa Bibele. A tsakamisiwile na wa ha li mutsongo, hi diya 27 ka Setembro wa 1992. Lexi tsakisaka, mamani wa yena lweyi a a holile a tlhele a sungula ku ya mintlhanganwini ni ku chumayela; naswona papayi wa yena ni vamakwavu va yena va yendle nhluvuku va gama va tsakamisiwa.
Nkama na wa ha li jovhem, Makwerhu Rumph a vone swaku vapfuli va ndlela i vanhu lava nga tsaka. Se nkama a nga gama xikola a sungule ku va mupfuli wa ndlela hi Setembro wa 1995. Hi 2000, a rhurhile a ya Equador leswaku a ya pfunisa lani a ku ni xilaveko xa vachumayeli. A Equador a tive Inga, mupfuli wa ndlela lweyi a a ta hi Canadá naswona hi ku famba ka nkama va chadile. Loko se va chadile va tshame ka xidoropani xaxitsongo aEquador lani a ku ni grupu lalitsongo la vachumayeli. Swoswi se i bandla lalikulu.
Hi ku famba ka nkama, Makwerhu Rumph ni nsati wa yena Inga va vekiwile swaku va va vapfuli va ndlela va ku hlawuleka naswona hi wugamu Makwerhu Rumph a vekiwile swaku a va mudjikelezi. Hi 2011 va rhambiwile swaku va ya ka Xikola xa Jiliyadi ka turma la wu 132. Loko va graduwariwile, va tikhorise hi ku yendla mintirho ya ku hambanahambana ya ku hlawuleka ka matiko ya ku hambanahambana. Hi xikombiso va tirhile aBetele, ka ntirho wa wumisiyonariyu, funtshi Makwerhu Rumph a tirhe tanihi mudjikelezi ni ku tlhela a va mun’we wa vadjondzisi ka Xikola xa Vachumayeli va Mfumu.
Hi mhaka korona, Makwerhu Rumph ni nsati wa yena va tlhelele aEstados Unidos. Va ye va ya tirhela ka Betele la Wallkill, lani Makwerhu Rumph a nga trenariwa hi Departamento de Serviço. Va game va rhumeliwa swaku va tlhela va ya tirhela ka Betele la Equador, lani Makwerhu Rumph a nga tirha ka Comissão La Betele. Hi 2023 va rhumeliwile aWarwick, naswona hi Janeiro wa 2024, Makwerhu Rumph a vekiwile swaku a va mupfunisi wa Comissão la Ntirho la Ntlawa Lowu Rhangelaka. Loko a pimisa hi mintirho hinkwayu leyi a nga yi yendla, Makwerhu Rumph a li: “Lexi yendlaka ntirho wu hlawuleka a hi ndhawu leyi hi tirhelaka ka yona, kambe i vanhu lava hi tirhaka na vona.”
Ha wu khensa ntirho lowu vamakwerhu lava va wu yendlaka naswona ha va ‘hlonipha vanhu va ku tshamisa leswo.’ — Filp. 2:29.