Hi Mhaka Muni Xikwembu Xi Pfumelele Ku Dlayeteliwa Ka Vayuda A Nkameni Wa Manazi?
Vanhu va vanyingi lava yendlaka xivutiso lexo va feliwe hi maxaka ya vona naswova va lava nhlamulu ya xivutiso lexi va tlhela va lava ni ku tiyisiwa. Van’wani va vona ku dlayetiliwa ka Vayuda na ku li nchumu xa ku biha hintamu lexi nga tshama xi yendleka naswona swa va karhatela ku kholwa leswaku ku ni Xikwembu.
Mavunhwa man’wani lawa vanhu va ma vulaka hi Xikwembu hi mhaka ya ku dlayeteliwa ka Vayuda
Mavunhwa: Swi hoxile ku va vanhu va vutisa swaku hi mhaka muni Xikwembu xi pfumelele swaku Vayuda va dlayeteliwa.
Ntiyiso: Hambi hi vanhu va lipfumelo lalikulu va tshame va vutisa swaku hi mhaka muni Xikwembu xi pfumelela wubihi. Hi xikombiso, muprofeta Habakuki a xi vutise leswi Xikwembu: “Hi mhaka muni u ni tshika ni vona wubihi? Hi mhaka muni u tshika vanhu va hluphiwa? Hi mhaka muni ni vona ku dlayana ni tinyimpi? Hi mhaka muni ku tale ku holova ni ku lwa?” (Habakuki 1:3) Handle ka ku va Xikwembu xi sola Habakuki hi mhaka ya swivutiso leswi, xi yendle swaku swivutiso swa yena swi tsaliwa Bibeleni ku va hinkwerhu hi ta swi tiva.
Mavunhwa: Xikwembu a xi na mhaka ni ku xaniseka ka vanhu.
Ntiyiso: Xikwembu a xi swi rhandzi ku vona vanhu na va xaniseka. (Swivuriso 6:16-19) Aminkameni ya Nowa, Xikwembu ‘xi twe ku vava ka mbilu ya xona’ hi mhaka ya wubihi leli a li talile misaveni. (Genesa 6:5, 6) Ha tiyiseka swaku Xikwembu xi vaviseke hintamu nkama lowu xi nga vona Vayuda na va dlayeteliwa a minkameni ya Manazi. — Malakiya 3:6.
Mavunhwa: Ku dlayeteliwa loku ka Vayuda a ku li xikhatiso xa Xikwembu.
Ntiyiso: I ntiyiso swaku Xikwembu xi tshame xi pfumelela swaku doropa la Yerusalema li helisiwa hi Varoma ka minkama ya vapostolo. (Matewu 23:37–24:2) Hambileswo, ku sukela ka nkama lowuyani, Xikwembu a xa ha tlhelanga xi langa tiko swaku xi li komba timpsalu kumbe ku li khatisa. Ka Xikwembu “a ku na ku hambana xikarhi ka Muyuda ni Mugriki.” — Varoma 10:12.
Mavunhwa: Loko a ku ni Xikwembu lexi nga ni lirhandzu naswona xa matimba hinkwawu a xi nga ta swi pfumelela swaku ku dlayeteliwa Vayuda.
Ntiyiso: Hambileswi Xikwembu xi kalaka xi nga yendli swaku vanhu va hlupheka, kambe minkama yin’wani xa swi pfumelela swaku va hlupheka. — Yakobe 1:13; 5:11.
Hi mhaka muni Xikwembu xi pfumelele swaku Vayuda va dlayeteliwa?
Leswi nga yendla swaku Xikwembu xi pfumelela swaku Vayuda va dlayeteliwa, swa fana ni leswi xi yendlaka xi pfumelela swaku vanhu hinkwavu va hlupheka ku nga ku va ku hlamuliwa mhaka leyi nga sungula ka jardim la Edeni. Bibele li swi kombisa kahle swaku lweyi a fumaka misava leyi a hi Xikwembu kambe i Sathana. (Luka 4:1, 2, 6; Yohani 12:31) Vona swilo swimbirhi leswi kombisiwaka ka Bibele leswi nga ta hi pfuna ku twisisa swaku hi mhaka muni Xikwembu xi pfumelele ku dlayeteliwa ka Vayuda.
Xikwembu xi yendle vanhu na va ni chunseko wa ku tilangela. Xikwembu xi byele Adamu na Evha leswi a va fanele va swi yendla kambe a xi va sindzisanga, vona a va ni chunseko wa ku langa ku yendla leswi nga swinene kumbe leswi swi kalaka swi nga li swinene. Se leswi va nga langa ku yendla swilo leswi kalaka swi nga li swinene ni leswi vanhu van’wani hi ku famba ka nkama na vona va nga langa swilo swa ku kala swi nga li swinene swi yendle swaku vanhu hinkwavu va hlupheka. (Genesa 2:17; 3:6; Varoma 5:12) Buku leli nge Declaração Dos Principios Do Judaismo Conservador li li: “Ku tala ka swilo leswi yendlaka swaku vanhu va xaniseka namuntlha, swi vangiwa hileswi vanhu va kalaka va nga wu tirhisi kahle chunseko wa vona wa ku tilangela lowu va nga nyikiwa hi Xikwembu.” Xikwembu a xi tsimbisanga vanhu swaku va va ni chunseko wa ku tilangela, kambe xi va nyike nkama wa leswaku va zama ku lulamisa swikarhatu swa vona hi voxe.
Xikwembu xi ta helisa swikarhatu hinkwaswu leswi nga vangiwa hi ku dlayeteliwa ka Vayuda. Xikwembu xi tshembisa ku pfuxa vanhu hinkwavu lava nga fa hambi hi Vayuda lava nga dlayeteliwa hi nkama wa Manazi. Xi ta tlhela xi helisa ku vava hinkwaku loku lava nga pona ku dlayeteliwa lokuyani va nga ku twa hi mhaka swilo swa ku biha leswi va nga kumana naswona. (Esaya 65:17; Mintirho 24:15) Lirhandzu la Xikwembu hi lona li hi tiyisekisaka swaku xi ta swi hetisisa switshembiso swa xona. — Yohani 3:16.
Ku tala ka lava nga pona nkama ku nga dlayeteliwa Vayuda va swi kotile ku tama va tiyisa lipfumelo la vona ni ku twisisa swaku va hanyela yini hi ku twisisa leswi yendlaka swaku Xikwembu xi pfumelela wubihi ni leswi xi nga ta swi yendla swaku xi helisa wubihi hinkwalu.