Indjhe Sathana A Kona Hikakunene?
Nhlamulu ya Bibele
Ina, Sathana a kona. Bibele li vula swaku i ntsumi ya ku biha leyi nga djikela Xikwembu naswona hi yena “lweyi a fumaka misava”. (Yohani 14:30; Vaefeza 6:11, 12) Bibele li vula leswi Sathana a nga tshamisa xiswona hi mavito lawa li mu vitanaka hi wona:
● Sathana, leswi vulaka “Mukaneti.” — Yobo 1:6.
● Davulosi, leswi vulaka “Mulumbeti.” — Nhlawutelo 12:9.
● Nyoka, leswi ka Bibele swi vulaka “Mukanganyisi.” — 2 Vakorinto 11:3.
● Lweyi a ringaka van’wani. — Matewu 4:3.
● Muhembi. — Yohani 8:44.
Sathana a hi wubihi leli nga ka mbilu ya munhu
Vanhu van’wani va pimisa swaku Sathana Davulosi i wubihi leli nga ka mbilu ya munhu. Hambileswo, Bibele li vulavula hi mabulu lawa ma nga va kona xikarhi ka Xikwembu na Sathana. Leswi Xikwembu xi kalaka xi nga na xidjoho, a xi na wubihi ka mbilu ya xona. (Deteronoma 32:4; Yobo 2:1-6) Hi lana ku fanaka, Sathana a tlhele a zama ku ringa Yesu, lweyi na yena a a nga na xidjoho. (Matewu 4:8-10; 1 Yohani 3:5) Hi mhaka leyo, Bibele li vula swaku Sathana i munhu wa hikakunene ku nga li wubihi leli nga ka mbilu ya munhu.
A hi fanelanga hi hlamala loko vanhu va vanyingi va nga kholwi swaku Sathana a kona hikusa Bibele li kombisa swaku a tirhisa wukanganyisi swaku a kuma leswi a swi lavaka. (2 Vatesalonika 2:9, 10) Ndlela yin’wani leyi a yi tirhisaka swaku a kanganyisa vanhu i ku va yendla va pimisa swaku a hi munhu wa hikakunene. — 2 Vakorinto 4:4.
Mavunhwa man’wani lawa vanhu va ma vulaka hi Sathana
● Mavunhwa: Vito lin’wani la Sathana i Lucifer.
Ntiyiso: Rito la Xiheberu leli Mabibele man’wani ma li hundzuluxelaka li va “Lucifer” li vula “ku phatima.” (Esaya 14:12) Ka Bibele, lani ku nga tirhisiwa rito leli a ku vulavuliwa hi tihosi ta Babilona. Tihosi leti a ti tibyela hintamu, naswona a ti ta danisiwa hi Xikwembu. (Esaya 14:4, 13-20) A rito leli nge “ku phatima” li tirhisiwile swaku ku poyiliwa tihosi ta Babilona nkama ti nga hluliwa.
● Mavunhwa: Sathana a tirhisana ni Xikwembu, swi fana ni loko Xikwembu xi li muyavanyisi se Sathana a li adivhogadu lweyi a xi pfunaka ku vona lweyi a nga ni nandzu.
Ntiyiso: Sathana i nala wa Xikwembu, a lwisana ni lava tirhelaka Xikwembu naswona wa va lumbeta. — 1 Pedru 5:8; Nhlawutelo 12:10.