Xikwembu Xi Kona?

Nhlamulu ya Bibele

Ina, Bibele li kombisa minchumu ya yinyingi leyi kholwisaka swaku Xikwembu xi kona. Bibele li hi pfuna ku tiyisa lipfumelo la hina hi Xikwembu, kambe a hi fanelanga hi kholwa hinkwaswu leswi wukhongeli li swi djondzisaka, hi fanele hi tirhisa ‘minpimiso ya hina hinkwayu’ leswaku hi “twisisa”. (Varoma 12:1; 1 Yohani 5:​20) Vona leswi Bibele li hi pfunaka hi swona:

• Leswi misava yi nga tshamisa xiswona swi kombisa leswaku ku ve ni lweyi a nga yi yentxa. Bibele li li: “Phela yindlo yin’wana ni yin’wana yi yakiwa hi munhu, kambe lweyi a nga yentxa minchumu hinkwayu i Xikwembu.” (Vaheberu 3:4) Hambileswi mhaka leyi yi kalaka yi nga karhati ku yi twisisa, yi pfuna vanhu va vanyingi lava va nga djondza hintamu.a

• Hina vanhu ha swi lava ku twisisa swaku hi mhaka muni Xikwembu xi hi yentxile. Hambiloko hi ni hinkwaswu leswi swi hi yentxaka hi tsaka, a nhlamulu ya mhaka leyi a hi tshiki ku lava ku yi tiva. Phela a nhlamulu leyi ha yi lava hikusa ha swi lava ku va “vanghanu va Xikwembu” hi tlhela hi xi tirhela. (Matewu 5:3; Nhlawutelo 4:​11) Kuva hi lava ku tiva Xikwembu hi tlhela hi xi tirhela swi kombisa swaku xona xi kona, xi ni lirhandzu naswona xi lava leswaku hi tsaka. — Matewu 4:4.

• Hambi leswi wuprofeta la Bibele li nga tsaliwa khale hintamu, kambe lona li hetisekile hi leswi Bibele li nga swi vulisa xiswona. Kuva Bibele li tlhamuseli kahle leswi swi nga yentxeka swi kombisa swaku lona li ta hi ka munhu lweyi a nga ni matimba hintamu. — 2 Pedru 1:21.

• 

  Vanhu lava va nga tsala Bibele a va tiva minchumu ya yinyingi hintamu ku tlula vanhu lava va nga hanya ka nkama wa vona. Hi xikombiso khale vanhu a va kholwa leswaku misava yi tiyisiwa hi swiharhi swa ku fana ni ndlopfu, khumba la khwati ni tihomu. Kambe ku hambana ni leswo Bibele li vula swaku Xikwembu “xi hayeka misava ampfhukeni.” (Yobo 26:7). Kambe Bibele li tlhela li vula swaku misava yi fana ni bola. (Esaya 40:22) Vanhu va vanyingi va kholwa swaku lava va nga tsala Bibele va swi kotile ku tsala minchumu leyi a yi nga tiviwi hi munhu hikusa leswi va nga swi tsala swi ta hi ka Xikwembu.

• Bibele hi lona li hi nyikaka tinhlamulu ta swivutiso swa ku karhata leswi nga ha yentxaka munhu a nga kholwi swaku Xikwembu xi kona loko a nga swi twisisi. Xin’wana xa swona hi lexi nge: Loko Xikwembu xi ni lirhandzu ni matimba hi mhaka muni ku ni wubihi ni ku hlupheka misaveni? Hi mhaka muni wukhongeli li yentxa swaku vanhu va hanya hi minchumu ya ku biha ku nga li ya yinene? — Tito 1:​16.