Muzimbha wa munhu lani swi kalaka swi nga koteki swaku mfumu wu va kona

Mfumu Wa Xikwembu I Nchumu Lowu Nga Ka Timbilu Ta Vanhu?

Nhlamulu Ya Bibele

Ihim, a Mfumu wa Xikwembu a hi nchumu lowu nga ka timbilu ta Vakreste.a Loko Bibele li vulavula hi lomu Mfumu wa Xikwembu wu kumekaka kona li vula swaku i “Mfumu wa matilo”. (Matewu 4:17) Vona swaku Bibele li swi kombisisa ku yini swaku Mfumu lowu i mfumu lowu wu nga matilweni.

Phela Mfumu wa Xikwembu wu ni vanhu lava va fumaka, wu ni vanhu lava va fumiwaka, wu ni minawu wu tlhela wu va ni xikongomelo xa ku hetisisa ku rhandza ka Xikwembu amatilweni ni lani misaveni. — Matewu 6:10; Nhlawutelo 5:10.
Mfumu lowu wu ta fuma “vanhu hinkwavu va matiko ni tirimi ta ku hambanahambana” lani misaveni. (Daniyele 7:13, 14) Mfanelo leyi ya ku fuma a yi ti hi ka vanhu, kambe hi ka Xikwembu. — Tipisalema 2:4-6; Esaya 9:7.
Yesu a vule swaku vapostolo va yena va ku tshembeka a va ta tipatsa na yena ka Mfumu lowu wa matilo swaku va va tihosi. — Luka 22:28, 30.
Mfumu lowu wu ni valala kambe wu ta va helisa hinkwavu. — Tipisalema 2:1, 2, 8, 9; 110:1, 2; 1 Vakorinto 15:25, 26.

A Bibele a li djondzisi swaku Mfumu wa le matilweni wu le ka mbilu ya hina naswona a wu fumi mbilu ya munhu; kambe li kombisa swaku “rungula la Mfumu” kumbe “mahungu lawa ya ku tsakisa ya Mfumu” ma nga khumba timbilu ta hina naswona ma fanele ma yendla swoleswo. — Matewu 13:19; 24:14.

Ma vula yini marito lawa ma nge “Mfumu wa Xikwembu wu le xikarhi ka n’wina”?

Xin’wani xi yendlaka swaku vanhu va dludleka nhloko hilani Mfumu wa Xikwembu wu kumekaka kona, hi mhaka ya leswi Mabibele man’wani ma ma hundzuluxelaka hi yona marito ya buku la Luka 17:21. Hi xikombiso, a Bibele la Almeida leli nga pfuxetiwa, li vulaka swaku “mfumu wa Xikwembu wu ndzeni ka n’wina.” Leswaku hi yi twisisa kahle ndzimana leyi, swi lava hi tiva swaku Yesu a a li ka xiyimu xini nkama a nga vula marito lawa.

Varhangeli va wukhongeli lava a va li valala va Yesu — Mfumu wa Xikwembu a wu nga li kona ndzeni ka timbilu ta valala va Yesu lava a va tibyela va tlhela va va vadlayi

Yesu a a vulavula ni Vafarisi, ku nga ntlawa wa varhangeli va wukhongeli lava a va li valala va yena naswona a va lava ku mu dlaya. (Matewu 12:14; Luka 17:20) Se a swi ta twisiseka ku vula swaku Mfumu a wu li ndzeni ka timbilu ta Vafarisi lava va ku tibyela? Yesu a va byele leswi: “Ndzeni mi tale hi wukanganyisi ni swilo swa ku kala nawu.” — Matewu 23:27, 28.

Wuhundzuluxeli lin’wani li swi vule kahle leswi Yesu a nga swi vula ka Luka 17:21 loko li ku: “Mfumu wa Xikwembu wu kona xikarhi ka n’wina.” (Bibele la Nova Versão Internacional) “Mfumu wa Xikwembu wu le xikarhi ka n’wina.” (Wuhundzuluxeli la Misava ya Nyuwani) Ku va Mfumu wa Xikwembu wu li “xikarhi” ka Vafarisi kumbe “ndzeni”, ka vona a swi vula swaku Yesu lweyi a nga langiwa hi Xikwembu swaku a va Hosi a a li na vona phambheni ka vona. — Luka 1:32, 33.

a Wukhongeli la linyingi leli li tivulaka vakreste li djondzisa swaku Mfumu wa Xikwembu wu ndzeni ka munhu kumbe ka mbilu ya munhu. Hi xikombiso, a Convenção Batista do Sul la Estados Unidos, li vula swaku Mfumu wa Xikwembu “i nchumu lowu nga ndzeni ka mbilu ni ka wutomi la munhu.” Hi ku fanana, Papa Bento XVI ka buku la yena leli nge: Jesus de Nazaré, (leswi vulaka: Yesu wa Nazareta) a vule swaku “Mfumu wa Xikwembu wu nghena ka mbilu ya munhu lweyi a yingisaka”.