Lifu La Yesu Li Nga Va Ponisisa Ku Yini “Vanhu Va Vanyingi”?
Nhlamulu ya Bibele
Xikwembu xi tirhisa lifu la Yesu leswaku xi ponisa vanhu ka xidjoho ni lifu. Bibele li vula swaku vanhu va nga ponisiwa hi ngati ya Yesu. (Vaefeza 1:7; 1 Pedru 1:18, 19) Hi mhaka leyo Yesu a tile lani misaveni swaku a ta “nyikela wutomi la yena swaku li kutsula vanhu va vanyingi.” — Matewu 20:28.
Hi mhaka muni a ku laveka swaku ku ‘kutsuliwa vanhu va vanyingi’?
Wanuna wa ku sungula ku nga Adamu a vumbiwe na a hetisekile, kumbe hi marito man’wani, na a nga na xidjoho. A a ta va a kume wutomi la ku kala li nga heli, kambe a li luzile hi mhaka ya leswi a kalaka a nga xi yingisanga Xikwembu. (Genesa 3:17-19) Adamu a hundzisele xidjoho lexo ka vana va yena. (Varoma 5:12) Hi mhaka leyo, Bibele li vula swaku Adamu a tixavisile yena a tlhela a xavisa ni vana va yena swaku va va swikarawa swa xidjoho ni lifu. (Varoma 7:14) A nga kona ni mun’we ka vana va yena lweyi a a ta kota ku lunghisa leswi nga wonhiwa hi Adamu hikusa hinkwavu a va ni xidjoho. — Tipisalema 49:7, 8.
Vana ni vatukulu va Adamu a va nga ta yendla nchumu swaku va helisa xidjoho lexi a va li na xona, kambe Xikwembu xi va twele wusiwana hintamu. (Yohani 3:16) Kambe hi ku ya hi minawu ya xona ya ku lulama a xi nga ta tekela ku va rivalela xidjoho lexo na xi nga yendlanga nchumu kumbe xi yendla ingi a xi swi vonanga leswi va nga swi yendla. (Tipisalema 89:14; Varoma 3:23-26) Xikwembu xa va rhandza vanhu, hi mhaka leyo xi lavetele ndlela yayinene ya ku va rivalela xi tlhela xi susa swidjoho swa vona. (Varoma 5:6-8) Xikwembu xi yendle leswo hi ku tirhisa lifu la Yesu.
Leswi nkutsulu wu tirhisaka xiswona
A Bibeleni, rito leli nge “nkutsulu” li patsa minchumu yinharhu:
Ku hakela. — Tinhlayo 3:46, 47.
Ku ponisa, kumbe ku chunsa. — Eksoda 21:30.
Leswi hakeliwaka swi fanele swi ringana ni leswi ku hakeliwaka hi swona.a
Vona swaku swilo leswinharhu swi fambisanisa ku yini ni nkutsulu wa Yesu Kreste.
Ku hakela. Bibele li vula swaku Vakreste va “xaviwile hi presu.” (1 Vakorinto 6:20; 7:23) A presu ya kona ku ve ngati ya Yesu leyi nga xavela “Xikwembu vanhu lava taka hi ka tinxaka hinkwatu, tirimi hinkwatu, vanhu hinkwavu ni ka matiko hinkwawu”. — Nhlawutelo 5:8, 9.
Ku ponisa. Lifu la Yesu li yendla swaku hi ponisiwa ka xidjoho. — 1 Vakorinto 1:30; Vakolosa 1:14; Vaheberu 9:15.
Ku ringana. Leswi Yesu a nga nyikela hi swona swa ringana ni leswi Adamu a nga swi luza ku nga wutomi la ku kala li nga na xidjoho. (1 Vakorinto 15:21, 22, 45, 46) A Bibele li li: “Hikusa leswi va ku tala va nga yendliwa vadjohi hi mhaka ya leswi munhu mun’we [Adamu] a kalaka a nga yingisanga ni vanhu va ku tala va ta yendliwa va ku lulama hi mhaka ya ku yingisa ka munhu mun’we [Yesu Kreste].” (Varoma 5:19) Ndzimana leyi yi kombisa swaku swi kotekise ku yini ku va munhu mun’we a hakela swidjoho swa vanhu va vanyingi. Phela Yesu a tinyikelile swaku “a va nkutsulu wa vanhu hinkwavu.” Hinkwavu lava yendlaka leswi lavekaka va nga pfuneka hi nkutsulu wa Yesu. — 1 Timotiya 2:5, 6.
a Ka tirimi leti Bibele a li tsaliwe hi tona ku sunguleni, marito lawa ma nga hundzuluxeliwa ma va “nkutsulu” ma kombisa swaku ku vulavuliwa hi male, kumbe nchumu lexi xi hakeliwaka leswaku ku kumiwa nchumu xin’wani. Hi xikombiso, rito la Xiheberhu leli nge ka·fár li vula “ku funengeta.” (Genesa 6:14) Leswi minkama ya yinyingi swi vulaka ku funengeta swilo leswi nga wonhiwa hi mhaka ya xidjoho. (Tipisalema 65:3) Se rito leli nge kó·fer li tirhisiwa swaku ku vuliwa male leyi humesiwaka leswaku ku hakeliwa swilo swoleswo. Hi xikombiso ka Bibele, minkama yin’wani leswo swi vula ku chunsa. (Eksoda 21:30) Hi ku fanana rito la Xigriki leli nge lý·tron, leli minkama ya yinyingi li hundzuluxeliwaka li va “nkutsulu,” na lona li nga ha vula “male leyi hakeliwaka leswaku ku chunsiwa munhu.” (Matewu 20:28) Vatsali van’wani va Vagriki va tirhise rito leli swaku va vulavula hi male leyi hakeliwaka leswaku ku chunsiwa munhu lweyi a nga khomiwa nyimpini kumbe ku chunsiwa xikarawa.