I Yini Nhlomulu Wawukulu?

Nhlamulu ya Bibele

Nhlomulu wawukulu ku ta va nkama wa ku karhata hintamu swinene wa ku a wu se tshama wu va kona misaveni. Hi ku ya hi Bibele, wu ta yendleka ka “masiku ya wugamu” kumbe ka “minkama ya wugamu.” (2 Timotiya 3:1; Daniyele 12:4, Bibele la New American) Yesu a tlhamusele swaku ka nhlomulu wawukulu a ku ta va ni ‘nhlomulu wa ku a ku se tshama ku humelela wa ku fana na wona ku sukela nkama Xikwembu xi nga tumbuluxa swilo hinkwaswu ku ta fikela hi nkama wolowo, naswona a wu nga ha ta tlhela wu va kona.’ — Marka 13:19; Daniyele 12:1; Matewu 24:21, 22.

I mpsini swi nga ta yendleka ka nkama wa nhlomulu wawukulu?

• Ku ta helisiwa wukhongeli la mavunhwa. Xikwembu xi ta helisa wukhongeli la mavunhwa hi ndlela ya ku hlamalisa funtshi hi xihantla. (Nhlawutelo 17:1, 5; 18:9, 10, 21) Xi ta tirhisa tihosi ta misava leti vumbiwaka hi Nações Unidas swaku ti helisa a wukhongeli la mavunhwa. — Nhlawutelo 17:3, 15-18.a

• Wukhongeli la ntiyiso li ta hlaseliwa. Xikwembu xi kombe muprofeta Ezekiyele hi ndlela ya singita, ntlawa wa matiko lowu vitaniwaka “Goge wa tiko la Magoge” na wu zama ku helisa vanhu lava nga ka wukhongeli la ntiyiso. Kambe Xikwembu a xi nga ta pfumelela swaku vanhu volavo va helisiwa. Xi ta va vhikela. — Ezekiyele 38:1, 2, 9-12, 18-23.

• Ku ta yavanyisiwa vanhu lani misaveni. Yesu a ta yavanyisa vanhu hinkwavu lani misaveni, a “va hambanisa ku fana ni murisi loko a hambanisa tinyempfu ka timbuti.” (Matewu 25:31-33) A ta pimisa hi yini nkama lowu a yavanyisaka vanhu? A ta pimisa hi leswi a va va khomisa xiswona “vamakwavu” va yena, ku nga lava nga ta fuma na yena tilweni. — Matewu 25:34-46.

• Ku ta hlengeletiwa lava nga ta ya fuma na Yesu. Loko lava nga langiwa swaku va ya fuma na Yesu matilweni va tshembeka anze va fa, va ta pfuxiwa swaku va ya matilweni. — Matewu 24:31; 1 Vakorinto 15:50-53; 1 Vatesalonika 4:15-17.

• Ku ta va ni nyimpi leyi vitaniwaka armajedoni. A nyimpi leyi yi vitaniwa “nyimpi ya siku lalikulu la Xikwembu xa Matimba Hinkwawu” yi tlhela yi vitaniwa “siku la Yehovha”. (Nhlawutelo 16:14, 16; Esaya 13:9; 2 Pedru 3:12) Ka nyimpi leyi, Yesu a ta helisa hinkwavu lava lwaka ni Xikwembu, (Sofaniya 1:18; 2 Vatesalonika 1:6-10) a tlhela a helisa mimfumu hinkwayu, leyi ka Bibele yi fanisiwaka ni xiharhi xa ku chavisa hintamu lexi nga ni 7 wa tinhloko. — Nhlawutelo 19:19-21.

I mpsini swi nga ta yendleka loko nhlomulu wawukulu se wu hundzile?

• Sathana ni madimoni ya yena va ta pfaleliwa. Ntsumi ya matimba yi ta pfalela Sathana ni madimoni ya yena ka “xikhele xa ku yenta”. (Nhlawutelo 20:1-3) Kambe leswo a swo lava ku vula swaku ko va ni xikhele xa ku yenta xa hikakunene. Swi lava ku vula swaku a va nga ha ta swi kota ku yendla minchumu ya ku biha, hikusa swi ta yendla ingi se va file. A va nga ha ta xengetela vanhu swaku va yendla swilo swa ku biha kumbe va yendla swilo swa ku biha lani misaveni. — Nhlawutelo 20:7.

• Yesu a ta sungula ku fuma lani misaveni. Mfumu wa Yesu wa 1.000 wa malembe wu ta yendla swilo swa ku xonga lani misaveni wu swi yendlela vanhu. (Nhlawutelo 5:9, 10; 20:4, 6) A hi swi tivi swaku i vanhu vangaki va nga ta pona ka nhlomulu wawukulu, kambe Bibele li vula swaku i “xitshungu xaxikulu”. Xitshungu lexi xi ta swi vona loko Mfumu wa Yesu wu yendla swilo swa ku xonga lani misaveni. — Nhlawutelo 7:9, 14; Tipisalema 37:9-11.