I Vamani Va Ya Ka Matilweni?
Nhlamulu ya Bibele
Xikwembu xi lange Vakreste van’wani va ku tshembeka lava loko va fa, va pfuxiwa swaku va ya hanya tilweni. (1 Pedru 1:3, 4) Loko se va langiwile, Vakreste lava va fanele va tama va tshembeka va tlhela va hanya hi ndlela leyi yi tsakisa Xikwembu. Va fanele va yendla leswo leswaku va nga luzekeliwe hi ntshembo wa vona wa ku ya hanya tilweni. — Vaefeza 5:5; Vafilipiya 3:12-14.
Lava va nga langiwa swaku va ya tilweni va ya yendla yini?
Vakreste lava va nga langiwa va ta ya tirha na Yesu tanihi hi tihosi ni vaprista ku ringana 1.000 wa malembe. (Nhlawutelo 5:9, 10; 20:6) Vona va ta lumba ntlawa wa “matilo ya nyuwani,” ku nga mfumu lowu nga tilweni, naswona va ta fuma a “misava ya nyuwani,” ku nga ntlawa wa vanhu lava nga ta hanya lani misaveni. Lava va nga ta hanya tilweni va ta pfuna vanhu swaku va va va ku hetiseka ku nga leswi Xikwembu a xi swi lava ku sukela a ku sunguleni. — Esaya 65:17; 2 Pedru 3:13.
I vangaki lava va nga ta pfuxiwa swaku va ya hanya tilweni?
Bibele li kombisa swaku i 144.000 wa vanhu lava va nga ta pfuxiwa swaku va ya hanya tilweni. (Nhlawutelo 7:4) Ka xivono lexi kumekaka ka Nhlawutelo 14:1-3, mupostolo Yohani a vone “Xinyempfana na xi nyime ka Nhava ya Siyoni; a xi ni 144.000 wa vanhu.” Ka xivono lexi, a “Xinyempfana” xi nyimela Yesu nkama lowu a nga pfuxiwa a ku feni. (Yohani 1:29; 1 Pedru 1:19) A “Nhava ya Siyoni” yi nyimela a wuhosi la ku tlakuka la Yesu ni lava va 144.000 va nga ta fuma na yena atilweni. — Tipisalema 2:6; Vaheberu 12:22.
Vakreste lava va nga ‘vitaniwa, va tlhela va langiwa’ swaku va ya fuma na Kreste atilweni va tiviwa tanihi “ntlhambi wa wutsongo.” (Nhlawutelo 17:14; Luka 12:32) Leswo swi kombisa swaku lava va ya ka tilweni i vatsongo loko va pimanisiwa ni tinyempfu hinkwatu ta Yesu. — Yohani 10:16.
Minchumu leyi kalaka yi nga li ntiyiso hi lava va ya ka tilweni
Mavunhwa: Vanhu hinkwavu vavanene va ta ya tilweni.
Ntiyiso: Xikwembu xi tshembise swaku vanhu va vanyigi vavanene va ta hanya hi masiku ni masiku kola misaveni. — Tipisalema 37:11, 29, 34.
Yesu a te: “A ku na munhu lweyi a nga tshama a tlhantuka a ya tilweni.” (Yohani 3:13) Hi marito lawa a Yesu a kombise swaku vanhu vavanene lava nga fa na yena a nga se ta lani misaveni va ku fana na Abrahamu, Moxe, Yobo na Davhida, a va yanga tilweni. (Mintirho 2:29, 34) Ku hambana ni leswo, vona a va ni tshembo wa ku pfuxiwa leswaku va hanya lani misaveni. — Yobo 14:13-15.
Lava nga ta pfuxiwa ku ya hanya tilweni hi vona va lumbaka ntlawa lowu wu nga ta “sungula ku pfuxiwa.” (Nhlawutelo 20:6) Leswo swi kombisa swaku ku ta va ni van’wani lava va nga ta pfuxiwa swaku va hanya lani misaveni.
Bibele li djondzisa swaku ka Mfumu wa Xikwembu, “lifu a li nga ha ta va kona.” (Nhlawutelo 21:3, 4) Xitshembiso lexi xi fanele xi yendleka lani misaveni hikusa amatilweni a ku na lifu.
Mavunhwa: Mun’wani ni mun’wani a ta tilangela swaku a lava ku hanya lani misaveni kumbe atilweni.
Ntiyiso: I Xikwembu xi langaka swaku i vamani Vakreste lava va nga ta kuma a “hakelo ya ku vitaniwa hi Xikwembu ni ya tilweni,” ku nga ntshembo wa ku hanya tilweni. (Vafilipiya 3:14) A swi na mhaka swaku munhu a swi navela hintamu ku hanya tilweni kambe i Xikwembu xi langaka swaku munhu a ta hanya kwini. — Matewu 20:20-23.
Mavunhwa: Ntshembo wa ku hanya lani misaveni a wu tsakisi hintamu hikusa munhu a to sala lani misaveni loko swi nga mu faneli ku ya tilweni.
Ntiyiso: Xikwembu loko xi vulavula hi vanhu lava va nga ta hanya lani misaveni hi masiku ni masiku xi li i “vanhu va mina,” “vanhu va mina lava ni nga va langa,” ni “vanhu lava nga katekisiwa hi Yehovha.” (Esaya 65:21-23) Vanhu lava va ta va ni lunghelo la ku hetisisa xikongomelo xa Xikwembu hi vanhu ku nga ku va vanhu va hanya na va nga ha na xidjoho va tlhela va hanya hi masiku ni masiku aparadesi kola misaveni. — Genesa 1:28; Tipisalema 115:16; Esaya 45:18.
Mavunhwa: A numeru ya 144.000 ku vulavuliwaka hi yona ka Nhlawutelo a hi ya ntiyiso.
Ntiyiso: I ntiyiso leswaku ka buku la Nhlawutelo tinumeru tin’wani i ta ku fanekisela, kambe tin’wani i ta ntiyiso. Hi xikombiso, buku leli ka Nhlawutelo li vulavula hi “12 wa mavito ya 12 wa vapostolo va Xinyempfana.” (Nhlawutelo 21:14) Vona swin’wani leswi kombisaka swaku a numeru ya 144.000 i ya ntiyiso.
Nhlawutelo 7:4 yi li “numeru ya lava nga markariwa, [kumbe, lava va nga tiyisekisiwa leswaku va ta ya hanya amatilweni], a va li 144.000.” Tindzimana leti landzelaka, ti fanisa ntlawa wa 144.000 ni ntlawa lowu wun’wani ku nga: “Xitshungu xa xinyingi lexi a ku nga na munhu lweyi a kotaka ku xi konta.” Lava va lumbaka “xitshungu xa xinyingi” na vona va ta ponisiwa hi Xikwembu. (Nhlawutelo 7:9, 10) Se loko numeru ya 144.000 a yi nga li ya ntiyiso, kambe na yi kombetela ka vanhu lava numeru ya vona yi kalaka yi nga tiviwi, a swi nga ta twala ku hambanisa mintlawa leyi yimbirhi.a
Nhlawutelo yi vula swaku lava va lumbaka ntlawa wa 144.000 “va xaviwe xikarhi ka vanhu leswaku va va mihandzu ya ku sungula.” (Nhlawutelo 14:4) Marito lama nge “mihandzu ya ku sungula” ma vula numeru ya yitsongo ya vanhu lava va nga langiwa. Marito lawa ma kombetela kahle ka lava va nga langiwa swaku va fuma na Yesu atilweni. Numeru leyi i yitsongo loko yi pimanisiwa ni ya vanhu lava va nga ta hanya hi masiku ni masiku amisaveni. — Nhlawutelo 5:10.
a Mudjondzisi mun’wani la vuliwaka Robert L. Thomas a vule leswi mayelana ni numeru ya 144.000 leyi kumekaka ka Nhlawutelo 7:4 a te: “A numeru leyi i ya ntiyiso loko yi pimanisiwa ni numeru leyi kumekaka ka Nhlawutelo 7:9. Loko a yi nga li ya ntiyiso swi vula leswaku tinumeru hinkwatu leti hi ti kumaka ka Nhlawutelo a hi nga fanelanga hi ti teka na ti li ta ntiyiso.” — Revelation 1-7: An Exegetical Commentary (Apocalipse 1-7: um Comentário Exegético), página 474.