MAJOVHEM MA VUTISA
Swi Bihile Ku Va Geyi?
David wa 23 wa malembe a li: “Ku sukela na ha li mutsongo, xikarhatu xaxikulu lexi ni nga kumana na xona hi leswaku a ni rhandza vafana. A ni pimisa swaku swi ta hundza, kambe ni swoswi na ha titwisa xiswoleswo.”
Leswi a nga Mukreste David a lava ku tsakisa Xikwembu. Kambe, indjhe a nga swi kota ku tsakisa Xikwembu hambileswi a rhandzaka vafana? Xikwembu xi pimisa yini hi mageyi?
Bibele li li yini?
Leswi vanhu va swi vulaka hi mageyi swa hambana hi ku ya hi lomo va tshamaka kona ni nkama lowu va hanyaka ka wona. Kambe Vakreste a va pfumeli ku ‘yisiwa hala ni hala’ hi “tidjondzo ta mavunhwa”. (Vaefeza 4:14) Handle ka leswo, leswi Vakreste va ma vonisaka xiswona mageyi (ni swin’wani ka wutomi la vona) swi fambisana ni leswi Bibele li swi vulaka.
Leswi Bibele li swi vulaka hi mageyi, swa twisiseka. Li li:
“U nga tshuki u famba masangu ni wanuna mun’wani.” — Levhitika 18:22.
“Xikwembu xi va tshikile va yendla ku navela ka timbilu ta vona xi tlhela xi . . . va tshika va navela swa masangu hi ndlela leyi danisaka, hikusa vavasati lava nga xikarhi ka vona va tshike ku famba masangu ni vavanuna, kambe va famba masangu ni vavasati ntsena.” — Varoma 1:24, 26.
“Mi nga kanganyisiwi. Lava yendlaka wuntunga la swa masangu, lava gandzelaka swikwembu swa mavunhwa, lava mbuyetaka, vavanuna lava tiyendlaka vavasati ni vavanuna lava fambaka masangu ni vavanuna van’wani, vayivi, vanhu va makwanga, swidakwa, lava rhuketelaka ni vakanganyisi, a va nge dli tshomba la Mfumu wa Xikwembu.” — 1 Vakorinto 6:9, 10.
Leswi Xikwembu xi swi vulaka hi mhaka leyi swi tirha ka vanhu hinkwavu, ku nga na mhaka swaku va ni ku navela ka wugeyi kumbe a va na kona. Mhaka hi leswaku vanhu hinkwavu va fanele va tikhoma loko va navela ku yendla swilo leswi swi kalaka swi nga xi tsakisi Xikwembu. — Vakolosa 3:5.
Se leswo swi vula swaku . . . ?
Se leswo swi vula swaku Bibele li vula swaku hi fanele hi nyenya mageyi?
Ihim. Ku vula ntiyiso Bibele li hi byela swaku a hi fanelanga hi nyenya munhu ku nga na mhaka swaku i geyi kumbe a hi geyi. Handle ka leswo, li hi byela swaku hi fanele hi “hanya hi ku rhula ni vanhu hinkwavu,” ku nga na mhaka swaku va hanyisa ku yini. (Vaheberu 12:14) Se, swi bihile ku poyila, ku hlupha kumbe ku ma yendlela swa ku biha mageyi.
Se leswo swi vula swaku Vakreste va fanele va lwisana ni minawu ya mfumu leyi pfumelelaka muchadu wa mageyi?
Bibele li kombisa swaku Xikwembu a xi lava swaku wanuna a chada ni wansati. (Matewu 19:4-6) Kambe minawu leyi mimfumu yi yi vekaka ya leswaku mageyi ma chada yi fambisana ni politika. Naswona Bibele li vula swaku Vakreste a va fanelanga va tipeta ka swa politika. (Yohani 18:36) Hi mhaka leyo, Vakreste a va seketeli kumbe ku lwisana ni minawu leyi pfumelaka swaku mageyi ma chada kumbe swin’wani swa ku fambelana ni swoleswo.
Kambe loko . . . ?
Kambe loko munhu a tshame a va geyi ke? Ku nga va swaku a nga txintxa?
Ina. Van’wani va minkama ya ku tsaliwa ka Bibele lava a va li mageyi, va swi kotile ku txintxa! Loko li hete ku vula swaku mageyi ma nga ta dla tshomba la Mfumu wa Xikwembu, Bibele li te: “Leswo hi leswi van’wani va n’wina a mi hanyisa swona.” — 1 Vakorinto 6:11.
Kambe leswo swi vula swaku lava a va li mageyi va nga ha ta tshuka va navela ku yendla leswi a va swi yendla? Ihim. Bibele li li: “Yambala wumunhu la nyuwani, leli yendliwaka li va la nyuwani hi wutivi la ntiyiso”. (Vakolosa 3:10) Leswi vulaka swaku munhu a tama a txintxa.
Kambe loko munhu lweyi a a li geyi a navela ku yendla ku rhandza ka Xikwembu a ta ku yini loko a navela ku yendla leswi a a swi yendla khale?
Ku fana ni ku navela kun’wani ka ku biha, munhu a nga ha langa ku kala a nga tshameli ku pimisa hi ku navela ka wugeyi ni ku kala a nga swi yendli. A nga swi yendlisa ku yini leswo? Bibele li li: “Tamani mi kongomisiwa hi moya wa ku kwetsima kutani a mi nga ta yendla leswi naveliwaka hi muzimbha wa n’wina lowu nga ni xidjoho.” — Vagalatiya 5:16.
Ndzimana leyi a yi vuli swaku munhu a nga ha ta navela ku yendla swilo swa ku biha, ku fana ni ku navela ku va geyi. Handle ka leswo, ndzimana leyi yi vula swaku loko munhu a tshamela ku djondza Bibele a tlhela a khongela ka Xikwembu a ta va ni ntamu lowu lavekaka swaku a lwisana ni ku navela koloko.
David lweyi hi nga bula hi yena hala henhla wa swi kota ku lwisana ni ku navela ka ku biha hi mhaka leswi a nga bula ni vapsali va yena hi xikarhatu xa yena. Loko se a bule ni vapsali va yena a te: “A swi fana ni ku susa ndzhwalu wa ku tika ka makatla ya mina. Loko a ni bule ni vapsali va mina na na ha li mutsongo wutomi la mina a li ta va li tsakisile.”
Leswi swi kombisa swaku hi to tsaka ntsena loko hi yingisa minawu ya Yehovha. Ha tiyiseka swaku “minawu leyi taka hi ka Yehovha yi lulamile, yi tsakisa mbilu” ni swaku hi ta katekisiwa loko hi yingisa Yehovha. — Tipisalema 19:8, 11.