Ku Nga Va Swaku Misava Leyi Yi Ta Helisiwa?
Nhlamulu ya Bibele
Misava leyi hi tshamaka ka yona a yi nga ta helisiwa, yi hisiwa kumbe yi txintxiwa ku vekiwa yin’wani. Bibele li djondzisa swaku Xikwembu lexi nga yendla misava xi lava swaku vanhu va tshama ka yona hi masiku ni masiku.
“Lava ku lulama va ta tshama misaveni, va ta hanya ka yona hi masiku ni masiku.” — Tipisalema 37:29.
“[Xikwembu xi] tiyise masungulo ya misava; a yi nge susiwi ka ndhawu ya yona hi masiku ni masiku.” — Tipisalema 104:5.
“Misava yi tshama hi masiku ni masiku.” — Ekleziyaxta 1:4.
“Lweyi a nga yendla misava a nga Mutumbuluxi wa yona, lweyi a nga yi veka yi tiya . . . a nga yi tumbuluxanga mahala, kambe a yi yendle swaku ku tshamiwa ka yona.” — Esaya 45:18.
Ku nga va swaku vanhu va ta helisa misava?
Xikwembu a xi nga ta swi pfumelela swaku vanhu va helisa misava hi ku tirhisa tinyimpi, ku yi chimisa kumbe hi tindlela tin’wani. Phela xi ta “helisa lava wonhaka misava.” (Nhlawutelo 11:18) Xi ta swi yendlisa ku yini leswo?
Xikwembu xi ta susa mimfumu ya vanhu, leyi kalaka yi nga swi koti ku vhikela misava xi gama xi veka Mfumu wa xona, ku nga Mfumu wa matilo. (Daniyele 2:44; Matewu 6:9, 10) A Hosi ya Mfumu lowu i Yesu Kreste N’wana wa Xikwembu. (Esaya 9:6, 7) Nkama na a li lani misaveni, Yesu a yendle masingita lawa ma nga kombisa swaku a ni matimba ya ku lawula ntumbuluku. (Marka 4:35-41) Leswi a nga Hosi ya Mfumu wa Xikwembu, Yesu a ta kota ku fuma misava hinkwayu ni hinkwaswu leswi nga ka yona. A ta lunghisa misava a tlhela a yi yendla yi va paradesi ku fana ni Jardim la Edeni. — Matewu 19:28; Luka 23:43.
Bibele li djondzisa swaku misava yi ta helisiwa hi ndzilu?
Ihim, a li djondzisi swona. Vanhu va pimisa leswo hikusa a va yi twisisi kahle ndzimana ya 2 Pedru 3:7, leyi nge: “Matilo ni misava leyi nga kona swoswi swi hlayiseliwe ndzilu.” A hi vonenei swilo swimbirhi swa lisima leswi nga ta hi pfuna ku ma twisisa kahle marito lawa:
Ka Bibele a marito lawa ma nge “Matilo,” “Misava,” ni “ndzilu” ma tlhamusela minchumu ya ku hambanahambana. Hi xikombiso, ka Genesa 11:1, hi Xiheberu ku kombisiwa swaku a misava a yi vulavula lirimi lin’we. Se swa tikomba swaku a “misava” leyi ku vulavuliwaka hi yona lani a hi planeta leli vanhu va tshamaka ka lona kambe ku vulavuliwa hi vanhu va nkama lowuyani.
Loko hi yi kambisisa kahle ndzimana ya 2 Pedru 3:7 hi ta twisisa swaku a rito leli nge matilo, misava, ni ndzilu swi fanekisela yini. Hi xikombiso ka tindzimana 5 ni 6 ku vulavuliwa hi ndhambi ya masiku ya Nowa. Ku kombisiwa leswaku a misava yi helisiwile, kambe ha swi tiva swaku Nowa ni ndjangu wa yena va ponisiwile ka ndhambi, a va helisiwanga. Leswo swi hi pfuna ku twisisa swaku “misava” leyi ku vulavuliwaka hi yona i vanhu va ku biha va nkameni lowuyani. (Genesa 6:11) Ku tlhela ku vulavuliwa hi “matilo” kambe ha swi vona swaku a ku vulavuliwi hi matilo lawa hi ma vonaka loko hi txuvuka henhla hikusa wona ma tame ma va kona, kambe a rito leli a li kombetela ka vanhu lava a va fuma ka minkama ya Nowa. Hi vona va nga helisiwa, kambe a planeta la misava li tame la ha va kona funtshi Nowa ni ndjangu wa yena va tame va hanya ka lona. — Genesa 8:15-18.
Ku fana ni leswi vanhu va le nkameni wa Nowa va nga helisiwa hi ndhambi, a “ndzilu” lowu ku vulavuliwaka hi wona ka 2 Pedru 3:7 wu vula ku helisiwa ka vanhu lava yendlaka swilo swa ku biha, ku nga li ka misava leyi hi hanyaka ka yona. Xikwembu xi tshembisa “matilo ya nyuwani ni misava ya nyuwani lomu ku nga ta va ni ku lulama.” (2 Pedru 3:13) “Misava ya nyuwani” i vanhu lava nga ta fumiwa hi “matilo ya nyuwani” ku nga Mfumu wa Xikwembu. Mfumu lowu wu ta yendla swaku misava yi va paradesi. — Nhlawutelo 21:1-4.