Yesu na a ni vanhu va tinxaka ta ku hambanahambana

Yesu A Hi Ponisisa Ku Yini?

Nhlamulu ya Bibele

Yesu a ponise vanhu va ku tshembeka nkama a nga nyikela wutomi la yena leswaku va kota ku rivaleliwa swidjoho swa vona. (Matewu 20:28) Hi mhaka leyo, Bibele li vula swaku Yesu i “Muponisi wa misava.” (1 Yohani 4:14) Bibele li tlhela li vula swaku: “A ku na lweyi a nga ta hi ponisa loko ku nga li yena [Yesu] hikusa a ku na vito lin’wani hansi ka tilo leli nga nyikiwa vanhu leli hi faneleke ku ponisiwa hi lona.” — Mintirho 4:12.

Yesu a file leswaku a ponisa lava va kombisaka lipfumelo ka yena. (Vaheberu 2:9; Yohani 3:16) Se, “Xikwembu xi mu pfuxile ka lava nga fa,” naswona swoswi Yesu a le matilweni. (Mintirho 3:15) Amatilweni Yesu wa swi kota ku “ponisa hi ku helela lava tshinelaka ka Xikwembu hi ku tirhisa yena, hikusa wa hanya hi masiku ni masiku leswaku a va kombelela” kumbe leswaku a va nyimelela. — Vaheberu 7:25.

Hi mhaka muni hi lava swaku Yesu a hi nyimelela?

Hikusa hinkwerhu hi vadjohi. (Varoma 3:23) Xidjoho xi fana ni muru lowu hi hambanisaka ni Xikwembu funtshi xi hi yisa ku feni. (Varoma 6:23) Kambe Yesu a tirha ku fana ni “muvulavuleli” kumbe adivhogadu lweyi a nyimelelaka hinkwavu lava nga ni lipfumelo ka lifu la yena. (1 Yohani 2:1, ntlhamuselo wa le hansi) Yesu wa hi nyimelela, a kombela swaku Xikwembu xi yingisa swikhongelo swa hina xi tlhela xi hi rivalela swidjoho swa hina. A yendla leswo hi ku tirhisa nkutsulu wa lifu la yena. (Matewu 1:21; Varoma 8:34) Xikwembu xa swi yingisa swikombelo swoleswo hikusa swi fambisana ni ku rhandza ka xona. Funtshi xi rhume Yesu a ta lani misaveni swaku a ta hi “ponisa.” — Yohani 3:17.

Ku nga va swaku hi to ponisiwa ntsena loko hi ni lipfumelo ka Yesu?

Ihim. I ntiyiso swaku swi lava hi va ni lipfumelo ka Yesu swaku hi ponisiwa kambe a hi leswo ntsena swi lavekaka. (Mintirho 16:30, 31) Bibele li li: “Ku fana ni leswi muzimbha lowu kalaka wu nga na wutomi wu nga fa ni lipfumelo la ku kala li nga na mintirho li file.” (Yakobe 2:26) Leswaku hi ponisiwa swi lava:

Hi djondza hi Yesu ni Papayi wa yena Yehovha. — Yohani 17:3.
Hi va ni lipfumelo ka vona. — Yohani 12:44; 14:1.
Hi kombisa lipfumelo hi ku yendla leswi va hi byelaka swona. (Luka 6:46; 1 Yohani 2:17) Yesu a vule swaku a hi hinkwavu lava a va vula swaku i “Hosi” lava a va ta ponisiwa kambe ku to ponisiwa ntsena “lava yendlaka ku rhandza ka Papayi wa [yena] lweyi a nga matilweni.” — Matewu 7:21.
Hi tama hi kombisa lipfumelo hambiloko swi hi karhatela. Yesu a vule leswo nkama a nga te: “Lweyi a nga ta tiyisela anze ku fika magamu, hi yena lweyi a nga ta ponisiwa.” — Matewu 24:13.