I Yini Leswi Bibele Li Swi Vulaka Hi Ku Xixa Nyimba?

Nhlamulu Ya Bibele

Bibele a li tirhisi hi ku kongoma rito leli nge “ku xixa nyimba”, leswi vulaka ku dlaya n’wana lweyi a nga ka khwirhi hi maxivomu. Kambe tindzimana ta tinyingi ta Bibele, ti komba vonelo la Xikwembu mayelana ni wutomi la vanhu ku patsa ni la n’wana lweyi a kalaka a nga se psaliwa.

Wutomi i nyiko ya Xikwembu. (Genesa 9:6; Tipisalema 36:9) Ka Xikwembu wutomi la swilo hinkwaswu leswi swi hanyaka i la lisima, ku patsa ni la n’wana lweyi a nga ka khwirhi la mamani wa yena. Hi mhaka leyo ku xixa nyimba hi maxivomu i ku dlaya.

Nawu lowu Xikwembu a xi wu nyike Vayisrayele a wu ku: “Loko vanhu vo tshuka va lwa va gama va vavisa wansati lweyi a nga ni nyimba se a psala na nkama wa yena wu nga se fika kambe ku nga fi munhu, lweyi a nga mu vavisa a fanele a hakela hinkwaswu leswi nuna wa wansati lweyi, a nga ta mu hakelisa swona; a fanele a ya swi hakela phambheni ka vayavanyisi. Kambe loko ko tshuka ku fa munhu, wutomi li fanele li hakeliwa hi wutomi.” — Eksoda 21:22, 23.a

• Wutomi la munhu li sungula nkama muni?

• Indjhe Xikwembu xa mu rivalela munhu lweyi a nga tshama a xixa nyimba?

• Ku nga va swaku swi bihile ku xixa nyimba loko wutomi la mamani kumbe la n’wana li li nghozini?

Wutomi la munhu li sungula nkama muni?

Ka Xikwembu wutomi la munhu li sungula loko mamani a ha ku kuma nyimba. Ka Bibele, makhambi ya manyingi Xikwembu xi fanisa n’wana lweyi a kalaka a nga se psaliwa ni munhu wa ku helela. Vona swikombiso leswi kombisaka swaku ka Xikwembu wutomi la n’wana lweyi a nga ndzeni ka mamani wa yena la fana ni la n’wana lweyi se a nga psaliwa.

• Hi ku kongomisiwa hi moya wa ku kwetsima, Hosi Davhida a byele Xikwembu a ku: “Matihlo ya wena ma ni vonile na ni nge se psaliwa.” (Tipisalema 139:16) Hambiloko Davhida a a nga se psaliwa Xikwembu se a xi mu vona na a li munhu.

• Na muprofeta Yeremiya a nga se psaliwa, Xikwembu se a xi ni ntirho wa ku hlawuleka lowu a xi lava ku mu nyika. Xikwembu xi mu byele leswi: “Ni ku tive na ni nge se ku vumba ka khwirhi la mamani wa wena, ni ku langile na u nge se psaliwa. Ni ku yendle muprofeta ka matiko.” — Yeremiya 1:5.

• Luka, mutsali wa Bibele lweyi a a li dotori, a tirhise rito lin’we la Xigriki loko a vulavula hi n’wana wa ku kala a nga se psaliwa ni lweyi se a nga psaliwa. — Luka 1:41; 2:12, 16.

Indjhe Xikwembu xa mu rivalela munhu lweyi a nga tshama a xixa nyimba?

Xikwembu xi nga mu rivalela munhu lweyi a nga tshama a xixa nyimba. Loko munhu swoswi a pfumela mavonelo ya Xikwembu hi wutomi a nga fanelanga a titwa nandzu na swi nga fanelanga. “Yehovha a ni timpsalu ni ntwelawusiwana. . . . Ku fana ni leswi wuxeni ku nga kule ni wupeladlambu, ni swidjoho swa hina a swi veke kule na hina.”b (Tipisalema 103:8-12) Yehovha wa va rivalela hinkwavu lava va tisolaka hi ku helela ka swidjoho swa vona leswi va nga tshama va swi yendla ku patsa ni ku xixa nyimba. — Tipisalema 86:5.

Ku nga va swaku swi bihile ku xixa nyimba loko wutomi la mamani kumbe la n’wana li li nghozini?

Hi ku ya hi leswi Bibele li swi vulaka mayelana ni wutomi la n’wana lweyi a kalaka a nga se psaliwa, ku xixa nyimba swi bihile hambiloko wutomi la mamani kumbe la n’wana li li nghozini.

Se hi nga ku yini loko nkama lowu mamani a nga ku phulukeni ku fanele ku langiwa wutomi la mamani kumbe la n’wana? Ka swiyimu leswi, va fanele va tiyendlela xiboho swaku ku ta ponisiwa mani.