Bibele Li Li Yini Hi Ku Hlayisa Vapsali Lava Va Nga Guga?

Nhlamulu ya Bibele

Vana lava se va nga kula va fanele va tiyiseka swaku vapsali va vona lava se va nga guga va hlayisekile. A Bibele li li vana “a va rhange va djondza ku kombisa swaku va tinyiketelile ka Xikwembu ka mindjangu ya vona naswona va fanele va tama va hlayisa vapsali va vona . . . hikusa leswo swa yamukeleka ka Xikwembu.” (1 Timotiya 5:4) Loko vana va tiyiseka leswaku vapsali va vona va hlayisekile, hi nkama wolowo wa wun’we va ta va na va yingisa leswi Bibele li swi vulaka hi ku hlonipha vapsali va vona. — Vaefeza 6:2, 3.

Bibele a li vuli hi ku kongoma leswaku vana va fanele vava hlayisisa ku yini vapsali va vona. Kambe li vulavula hi vavanuna ni vavasati va ku tshembeka lava na vona va nga hlayisa vapsali va vona. Bibele li ni switsundzuxu swa lisima leswi swi nga pfunaka lava va hlayisaka vapsali lava va nga guga.

• Vanhu van’wani lava nga Bibeleni va va hlayisise ku yini vapsali va vona lava va nga guga?

• Hi swini switsundzuxu leswi Bibele li swi nyikaka lava hlayisaka vapsali va vona lava va nga guga?

• Swi bihile ku veka vapsali ka ndhawu ya ku hlayisa lava va nga guga?

Vanhu van’wani lava nga Bibeleni va va hlayisise ku yini vapsali va vona lava va nga guga?

Va yendle leswo hi tindlela ta tinyingi hi ku ya hi swiyimu swa vona.

• Yosefa, a a tshama kule ni papayi wa yena Yakobe lweyi se a a gugile. Kambe a nkama swi nga koteka a mu tekile swaku a tshama kusuhi na yena. Yosefa a nyike papayi wa yena ndhawu ya ku tshama, swakudla, ni leswi a a swi lava swaku a kota ku hanya. — Genesa 45:9-11; 47:11, 12.

• Ruti a rhurhile swaku a ya tshama ni n’wingi wa yena naswona a tirhe hi matimba leswaku a mu hlayisa. — Ruti 1:16; 2:2, 17, 18, 23.

• Yesu, na a nge se fa a lange munhu swaku a hlayisa mamani wa yena Mariya lweyi swi nga yendlekaka hi nkama wolowo se a a feliwe ni nuna. — Yohani 19:26, 27.a

Hi swini switsundzuxu leswi Bibele li swi nyikaka lava va hlayisaka vapsali va vona lava va nga guga?

Minkama yin’wani ku hlayisa vapsali lava va nga guga swi nga ha karhalisa. Kambe Bibele li ni switsundzuxu leswi nga pfunaka lava yendlaka ntirho lowo.

• Hlonipha vapsali va wena.

  Bibele li li: “Hlonipha papayi wa wena ni mamani wa wena”. — Eksoda 20:12.

  U nga yi tirhisisa ku yini ndzimana leyi? Kombisa swaku wa va hlonipha vapsali va wena hi ku kala u nga lavi ku tiva hinkwaswu leswi yendlekaka ka wutomi la vona. Loko swi koteka, va tshiki va langa swaku va lava ku hlayisisiwa ku yini. Naswona hlonipha vapsali va wena hi ku yendla hinkwaswu leswi u nga swi kotaka swaku u va pfuna.

• Va twisisi u tlhela u va rivalela.

  Bibele li li: “Ku twisisa ka munhu ku b’ohlisa ku kwata ka yena, naswona swi sasekile ka yena loko a tshika xihoxo xi hundza.” — Swivuriso 19:11.

  U nga yi tirhisisa ku yini ndzimana leyi? Loko papayi wa wena kumbe mamani wa wena a vula nchumu na a nga xi pimisanga, kumbe a nga khensi hinkwaswu leswi u mu yendlelaka swona. Tivutisi leswi: ‘A ni ta ku yini loko a ni li ka xiyimu xa yena?’ Loko u mu twisisa naswona u mu rivalela swi ta yendla swaku swilo swi nga bihi ku tlula mpimu.

• Bula ni van’wani.

  Bibele li li: “Lani ku kalaka ku nga na ku vulavulisana a maplanu a ma fambi kahle, kambe lani ku nga ni vatsundzuxi va vanyingi swilo swi ta famba kahle.” — Swivuriso 15:22.

  U nga yi tirhisisa ku yini ndzimana leyi? Yendla mapexkiza ya ku kuma ndlela ya ku yampsa ya ku daha mavabyi ya vapsali va wena. Zama ku tiva swaku hi kwini lomu u nga va yisaka kona kusuhi ni lomu u tshamaka kona leswaku va pfuniwa. Bula ni van’wani lava na vona se va nga hlayisa vapsali va vona va ku guga. Loko u ni vamakwenu, yendlani ntlhanganu hi ndjangu swaku mi bula hi swilo swin’wani leswi mi nga swi yendlaka swaku mi va pfuna.

  

• Tiveki hansi.

  Bibele li li: “Lava tivekaka hansi va tlharihile.” — Swivuriso 11:2.

  U nga yi tirhisisa ku yini ndzimana leyi? Pfumela swaku a hi hinkwaswu leswi u nga kotaka ku swi yendla. Ku vula ntiyiso hinkwerhu a hi na nkama ni matimba ya ku yendla hinkwaswu leswi hi swi lavaka. Hi mhaka leyo, loko swi ku karhatela ku hlayisa vapsali va wena lava se va nga guga, kombela ku pfuniwa hi van’wani andjangwini kumbe lava va tenderaka lava va nga guga.

• Tihlayisi.

  Bibele li li: “A nga kona munhu lweyi a nga tshama a nyenya muzimbha wa yena, kambe wa wu wundla a tlhela a wu hlayisa”. — Vaefeza 5:29.

  U nga yi tirhisisa ku yini ndzimana leyi? Hambileswi u nga ni ntirho wa ku hlayisa vapsali va wena lava se va nga guga, u fanele u tinyika nkama wa ku tihlayisa ni ku hlayisa ndjangu wa wena loko se u chadile. U fanele u dla swakudla swa kahle, u humula, u tlhela u yetlela nkama wa ku yenela. (Ekleziyaxta 4:6) Handle ka leswo, i swinene ku yendla swilo leswi swi nga ta ku pfuna ku humula ni ku pepisa nhloko. Loko u yendla swilo leswi, u ta va ka xiyimu xaxinene xa ku hlayisa vapsali va wena lava se va nga guga.

Swi bihile ku veka vapsali ka ndhawu ya ku hlayisa lava va nga guga?

A Bibele a li vuli hi ku kongoma swaku hi kwini lani vapsali lava va nga guga va faneleke va tshama kona leswaku va hlayisiwa. Mindjangu yin’wani yi boha ku hlayisa vapsali va vona lava se va nga guga akaya. Ku nga ha va kaya ka vana kumbe kaya ka vapsali. Kasi van’wani va swi vona swi yampsa ku ya veka vapsali va vona lava se va nga guga ka ndhawu leyi ku hlayisiwaka va ku guga. Ndjangu wun’wani ni wu’wani wu fanele wu langa swaku hi swini leswi nga ta vevukela mun’wani ni mun’wani wa lava va nga ta va hlayisa. — Vagalatiya 6:4, 5.