A Tame A Tshembeka Hambiloko A Kumana Ni Mindzingo

1, 2. I mpsini leswi Pedru a a swi nyimela nkama lowu Yesu na a vulavula aKapernawume, kambe i mpsini swi nga gama swi yendleka?

PEDRU a a va txuvukisela kahle vanhu lava a va yingisela Yesu. Funtshi a va li ka sinagoga aKapernawume. Kaya ka Pedru a ku kumeka ka doropa lolelo, naswona a ntirho wa yena wa ku phasa tihlampfi a a wu yendla ka doropa lolelo ka tlhelo la norte la nambu wa Galileya. Vanghanu va yena va vanyingi, maxaka ya yena ni lava a a tirha na vona ka ku phasa tihlampfi a va tshama ka doropa lolelo. Ha tiyiseka leswaku Pedru a a swi lava hintamu swaku vanhu va Kapernawume na vona va vona Yesu na a li Mesiya, va tlhela va tsaka hi ku djondza hi Mfumu wa Xikwembu ka mudjondzisi wamukulu wa ku tlula hinkwavu. Kambe a swi tikomba ingaku leswo a swi nga ta yendleka.

² Vanhu va vanyingi va tshike ku mu yingisela, funtshi a va ngurangura hikusa a va nga ha tsaki hi leswi Yesu a a swi djondzisa. Kambe lexi a xi karhata Pedru, hi leswi nga yendliwa hi van’wani va vadjondzisiwa va Yesu. A swi tikomba ka makara ya vona swaku a va nga ha tsaki hi ku djondza swilo swa nyuwani, naswona a va nga ha khumbeki hi mintiyiso ya nyuwani leyi a va yi djondza ka Yesu. Swoswi a va karhateka funtshi a va patsa ni ku kwata. Van’wani va kombise leswi a va titwisa xiswona hi ku vula swaku marito ya Yesu a ma chavisa. Va tshike ku tama va mu yingisela va huma ka sinagoga, va tlhela va nyima ku mu landzela. — Lerha Yohani 6:60, 66.

3. Lipfumelo la Pedru li mu pfune swaku a yendla yini makhambi ya manyingi?

³ Leswi nga yendleka swi mu karhatile Pedru ni vapostolo lavan’wani. Pedru a nga swi twisisanga kahle leswi Yesu a nga swi vula siku leliyani. A hi kanakani swaku Pedru a swi twisisile swaku hi mhaka muni a marito ya Yesu a ma ta karhata ku ma twisisa loko ma nga tlhamuseliwanga. Se i yini leswi Pedru a nga swi yendla? Phela a ku nga li khambi la ku sungula na ku tshembeka ka yena ka Yesu ku ringiwa, naswona a ku nga ta va khambi la wugamu. Se a hi voneni swaku lipfumelo la Pedru li mu pfunise ku yini swaku a hlula swikarhatu a tlhela a tama a tshembeka.

A A Tshembekile Hambiloko Van’wani Va Nga Tshembeki

4, 5. Hi swini swilo leswi Yesu a nga swi yendla leswi vanhu a va nga swi nyimelanga?

⁴ Makhambi ya manyingi Pedru a a hlamala hi leswi Yesu a a swi vula ni ku swi yendla. Yesu a a vula ni ku yendla swilo hi ndlela leyi vanhu a va nga yi nyimelanga. Hi siku leli nga hundza a a phamele vanhu va vanyingi hi singita. Hi mhaka ya leswo, vona va lave ku mu yendla hosi ya vona kambe a yalile. Se a byela vadjondzisiwa va yena swaku va khwela boti va ya Kapernawume. Nkama vadjondzisiwa va yena a va famba hi boti, Yesu a fambe henhla ka mati ya lwandle la Galileya, lani a nga djondzisa Pedru lisima la ku va ni lipfumelo la ku tiya.

⁵ Se loko lixile, va vone swaku a xitshungu a xi va landzile hi boti. Kambe a xi nga va landzanga hi ku lava ku djondza mintiyiso yin’wani kambe hileswi a xi lava ku vona Yesu na a tlhela a xi phamela hi ndlela ya singita. Na swi nga hlwelanga, Yesu a vhele a xi kawuka xitshungu lexiyani hileswi xi nga swi yendla. (Yoh. 6:25-27) A mhaka leyi, va tame va bula hi yona ka sinagoga aKapernawume lani Yesu a nga yendla leswi a va nga swi nyimelanga, ku nga ku va djondzisa ntiyiso wa lisima lowu karhataka ku wu twisisa.

6. Hi xini xikombiso lexi Yesu a nga xi yendla, naswona i mpsini leswi vanhu va vanyingi va nga swi yendla?

⁶ Yesu a a nga swi lavi leswaku vanhu va ya ka yena hi mhaka ya leswi a va lava ku phameliwa hi ndlela ya singita, kambe a a lava leswaku va swi twisisa swaku Xikwembu a xi ta va nyika wutomi la ku kala li nga heli ntsena loko va kombisa lipfumelo ka gandzelo la Kreste, va tlhela va tekelela xikombiso xa yena. Se swaku a va pfuna ku twisisa mhaka leyi, a tirhise xikombiso. Yesu a tifanise ni mana ku nga pawu leli a li ta hi tilweni ka masiku ya Moxe. Loko van’wani va nga pfumelelani na yena ka mhaka leyi, a tirhise xikombiso xin’wani. A va tlhamusele swaku a va fanele va dla nyama ya yena va tlhela va phuza ngati ya yena leswaku va kuma wutomi la ku kala li nga heli. Hi lanu xipfunyi xi nga pfuka kona, hikusa van’wani va ze va vula leswi: “Mhaka leyi ya chavisa; i mani lweyi a nga swi yingisaka swoleswo?” Phela hambi van’wani va vadjondzisiwa va Yesu va tshike ku mu landzela.a — Yoh. 6:48-60, 66.

7, 8. a) I mpsini leswi Pedru a a nge se swi twisisa hi leswi Yesu a a fanele a swi yendla? b) Pedru a xi hlamulise ku yini xivutiso lexi Yesu a nga xi yendla vapostolo hinkwavu?

⁷ Se i yini leswi Pedru a a ta swi yendla? Phela Pedru a a nga ma twisisanga kahle marito ya Yesu, naswona a a nga se swi twisisa swaku a swi lava swaku Yesu a fa swaku ku hetiseka xikongomelo xa Xikwembu. Ku nga va swaku Pedru a titwe na a ringeka ku tshika ku landzela Yesu ku fana ni vadjondzisiwa lavayani van’wani? Ihim. Ku ve ni nchumu xa lisima lexi nga yendla swaku Pedru a yendla swilo hi ndlela ya ku hambana. Hi xini xa kona?

⁸ Yesu a game a vutisa vapostolo va yena a ku: “Se n’wina ke, a mi lavi ku famba?” (Yoh. 6:67) Hambileswi Yesu a nga vutisa vapostolo hinkwavu va 12, ku ve Pedru lweyi a nga hlamula. Swi nga yendleka hi mhaka ya leswi a a li yena wamukulu xikarhi ka lava va 12. Ku nga na mhaka leswaku xi ve xini xivangelo, swi tikomba ingaku Pedru minkama hinkwayu a ku tolovela ku va yena wa ku sungula ku vulavula, naswona a a nga tshiki ku vula leswi a a swi pimisa. Ka mhaka leyi a game a vula marito ya ku xonga lawa ma nga tsaliwa ka Bibele lawa ma nge: “Hosi, hi ta ya ka mani ke? Hi wena lweyi a nga ni marito lama nga ni wutomi la ku kala li nga heli.” — Yoh. 6:68.

9. Pedru a swi kombisise ku yini swaku a a tshembeka ka Yesu?

⁹ Indjhe a marito lawa a ma ku khumbi mbilu? A lipfumelo leli Pedru a a li na lona ka Yesu, li mu pfune ku va munhu wa ku tshembeka ku nga wumunhu la lisima swinene. Pedru a swi twisise kahle leswaku ko va Yesu ntsena Muponisi lweyi a nga vekiwa hi Yehovha. Yesu a a ponisa hi leswi a a swi vulavula ku nga leswi a a swi djondzisa hi Mfumu wa Xikwembu. Pedru a a swi tiva swaku hambiloko ko va ni nchumu lexi a a nga xi twisisi, a ku nga ha na ndhawu yin’wani leyi a a ta ya ka yona loko a lava ku tsakeliwa hi Xikwembu ni ku kuma wutomi la ku kala li nga heli.

10. Hi nga ku tekelelisa ku yini ku tshembeka ka Pedru?

¹⁰ Indjhe na wena u titwisa xileswo? Phela lexi twisaka ku vava, vanhu va vanyingi namuntlha va vula swaku va mu rhandza Yesu, kambe a va tshembeki ka yena. A ku tshembeka ka Kreste swi vula ku vona leswi Yesu a a swi djondzisa ku fana ni leswi Pedru a a swi vonisa xiswona. Hi fanele hi djondza leswi Yesu a a swi djondzisa hi twisisa swaku swi vula yini, hi tlhela hi tinyimisela ku hanya hi swona, hambiloko minkama yin’wani leswi hi swi djondzaka swi nga yelani ni leswi a hi swi nyimela kumbe leswi hi swi rhandzaka. Kambe hi to kuma a wutomi la ku kala li nga heli ntsena loko hi tama hi tshembeka. — Lerha Tipisalema 97:10.

A Tshembekile Hambi A Layiwa

11. Yesu a va yise kwini vadjondzisiwa va yena? (Vona ni ntlhamuselo.)

¹¹ Loko ku yendleke leswo, Yesu a teke vadjondzisiwa va yena va ya ka tlhelo la le norti. Minkama yin’wani loko munhu a li ka lwandle la Galileya leli a li ni mati ya ku xonga, a swi koteka ku vona a ntshava ya Hermoni leyi a yi mbhonyiwile hi neve ka tlhelo la norti la Tiko la Xitshembiso. Nkama lowu Yesu ni vadjondzisiwa va yena a va ya va tshinela kusuhi ni swidoropani leswi a swi li kusuhi ni Khezariya wa Filipi, a ntshava leyi a yi ya yi va kusuhi hintamu.b Ka ndhawu yoleyo leyi a swi ta koteka ku vona ndhawu yayikulu ya Tiko la Xitshembiso hi tlhelo la sul, Yesu a va yendle xivutiso xa lisima hintamu valandzeli va yena.

12, 13. a) Hi mhaka muni Yesu a lave ku tiva leswi xitshungu a xi swi pimisa hi yena? b) Pedru a li kombisise ku yini lipfumelo la ntiyiso ka marito lawa a nga ma byela Yesu?

¹² Yesu a vutise vadjondzisiwa va yena a ku: “Kasi xitshungu xi li hi mina mani?” Hi nga mu pimisa Pedru na a mu txuvukisela kahle Yesu, a vona wunene ni wutlharhi leli Hosi ya yena a yi li na lona. Phela Yesu a a lava ku tiva swaku vanhu va li hi yena mani, hi mhaka leswi va nga swi twa ni leswi va nga mu vona na a swi yendla. Vadjondzisiwa va yena va mu hlamulile hi ku vula leswi vanhu a va swi pimisa hi yena. Kambe Yesu a a lava ku tiva swin’wani, a a lava ku tiva swaku vona a va pimisa leswaku hi yena mani. Se, a va vutisile a ku: “Se n’wina ke, mi li hi mina mani?” — Luk. 9:18-20.

¹³ Ni ka khambi leli, Pedru a yo vhela a hlamula. Na a nga djikadjiki a vule leswi yena ni lavan’wani a va titwisa xiswona. A te: “U Kreste, N’wana wa Xikwembu lexi hanyaka.” Hi nga mu pimisa Yesu na a mb’onyozela hi ku tsakisiwa hi leswi Pedru a nga swi vula. Yesu a khumbukise Pedru swaku a ku nga li munhu, kambe a ku li Yehovha Xikwembu lweyi a nga pfuna lava a va ni lipfumelo swaku va twisisa ntiyiso lowu wa lisima. Pedru a swi kotile ku twisisa ntiyiso wa lisima wa leswaku Yesu a ku li yena Mesiya, kumbe Kreste lweyi a a tshembisiwile! — Lerha Matewu 16:16, 17.

14. Hi wini ntirho wa lisima lowu Yesu a nga nyika Pedru?

¹⁴ Kreste lweyi, hi yena lweyi wuprofeta la khale li nga mu vita ribye leli vayaki va nga li yala. (Ps. 118:22; Luk. 20:17) Na a pimisa hi wuprofeta la ku fana ni leli, Yesu a vule leswaku Yehovha a a ta veka bandla a henhla ka ribye, ku nga Kreste. Yesu a nyike Pedru mintirho ya yinyingi ka bandla lolelo. A mu nyike “makhiya ya Mfumu”. (Mat. 16:19) Pedru a a ta va ni nkateko wa ku pfuna tinxaka tinharhu ta vanhu leswaku ti nghena ka Mfumu wa Xikwembu ku nga Vayuda, Vasamariya ni lava a va nga li Vayuda. Kambe hi ku yendla leswo, Yesu a a nga lavi ku kombisa swaku Pedru hi yena wa lisima ku tlula vapostolo lavan’wani hilani va ku tala va pimisaka hi kona.

15. Hi mhaka muni Pedru a kawuke Yesu, naswona a swi yendlise ku yini?

¹⁵ Hi ku famba ka nkama Yesu a vule swaku lweyi a nyikiwaka swa swinyingi ku ta nyimeliwa swa swinyingi ka yena. Leswo swi yendlekile ka Pedru. (Luk. 12:48) Yesu a tame a vulavula hi mintiyiso leyi yelanaka na Mesiya. Yena a vule swaku a a ta hlupheka hintamu a tlhela a dlayiwa aYerusalema, funtshi leswo a swi li kusuhi ni ku yendleka. Nkama lowu Pedru a nga twa leswo, swi mu karhatile hintamu. Se Pedru a mu koka a ya tlhelweni na yena a fika a ku: “Titsetseleli we Hosi; swilo leswo swi nga ta tshuka swi ku humelela.” — Mat. 16:21, 22.

16. Yesu a mu layise ku yini Pedru, naswona i mpsini leswi hi nga swi djondzaka ka marito ya Yesu?

¹⁶ Ha tiyiseka swaku Pedru a vule marito lawa hi xikongomelo xaxinene, kambe nhlamulu ya Yesu yi mu hlamalisile. Yesu a hundzukulile a mu komba nhlana Pedru, a txuvuka vapostolo lavan’wani lava na vona a va pimisa ku fana na Pedru. A gama a ku: “Suka la ka mina Sathana! U ni sivela ku yendla ku rhandza ka Xikwembu, hikusa a wu pimisi ku fana ni Xikwembu, kambe u pimisa ku fana ni vanhu.” (Mat. 16:23; Mar. 8:32, 33) A marito ya Yesu ma hi pfuna na hina namuntlha. Phela swa vevuka kuva hi pimisa ku fana ni vanhu, kambe hi nga pimisi ku fana ni Xikwembu. Minkama yin’wani swi nga yendleka hi lava ku pfuna munhu, kambe na hi nga swi tsumbulanga hi kutxa munhu yelweyo leswaku a yendla swilo leswi tsakisaka Sathana, handle ka ku yendla swilo leswi tsakisaka Xikwembu. Kambe Pedru a yendle yini?

17. I mpsini leswi Yesu a a lava ku swi vula nkama a nga byela Pedru swaku “suka la ka mina Sathana”?

¹⁷ Pedru a swi twisisile swaku Yesu a a nga vuli swona swaku yena a a bihile ku fana na Sathana Davulosi. Phela Yesu, a yo maha hi ku mu hlongola Sathana. (Mat. 4:10) Kambe Pedru a nga zanga hi ku mu hlongola hikusa a a vone wumunhu lalinene leli Pedru a a li na lona. Yesu a pfune Pedru leswaku a lulamisa mimpimiso ya yena leyi a yi hoxile ka mhaka leyi. A mhaka hi leswaku Pedru a a fanele a tshika ku kavanyeta Yesu leswaku a nga yendli ku rhandza ka Xikwembu. Kambe a a fanele a yendla hinkwaswu leswi a swi kotaka swaku a mu seketela.

18. Pedru a swi kombisise ku yini swaku wa tshembeka, naswona hi nga mu tekelelisa ku yini?

¹⁸ Ku nga va swaku Pedru a sungule ku holovisa Yesu, kumbe a mu kwatela? Nada. Pedru hi ku tiveka hansi a pfumele ku layiwa, naswona ni ka khambi leli a tlhele a kombisa leswaku a a li munhu wa ku tshembeka. Phela hinkwavu lava nga valandzeli va Kreste minkama yin’wani swi ta lava va layiwa. Loko hi tiveka hansi hi pfumela ku layiwa hi tlhela hi tinyimisela ku djondza ka leswi va hi layaka ka swona, hi ta swi kota ku tama hi va vanghanu va Yesu Kreste ni Papayi wa yena Yehovha Xikwembu. — Lerha Swivuriso 4:13.

Ku Tshembeka Ka Yena Ku Katekisiwile

19. Hi swini swilo swa ku hlamalisa leswi Yesu a nga swi vula, naswona i mpsini swi nga ha yendlekaka Pedru a swi pimisile?

¹⁹ Ku nga se hundza nkama wa wunyingi, Yesu a vule nchumu wa ku hlamalisa hintamu, a te: “Ni mi byela ntiyiso: Van’wani ka lava nga nyima lani a va nga ta fa na va nga rhanganga hi ku vona N’wana wa munhu na a li ka Mfumu wa yena.” (Mat. 16:28) A swi kanakanisi swaku marito wolawo ma hlamalise Pedru. Yena a a lava ku tiva swaku hi mhaka muni Yesu a vule leswo. Swi nga ha yendleka Pedru a pimise swaku leswi a a ha li ku gama ku layiwa, a a nga ha ta yi kuma minkateko ya ku hlawuleka ya ku fana ni leyo.

20, 21. a) Tlhamusela swilo swa ku hlamalisa leswi Pedru a nga swi vona. b) Leswi vavanuna lava a nga va vona a va bula hi swona, swi mu pfunise ku yini Pedru kuva a lulamisa mavonelo ya yena?

²⁰ Hambileswo, loko se ku hundze vhiki Yesu a teke Yakobe, Yohani na Pedru a ya na vona ka “ntshava ya ku leha”. Swi nga yendleka a ku li ntshava ya Hermoni lomu a swi ta lava va famba makilometru ya matsongo swaku va fika. Swi nga yendleka a ku li niwusiku hikusa ku kombisiwa swaku vavanuna lava va vanharhu a va peziwa hi wurhongo. Loko Yesu a li ku khongeleni, ku yendleke nchumu lexi nga va yendla va nga ha yetleli. — Mat. 17:1; Luk. 9:28, 29, 32.

²¹ Yesu a sungule ku txintxiwa phambheni ka vona. A kara la yena li sungule ku phatima hintamu ku fana ni dlambu. A mpahla ya yena a yi basile yi ku baa, yi tlhela yi phatima. Se ku humelele vavanuna vambirhi lava a va nyime tlhelweni ka Yesu, lava a va fanekisela Moxe na Eliya. Va sungule ku vulavula “hi ku famba ka yena loku a ku li kusuhi ni ku hetiseka aYerusalema.” Swi tikomba a va vulavula hi ku fa ni ku pfuxiwa ka Yesu. Phela swi vhele swi tikomba swaku leswi Pedru a a swi pimisa, swaku Yesu a a nga ta humeleliwa hi swilo leswi swa ku biha, a wo tikanganyisa. — Luk. 9:30, 31.

22, 23. a) Pedru a swi kombisise ku yini swaku a a ni wunene a tlhela a tshama na a tsakile? b) I nkateko wini lowu Pedru, Yakobe na Yohani va nga va na wona ka wusiku leliyani?

²² Pedru a a lava ku katseka ka swilo swa ku hlamalisa leswi a a swi vona, naswona a a lava swaku swi teka nkama wa ku leha, hikusa a swi tikomba ingi Moxe na Eliya se a vo famba. Se Pedru a byela Yesu a ku: “Mudjondzisi, swa tsakisa ku va lani. Hi pfumeleli hi hamba minchacha yinharhu, wun’we wu va wa wena, wun’wani wu va wa Moxe se wun’wanyani wu va wa Eliya.” Kambe hi swi tiva kahle leswaku vavanuna lavayani lava va nga tirhela Yehovha se a va file khale, hi mhaka leyo a swi nga laveki swaku va yakeliwa minchacha. Kambe Pedru a a nga swi tivi leswi a a swi vula. Se wena ke, a wu swi tsakeli a ku tekelela wanuna lweyi a a kombisa wunene a tlhela a tshama na a tsakile? — Luk. 9:33.

²³ Hi wusiku lolelo Pedru, Yakobe na Yohani va tlhele va nyikiwa nkateko wun’wani. Ku humelele rhefu leli nga nyima a henhla ka vona. Ka rhefu lolelo ku twale rito, phela a ku li Rito la Yehovha Xikwembu, Yena a te: “Lweyi i N’wananga, lweyi ni nga mu langa. Mu yingiseni.” Ndzhaku ka leswo, leswi a va swi vona swi nyamalalile. Va game va sala voxe na Yesu antshaveni. — Luk. 9:34-36.

24. a) Ku va Pedru a vone Yesu na a txintxiwa swi mu pfunise ku yini? b) Hi nga pfunekisa ku yini hi leswi Pedru a nga swi vona?

²⁴ Phela, leswi Pedru a nga swi vona ku ve prezenti lalikulu ka yena ni ka hina hinkwerhu. Ka malembe ma nga landzela, Pedru a game a tsala hi nkateko lowu a nga va na wona ka wusiku leliyani, wa ku va a vone Yesu na a li Hosi ya ku hlonipheka atilweni ni ku tlhela a va mun’we wa “timboni leti nga ku vona hi matihlo ku phatima ka yena kakukulu.” Phela leswi Pedru a nga swi vona, a swi tiyisekisa wuprofeta la linyingi leli Pedru a nga li vona leli kumekaka ka Rito la Xikwembu. Funtshi swi tiyise lipfumelo la yena ka swikarhatu leswi a a ta kumana na swona. (Lerha 2 Pedru 1:16-19.) Leswi Pedru a nga swi vona, swi nga tiyisa lipfumelo la hina. Ku fana na Pedru, hi fanele hi tama hi tshembeka ka Hosi ya hina Yesu Kreste lweyi a nga vekiwa hi Yehovha ni ku tlhela hi djondza ka yena, hi pfumela ku layiwa hi yena ni ku tiveka hansi hi mu landzela siku ni siku.