Abrahamu Na Sara Va Yingise Yehovha

Kusuhi ni Babele a ku ni doropa lin’wani leli a li vitaniwa Ura. Vanhu va doropa leli, a va tirhela swikwembu swa mavunhwa. Kambe koseniyani a ku ni wanuna mun’wani wamunene. Yena a a tirhela Yehovha ntsena. Vito la yena a ku li Abrahamu.

Siku lin’wanyani Yehovha a byele Abrahamu a ku:

— Suka ka doropa leli la Ura, u ya ka ndhawu leyi ni nga ta ku kombaka yona.

Yehovha a game a byela Abrahamu a ku:

— Wena u ta va ni ndjangu wawukulu. Vanhu va ndjangu wa wena va ta va vanyingi hintamu. Naswona ni ta tirhisa wena ni ndjangu wa wena leswaku ni katekisa vanhu hinkwavu amisaveni.

Hambileswi Abrahamu na Sara a va nga swi tivi swaku Yehovha a a lava swaku va ya kwini, va tekele ku lunghiselela swilo swa vona va suka va famba. Nkama va nga suka Ura, va fambe ni papayi wa Abrahamu ni sobrinyu wa yena. Vito la papayi wa Abrahamu i Tera. Kasi sobrinyu wa Abrahamu i Lota.

Nkama Abrahamu a a ni 75 wa malembe, yena ni ndjangu wa yena va fikile aKanana ku nga ndhawu leyi Yehovha a a lava swaku va ya ka yona. Loko va li seniyani, Yehovha a tlhele a mu byela leswi:

— A ndhawu leyi ni ta yi nyika vana va wena ni vatukulu va wena. Kambe leswi Abrahamu na Sara se a va gugile funtshi a va nga na n’wana, a swi ta kotekisa ku yini swoleswo?