Abrahamu Na Sara Va Va Ni N’wana

Abrahamu na Sara a va ni malembe manyingi na va chadile. Phela a va tshike yindlo ya vona ya ku xonga ni minchumu ya yinyingi leswaku va yingisa Yehovha. Funtshi leswi Sara a a mu rhandza Yehovha naswona a a lava ku mu yingisa, a a nga tshameli ku khala hi wutomi leli a va li na lona ka matende, naswona a a nga tshameli ku fananisa wutomi la yena lahayani ni leli a nga li siya lomu a a tshama kona aUra.

Leswi a a swi lava hintamu ku va ni n’wana, Sara a vulavule na Abrahamu a mu byela leswi:

— Leswi ni kalaka ni nga na n’wana, ni kombela u teka mutirhi wa mina Agara u va ni n’wana na yena. Se n’wana wa yena a ta va n’wana wa mina.

Agara a game a va ni n’wana na Abrahamu, naswona va mu chule vito la Ismayeli.

Se, a nkama Abrahamu a a ni 99 wa malembe, naswona Sara a ni 89 wa malembe, va yendzeliwile hi 3 wa vavanuna. Abrahamu a va rhambile vavanuna lava swaku va ya tshama xikan’we a ndzhutini a tlhela a va nyika swakudla swaku va dla. Wa swi tiva swaku a ku li vamani vavanuna lavayani? Phela a ku li tintsumi. Mun’we wa vona a game a byela Abrahamu a ku:

— Lembe li taka u ta va ni n’wana.

Sara a a va yingisela na a li ka tende. Se nkama a nga twa leswo, a sungule ku hleka. Yena a a pimisa leswi:

— Mina se ni gugile, se swi nga yendlekisa ku yini swaku ni psala n’wana?

Kambe loko se ku hundze lembe, Sara a psale n’wana, naswona Abrahamu a mu chule vito leli nge Izaki, leswi vulaka “Ku Hleka.”

Nkama Izaki a a ni 5 wa malembe, Sara a vone Ismayeli na a hlupha n’wana wa yena Izaki. Sara a game a kombela Abrahamu swaku a hlongola Ismayeli ni mamani wa yena Agara, kambe Abrahamu a a nga swi lavi ku swi yendla leswo. Leswaku a vhikela Izaki, Yehovha a byele Abrahamu a ku:

— Yingisa nsati wa wena Sara, u hlongola Ismayeli ni mamani wa yena. Mina ni ta va hlayisa, kambe leswi ni nga ku tshembisa swona ni ta swi yendla ka Izaki.