Xikombelo Xa Ku Karhata Hintamu

Abrahamu a a mu rhandza hintamu Yehovha a tlhela a mu tshemba, funtshi a pfune ni n’wana wa yena Izaki swaku a mu rhandza hintamu Yehovha. Kambe nkama Izaki a a ni 25 wa malembe, Yehovha a kombele Abrahamu swaku a yendla nchumu wa ku karhata hintamu. Wa swi tiva swaku a mu kombele swa ku yini?

Yehovha a byele Abrahamu a ku:

— Ni kombela u ya ka ndhawu leyi vitaniwaka Moriya, leswaku u ya ni yendlela gandzelo. Kambe swoswi a ni lavi swiharhi, ni lava u ni nyika n’wana wa wena Izaki lweyi u mu rhandzaka hintamu.

Abrahamu a nga swi twisisanga swaku hi mhaka muni Yehovha a mu kombelile leswo, hambileswo a mu yingisile Yehovha ku fana ni masiku man’wani.

Nkama li nga xa, Abrahamu a yile aMoriya, a fambe na Izaki ni vatirhi va yena vavambirhi. Vona va fambe masiku manharhu, loko se va li kusuhi ni ku fika aMoriya, Abrahamu a byele vatirhi va yena a ku:

— Nyimani lani, mina na Izaki hi lava ku ya mu yendlela gandzelo Yehovha.

Abrahamu a kombele Izaki swaku a teka tihunyi se yena a teka xikhwa. Izaki a vutise Abrahamu a ku:

— A xifuyu xa kona xi kwini Papayi?

Abrahamu a ku:

— U nga karhateki n’wananga, Yehovha a ta hi nyika.

Nkama lowu va nga fika lomu Yehovha a a va rhume kona va fike va lunghiselela ndhawu leyi a va ta nyikela gandzelo ka yona, va tlhela va veketela tihunyi ka yona. Abrahamu a game a boha mavoko ni minenge ya Izaki, se a mu veka henhla ka tihunyi.

Abrahamu a game a teka xikhwa, nkama lowu a nga lava ku dlaya Izaki ku twakale ntsumi yi ku:

— Abrahamu! U nga mu vavisi Izaki, phela se ni swi vonile swaku u ni lipfumelo la ku tiya. Hambileswi xikombelo lexi xi karhataka, u tinyimiselile ku nyikela hi n’wana wa wena wa mun’we lweyi u mu rhandzaka hintamu.

Abrahamu a game a vona xinyempfani lexi nga tiphasa ka xinsinyani hi timhondzo, se a xi teke a xi nyikela ka Yehovha xi va gandzelo.

Ku sukela ka siku leliyani, Yehovha a vitane Abrahamu swaku i munghanu wa yena. Wa swi tiva swaku hi mhaka muni? Hi mhaka minkama hinkwayu Abrahamu a a yendla hinkwaswu leswi Yehovha a a mu kombela, hambiloko a nga swi twisisi swaku hi mhaka muni a a mu kombela swaku a swi yendla.

Yehovha a tlhele a phindha xitshembiso lexi a a mu yendlele xona Abrahamu. Yehovha a te:

— Vanhu va ndjangu wa wena va ta va vanyingi naswona ni ta tirhisa ndjangu wa wena leswaku ni va yendlela swaswinene vanhu va misava hinkwayu.