Bibele Li Txintxa Wutomi La Vanhu

I MPSINI swi nga yendla swaku wansati lweyi se a a ni 60 wa malembe a tshika ku gandzela swifaniso? I mpsini swi nga yendla muprista wa wukhongeli la Wuxinto a tshika ntirho lowu a a wu yendla a tempeleni swaku a va Mukreste? Wansati lweyi a nga tshikiwa hi vapsali va yena na wa ha li mutsongo a swi kotise ku yini ku hlula mimpimiso ya ku biha ya ku titwa a tshikiwile? Vona leswi vanhu lava va swi vulaka.

“A na ha gandzeli swifaniso.” — ABA DANSOU

LEMBE LA KU PSALIWA: 1938

TIKO LA KU PSALIWA: BENIN

LESWI SWI NGA MU YENDLEKELA: A A GANDZELA SWIFANISO

WUTOMI LA MINA LA KHALE: Ni kulele a So-Tchahoué ku nga ndhawu leyi nga tala hi madaka naswona yi nga kusuhi ni mati. Vanhu va ndhawu leyi va hanya hi ku phasa tihlampfi, va fuya timbuti, tinyempfu, makhumba ni swinyanyani. Ka ndhawu leyi a ku na switaratu, vanhu va famba hi maboti, tinyindlo ta tinyingi ti yakiwe hi timhandzi ni mabyanyi, tin’wani ti yakiwe hi mabiloko. Ka ndhawu leyi ku ni wusiwana hintamu hambileswo a wugevenga a li talanga hintamu ku fana ni madoropeni.

Nkama na ni li mutsongo papayi wa mina a yise mina ni makwavu wa mina wa wansati ka ndhawu leyi a ku gandzeliwa swifaniso, lani va nga hi djondzisa mahanyelo ni tidjondzo ta wukhongeli la vona. Se loko ni kulenyana ni lange Dudua wa Yoruba swaku a va xikwembu xa mina, xikwembu lexi ni xi yakele yindlo, naswona nkama ni nkama a ni xi yendlela magandzelo hi ku tirhisa swikhepu, azeite, timbatsana, kumbe swiharhi swin’wani swa switsongo swa ku tshama ka mati, tihuku, swituvani, ni swiharhi swin’wani. Minchumu leyi a yi dura hintamu naswona minkama ya yinyingi a yi ni hetela male ya mina hinkwayu.

BIBELE LI TXINTXE WUTOMI LA MINA: Nkama ni nga sungula ku djondza Bibele ni djondze swaku Yehovha hi yena Xikwembu xa ntiyiso, naswona ni djondze swaku a nga pfumeli wugandzeli la swifaniso. (Eksoda 20:4, 5; 1 Vakorinto 10:14) A ni swi tiva leswi a ni fanele ni swi yendla, se ni txukumete swifaniso hinkwaswu leswi a ni swi tirhisa ni tlhela ni basisa yindlo ya mina. Ni tshike ku ya ka tinyanga naswona a ni nga ha hlangameli ka minkhuvu leyi a yi yendliwa loko ku fa munhu ni minkhuvu yin’wani leyi a va yi yendla lomu a ni tshama kona leyi a yi nga tsakisi Xikwembu.

Leswi a ni ni 60 wa malembe a swi ni karhatela ku txintxa wutomi la mina. Vanghanu va mina, maxaka ni vavhizinyu a va ni kaneta naswona a va vulavula ku biha hi mina, kambe ni khongelile ka Yehovha swaku a ni nyika ntamu wa ku yendla leswi swi nga swinene. Marito lawa ma nga ka Swivuriso 18:10 lawa ma nge: “Vito la Yehovha li fana ni ndhawua ya ku tiya ya ku tumbela ka yona. Lweyi wa ku lulama a tsutsuma a ya ka yona naswona wa vhikeliwa,” ma ni tiyise hintamu.

Nchumu xin’wani xi nga ni pfuna i ku ya ka mintlhanganu ya Timboni ta Yehovha, ka yona ni swi vonile swaku vamakwerhu va li kombisa lirhandzu la ntiyiso. Swi ni hlamalisile hikusa va zama ku hanya hi minawu ya ku lulama ya Bibele, leswi swi ni yendle ni tiyiseka swaku wukhongeli la Timboni ta Yehovha i la ntiyiso.

LESWI NI NGA PFUNEKISA XISWONA: Ku tirhisa minawu ya Bibele swi ni pfunile ku yampsisa wunghanu la mina ni vana va mina, swi fana ni loko ni yo susiwa ndzhwalu wa ku tika ka makatla. A ni tirhisa male ya mina hinkwayu swaku ni gandzela swifaniso swa ku kala swi nga hanyi, leswi a swi nga ni pfuni hi nchumu. Swoswi ni gandzela Yehovha lweyi a nga helisaka swikarhatu swa mina hinkwaswu. (Nhlawutelo 21:3, 4) Ni tsake hintamu hikusa a na ha gandzeli swifaniso kambe ni gandzela Yehovha, ka yena ni kume ku vhikeliwa ka ntiyiso.

“Ni lavetele Xikwembu kusukela na ha li mutsongo.” — SHINJI SATO

LEMBE LA KU PSALIWA: 1951

TIKO LA KU PSALIWA: JAPÃO

LESWI NGA MU YENDLEKELA: MUPRISTA WA WUKHONGELI LA WUXINTO

WUTOMI LA MINA LA KHALE: Ni psaliwe ka doropa la Fukuoka. Vapsali va mina a va li rhandza hintamu wukhongeli, kusukela na ha li mutsongo va ni djondzise ku gandzela swikwembu swa Wuxinto. A ni pimisa hintamu hi ku ponisiwa ka mina, naswona a ni swi lava hintamu ku pfuna vanhu lava a va ni swikarhatu. Ni khumbuka swaku siku lin’wani na ni li xikola, profesori wa hina a hi vutise swaku a hi lava ku yendla yini loko hi kula, vakolega va mina se a va swi tiva leswi a va swi lava, a va lava ku va va cientista, va ni hleke hintamu nkama ni nga vula swaku mina ni lava ku tirhela Xikwembu.

Loko ni hete xikola ni ye ka xikola xa lava va lavaka ku djondzisa swa wukhongeli. Nkama na ni li ka xikola lexo ni kumane ni muprista wa Wuxinto, lweyi hi nkama wa ku humula a a lerha buku la kapa la ntima. Siku lin’wani a ni vutise a ku: “Sato wa li tiva buku leli?” Ni txuvuke kapa la buku ni gama ni ku: “I Bibele.” Yena a game a ku: “Hinkwavu lava va lavaka ku va vaprista va wukhongeli la Wuxinto va fanele va li lerha buku leli.”

Hi ku hantlisa ni ye ni ya xava Bibele ni tlhela ni li veka ka ndhawu ya lisima lani a ni veka kona mabuku man’wani. A ni li hlayisa kahle kambe a ni nga na nkama wa ku li lerha, hikusa a ni ni minchumu ya yinyingi ya ku yi yendla nkama na na ha li xikola. Loko ni hete ku djondza ni sungule ku tirha tempeleni tani hi muprista wa wukhongeli la Wuxinto, leswi a ni swi navela kusukela na ha li mutsongo se a swo yendleka.

Kambe ni game ni vona swaku ku va muprista wa wukhongeli la Wuxinto a swi hambanile ni leswi a ni swi pimisa. Vaprista van’wani a va nga na lirhandzu naswona a va nga na mhaka ni vanhu van’wani, ku tala ka vona a va nga na lipfumelo. Mun’we wa lava a va rhangela a ni byele swaku: “Loko u lava swaku swi ku fambela kahle vulavula hi timhaka ta filozofiya ntsena, swa tsimbisiwa ku vulavula hi lipfumelo lani.”

Leswi a nga ni byela swona, swi ni yendle ni nga ha li tsakeli wukhongeli la Wuxinto. Hambileswi ni nga tama ni tirha atempeleni ni sungule ku kambisisa wukhongeli lin’wani kambe hinkwalu a lo fana. Loko ni ya ni kambisisa a wukhongeli a ni ya ni nga ha li tsakeli wukhongeli hikusa hinkwalu a swi tikomba li nga li la ntiyiso.

BIBELE LI TXINTXE WUTOMI LA MINA: Hi 1988 ni kumane ni Mubuda lweyi a nga ni byela swaku ni lerha Bibele. Leswo swi ni khumbukise muprista lwiyani wa wukhongeli la Wuxinto a nga ni byela leswi fanaka, hi mhaka leyo ni sungule ku lerha Bibele. Ni hlamalisiwe hintamu hi leswi ni nga swi lerha, minkama yin’wani a ni li lerha wusiku hinkwalu anze lixa.

Leswi a ni swi lerha swi ni yendle ni lava ku khongela ka Xikwembu lexi a ni djondza hi xona ka Bibele, ni sungule hi xikhongelo lexi nga ka Matewu 6:9-13. Nkama ni nkama loko ku hundza 2 wa mawora a ni phindha xikhongelo lexi, hambiloko ni li ka ntirho wa mina atempeleni.

A ku ni minchumu ya yinyingi leyi a ni nga yi twisisi nkama na ni lerha. Hi nkama wolowo se a ni chadile naswona a ni swi tiva swaku Timboni ta Yehovha ti djondzisa vanhu Bibele hikusa a ti tshame ti ta kaya ti ta djondza ni nsati wa mina, se ni lavetele mun’we wa tona ni mu yendla swivutiso swa swinyingi leswi a ni li na swona. Swi ni hlamalise hintamu loko a tirhisa Bibele swaku a hlamula swivutiso swa mina hinkwaswu. Leswi a a li wansati a game a ni lavela Mboni ya Yehovha ya wanuna swaku yi djondza Bibele na mina.

Ku nge se hundza nkama wa wunyingi ni sungule ku ya ka mintlhanganu ya Timboni ta Yehovha, ni game ni tsumbula swaku van’wani lava a va li mintlhanganwini a ni tshame ni va yendlela minchumu ya ku biha, hambileswo va ni xowetile hi lirhandzu va tlhela va ni yamukela kahle.

Ka mintlhanganu liyani ni djondze swaku Xikwembu xi lava swaku vavanuna lava va nga chada va rhandza vasati va vona va tlhela va nyika lisima mindjangu ya vona. Ka wutomi la mina a ni pimisa ntsena hi ntirho wa mina wa ku va muprista, a ni nga na mhaka ni nsati wa mina ni vana va hina va vambirhi. Ni vone swaku a ni va yingisela kahle vanhu lava a va ta tempeleni kambe nsati wa mina a ni nge se tshama ni mu yingisela.

Nkama na ni djondza ni twisise minchumu ya yinyingi leyi yi nga ni yendla ni titwa na ni li kusuhi hintamu na Yehovha. Ni khumbiwe hintamu hi tindzimana ta ku fana ni Varoma 10:13 leyi yi nge: “Lweyi a vitanaka vito la Yehovha a ta ponisiwa.” A ni lavetela Xikwembu kusukela na ha li mutsongo kambe swoswi, hi wugamu, ni xi kumile.

Se a swi nga ha ni tsakisi ku tirha tempeleni kambe a ni karhateka hi leswi van’wani a va ta swi pimisa loko ni tshika wukhongeli la Wuxinto. Minkama hinkwayu a ni tibyela swaku a ni ta li tshika loko ni kuma Xikwembu xa ntiyiso, hi mhaka leyo hi 1989 ni yendle leswi lipfalu la mina a li ni byela swona. Ni tshike ku va muprista naswona ni veke wutomi la mina ka mavoko ya Yehovha.

Swi karhate hintamu ku tshika ku tirha tempeleni. Lava a va rhangela va ni vulavulelile va tlhela va zama ku ni sindzisa swaku ni tama ni tirha tempeleni. Nakambe swi ni karhatele hintamu ku byela vapsali va mina mhaka leyi. Nkama na ni ya lomu a va tshama kona a ni chava hintamu lakakuva xifuva xa mina a xi vava ni minenge ya mina a yi rhurhumela, ni nyime ka kunyingi ndleleni ni khongela ka Yehovha swaku a ni nyika ntamu.

Nkama ni nga fika a ni chava ku va byela, loko se ku hundze mawora ya manyingi na ni khongelile ka Yehovha ni game ni mu tlhamusela hinkwaswu papayi wa mina. Ni mu byele swaku ni kume Xikwembu xa Ntiyiso naswona ni tshike ku tirha tempeleni swaku ni tirhela Xikwembu lexi. Papayi a kwate hintamu, van’wani va maxaka ya mina va tile va ta zama ku ni yendla ni txintxa mavonelo. A ni nga swi lavi ku kwatisa maxaka ya mina, kambe a ni swi tiva swaku ku tirhela Yehovha hi swona swaswinene, hi ku famba ka nkama maxaka ya mina ma hloniphe xiboho xa mina.

Hambileswi se a ni tshikile ku tirha tempeleni a swa ha ni karhatela ku tshika ku pimisa hi kona. Phela ku va muprista a ku li wutomi la mina, ni zamile ku swi khohlwa kambe a swi tikomba ingaku hinkwaku lomu a ni ya kona a ku ni minchumu leyi a yi ni yendla ni khumbuka wutomi la mina la khale.

Ku ni minchumu yimbirhi leyi yi nga ni pfuna. Xa ku sungula, ni lavetele minchumu hinkwayu leyi a yi li kona kaya leyi a yi fambisana ni wukhongeli la mina ya ku fana ni mabuku, mafoto hambi minchumu ya ku dura se ni gama ni yi hisa. Xa wumbirhi, a ni zama ku heta nkama wa wunyingi ni Timboni ta Yehovha. Ku va munghanu wa Timboni ta Yehovha swi ni pfune hintamu naswona hi ku tsongokutsongo ni ye ni khohlwa wutomi la mina la khale.

LESWI NI NGA PFUNEKISA XISWONA: Khale a ni nga tinyiki nkama wa ku tshama ni nsati wa mina ni vana va mina, leswo a swi va yendla va titwa va li voxe kambe nkama ni nga sungula ku yendla leswi Bibele li swi djondzisaka hi ku heta nkama na vona hi sungule ku va vanghanu. Hi ku famba ka nkama nsati wa mina na yena a sungule ku tirhela Yehovha. Swoswi hi tirhela Yehovha ni vana va hina xinkan’we ni nuna wa n’wana wa hina wa wansati.

Swoswi loko ni pimisa hi leswi a ni swi navela kusukela na ha li mutsongo, ku nga ku tirhela Xikwembu ni ku pfuna vanhu van’wani ni vona swaku ni swi kumile hinkwaswu leswi a ni swi lava. Ni mu khensa hintamu Yehovha.

“A ni swi tiva swaku a ku ni lexi a xi chota. — LYNETTE HOUGHTING

LEMBE LA KU PSALIWA: 1958

TIKO LA KU PSALIWA: Djoni

LESWI NGA MU YENDLEKELA: A TSHIKIWE HI VAPSALI VA YENA NKAMA NA WA HA LI MUTSONGO

WUTOMI LA MINA LA KHALE: Ni psaliwe Germiston ka doropa leli li nga ni ma empreza ya manyingi ya lava tirhaka mugodini naswona a ku na wugevenga la linyingi. Vapsali va mina a va pimisa swaku a va nge swi koti ku ni wundla se va ni nyikelile ka vapsali van’wani. Vapsali volavo va ni tekile na ni ni 14 wa masiku, a va ni hlayisa hi lirhandzu ku fana ni loko va li vapsali va mina hikakunene. A nkama ni nga tiva leswi swi nga ni yendlekela ni titwe ni tshikiwile, a ni nga ha titwi ni li n’wana wa vapsali lava va nga ni wundla naswona a ni pimisa swaku vona a va ni twisisi.

Nkama na ni ni 16 wa malembe ni sungule ku ya madixkoteka lomu a hi txina hi tlhela hi yingisela muzika. Se nkama na ni ni 17 wa malembe ni sungule ku dzaha. A ni lava ku va munhu wa ku lala ku fana ni lava a ni va vona ka ma publicidade ya masigaru. Nkama na ni ni 19 wa malembe ni sungule ku tirha aJohannesburg naswona ni sungule ku tlanga ni vanhu lava a va ni mahanyelo ya ku biha. Swi nga hlwelanga ni sungule ku va ni mavulavulelo ya ku biha, ku dzaha hintamu ni ku nwa byala hintamu hi ku hela ka vhiki.

Hambileswo miri wa mina a wu tiyile naswona a ni nga tshameli ku vabya, nkama ni nkama a ni tshamela ku yendla ma exercício ni ku bela bola ni vavasati. A ni tirha hintamu, leswo a swi ni yendla ni va ni ndhuma ka empreza ya makomputadori leyi a ni tirha ka yona, a ni ni male ya yinyingi naswona vanhu a va ni vona na ni li munhu wa ku ganya kambe a ni nga tsakanga, a ni titwa na ni lahlekile ka wutomi la mina, ka mbilu ya mina a ni swi tiva swaku a ku ni lexi a xi chota.

BIBELE LI TXINTXE WUTOMI LA MINA: Nkama ni nga sungula ku djondza Bibele ni djondze swaku Yehovha i Xikwembu xa lirhandzu ni tlhele ni djondza swaku a li kombisile lirhandzu lelo hi ku hi nyika Rito la yena ku nga Bibele, swo fana ni loko a hi tsalele karta swaku a hi kongomisa. (Esaya 48:17, 18) Ni vone swaku loko ni lava ku kongomisiwa hi lirhandzu la Xikwembu a ni fanele ni txintxa mahanyelo ya mina.

Ni sungule hi ku txintxa vanghanu va mina, ni pfuniwe hi marito lawa ma nga ka Swivuriso 13:20 lawa ma nge: “Lweyi a fambaka ni va ku tlhariha a ta tlhariha, kambe lweyi a tirhisanaka ni swiphunta, a swi nga ta mu fambela kahle.” Marito lawa ma ni pfunile swaku ni tshika vanghanu va mina va khale ivi ni sungula ku yendla vanghanu va nyuwani ni Timboni ta Yehovha.

Leswi a swi ni karhatela hintamu i ku tshika ku dzaha hikusa a swi ni nghene hintamu. Hi ku tsongokutsongo a ni ya ni swi kota ku tshika ku dzaha kambe ni kumane ni xikarhatu xin’wani. Ku tshika ku dzaha swi ni yendle ni ya ni kuluka ni yengetela 13,6 wa makilu. A ni nga swi nyimelanga swaku ni nga tshuka ni kuluka hi ndlela leyi naswona a swi lava 10 wa malembe swaku ni pumba makilu lawa a ni li na wona kambe a ni swi tiva swaku ku tshika ku dzaha a swi li swinene. Nkama hinkwawu a ni khongela ka Yehovha swaku a ni nyika ntamu wa ku hlula xikarhatu lexi.

LESWI NI NGA PFUNEKISA XISWONA: Swoswi ni ni wutomi lalinene naswona miri wa mina u kahle. Ni tsakile naswona a na ha karhateki hi ku lava minchumu ya yinyingi ni ku va ni ndhuma hi mhaka ya ntirho lowu a ni wu yendla, ku hambana ni leswo na tsaka hi ku byela van’wani ntiyiso lowu nga ka Bibele, hi mhaka leyo vavasati vanharhu lava a ni tirha na vona swoswi va tirhela Yehovha xikan’we na mina ni nuna wa mina. Loko vapsali va mina lava va nga ni wundla va nge se fa ni ve ni nkateko wa ku va komba xitshembiso xa ku pfuxiwa ka lava va nga fa ka misava ya nyuwani aparadesi.

Ku va munghanu wa Yehovha swi ni pfunile ku hlula ku titwa ni nga pfuni nchumu hi mhaka ya leswi ni nga tshikiwa hi vapsali va mina. Yehovha a ni yendle ni vona swaku ni lumba ndjangu wa vamakwerhu va misava hinkwayu. Ka vamakwerhu lava ni ni vamamani, vapapayi, vamakwerhu vaxinuna ni vaxisati. — Marka 10:29, 30.

[Marito ka pajina ]

Ka Timboni ta Yehovha ni vone lirhandzu la Wukreste

[Marito ka pajina ]

Tempele ya wugandzeli la Wuxinto lani a ni gandzela kona