“ U Munhu Lweyi A Rhandziwaka Hintamu”!

1-2. I yini xi nga hi pfunaka ku tiyiseka swaku hi va lisima ka Yehovha?

VANHU va Yehovha i va lisima swinene ka yena kambe van’wani swa va karhatela ku kholwa leswaku Yehovha impela wa va rhandza. Swi nga yendleka va titwa hi ndlela leyo hi mhaka leswi va nga tshama va hluphiwa. Ku nga va leswaku na wena u titwa hi ndlela ya ku fana? I ntxini lexi nga ku tiyisekisaka leswaku impela u wa lisima ka Yehovha?

² Xin’wani lexi nga ku pfunaka i ku pimisa hi swikombiso swa Bibele leswi kombisaka leswaku Yehovha a lava swaku hi va vonisa ku yini hi tlhela hi va khomisa ku yini vanhu van’wani. Yesu a a hlonipha vanhu van’wani a tlhela a va khoma hi ndlela yayinene, hi ku yendla leswo a kombise leswaku vanhu lava tivonaka na va nga li va nchumu i va lisima hintamu ka yena ni ka Papayi wa yena. (Yoh. 5:19; Heb. 1:3) Ka djondzo leyi hi ta vona swaku 1) Yesu a va pfunise ku yini van’wani ku vona swaku a va li va lisima ka Yehovha ni swaku 2) hi nga yendla yini leswaku hi tiyiseka swaku hi va lisima ka Yehovha. — Hag. 2:7.

YESU A PFUNE VAN’WANI KU VONA SWAKU I VA LISIMA KA YEHOVHA

3. Yesu a va khomise ku yini vanhu lava nga ya ka yena aGalileya?

³ Nkama lowu Yesu a a chumayela Galileya, vanhu va vanyingi a va ya ka yena kuva va mu yingisela va tlhela va hanyisiwa. Yesu a swi vonile swaku vanhu lavayani a va hluphiwa va tlhela ‘va pepetsekisiwa ku fana ni tinyempfu ta ku kala ti nga na murisi.’ (Mat. 9:36.) Varhangeli va wukhongeli va nkama lowuyani a va vona vanhu volavo na va nga na lisima, hi mhaka leyo a va nga na mhaka na vona. Phela a va tlhela va vula swaku vanhu lavayani a va li “vanhu lava nga rhukiwa.” (Yoh. 7:47-49) Kambe Yesu a a va hlonipha a tlhela a va khoma hi ndlela yayinene; hi mhaka leyo, a a tinyika nkama wa ku va djondzisa ni ku va hanyisa. (Mat. 9:35) Handle ka leswo, kuva Yesu a pfuna vanhu va vanyingi, a trenare vapostolo va yena ku chumayela a tlhela a va nyika matimba swaku va hanyisa lava a va vabya. — Mat. 10:5-8.

4. Hi djondza yini ka ndlela leyi Yesu a a va khoma hi yona vanhu lava a va voneliwa hansi?

⁴ Hi ku va a khoma vanhu hi ndlela yayinene ni ya xihlonipho, Yesu a kombise leswaku vanhu lava va voneliwaka hansi, i va lisima swinene ka yena ni ka Papayi wa yena. Loko u tirhela Yehovha kambe u nga tiyiseki leswaku u wa lisima, tinyiki nkama wa ku pimisa hi ndlela leyi Yesu a a va khoma hi yona vanhu va ku toloveleka lava a va lava ku djondzisiwa hi yena. Ku yendla leswo swi ta ku pfuna ku vona leswaku u wa lisima ka Yehovha.

5. I mpsini leswi hi swi tivaka hi wansati lweyi Yesu a nga mu tiva aGalileya?

⁵ Yesu a a nga djondzisi vanhu loko va li vanyingi ntsena kambe a a tlhela a djondzisa ni ku pfuna vanhu na va li voxe. Hi xikombiso, nkama lowu a a chumayela aGalileya a tive wansati mun’wani lweyi se a a ni 12 wa malembe na a hluphiwa hi mavabyi ya ku humetela ngati. (Mar. 5:25) Hi ku ya hi Nawu wansati lweyi a a nga basanga, funtshi mun’wani ni mun’wani lweyi a a ta mu khumba a a ta va a nga basanga. Se yena a a nga fanelanga a tshama ni vanhu van’wani, naswona swi nga yendleka a a tshama nkama wa ku leha na a li yexe. Handle ka leswo, a a nga fanelanga a gandzela Yehovha ni vanhu van’wani asinagogeni kumbe ka mafexta. (Lev. 15:19, 25) Ha tiyiseka swaku mavabyi lawa a ma mu hlupha wansati lwiyani ma tlhela ma mu dla hi le mbilwini. — Mar. 5:26.

6. Wansati lweyi a a ni mavabyi ya ku humetela ngati a yendle yini swaku a hanyisiwa?

⁶ Wansati lweyi, lweyi a a hlupheka swinene a a swi lava hintamu swaku Yesu a mu hanyisa, kambe a nga mu kombelanga leswaku a swi yendla leswo. Hi mhaka muni? Swi nga yendleka a a danisiwa hi mavabyi ya yena kumbe a a chava swaku Yesu a a ta mu hlongola hileswi mavabyi ya yena a ma mu yendla a va munhu wa ku kala a nga basanga, lweyi a a nga fanelanga a va xikarhi ka vanhu. Se a khumbe mpahla ya Yesu na a tiyiseka swaku a a ta hanyisiwa. (Mar. 5:27, 28) Vhela, hi ku va a kombise lipfumelo lolelo la ku tiya a hanyisiwile ka mavabyi ya yena. Yesu a game a vutisa swaku i mani lweyi a nga mu khumba naswona wansati lweyi a vhele a vula leswi a nga swi maha. I mpsini leswi Yesu a nga swi yendla?

7. Yesu a mu khomise ku yini wansati lwiyani a a hlupheka ngopfu? (Marka 5:34)

⁷ Yesu a khome wansati lweyi hi ndlela yayinene ni ya xihlonipho. A swi vonile swaku a “a chava a tlhela a rhurhumela.” (Mar. 5:33) Hi mhaka leyo, Yesu a mu tiyisile a tlhela a mu komba lirhandzu. Nkama a nga vulavula na yena a te “n’wananga” ku nga rito leli kombisaka xihlonipho ni lirhandzu. (Lerha Marka 5:34.) Phela leli ko va lona khambi lin’we ntsena leli nga tsaliwa ka Bibele lani Yesu a nga vitana wansati a ku “n’wananga”. Swi nga yendleka a yendle leswo hi mhaka ya leswi xiyimu lexiyani a xi mu karhatela wansati lweyi ni leswi a a chava. Pimisa hi leswi wansati lweyi a nga titwisa xiswona; a hi kanakani swaku a tsakile a tlhela a titwa na a pepile. Hambiloko Yesu a a nga mu kombanga wunene wansati lweyi, a hi kanakani swaku a a ta va a hanyisiwile. Kambe a a ta tama a titwa nandzu a tlhela a vaviseka hi le mbilwini. Se Yesu a a nga lavi ku mu hanyisa ntsena kambe a a lava ku mu pfuna kuva a vona swaku a a li wa lisima ka Yehovha, Papayi wa hina wa lirhandzu.

8. Hi swini swikarhatu leswi makwerhu Maria a nga kumana na swona?

⁸ Ninamuntlha, van’wani lava tirhelaka Xikwembu va kumana ni swikarhatu swa lihanyu leswi va hetaka ntamu ni ku va yendla va pimisa swaku a hi va lisima. Hi xikombiso, makwerhu Mariaa lweyi a nga mupfuli wa ndlela aBrasil a psaliwe na a nga na minenge ni voko la ximatsi. Yena a li: “A xikola a va ni poyilela swinene, funtshi a va ni hlupha hileswi ni nga limala. Vakolega va mina a va ni chuletela mavito va tlhela va ni poyilela. Naswona minkama yin’wani, hambi maxaka ya mina a ma ni vonela hansi.”

9. I mpsini swi nga pfuna Maria ku vona swaku i wa lisima ka Yehovha?

⁹ I mpsini leswi nga pfuna Maria? Nkama lowu a nga va Mboni ya Yehovha, vamakwerhu abandleni va mu tiyisile va tlhela va mu pfuna ku tivona hi ndlela leyi Yehovha a a mu vona hi yona. Yena a te: “Vamakwerhu va vanyingi va ni pfunile, naswona ni mu khensa hi mbilu ya mina hinkwayu Yehovha hi kuva a ni nyike ndjangu lowu wa lisima.” Phela vamakwerhu va pfune makwerhu Maria ku vona leswaku yena i wa lisima swinene ka Xikwembu.

10. Hi swini swikarhatu leswi Mariya Madalena a a kumana na swona funtshi a a titwisa ku yini? (Vona mafoto.)

¹⁰ Yesu a tlhele a pfuna Mariya Madalena lweyi a a ni 7 wa madimoni. (Luk. 8:2) Swi nga yendleka vanhu a va mu baleka hileswi a a yendla swilo swa ku kala swi nga tolovelekanga hi mhaka ya madimoni. Ka nkama wolowo wa ku karhata swinene ka wutomi la yena, swi nga yendleka Mariya Madalena a a titwa a nga li wa nchumu a tlhela a nga rhandziwi. Yesu a ma hlongolile madimoni lawa a ma mu hlupha a tlhela a mu pfuna swaku a va mulandzeli wa yena. I mpsini swin’wani leswi Yesu a nga swi yendla swaku a pfuna Mariya Madalena ku twisisa swaku a a li wa lisima ka Xikwembu?

11. Yesu a mu pfunise ku yini Mariya Madalena ku vona swaku a a li wa lisima ka Xikwembu? (Vona mafoto.)

¹¹ Yesu a tlhele a rhamba Mariya Madalena swaku va famba xikan’we nkama lowu a a famba a chumayela.b Leswo swi mu pfulele nkama swaku a yingisela Yesu na a djondzisa vanhu van’wani. Hi siku leli Yesu a nga pfuxiwa hi lona, a humelelile ka Mariya Madalena funtshi yena a ve mun’we wa vanhu va ku sungula lava Yesu a nga vulavula na vona hi siku leliyani. Yesu a tlhele a mu kombela swaku a ya byela vapostolo swaku se a a pfuxiwile. Hinkwaswu leswi swi yendle Mariya Madalena a tiyiseka swaku impela a a li wa lisima ka Yehovha! — Yoh. 20:11-18.

12. I mpsini swi nga yendla Lidia a pimisa leswaku a a nga ta rhandziwa hi munhu?

¹² Ku fana na Mariya Madalena, vanhu va vanyingi namuntlha va tivona na va nga li va lisima. Makwerhu Lidia lweyi a tshamaka Espanha a vule leswaku nkama mamani wa yena a nga kuma nyimba ya ku psala yena a a pimisa hi ku yi xixa. Lidia a khumbuka swaku nkama na a ha li xin’wanani, mamani wa yena a a nga mu hlayisi kahle funtshi a a mu byela marito ya ku tlhava. Yena a li: “A swi ni chavisa ku pimisa leswaku a ku nga ta va ni munhu lweyi a a ta ni rhandza hikusa mamani wa mina a a yendla hinkwaswu kuva a ni yendla ni pimisa leswaku a ni nga li munhu wamunene.”

13. I mpsini leswi nga pfuna Lidia ku vona swaku i wa lisima ka Yehovha?

¹³ Nkama Lidia a nga djondza ntiyiso swilo swi txintxile. Ku khongela, ku djondza Bibele, marito ni swiyendlo swa wunene swa vamakwerhu swi mu pfunile ku vona leswaku i wa lisima ka Yehovha. Yena a li: “Minkama hinkwayu nuna wa mina wa ni byela swaku wa ni rhandza a tlhela a ni khumbukisa wumunhu lalinene leli ni nga na lona. Ni vanghanu va mina va swi yendla leswo.” Amabandleni ku ni vanhu va ku fana na Lidia, lava swi lavaka hi va pfuna ku vona leswaku i va lisima ka Yehovha. U pimisa hi mani a lavaka ku pfuniwa ka bandla la wena?

TIVONI KU FANA NI LESWI YEHOVHA A KU VONISAKA SWONA

14. 1 Samuwele 16:7 yi hi pfunisa ku yini a ku va hi tivona hi ndlela leyi Yehovha a hi vonaka hi yona? (Vona kwadru leli nge “Hi Mhaka Muni Vanhu Va Yehovha Va Li Va Lisima Ka Yena?”)

¹⁴ Khumbuka swaku Yehovha a nga ku voni hi ndlela leyi van’wani va ku vonaka hi yona. (Lerha 1 Samuwele 16:7.) Ka misava leyi, munhu a voniwa na a li wa lisima loko a sasekile, a li ni male kumbe loko a djondzile hintamu. Kambe leswo a hi swa lisima ka Yehovha. (Esa. 55:8, 9) Se zama ku tivona hi ndlela leyi Yehovha a ku vonaka hi yona ku nga li leyi van’wani va ku vonaka hi yona. Kambisisa swikombiso swa le Bibeleni swa vanhu lava minkama yin’wani a va tivona na va nga pfuni nchumu va ku fana na Eliya, Nawomi na Ana. Loko u djondza hi swikombiso leswo, vona ndlela leyi Yehovha a nga kombisa hi yona leswaku a a va rhandza. U nga ha tsala swilo leswi nga yendleka ka wutomi la wena leswi kombisaka swaku Yehovha wa ku rhandza funtshi a ku nyika lisima. U nga ha tlhela u hamba mapexkiza hi mhaka yoleyo ka mabuku ya hina.c

15. Hi mhaka muni Yehovha a a mu rhandza hintamu Daniyele? (Daniyele 9:23)

¹⁵ Khumbuka leswaku ku tshembeka ka wena ku yendla leswaku Yehovha a ku vona na u li wa lisima. Nkama muprofeta Daniyele a a ni ku tlula 90 wa malembe a a “nga ha tikoti hi ku karhala” funtshi a a xukuvalile. (Dan. 9:20, 21) I mpsini leswi Yehovha a nga swi yendla leswaku a mu pfuna? A rhumele ntsumi Gabriyele swaku yi ya khumbukisa Daniyele leswaku a a li “munhu lweyi a rhandziwaka hintamu” ni swaku swikhongelo swa yena a swi twiwile hi Xikwembu. (Lerha Daniyele 9:23.) I mpsini leswi nga yendla leswaku Daniyele a rhandziwa hi Xikwembu? Hileswi a a ni wumunhu lalinene la ku fana ni ku rhandza swilo swaswinene ni ku tshembeka. (Eze. 14:14) Yehovha a tsale mhaka leyi ka Bibele leswaku yi hi tiyisa. (Rom. 15:4) Phela Yehovha wa swi twa swikhongelo swa wena funtshi a ku nyika lisima hileswi u rhandzaka swilo swa ku lulama naswona u mu tirhelaka hi ku tshembeka. — Mik. 6:8; Heb. 6:10.

16. I mpsini swi nga ku pfunaka kuva u vona Yehovha na a li Papayi lweyi a nga ni lirhandzu?

¹⁶ Vona Yehovha na a li Papayi lweyi a ku rhandzaka. Phela Yehovha a lava ku ku pfuna ku nga li ku lavetela swihoxo ka wena. (Ps. 130:3; Mat. 7:11; Luk. 12:6, 7) Ku pimisa hi leswo swi pfuna vanhu va vanyingi lava tivonaka na va nga pfuni nchumu. Hi leswo makwerhu Michelle lweyi a tshamaka Espanha a titwisaka xiswona hileswi nuna wa yena a a mu byela marito ya ku tlhava ku ringana malembe ya manyingi. Yena a li: “Loko ni tshuka ni titwa na ni nga pfuni nchumu ni zama ku tipimisa na Yehovha a ni tlakula a ni komba swaku wa ni rhandza a tlhela a ni vhikela.” (Ps. 28:9) Lauren, makwerhu wa xisati lweyi a tshamaka Djoni a tshamela ku tikhumbukisa a ku: “Leswi Yehovha a nga ni koka ni ta ka yena, funtshi a ni pfunaka swaku ni va kusuhi na yena a tlhela a ni tirhisa swaku ni djondzisa vanhu van’wani, swa tikomba leswaku impela ni munhu wa lisima ka yena.” — Hos. 11:4.

17. I mpsini swi nga ku pfunaka ku tiyiseka swaku Yehovha wa ku yamukela? (Tipisalema 5:12) (Vona mufoto.)

¹⁷ Tiyiseka swaku Yehovha wa ku yamukela. (Lerha Tipisalema 5:12.) Davhida a fanise ku yamukeliwa hi Yehovha ni “xivhikelo xaxikulu” lexi vhikelaka lava ku lulama. Ku tiva swaku Yehovha wa ku yamukela a tlhela a ku seketela, swi ta ku vhikela ku fana ni xivhikelo xaxikulu loko u teliwa hi mimpimiso ya ku kala yi nga li yinene. Leswaku u tiyiseka swaku Yehovha wa ku yamukela u fanele u lerha Bibele kuva u vona leswi Yehovha a swi pimisaka hi wena. Handle ka leswo, Yehovha a tirhisa madoda, vanghanu va wena ni vanhu van’wani swaku va ku khumbukisa swaku u wa lisima ka yena. Se u fanele u yendla yini loko vanhu va ku byela swaku u wa lisima?

18. Hi mhaka muni u fanele u pfumela ku khensiwa hi van’wani?

¹⁸ Loko lava ku tivaka ni lava ku rhandzaka va ku byela marito ya ku ku khensa, tiyiseka swaku a vo ku hembela. Khumbuka leswaku Yehovha a nga tirhisa vanhu volavo kuva va ku pfuna ku vona leswaku wa ku yamukela. Michelle, lweyi se hi nga bula hi yena a li: “Hi kutsongokutsongo ni djondza ku pfumela marito yamanene lawa vanhu va ni khensaka hi wona. Hambileswi ku yendla leswo swi ni karhatelaka, na swi tiva swaku hi leswo Yehovha a lavaka swaku ni swi yendla.” Hi lirhandzu, madoda ma tama ma pfuna Michelle ku vona swaku Yehovha wa mu yamukela. Swoswi i mupfuli wa ndlela funtshi a yendla ntirho wa Betele na a li kaya.

19. Hi mhaka muni u nga tiyisekaka swaku u wa lisima ka Yehovha?

¹⁹ Hi lirhandzu, Yesu a hi khumbukisa leswaku hi va lisima swinene ka Papayi wa hina wa le tilweni. (Luk. 12:24) Hi nga tiyiseka swaku Yehovha a hi vona na hi li vanhu va lisima, funtshi a hi fanelanga hi swi khohlwa leswo. Hi lava ku yendla hinkwaswu hi nga swi kotaka swaku hi pfuna ni van’wani ku vona swaku i va lisima ka Yehovha!