Vanhu lava hoyozelaka vanghanu ni maxaka ya vona lawa ma nga pfuxiwa aparedesi lani misaveni

Swi Vula Yini Ku Pfuxiwa Ka Lava Nga Fa?

Nhlamulu ya Bibele

Ka Bibele, a rito leli nga hundzuluxeliwa li va “ku pfuxiwa” li ta hi ka rito la Xigriki leli nge anástasis, leli vulaka “ku sekeleka.” Loko munhu a pfuxiwa, a susiwa ka lava nga fa leswaku a tlhela a hanya. — 1 Vakorinto 15:12, 13.

A rito leli nge “ku pfuxiwa” a li humeleli ka Matsalwa ya Xiheberu, kambe djondzo ya ku pfuxiwa ka vafi ya kumeka ka Matsalwa lawa. Hi xikombiso, hi ku tirhisa muprofeta Hosiya, Xikwembu xi tshembise leswi: “Ni ta va ponisa ka matimba ya Sirha; ni ta va ponisa ka lifu.” — Hosiya 13:14; Yobo 14:13-15; Esaya 26:19; Daniyele 12:2, 13.

Lava nga ta pfuxiwa va ta tshama kwini? Vanhu van’wani lava nga ta pfuxiwa va ta ya tshama matilweni naswona va ta ya fuma na Yesu Kreste. (2 Vakorinto 5:1; Nhlawutelo 5:9, 10) Bibele li vula swaku lava hi vona va “nga ta rhanga va pfuxiwa”. Marito lawa ma kombisa swaku ku ni ntlawa wun’wani wa vanhu lava nga ta pfuxiwa. (Nhlawutelo 20:6; Vafilipiya 3:11) Ntlawa wa wumbirhi lowu nga ta pfuxiwa i wa vanhu va vanyingi lava nga ta pfuxiwa swaku va hanya lani misaveni. — Tipisalema 37:29.

Lava nga fa va ta pfuxiwa na va tshamise ku yini? Xikwembu xi nyike Yesu matimba ya ku pfuxa lava nga fa. (Yohani 11:25) Yesu a ta pfuxa hinkwavu lava nga fa, mun’wani ni mun’wani a ta mu pfuxa na a tshamise xileswi na a tshamise xiswona ku sunguleni ni wumunhu la yena na a khumbuka leswi nga tshama swi mu humelelela. (Yohani 5:28, 29) Lava nga ta pfuxiwa swaku va ya hanya matilweni va ta nyikiwa muzimbha wa ku fana ni wa tintsumi kasi lava nga ta pfuxiwa swaku va hanya lani misaveni va ta nyikiwa muzimbha wa nyama, naswona na va ni lihanyu la linene. — Esaya 33:24; 35:5, 6; 1 Vakorinto 15:42-44, 50.

I vamani lava nga ta pfuxiwa? Bibele li li: “Lava ku lulama ni lava kalaka va nga lulamanga va ta pfuxiwa.” (Mintirho 24:15) Va ku lulama ku vuliwa vanhu va ku tshembeka va ku fana na Nowa, Sara na Abrahamu. (Genesa 6:9; Vaheberu 11:11; Yakobe 2:21) Va ku kala va nga lulamanga ku vuliwa vanhu lava kalaka va nga yingisanga minawu ya Xikwembu hi mhaka ya leswi va kalaka va nga xi tivanga naswona va kalaka va nga djondzanga hi xona.

Kambe vanhu lava nga yendla swilo swa ku biha hintamu, lava Xikwembu xi vonaka swaku a va nge he txintxi a va nga ta pfuxiwa. Loko munhu wa ku tshamisa xileswo a fa a tekela ku helisiwa swa wugamu, a nga ha na tshembo wa ku tlhela a pfuxiwa. — Matewu 23:33; Vaheberu 10:26, 27.

Lava nga fa va ta pfuxiwa siku muni? Bibele li vule swaku lava nga ta pfuxiwa swaku va ya hanya matilweni va ta pfuxiwa hi nkama wa ku vuya ka Yesu naswona nkama wolowo wu sungule hi 1914. (1 Vakorinto 15:21-23) Lava nga ta pfuxiwa swaku va hanya lani misaveni va ta pfuxiwa hi nkama wa Mfumu wa 1.000 wa malembe wa Yesu Kreste naswona hi nkama wolowo misava yi ta txintxiwa yi va paradesi. — Luka 23:43; Nhlawutelo 20:6, 12, 13.

Hi mhaka muni swi twala ku kholwa swaku lava nga fa va ta pfuxiwa? Bibele li vulavula hi 9 wa vanhu lava nga pfuxiwa, naswona vanhu lava va pfuxiwe na va voniwa hi vanhu van’wani. (1 Tihosi 17:17-24; 2 Tihosi 4:32-37; 13:20, 21; Luka 7:11-17; 8:40-56; Yohani 11:38-44; Mintirho 9:36-42; Mintirho 20:7-12; 1 Vakorinto 15:3-6) Ku pfuxiwa ka Lazaru hi kona ku hlamalisaka hintamu, hikusa se a ku hundze 4 wa masiku na Lazaru a file naswona Yesu a pfuxe Lazaru na ku tale hi vanhu va vanyingi. (Yohani 11:39, 42) Hambi vanhu lava a va nyenya Yesu a va nga phiki swaku Lazaru a pfuxiwile, funtshi a va lava ku dlaya Yesu va tlhela va lava ku dlaya na Lazaru. — Yohani 11:47, 53; 12:9-11.

Vanhu vanharhu lava ku vulavuliwaka hi vona ka Bibele, lava nga tshama va pfuxiwa ku feni: n’wana wa wansati lweyi a nga feliwa hi nuna, wansati lweyi a nga Mukreste na Lazaru munghanu wa Yesu

Bibele li kombisa swaku Xikwembu xi na wona matimba ya ku pfuxa lava nga fa funtshi xa swi lava ku va pfuxa. A xi va khohlwanga, xa ha khumbuka hinkwaswu hi mun’wani ni mun’wani lweyi a nga fa. (Yobo 37:23; Matewu 10:30; Luka 20:37, 38) Xikwembu a xo sindzisiwa ku pfuxa lava nga fa, xi ta va pfuxa hi ku swi lava! Loko Bibele li vulavula hi ku pfuxiwa ka lava nga fa, li vula swaku Xikwembu xi ta ‘navela ku vona ntirho wa mavoko ya xona.’ — Yobo 14:15.

Mavunhwa lawa ma vuliwaka hi ku pfuxiwa ka vafi

Mavunhwa: Ku pfuxiwa ka vafi i ku patsiwa ka moya wa munhu ni muzimbha wa yena.

Ntiyiso: Bibele a li djondzisi swaku munhu a ni moya lowu tamaka wu hanya loko a fa. (Genesa 2:7; Ezekiyele 18:4) Hi mhaka leyo ku pfuxiwa ka lava nga fa a hi ku tlhanganisiwa ka moya (alma) ni nyama, kambe i ku va Xikwembu xi tlhela xi mu yendla.

Mavunhwa: Van’wani va ta pfuxiwa va gama va tekela ku helisiwa.

Ntiyiso: Bibele li vula swaku “lava a va yendla swa ku biha va ta pfukela ku yavanyisiwa.” (Yohani 5:29) Hambileswo, a va nga te yavanyisiwa hileswi va nga swi yendla na va nge se fa, kambe va ta yavanyisiwa hi ku ya hileswi va nga ta swi yendla loko se va pfuxiwile. Yesu a te lava nga fa va “ta twa rito la N’wana wa Xikwembu, kutani lava nga mu yingisa va ta kuma wutomi.” (Yohani 5:25) Lava nga ta yingisa leswi va nga ta djondzisiwa loko se va pfuxiwile, mavito ya vona ma ta tsaliwa “buku la wutomi.” — Nhlawutelo 20:12, 13.

Mavunhwa: Lava nga ta pfuxiwa, va ta nyikiwa muzimbha lowu na va li na wona na va nga se fa.

Ntiyiso: Lomo munhu se a file, muzimbha wa yena wu “tlhelela ka wuthulu” kumbe hi marito man’wani, wa bola. — Ekleziyaxta 3:19, 20.