MAJOVHEM MA VUTISA
Swi Bihile Ku Komba Munhu Swaku Wa Mu Lava?
Swi vula yini ku komba munhu swaku wa mu lava?
Ku komba munhu swaku wa mu lava i ku vula kumbe ku yendla nchumu lexi nga ta mu yendla a pimisa swaku wa mu lava. Swi bihile ku yendla leswo? Ihim. Jovhem lin’wani leli vitaniwaka Ann li li: “Loko se u swi lunghekelile ku namorara naswona ku ni djaha leli u li tsakelaka, swi lava u li komba swaku wa li lava, kuva u tiva swaku indjhe na lona la ku lava ke?”
Ka nhlokomhaka leyi, hi ta bula hi ndlela ya ku biha ya ku komba munhu swaku wa mu lava, ku nga ku tlanga hi ku namorara. Ku tlanga hi ku namorara swi vula ku yendla munhu mun’wani a pimisa swaku wa mu lava kuve ho lava ku tlanga hi yena.
Deanna a li: “Nchumu xin’wani i ku va munhu a kombisa swaku a ni mhaka ni munhu mun’wani hileswi a lavaka ku namorara na yena. Kambe xin’wani xa ku hambana ni lexo, i ku va munhu a yendla munhu mun’wani a pimisa swaku wa mu tsakela naswona a lava ku namorara na yena a gama a mu chela hi mati ya ku titimela hi ku vula swaku a wo tlanga na yena.”
Hi mhaka muni vanhu van’wani va tlanga hi ku namorara?
Phela, vanhu van’wani va tlanga hi ku namorara leswaku va ta gama va tikhuza hi swoleswo. Ntombhi yin’wani leyi vitaniwaka Hailey yi li: “Loko ntombhi yi swi kota ku yendla leswaku djaha li rendera hi yona yi nga ha sungula ku tibyela yi tlhela yi tolovela ku yendla leswaku madjaha man’wani ma yi lava.” Kambe ku yendla leswaku munhu a pimisa leswaku wa mu lava kuve wena a wu le ka swona swi kombisa leswaku a wu na mhaka ni leswi a titwisaka xiswona. Funtshi loko u yendla leswo hi maxivomu leswaku u ta gama u tikhuza hi swona, swi kombisa leswaku wa ha li n’wana naswona swa ha lava leswaku u kula.
Bibele li li: “Xiphunta xi tsakisiwa hi wuphunta.” — Swivuriso 15:21.
Hi mhaka leyo, Hailey a li: “Swi nga ha tikomba ingaku ku tlanga hi ku namorara a swi bihanga, kambe minkama ya yinyingi swi nga yendla leswaku munhu mun’wani a vavisiwa.”
Hi yini nghozi ya ku tlanga hi ku namorara?
Ku tlanga hi ku namorara swi wonha ndhuma ya wena.
Jeremy a li: “Munhu lweyi a rhandzaka ku tlanga hi ku namorara a kombisa swaku a nga titshembi funtshi wa ha li n’wana. Munhu lweyi a yendlaka leswo, a nga vulavuli ntiyiso o lava ku tlanga hi vanhu van’wani.”
Bibele li li: “Lirhandzu . . . a li tilaveli leswi pfunaka lona ntsena.” — 1 Vakorinto 13:4, 5.
Pimisanyana hi leswi, ‘hi swini swilo kumbe marito lawa u faneleke u fambela kule na wona loko u nga lavi ku tiviwa u li munhu lweyi a tlangaka hi ku namorara?’
Ku tlanga hi ku namorara swi vavisa munhu mun’wani.
Jaqueline a li: “Mina ni fambela kule ni madjaha lawa ma tlangaka hi ku namorara, hikusa lexi xi ma yendlaka ma bula na mina hileswi ni nga ntombhi. Madjaha lawa ma tlangaka hi ku namorara a ma na mhaka na mina kambe xa lisima ka wona i ku lava ku titsakisa.”
Bibele li li: “Mun’wani ni mun’wani a nga lavi leswi nga ta pfuna yena ntsena, kambe a a lavi leswi nga ta pfuna van’wani.” — 1 Vakorinto 10:24.
Pimisanyana hi leswi, ‘ku ni munhu lweyi a nga tshama a ku yendla u pimisa leswaku wa ku lava kambe hi wugamu u tsumbula swaku munhu yelweyo a nga lavi ku namorara na wena? U titwise ku yini, naswona u nga yendla yini leswaku na wena u nga vavisi munhu mun’wani hi ndlela ya ku fana?’
Ku tlanga hi ku namorara swi nga yendla swi ku karhatela hintamu swinene ku kuma nuna kumbe nsati wamunene.
Olivia a li: “A ni nge tshuki ni namorara kumbe ku chada ni munhu lweyi a tlangaka hi ku namorara, phela munhu yelweyo a ni nge mu tshembi hikusa a yendla ingi o ni rhandza kuve a nga le ka mina.”
Davhida a tsale leswi: “Ni fambela kule ni vanhu lava fihlaka leswi va nga swona.” — Tipisalema 26:4.
Pimisanyana, ‘loko wo tlanga hi ku namorara u pimisa leswaku i munhu wa ku tshamisa ku yini lweyi a nga ta lava ku namorara na wena? Ku nga va swaku mpelampela i munhu yelweyo u lavaka leswaku a va nsati kumbe nuna wa wena?’