Ku Pfuxiwa Ka N’wana Wa Wansati Lweyi A A Feliwe Hi Nuna

Ka malembe lawa a ku ni ndlala aIsrayele, Yehovha a byele Eliya a ku:

— Famba aSarepta, u ta kuma wansati wa ku feliwa hi nuna lweyi a nga ta ku nyika swakudla.

Nkama lowu Eliya a nga fika, a vone wansati na a rholela tihunyi. Phela a ku li wansati yelweyo lweyi Yehovha a a vulavule hi yena. Eliya a mu kombele pawu ni mati kambe wansati lweyi a te:

— Mina a ni na pawu no va ni trigu lalitsongo ni mafurha ya matsongo, naswona swo yenela mina ni n’wana wa mina.

Eliya a byele wansati lwiya a ku:

— Yehovha a tshembise leswaku loko wo ni yendlela pawu, a trigu la wena ni mafurha ya wena a swi nga ta hela anze ku tlhela ku na mpfula.

Wansati lwiyani wa ku feliwa hi nuna a fambe a ya kaya ka yena, a fika a mu yendlela pawu Eliya. Se leswi Yehovha a a swi tshembisile swi yendlekile, wansati lwiya ni n’wana wa yena va ve ni swakudla malembe hinkwawu lawayani ya ndlala. A trigu leli a li li ka khuwani ni mafurha ya kona a swi zanga swi hela.

Kambe ku game ku humelela nchumu wa ku karhata hintamu. N’wana wa wansati lweyi wa ku feliwa hi nuna a sungule ku vabya hi wugamu a fa. Se wansati lweyi a kombele Eliya swaku a yendla xan’wanchumu. Eliya a teke n’wana lweyi ka mavoko ya mamani wa yena, a famba na yena ka kwartu leli a li kumeka henhla a fika a mu veka ka mubedu. A gama a sungula ku khongela a ku:

— Yehovha yendla leswaku n’wana lweyi a tlhela a hanya.

Phela leswi Eliya a nga swi kombela a swi tikomba ingaku a swi nga ta koteka hikusa leswo a swi nga se tshama swi yendleka, naswona wansati lweyi wa ku feliwa hi nuna ni n’wana wa yena a va nga li Vayisrayele.

Kambe n’wana lweyi a tlhele a hanya. Eliya a game a byela wansati lwiyani a ku:

— Wa mu vona n’wana wa wena a pfuxiwile, wa hanya.

Wansati lwiyani wa ku feliwa hi nuna a tsake hintamu, a gama a byela Eliya a ku:

— Swoswi se na swi tiva swaku u munhu lweyi a nga rhumiwa hi Xikwembu, naswona leswi u swi vulaka swi ta hi ka Yehovha funtshi i ntiyiso.