A Tiyisiwile Hi Xikwembu Xa Yena

1, 2. I mpsini leswi nga yendleka ka siku leli a li li la lisima hintamu ka Eliya?

ELIYA a a li ku tsutsumeni na mpfula yi li ku neni naswona a li ya li pela. Akuva a ya fika aYezreyeli a ka ha li mpfhuka wa ku leha naswona Eliya se a a gugile. Hambileswo a tsutsumile a nga nyimi hikusa a “voko la Yehovha” a li li na yena. Phela matimba lawa a a li na wona, a a nga se tshama a va na wona ka wutomi la yena hikusa a wa ha li ku hundza makavhalu lawa a ma koka nyolo ya Hosi Akabu. — Lerha 1 Tihosi 18:46.

² Phela Eliya a a tsutsuma na a li yexe ka xitaratu lexi, naswona a liyendzo a la ha lehile. Pimisa hi Eliya na a tsutsuma na ku na mpfula yayikulu hintamu leyi a yi ba kara la yena na a pimisa hi leswi nga yendleka ka siku leli, leli nga va la lisima ka yena. A hi kanakani leswaku ku ve siku leli Yehovha Xikwembu xa Eliya a nga hlula, ku tlhela ku voniwa swaku hi lini wugandzeli la ntiyiso. Eliya a nga ha yi voni Ntshava ya Karmeli hikusa a tilweni a ku mphumile naswona a ku ni marhefu. Phela ku ve ka Ntshava leyi lani Yehovha a nga hlamula xikhongelo xa Eliya hi ndlela ya singita, a tlhela a kombisa swaku wugandzeli la Bali a li li la mavunhwa. Vaprofeta va vanyingi va Bali va danisiwile va tlhela va dlayiwa hinkwavu. Se Eliya a khongelile ka Yehovha a kombela leswaku a mpfula leyi nga heta malembe manharhu ni hafu na yi nga ni yi na, funtshi hi wugamu a mpfula yi nile. — 1 Tih. 18:18-45.

3, 4. a) Nkama Eliya a a ya Yezreyeli hi swini swilo swaswinene leswi a a nyimela swa ku swi yendleka? b) Hi swini swivutiso leswi hi nga ta bula hi swona?

³ Nkama Eliya na a tsutsuma a ya Yezreyeli ku nga mpfhuka wa kolomuyani ka 30 wa makilometru, swi nga yendleka a pimisile swaku a swilo se a swi ta txintxa. Swi nga yendleka a pimisile swaku leswi vaprofeta hinkwavu va Bali se a va helisiwile a swilo a swi ta yampsa. Naswona swi nga yendleka a pimisile swaku leswi a swa ha ku yendleka, a swi ta yendla Akabu a txintxa, a tshika ku gandzela Bali a tlhela a sivela nsati wa yena Jezabele swaku a tshika ku xanisa vanhu va Yehovha.

⁴ Loko swilo swi hi fambela kahle, hi nga ha tshuka hi pimisa swaku swi ta tama swi famba kahle ni ka nkama lowu taka. Swi nga yendleka hi pimisa leswaku a swiyimu swa hina, swi ta tama swi yampsa funtshi hi wugamu swikarhatu swa hina swaswikulu swi ta hela. Se a swi hlamalisi loko swi ku Eliya na yena a titwe hi ndlela leyo, hikusa “a a li munhu wa ku fana na hina.” (Yak. 5:17) Kambe ku vula ntiyiso, a swikarhatu swa Eliya a swo ho sungula. Ndzeni ka maworanyana a a ta sungula ku chava, a godola a tlhela a lava ni ku fa. Hi mhaka muni? Naswona Yehovha a mu pfunise ku yini muprofeta lweyi swaku a tlhela a va ni lipfumelo a tlhela a tiya nhlana? A hi swi voneni.

Swilo Swi Djime Hi Nhloko

5. Indjhe Akabu a djondze ku hlonipha Yehovha loko se a vone leswi nga yendleka ka Ntshava ya Karmeli, naswona hi swi tivisa ku yini leswo?

⁵ Ku nga va leswaku nkama Akabu a nga fika ka yindlo ya wuhosi a Yezreyeli a txintxile mahanyelo ya yena? Bibele li li: “Akabu a byele Jezabele hinkwaswu leswi Eliya a nga swi yendla ni leswi a nga va dlayisa swona vaprofeta hinkwavu hi xipada.” (1 Tih. 19:1) Vona leswaku Akabu a nga zanga a vula nchumu hi Yehovha Xikwembu xa Eliya. Hambileswi a nga vona masingita hinkwawu lawa Yehovha a a ma yendlile, Akabu a nga zanga a pfumela swaku ma yendliwile hi Yehovha hikusa a a nga na mhaka ni Xikwembu. Phela a a pimisa ntsena leswaku masingita lawayani a “ma yendliwile hi Eliya.” Se swa tikomba leswaku Akabu a nga zanga a djondza ku hlonipha Yehovha Xikwembu. Se i mpsini leswi nsati wa yena Jezabele a nga swi yendla?

6. I mpsini leswi Jezabele a a nga rhuma mutirhi wa yena swaku a ya byela Eliya, naswona a swi vula yini?

⁶ Jezabele a a kwate hintamu lakaku a rhume mutirhi wa yena a ya byela Eliya a ku: “Swikwembu a swi ni khatisi hintamu loko mundzuku ko ba nkama lowu na ni nga ku yendlanga hinkwaswu leswi u nga swi yendla ka vaprofeta lavaya!” (1 Tih. 19:2) Phela mhaka leyi a yi chavisa hintamu hikusa wutomi la Eliya a li li nghozini. Ku vula ntiyiso Jezabele a a vula swaku a a bedja ku fa loko mundzuku o kala a nga swi koti ku dlaya Eliya, a hakelisa leswi a nga swi yendla ka vaprofeta va Bali. Hi nga pimisa hi leswi nga yendleka ka wusiku leliyani na ku ni xidzedze, Eliya a pfuxiwa swa kola na kola ka ndhawu leyi na a yetlelile ka yona, a byeliwa mhaka leyi ya ku chavisa leyi taka hi ka Jezabele. U pimisa swaku a titwise ku yini?

A Sungula Ku Chava A Tlhela A Godola

7. Eliya a titwise ku yini nkama a nga tiva swaku Jezabele a a lava ku mu dlaya, naswona a yendle yini?

⁷ Loko ku li leswaku Eliya a a pimisa swaku a nyimpi leyi a a yi lwa ni wugandzeli la Bali a yi li kusuhi ni ku hela, a hantle a swi tsumbula leswaku a wo tikanganyisa. Phela Jezabele a nga zanga a txintxile, funtshi vaprofeta va vanyingi lava a va li vanghanu va Eliya se a va dlayiwile hi Jezabele naswona a swi tikomba ingi Eliya na yena a a ta landzela. Se Eliya a titwise ku yini hi leswi Jezabele a nga swi vula? Bibele li li: “Eliya a sungula ku chava.” Ku nga va leswaku Eliya a a tshamela ku pimisa hi leswi Jezabele a a lava ku mu dlaya? Loko ku li leswo, swi yendle swaku a sungula ku chava. Naswona ‘a balekile leswaku a ta ponisa wutomi la yena.’ — 1 Tih. 18:4; 19:3.

8. a) A xikarhatu lexi pedru a nga kumana na xona, xi fanisa ku yini ni xikarhatu xa Eliya? b) Hi djondza yini ka leswi nga yendlekela Eliya na Pedru?

⁸ Eliya a hi yena yexe wanuna wa lipfumelo lweyi a nga tshama a titwa na a chava. Loko se ku hundze nkama wa wunyingi, mupostolo Pedru na yena a ve ni xikarhatu xa ku fana. Nkama Yesu a nga yendla swaku Pedru a famba henhla ka mati, mupostolo lweyi a sungule ku “txuvuka xidzedze” a gama a chava se a sungula ku mbombomela. (Lerha Matewu 14:30.) Leswi nga yendlekela Eliya na Pedru swi hi djondzisa mhaka ya lisima hintamu. Na hina leswaku hi tiya nhlana a hi fanelanga hi tshamela ku pimisa hi tinghozi leti nga ha hi humelelaka, kambe hi fanele hi pimisa hi Yehovha hikusa hi yena a hi nyikaka matimba ni ntshembo.

“A Na Ha Gwenti!”

9. Tlhamusela liyendzo la Eliya ni leswi nga yendlekaka a a titwisa xiswona.

⁹ Hi mhaka leswi Eliya na a chava, a balekile a ya Berxeba kusuhi ni lomu tiko la Yuda li gamelaka kona hi tlhelo la le wuxeni. Phela a fambe kolomu ka 150 wa makilometru. A fike a siya mupfunisi wa yena ka ndhawu yoleyo leyi a yi li mananga naswona a mu siye yexe. Bibele li vula swaku Eliya a fambe “siku hinkwalu.” Se hi nga mu pimisa na a pfuka nimpundzu swinene, a famba na a nga na swakudla kumbe swilo swin’wani. Phela leswi a a hele matimba ni leswi a a chava, Eliya a tame a famba na a psha hi mumu wa ndhawu liyani ya mananga lani a ku nga tshami munhu. Nkama dlambu se a li ya ku peleni, Eliya se a a karhale swinene. Hi mhaka leyo, a ye a ya tshama hansi ka nsinya lowu a ku li wona ntsena lowu a a ta tumbela ka wona ka ndhawu liyani leyi a yi li mananga. — 1 Tih. 19:4.

10, 11. a) Xikhongelo xa Eliya xi vula yini? b) Hi ku tirhisa tindzimana leti nga ka paragrafu tlhamusela leswi vatirheli va Yehovha va ku tshembeka va nga titwisa xiswona nkama na va karhatekile.

¹⁰ Na a karhateke hintamu, Eliya a khongele ka Yehovha a kombela ku fa. Yena a te: “A ni va tluli hi nchumu vavhovho va mina.” Eliya a a swi tiva leswaku vavhovho va yena a va yo sala hi wuthulu ni marhambu asirheni, naswona a va nga ha ta kota ku yendlela munhu nchumu. (Ekl. 9:10) Eliya a a titwa na a nga pfuni nchumu ku fana na vona, se a swi hlamalisi leswi a nga huwelela a ku: “A na ha gwenti!” Hi marito man’wani a a lava ku vula swaku swi siza yini ku tama ni hanya?

¹¹ Indjhe swi fanele swi hi hlamalisa ku vona leswaku wanuna wa Xikwembu a a karhateke hintamu a za a kombela ni ku fa? Ihim. Hikusa ka Bibele ku ni vanhu va vanyingi va ku tshembeka lava na vona hi mhaka ya leswi a va karhatekile va nga kombela ni ku fa. Van’wani va vona ku ve Rabeka, Yakobe, Moxe na Yobo. — Gen. 25:22; 37:35; Tin. 11:13-15; Yob. 14:13.

12. Loko siku lin’wani u titwa na wu helile ntamu, u nga xi tekelelisa ku yini xikombiso xa Eliya?

¹² Namuntlha hi hanya ka “minkama ya ku karhata leyi swi tikaka ku hanya ka yona.” Hi mhaka leyo, a swi hi hlamalisi kuva vanhu va ku tshembeka ka Yehovha minkama yin’wani va hela ntamu. (2 Tm. 3:1) Se loko na wena siku lin’wani u titwa hi ndlela leyo, tekelela xikombiso xa Eliya, chulula mbilu ya wena ka Yehovha hikusa Yehovha i “Xikwembu lexi tiyisaka vanhu ka swiyimu hinkwaswu.” (Lerha 2 Vakorinto 1:3, 4.) Ku nga va leswaku Yehovha a mu tiyisile Eliya?

Yehovha A Hlayise Muprofeta Wa Yena

13, 14. a) Yehovha hi ku tirhisa ntsumi a swi kombisise ku yini swaku a a ni mhaka ni muprofeta wa yena lweyi a a helile matimba? b) Hi mhaka muni swi hi tiyisa ku tiva leswaku Yehovha a hi tiva ku yampsa a tlhela a tiva ni leswi hi tsandzekaka ku swi yendla?

¹³ U pimisa swaku Yehovha a titwise ku yini loko a vona muprofeta wa yena lweyi a a mu rhandza hintamu na a li hansi ka xinsinyani amananga na a kombela ku fa? A Bibele la hi byela leswi nga yendleka. Loko Eliya se yetlelile Yehovha a rhumele ntsumi, naswona hi lirhandzu a ntsumi yi mu khumbile yi mu pfuxa yi ku: “Pfuka u dla.” Eliya a yendle swoleswo hikusa ntsumi a yi mu tisele swakudla, ku nga pawu la ku hisa ni mati ya ku titimela. Ku nga va leswaku Eliya a yi khensile ntsumi? A Bibele lo hi byela ntsena swaku muprofeta lweyi a pfukile a dla a tlhela a yetlela. Ku nga va swaku Eliya a a karhateke hintamu lakaku a nga gwenti ni ku vulavula? Swi nga yendleka. Kambe a ntsumi yi tlhele yi mu pfuxa ka wumbirhi kumbexana na li ya ku xeni yi ku: “Pfuka u dla, hikusa lipfhumba la wena la ha li likulu hintamu.” — 1 Tih. 19:5-7.

¹⁴ Xikwembu xi pfune ntsumi ya xona ku tiva lomu Eliya a a ya kona. Phela Xikwembu a xi swi tiva swaku Eliya a a nga ta swi kota ku yendza hi matimba ya yena yexe. Swi hi tiyisa hintamu ku tiva leswaku Xikwembu xi lunghekile swaku xi hi pfuna, hikusa xi swi tiva ku yampsa leswi hi kotaka ku swi yendla ni leswi hi kalaka hi nga swi koti ku swi yendla hi matimba ya hina! (Lerha Tipisalema 103:13, 14.) Se leswi Eliya a nga swi dla swi mu pfunise ku yini?

15, 16. a) Swakudla leswi Yehovha a nga nyika Eliya swi mu pfunise ku yini? b) Hi mhaka muni hi fanele hi mu khensa Yehovha hi leswi a swi yendlaka swaku a hlayisa vanhu va yena namuntlha?

¹⁵ Bibele li li: “A pfuka a dla a tlhela a phuza. Swakudla leswi swi mu nyike ntamu wa ku famba 40 wa masiku, wusiku ni nhlikanhi, anze a ya fika Horebi, ka ntshava ya Xikwembu xa ntiyiso.” (1 Tih. 19:8) Ku fana ni leswi nga yendlekela Moxe ka 600 wa malembe lawa se a ma hundzile ni leswi nga yendlekela Yesu ka 1.000 wa malembe lawa ma nga landzela, Eliya a tshame 40 wa masiku na a nga dlanga nchumu. (Eks. 34:28; Luk. 4:1, 2) Swakudla leswiyani a swi helisanga swikarhatu hinkwaswu leswi a a li na swona, kambe swi mu tiyisile hi ndlela ya singita. Pimisa hi Eliya lweyi se a a gugile, na a famba amananga ka tindhawu ta ku kala switaratu siku ni siku, vhiki ni vhiki a za a heta kolomu ka wheti ni hafu na a famba.

¹⁶ Ninamuntlha Yehovha wa va hlayisa vanhu va yena lava mu tirhelaka, kambe a nga yendli leswo hi ndlela ya singita. A swi yendla hi ndlela ya lisima hintamu hikusa a va nyika hinkwaswu leswi va swi lavaka swaku va tama va va vanghanu va yena. (Mat. 4:4) Phela ku djondza hi Yehovha ka Rito la yena ku nga Bibele, ni ku djondza mabuku lawa ma nga seketeliwa ka Bibele swi fana ni ku dla swakudla hikusa swi hi nyika ntamu wa ku hi tama hi mu tirhela. Ku yendla swilo leswi hinkwaswu, swi nga yendleka swi nga helisi swikarhatu swa hina hinkwaswu, kambe swi ta hi nyika ntamu wa ku tiyisela loko hi kumana ni swiyimu swa ku karhata. Phela swilo leswi hinkwaswu leswi Yehovha a hi nyikaka swona, swi hi yisa ka “wutomi la ku kala li nga heli.” — Yoh. 17:3.

17. Hi yini ndhawu leyi Eliya a nga ya ka yona, naswona hi mhaka muni ndhawu yoleyo a yi li ya lisima hintamu?

¹⁷ Phela Eliya a fambe kolomuyani ka 320 wa makilometru a za a ya fika ka Ntshava ya Horebi (kumbe ntshava ya Sinayi). Phela ntshava leyi a yi li ndhawu ya lisima hintamu hikusa ka nkama lowu nga hundza Yehovha a tshame a humelela ka Moxe hi ku tirhisa ntsumi na a li ka xinsinyani lexi a xi pfurha ndzilu. Naswona hi ku famba ka nkama, Yehovha a yendle ntwananu wa Nawu ni Vayisrayele ka ndhawu yoleyo. Eliya a fike a nghena ka mhakwa.

Yehovha A Mu Tiyisise Ku Yini Muprofeta Wa Yena?

18, 19. a) Ntsumi ya Yehovha yi mu vutise yini Eliya, naswona a yi hlamulise ku yini? b) Hi swini swivangelo swinharhu leswi nga yendla Eliya a godola?

¹⁸ Ka Ntshava ya Horebi Eliya a twile “rito” la Yehovha leli swi nga yendleka a li ta hi ka ntsumi li ku: “Eliya, u yendla yini lani?” Swi nga ha yendleka xivutiso lexi xi yendliwe hi lirhandzu, hikusa Eliya a swi vone na ku li nkama wa ku va a chulula leswi a swi li ka mbilu ya yena. Se Eliya a game a ku: “Ni tinyiketele hi mbilu hinkwayu ka wena Yehovha Xikwembu, murhangeli wa tintsumi; kambe Vayisrayele va tshike ntwananu wa wena, va tlhela va dilizela maaltari ya wena, va dlaye vaprofeta va wena hi xipada, ku yo sala mina ntsena. Kutani swoswi va lava ku ni dlaya.” (1 Tih. 19:9, 10) Marito ya Eliya ma kombisa swivangelo swinharhu leswi a swi mu yendla a hela ntamu.

¹⁹ Xa ku sungula, Eliya a a pimisa swaku ntirho wa yena a wu pfunanga nchumu, hambileswi a a ‘tinyiketelile hi mbilu hinkwayu ka ntirho wa Yehovha’ naswona a a rhangisa ku gandzela Yehovha ku tlula swilo hinkwaswu. Eliya a a vona ingi a swilo a swo ya hi ku biha, a vanhu a va nga kombisanga lipfumelo, naswona a va nga lavi ku twa nchumu funtshi a wugandzeli la mavunhwa a lo ya li tala. Xa wumbirhi, Eliya a a titwa na a li yexe lakaku a ze a ku “ku yo sala mina ntsena”, na a pimisa swaku a ku li yena ntsena lweyi a a gandzela Yehovha aIsrayele. Xa wunharhu, Eliya a a chava hintamu, hikusa ku tala ka vanghanu va yena lava na vona a va li vaprofeta se a va dlayiwile naswona yena a a pimisa swaku a a ta landzela. Swi nga yendleka swi nga mu vevukelanga Eliya ku vula ndlela leyi a a titwa hi yona, kambe a nga pfumelelanga swaku ku tibyela kumbe ku va ni tingana swi mu tshikisa ku vula leswi a a titwisa xiswona. Eliya a khongele ka Yehovha a mu byela hinkwaswu leswi a swi li ka mbilu ya yena. Phela Eliya i xikombiso xaxinene ka hinkwavu lava tirhelaka Yehovha hi ku tshembeka. — Ps. 62:8.

20, 21. a) Tlhamusela leswi Eliya a nga swi vona nkama na a li ka nyanghwa wa mhakwa wa Ntshava ya Horebi. b) A swikombiso swa matimba ya Yehovha, swi mu djondzisile yini Eliya?

²⁰ Yehovha a mu pfunise ku yini Eliya hi mhaka ya leswi a a karhateke hintamu? Ntsumi ya Yehovha yi byele Eliya leswaku a ya nyima ka nyanghwa wa mhakwa. Hambileswi a a nga swi tivi leswi a swi ta yendleka, Eliya a yingisile. Kola na kola ku sungule ku ba moya wawukulu hintamu, phela wu vange guwa lalikulu hintamu hikusa hambi maribye ni tintshava a swi pandzekela. Hi nga mu pimisa Eliya na a zama ku vhikela matihlo ya yena naswona na a zama ku khoma nguvu ya yena swaku yi nga pengwisiwi hi moya hikusa a wu li wukulu hintamu. Naswona swi nga yendleka a swi nga mu vevukeli kuva a nyima hikusa misava a yi sungula ku tsekatseka, naswona swi nga ya nga kule swi lave swaku Eliya a nghena ndzeni ka mhakwa hikusa ku humelele ndzilu lowu a wu hisa hintamu. — 1 Tih. 19:11, 12.

²¹ Bibele li hi yendla hi twisisa swaku ka swiyendlakalo hinkwaswu swoleswo swa matimba ya ntumbuluku, Yehovha a a nga li kona ndzeni ka swona. Eliya a a swi tiva swaku Yehovha i Xikwembu xa ku twisiseka ku nga li Bali lweyi vagandzeli va yena a va pimisa swaku i “hosi ya marhefu” naswona hi yena a nisaka timpfula. Yehovha hi yena Xihlovo xa matimba hinkwawu ya ntumbuluku kambe yena a tlakukile swinene ku tlula swilo hinkwaswu leswi a nga swi yendla. Phela hambi hi matilo lawa hi ma vonaka a ma mu ringani. (1 Tih. 8:27) Se hinkwaswu leswi swi mu pfunise ku yini Eliya? Khumbuka swaku a a chava hintamu. Se leswi Eliya a a li na Yehovha Xikwembu xa matimba hinkwawu ka tlhelo la yena, a a nga na xivangelo xa ku va a chava Akabu na Jezabele. — Lerha Tipisalema 118:6.

22. a) A “rito la ku rhula leli a li twalela hansi” li mu pfunise ku yini Eliya ku vona leswaku a wa ha li wa lisima? b) A “rito la ku rhula leli a li twalela hansi” swi nga yendleka a li li la mani? (Vona ntlhamuselo.)

²² Nkama ndzilu wu nga hela, ku twale “rito la ku rhula leli a li twalela hansi” a rito leli li byele Eliya swaku a tlhela a vulavula. Se hi khambi la wumbirhi Eliya a vule leswi a swi mu karhata naswona swi nga yendleka leswo swi mu yendle a titwa kahle.a A hi kanakani swaku Eliya a tlhele a tiyisiwa hi leswi “rito la ku rhula leli a li twalela hansi” li nga gama li swi vula. Yehovha a tiyisekise Eliya swaku a a li wa lisima. A swi yendlise ku yini? Phela Xikwembu xi byele Eliya swilo leswi a xi ta swi yendla hi ku famba ka nkama leswaku xi helisa wugandzeli la Bali aIsrayele. Ha tiyiseka swaku a ntirho wa Eliya a wu vanga wa mahala, hikusa a xikongomelo xa Yehovha a xi nga se hetiseka funtshi a ku nga na nchumu lexi a xi ta xi sivela swaku xi nga hetiseki. Handle ka leswo Eliya a a yendla xiyenge ka xikongomelo xolexo, hikusa Yehovha a game a mu byela swaku a tlhelela ka ntirho wa yena a tlhela a mu byela ni leswi a a fanele a swi yendla. — 1 Tih. 19:12-17.

23. Hi swini swilo swimbirhi leswi Yehovha a nga swi yendla leswaku a pfuna Eliya akuva a nga titwi na a li yexe?

²³ I mpsini leswi Yehovha a nga swi yendla leswaku Eliya a nga titwi na a li yexe? Yehovha a yendle swilo swimbirhi. Xa ku sungula, a byele Eliya swaku a langa Elixa swaku a va muprofeta lweyi hi ku famba ka nkama a a ta pfala ndhawu ya yena. Phela Elixa a ve munghanu a tlhela a va mupfunisi wa Eliya ku ringana malembe ya manyingi, leswo swi mu tiyisile hintamu Eliya. Xa wumbirhi, Yehovha a mu byele mhaka ya ku tsakisa hintamu. Yehovha a te: “Na ha ni 7.000 wa Vayisrayele, lava kalaka va nga khizamanga va gandzela Bali ni lava kalaka va nga mu bejaranga.” (1 Tih. 19:18) Eliya a a nga li yexe! Ku tiva leswaku ku ni Vayisrayele va vanyingi lava kalaka va nga mu gandzelanga Bali, swi mu tiyisile Eliya. Phela Vayisrayele lavayani, a va swi lava hintamu swaku Eliya a tama a yendla ntirho wa yena hi ku hiseka a tlhela a va xikombiso xaxinene ka vona ka masiku lawayani ya ku karhata. Eliya a tiyisiwe hintamu hi marito wolawo ya Yehovha, lakakuva ingi Yehovha a yo vulavula na yena hi ku kongoma.

24, 25. a) Hi nga li twisa ku yini ‘rito la ku rhula leli twalelaka hansi’ la Yehovha namuntlha? b) I mpsini swi hi tiyisekisaka swaku Eliya a pfumelile ku tiyisiwa hi Yehovha?

²⁴ Ku fana na Eliya na hina swi nga yendleka hi hlamala hintamu loko hi vona matimba lawa ntumbuluku wu nga na wona. Leswo swa twisiseka, hikusa ntumbuluku wu ma kombisa kahle matimba lawa Yehovha a nga na wona. (Rom. 1:20) Yehovha wa ha swi lava ku tirhisa matimba ya yena yamakulu swaku a pfuna vanhu va yena va ku tshembeka. (2 Tik. 16:9) Kambe Yehovha a vulavula na hina hi ku tirhisa Rito la yena ku nga Bibele. (Lerha Esaya 30:21.) A Bibele li nga fanisiwa ni “rito la ku rhula leli a li twalela hansi” loko hi li pfumelela swaku li hi kongomisa namuntlha. Phela hi ku tirhisa Bibele, Yehovha wa hi lulamisa, a hi tiyisa a tlhela a hi tiyisekisa swaku wa hi rhandza.

²⁵ Ku nga va swaku Eliya a pfumelile ku tiyisiwa hi Yehovha ka Ntshava ya Horebi? Ina. Hi nkamanyana muprofeta lweyi wa ku tiya, wa ku tshembeka lweyi a nga lwa ni wugandzeli la mavunhwa a swi kotile ku tlhela a tirhela Yehovha ni ku basopisa vanhu swaku va tshika ku gandzela swikwembu swa mavunhwa. Kutani na hina, loko hi ma nyika lisima Matsalwa hi ta swi kota ku ‘tiyisiwa’ naswona hi ta tekelela lipfumelo la Eliya. — Rom. 15:4.