Makhombo Manharhu Ya Ku Sungula

Nkama Vayisrayele a va li Gibita a va li swikravhu naswona a va sindzisiwa ku tirha. Se leswaku Yehovha a pfuna vanhu va yena a rhume Moxe na Aroni va ya byela Faru va ku:

— Tshika vanhu va mina va famba, ni lava leswaku va ya ni gandzela amananga.

Kambe leswi Faru a a tibyela a a nga lavi ku yingisa leswi Yehovha a nga swi vula, yena a te:

— I mani Yehovha wa kona swaku ni mu yingisa, ni za ni tshika Vayisrayele va famba?

Leswi Faru a a kwate hintamu a yendle swaku Vayisrayele va tirha hintamu. Se i yini leswi Yehovha a nga swi yendla? A yendle leswaku ku va ni 10 wa swilo swa ku chavisa aGibita, leswi vitaniwaka makhombo. Yehovha a byele Moxe a ku:

— Famba ka Faru u ya mu byela swaku leswi a kalaka a nga lavi ku tshika vanhu va mina va famba, mati ya Riyu Nilu ma ta txintxa ma va ngati.

Se Moxe a suka a ya vulavula na Faru, se Aroni a tlakusa nhonga a ba mati lawa a ma li ka Riyu Nilu, mati hinkwawu ma txintxa ma va ngati, ma sungula ku nun’hwa ni tihlampfi leti a ti li ka riyu ti sungula ku fa. Lelo ku ve khombo la ku sungula aGibita. Vagibita a va nga ha gwenti ku phuza mati lawa a ma li ka Riyu Nilu. Hambileswo Faru a nga va tshikanga Vayisrayele va famba. Loko se ku hundze vhiki lin’we, Yehovha a tlhele a byela Moxe a ku:

— Famba u ya vulavula na Faru u mu byela swaku loko a nga tshiki vanhu va mina va famba, aGibita ku ta tala hi makhutla.

Faru a nga lavanga ku swi yingisa leswi Yehovha a nga swi vula, se Aroni a tlakuse nhonga ya yena ku gama ku tala hi makhutla. Phela a ma li ka tindhawu hinkwatu, lomu tindlwini, mubedwini ni ka matijela. Nkama Faru a nga vona leswo a byele Moxe a ku:

— Ni kombela leswaku mi ni kombelela ka Yehovha swaku a ni susela makhutla lawa, mina ni vanhu va mina. Ni ta mi tshika mi famba.

Se Yehovha a yendla swaku makhutla hinkwawu ma fa, se aGibita hinkwaku ku nun’hwa. Vagibita va hlengeleta makhutla ya manyingi. Kambe Faru a tlhele a yala leswaku Vayisrayele va famba.

Yehovha a tlhela vulavula na Moxe a ku:

— Byela Aroni a tlakusa nhonga ya yena a ba misava, wuthulu hinkwalu li ta txintxa li va tinsuna.

Se Aroni a yendla leswi Moxe a nga mu byela swona se ku va ni tinsuna ta tinyingi ka tiko hinkwalu la Gibita. Nkama lowu Vagibita va nga vona leswo, va byela Faru va ku:

— Phela leswi swi yendleka hi matimba ya Xikwembu.

Kambe yena a tama a yala swaku Vayisrayele va famba.