Vadjondzisiwa Va Yamukela Moya Wa Ku Kwetsima

Loko se ku hundze 10 wa masiku na Yesu a tlhelelile atilweni, vadjondzisiwa va yena va yamukele moya wa ku kwetsima. Hi lembe la 33 vanhu va vanyingi a va yile aYerusalema, leswaku va ya tlangela a fexta la Pentekoxta. Kolomuyani ka 120 wa vadjondzisiwa va Yesu a va tlhanganile ka yindlo, se na va nga swi nyimelanga, ku yendleke nchumu wa ku hlamalisa. Ku sungule ku twala guwa lalikulu la moya, lowu nga tata yindlo hinkwayu, se ku gama ku humelela minchumu ya ku fana ni ndzilu henhla ka tinhloko ta vadjondzisiwa hinkwavu. Se hinkwavu va sungule ku vulavula tirimi ta ku hambanahambana.

Lava a va yendzele aYerusalema va li twile guwa leli a li twakala, se va tlhanganile leswaku va vulavula hi swona. Vona va hlamale hintamu loko va vona vadjondzisiwa na va vulavula hi lirimi la vona. Va game va ku:

— Vanhu lava i va le Galileya. Se va swi kotisa ku yini ku vulavula lirimi la hina?

Se Pedru ni vapostolo van’wani va fambe va ya tlhangana ni xitshungu. Pedru a byele vanhu hi leswi Yesu a a fise xiswona ni leswaku Yehovha a a mu pfuxile. Yena a tlhele a ku:

— Swoswi Yesu a le tilweni ka tlhelo la Xikwembu. Funtshi a le ku hi nyikeni ka moya wa ku kwetsima lowu a nga hi tshembisa wona. Hi yona mhaka leyi n’wina mi vonaka swilo leswi swa ku hlamalisa.

Leswi Pedru a nga swi vula swi va khumbe hintamu vanhu lavayani. Se va mu vutisile swaku a va fanele va yendla yini. Pedru a te:

— Tisoleni, ka swilo swa ku biha leswi mi nga swi yendla, mi tlhela mi tsakamisiwa hi vito la Yesu, se na n’wina mi ta yamukela moya wa ku kwetsima.

Hi siku leliyani, 3.000 wa vanhu va tsakamisiwile. Ku sukela ka siku leliyani, vadjondzisiwa aYerusalema va ye va tala hintamu, se hi ku pfuniwa hi moya wa ku kwetsima a mabandla ma ye ma tala. Vapostolo va djondzise vanhu swilo hinkwaswu leswi Yesu a a va rhumile leswaku va swi djondzisa.