Mareferensiya Ya Xibukwana Xa Mintlhanganu Ya Mahanyelo Ni Ntirho
© 2024 Watch Tower Bible and Tract Society of Pennsylvania
6 KU YA KA 12 KA MAIO
XUMA XI NGA KA RITO LA XIKWEMBU TIPISALEMA 36-37
“U Nga Kwati Hi Mhaka Ya Lava Yendlaka Swa Ku Biha”
Murindzi 04/17 paj. 10 par. 4
I Yini Leswi Nga Ta Kala Swi Nga Ha Li Kona Loko Mfumu Wa Xikwembu Wu Ta Fuma Misava?
4 A mahanyelo ya vanhu va misava leyi ma hi khumbisa ku yini? Loko mupostolo Pawulo a vule swaku ka masiku lawa hi hanyaka ka wona a ku ta fika “minkama ya ku karhata leyi swi tikaka ku hanya ka yona,” a tlhele a vula leswi: “Vanhu va ku biha ni vakanganyisi va ta tama va yengetela ku biha swinene.” (2 Tm. 3:1-5, 13) Wena ke, indjhe wa swi vona swilo leswi na swi yendleka namuntlha? Ku tala ka hina se hi hluphiwile hi mabandidu, hileswi vanhu va nga ni xikheto kumbe hi vanhu van’wani lava va rhandzaka ku va yendla swa ku biha vanhu van’wani. Phela van’wani va vanhu volavo va tolovela ku fihla leswi va nga tshamisa xiswona, kasi a van’wani hambi hi ku swi fihla a va ha swi fihli. Hambiloko vanhu volavo lava va va yendlaka swa ku biha vanhu van’wani va nga hluphanga hina hi ku kongoma, a leswi va swi yendlaka swa hi khumba. Phela ha vaviseka loko hi twa swaku a swivanani, vanhu lava nga guga kumbe vanhu van’wani lava swi va karhatelaka ku tivhikela, va hluphiwile hi vanhu lava. Hikusa leswi va swi yendlaka a swi twisiseki; phela va yendla swilo ingi hiloko vo va swiharhi kumbe madimoni. (Yak. 3:15) Kambe lexi tsakisaka hileswaku Bibele li ni mahungu ya ku tsakisa!
Murindzi 06/22 paj. 10 par. 10
Yehovha Wa Va Katekisa Lava Rivalelaka
10 Ku veketela xiviti swi ta hi vavisa. Xiviti xi fana ni xidjumba naswona Yehovha a lava swaku hi xi rhula xidjumba lexo swaku hi hanya na hi pepile. (Lerha Vaefeza 4:31, 32.) A hi byela swaku hi “tshika ku veketela xiviti ni ku kwata”. (Pis. 37:8) Ku yingisa marito lawa swi pfuna hina hikusa ku veketela xiviti swi nga hi kokela mavabyi. (Swi. 14:30) Loko hi veketela xiviti a hi nga ta vavisa lweyi hi nga mu kwatela. Hikusa leswo swi fana ni ku nwa vhenenu, li ta vavisa hina. Loko hi rivalela van’wana hi vhikela miri wa hina. (Swi. 11:17) Hi ta rhula ka mbilu ya hina, hi tlhela hi tama hi tirhela Yehovha na hi tsakile.
Murindzi 01/12/03 paj. 13 par. 20
“Kuma Ku Tsaka Kakukulu Ka Yehovha”
20 Phela “lava ku rhula va ta tshama misaveni.” (Tipisalema 37:11a) Kasi i vamani ‘vanhu va ku rhula’? A rito leli nge “ku rhula” li ta hi ka rito lin’wani leli li vulaka “ku hluphiwa, ku tiveka hansi ni ku danisiwa.” Phela vanhu va ku rhula, hi ku tiveka hansi va nyimela swaku ku va Yehovha lweyi a nga ta lulamisa swikarhatu leswi swi va hluphaka. Vanhu volavo “va ta tsaka hintamu hikusa ku ta va ni ku rhula kakukulu.” (Tipisalema 37:11b) Phela hambi swoswi hi ni ku rhula kakukulu ndzeni ka ndjangu wa Yehovha, ku nga bandla la Wukreste.
Lavetela Xuma Ka Rito La Xikwembu
Perspicaz vol. 2 paj. 410
Ntshava
A yi tsekatsekisiwi, yi tshama yi li kona naswona yi tlakukile. Loko ku vulavuliwa hi tintshava ku vuliwa swaku tona a ti tsekatsekisiwi naswona ti tshama ti li kona. (Esa 54:10; Hab 3:6; vona ni Ps 46:2.) Se loko mupisalema a vula swaku ku lulama ka Yehovha ku fana ni “tintshava ta Xikwembu” (Ps 36:6), swi nga yendleka a a lava ku hlaya swaku Yehovha a tshama na a lulamile minkama hinkwayu. Naswona leswi tintshava ti nga tlakuka, swi nga yendleka mupisalema a a lava ku hlaya swaku ku lulama ka Yehovha i kukulu hintamu ku tlula ka vanhu. (Vona ni Esa 55:8, 9.) Buku la Nhlawutelo 16:20, loko li vulavula hi ku chululiwa ka tijela la wu 7 la ku kwata ka Xikwembu li li: “Ku tlhele ku nyamalala ni . . . tintshava.” A marito lawa ma lava ku kombisa swaku hambi hi swilo leswi nga tlakuka swinene ku fana ni tintshava a swi nga ta swi kota ku pona loko Yehovha a ta chulula ku kwata ka yena. — Vona ni Yer 4:23-26.
13 KU YA KA 19 KA MAIO
XUMA XI NGA KA RITO LA XIKWEMBU TIPISALEMA 38-39
Tshika Ku Titwa Nandzu Ku Tlula Mpimu
Murindzi 11/20 paj. 27 mapar. 12-13
Pimisa Hi Minkateko Ya Nkama Lowu Taka
12 Lerha 1 Yohane 3:19, 20. Minkama yin’wana hinkwerhu hi nga ha titwa nandzu. Hi xikombiso, vanhu van’wana va titwa nandzu hi leswi va nga swi yentxa na va nga se djondza ntiyiso. Kasi van’wana va titwa nandzu hi leswi va nga swi yentxa na se va tsakamisiwile. (Rhom. 3:23) I ntiyiso swaku hi lava ku yentxa swilo swa swinene, kambe ‘hinkwerhu hi ni swihoxo leswotala’. (Yak. 3:2; Rhom. 7:21-23) Hambileswi hi kalaka hi nga swi rhandzi ku titwa nandzu, minkama yin’wana swi nga hi pfuna. Hi mhaka muni? Hikusa ku titwa nandzu swi yentxa munhu a lunghisa swihoxo swa yena a tlhela a tinyimisela ku kala a nga ha phindi leswi a nga swi yentxa. — Hev. 12:12, 13.
13 Minkama yin’wana hi nga ha titwa nandzu ku tlula mpimu. Leswo swi vula ku titwa nandzu hambiloko se hi tisolile ka swidjoho swa hina naswona Yehovha a hi rivalelile. Phela ku titwisa xileswo a hi swinene. (Pis. 31:10; 38:3, 4) Hi mhaka muni swi nga li swinene? Vona xikombiso xa makwerhu mun’wana wansati lweyi a a titwa nandzu hi swidjoho swa yena swa khale. A te: “Ni vona swaku ku yentxa minchumu ya yinyingi ka ntirho wa Yehovha a swi pfuni nchumu hikusa a ni nga ta ponisiwa.” Vanhu vanyingi va titwa ku fana ni makwerhu lweyi. Hi mhaka leyo, hi fanele hi tivonela swaku Sathana a nga hi phasi hi ntlhamu lowu wa ku titwa nandzu ku tlula mpimu, hikusa Sathana wa tsaka loko hi tshika ku tirhela Yehovha, hi khohlwa swaku Yehovha wa ha tama a hi rhandza. — Fananisa ni 2 Vakorinto 2:5-7, 11.
Murindzi 15/11/02 paj. 20 mapar. 1-2
Hi Nga Yendla Yini Swaku Masiku Ya Hina Ma Va Ya Lisima Ka Yehovha?
A MASIKU lawa hi hanyaka wona i matsongo naswona ma hundza hi ku kahlula. Loko a pimisa hi leswo, mupisalema Davhida a game a khongela ka Yehovha a ku: “Yehovha Xikwembu xa mina, ni pfuni ni tiva swaku ni ta gamisa ku yini, ni tiva ni masiku ya mina, swaku ni ta tiva ku leha ka wutomi la mina. Phela u ni nyike masiku yamatsongo; masiku ya wutomi la mina a hi ya nchumu ka wena.” Phela lexi Davhida a a xi lava a ku li ku tsakisa Yehovha hi leswi a swi vulaka ni leswi a swi yendlaka. Leswaku Davhida a kombisa swaku a a mu tshemba hintamu Yehovha a game a vula leswi: “Hi wena ntsena ntshembo wa mina.” (Ps. 39:4, 5, 7) Yehovha a xi yingisile xikhongelo xa Davhida funtshi a ma vonile masiku ya Davhida ya ku hanya ni mintirho ya yena hinkwayu a tlhela a mu katekisa hi mhaka ya leswo.
Swi vevuka hintamu ku tshama na hi khomekile hi ku va ni mintirho ya yinyingi ya ku va hi yi yendla, naswona minkama yin’wani hi nga ha karhateka hi ku tiva swaku hi ni minchumu ya yinyingi ya ku yi yendla kambe nkama wa kona wa ku yi yendla i wutsongo. Kambe ku fana na Davhida, hi fanele hi karhateka hintamu hi ku va hi hanya hi ndlela leyi nga ta tsakisa Yehovha Xikwembu. Leswo i swa lisima hikusa Yehovha a kambisisa mun’wani ni mun’wani wa hina. Yobo lweyi a nga hanya kolomuyani ka 3.600 wa malembe lawa ma nga hundza, a vule leswaku Yehovha a a kambela ndlela leyi a a hanya hi yona ni hinkwaswu leswi a a swi yendla. Yobo a tivutisile a ku: “Se ni nga yendla yini loko Xikwembu xi ni vutisa? Ni ta ku yini loko xi lava ku hlamuliwa?” (Yob. 31:4-6, 14) Phela hi nga yendla leswaku masiku ya hina ma va ya lisima ka Yehovha hi ku va hi rhangisa wunghanu la hina na yena, hi yingisa minawu ya yena hi tlhela hi wu tirhisa kahle nkama wa hina. Hi nga swi yendlisa ku yini leswo?
Pfuxeta Wunghanu La Wena Na Yehovha
Minkama hinkwayu khongela ka Yehovha. Papayi wa wena Yehovha wa swi twisisa swaku leswi u titwaka nandzu swi nga ku karhatela ku vulavula na yena hi xikhongelo. (Rom. 8:26) Hambileswo, ‘u nga tshiki ku khongela,’ byela Yehovha swaku u swi lava hintamu ku tlhela u va munghanu wa yena. (Rom. 12:12) Andre a vula leswi: “A swi ni yentxa ni titwa nandzu swi tlhela swi ni danisa ku khongela, kambe loko se ni khongelile ni game ni titwa kahle ni tlhela ni rhula.” Loko u nga swi tivi leswi u nga ta swi hlaya loko u khongela, kambisisa swikhongelo leswi nga yentxiwa hi Hosi Davhida nkama a nga tisola, leswi nga ka Tipisalema ndzima 51 ni 65.
Lavetela Xuma Ka Rito La Xikwembu
Murindzi 09/22 paj. 13 par. 16
Kombisa Swaku Wa Tshembeka
16 Ku tikhoma i swa lisima loko hi lava swaku van’wana va hi tshemba. Ku tikhoma ku ta hi pfuna swaku hi pfala nomo loko hi ringeka ku vula mhaka ya xihundla. (Lerha Swivuriso 10:19.) Swi nga ha karhata ku tikhoma nkama lowu hi tirhisaka ma redes sociais. Loko hi nga tivoneli, hi nga ha tikuma hi byeletele vanhu va vanyingi mhaka leyi nga xihundla. Phela loko hi posa rungula ka ma redes sociais a hi swi tivi swaku vanhu va ta yentxa yini hi lona ni swikarhatu leswi rungula lolelo li nga hi tiselaka swona. Ku tikhoma ku ta tlhela ku hi pfuna swaku hi miyela loko lava va hi nyenyaka va hi sindzisa ku vula swilo leswi nga vekaka vamakwerhu nghozini. Leswo swi nga ha yentxeka loko mimfumu yi zama ku hi yentxa swivutiso ka matiko lawa ntirho wa hina wu tsimbisiwaka. Se, ka swiyimu swa ku fana ni leswi, i swa lisima ku va hi “pfala nomo”. (Pis. 39:1) Hi fanele hi zama ku tshembeka ka vanhu hinkwavu ku nga na mhaka swaku i maxaka, vanghanu, vamakwerhu kumbe vanhu van’wana. Kambe leswo swi ngo koteka ntsena loko hi tikhoma.
20 KU YA KA 26 KA MAIO
XUMA XI NGA KA RITO LA XIKWEMBU TIPISALEMA 40-41
Hi Mhaka Muni Hi Fanele Hi Pfuna Van’wani?
Murindzi 08/18 mapaj. 19-20 mapar. 16-18
Va Tsaka Lava Hananaka
16 Vanhu lava hananaka ava nyimeli kuhakeliwa hi leswi vaswi yendlaka. Yesu a te: “Loko unyikela nkhuvu wa xifihlulo kumbe wa xilalelo . . . rhamba svisiwana, svilima, lava vakhutaka ni svifamahlo”. (Luka 14:13, 14) Bibele li tlhela li vula leswi: “Munhu lweyi ahananaka atakatekisiswa”. Li tlhela li ku: “Watsaka mun’wana ni mun’wana lweyi ayanakanyelaka wa xiyimo xa le hansi”. (Swivuriso 22:9; Tipisalema 41:1) Kunavela kupfuna van’wana hi kona kufaneleke kuhi susumetela kuhanana.
17 Loko Pawulo a tshahe marito ya Yesu lamange “kunyika i nkateko lowukulu kutlula kunyikiwa”, a angavulavuli hi kunyika swilo leswi vonekaka ntsena. Hingaha nyika xikhutazo kumbe ndzayu ya le Bibeleni. Hingaha yendla swokarhi kupfuna van’wana. (Mintirho 20:31-35) Leswi Pawulo aswi vuleke ni leswi aswi yendleke swihi djondzisa lisima la kurhandza ni kukhatala hi van’wana ni kutirhisa nkama ni ntamu wa hina leswaku hiva pfuna.
18 Vakambisisi lava djondzaka ta matshamela ya vanhu va tsumbule leswaku kuhanana swi yendla munhu a tsaka. Hikuya hi buku lin’wana, vanyingi va vula leswaku va tsaka swinene loko va nyika van’wana swilo. Vakambisisi van’wana va vula leswaku kupfuna van’wana swi yendla wutomi la hina liva ni xikongomelo. Vativi van’wana va hlamusela leswaku lava yendlaka mintirho ya kutirhandzela va ni lihanyu lelinene naswona va tshama va tsakile. Hinkwaswo leswi vativi lava vaswi tsumbuleke aswihi hlamalisi nikatsongo hikusa Yehovha, muvumbi wa hina wa lirhandzu, se ahi byelile leswaku kuhanana swi tisa ntsako. — 2 Timotiya 3:16, 17.
Murindzi 15/12/15 paj. 24 par. 7
Yehovha A Nga Ta Ku Tshika Loko U Vabya
7 Loko hi vabya, hi nga kombela Yehovha swaku a hi tiyisa, a hi nyika wutlharhi a tlhela a hi pfuna, ku fana ni malandza ya yena ya khale. Davhida a vule leswi: “Wa tsaka lweyi a pimiselaka xisiwana; Yehovha a ta mu ponisa hi siku la khombo. Yehovha a ta mu hlayisa a hanya.” (Ps. 41:1, 2) Phela a vanhu va nkameni wa Davhida lava va nga pfuna swisiwana, va game va fa. Se leswo swi kombisa swaku hi marito lawa, Davhida a a nga lavi ku vula leswaku a vanhu lava a va pfuna swisiwana Yehovha a a ta va ponisa hi singita, a va nyika wutomi la ku kala li nga heli. Kambe marito lawa ma kombisa swaku Yehovha a a ta va pfuna vanhu volavo lava a va kombisa wunene. A a ta swi yendlisa ku yini? Davhida a te: “Yehovha a ta mu pfuna loko a vabya; a ta mu hlayisa loko a vabya.” (Ps. 41:3) Munhu lweyi a vabyaka a nga tiyiseka swaku Yehovha a nga swi khohlwanga swilo swaswinene leswi a nga swi yendla naswona a nga ma khohlwanga mahanyelo ya yena yamanene. Funtshi swa tiyisa ku tiva swaku Yehovha a yendle muzimbha wa munhu na wu kota ku tihanyisa loko a vabya.
Murindzi 09/17 paj. 12 par. 17
Tekelela Ntwelawusiwana Wa Yehovha
17 Minkateko leyi vaka kona loko hi va twela wusiwana vanhu van’wani a hi yona ntsena leyi faneleke yi hi yendla hi va twela wusiwana vanhu van’wani. Phela xa lisima lexi xi faneleke xi hi yendla hi va twela wusiwana vanhu, hileswi hi lavaka ku tekelela Yehovha hi tlhela hi mu dzunisa. (Swiv. 14:31) Yehovha i xikombiso xaxikulu xa lirhandzu ni ku kombisa ntwelawusiwana ka van’wani, se hina hi lava ku yendla hinkwaswu leswi hi nga swi kotaka swaku hi mu tekelela. Phela loko hi tekelela Yehovha hi ta va twela wusiwana vamakwerhu va hina hi tlhela hi hanyisana kahle ni vanhu hinkwavu. — Gal. 6:10; 1 Yo. 4:16.
Lavetela Xuma Ka Rito La Xikwembu
Perspicaz vol. 2 paj. 49
Yehovha
Xikhongelo xa Davhida lexi xi kumekaka ka Tipisalema 40:5-10 xi vulavula hi ku kwetsimisiwa ka vito la Yehovha. Phela Bibele hinkwalu li vulavula hi ku lweliwa ka wuhosi la Yehovha. Leswo swi kombisa leswaku a nchumu xa lisima hintamu ka Yehovha Xikwembu i ku kwetsimisiwa ka vito la yena. Leswo swi vula ku basisa vito la Xikwembu ka mavunhwa hinkwawu lawa va nga xi hembela. Kambe nchumu xin’wani xa lisima, ku laveka leswaku a vito la Xikwembu li dzunisiwa li tlhela li voniwa na li kwetsima atilweni ni lani misaveni. Leswo swi vula swaku hinkwavu va fanele va hlonipha leswaku Yehovha hi yena Hosi Leyikulu hi ku swi rhandza va tlhela va mu tirhela hileswi va mu rhandzaka. — Heb 10:5-10.
27 KA MAIO KU YA KA 2 KA JUNHO
XUMA XI NGA KA RITO LA XIKWEMBU TIPISALEMA 42-44
Tirhisa Leswi Yehovha A Ku Djondzisaka Swona
Murindzi 01/06/06 paj. 9 par. 4
Tipontu Ta Lisima Ta Buku La Tipisalema
42:4, 5, 11; 43:3-5. Loko u tshuka u kumana ni swiyimu leswi sindzisaka swaku u va kule ni vamakwerhu abandleni swa nkamanyana, ku khumbuka ntsaku lowu a wu li na wona nkama lowu a wu li ni vamakwerhu swi nga ku pfuna. Nhambileswi ku tshamela ku khumbukela minkama yoleyo ya ku tsakisa swi nga ku yendlaka u titwa na u li wexe; ku yendla leswo swi nga tlhela swi ku pfuna ku va u khumbuka swaku Yehovha i Muponisi wa hina ni swaku hi fanele hi nyimela yena leswaku a hi pfuna.
Murindzi 15/01/12 paj. 15 par. 2
U Nga Yendla Yini Swaku Djondzo Ya Wena Ya Bibele Yi Tsakisa Yi Tlhela Yi Ku Pfuna?
1 XIKHONGELO: Nchumu xa ku sungula lexi u faneleke u xi yendla i ku hamba xikhongelo. (Ps. 42:8) Hi mhaka muni leswo swi li swa lisima? I swa lisima hikusa a ku djondza Bibele i nchumu wa lisima hintamu ka ku gandzela Yehovha. Se i swa lisima kuva hi kombela Yehovha swaku a hi pfuna hi lulamisela mimpimiso ya hina leswaku hi twisisa leswi hi nga ta swi djondza a tlhela a hi nyika moya wa yena wa ku kwetsima leswaku wu hi pfuna ku twisisa. (Luk. 11:13) Makwerhu Barbara lweyi i nga khale na a li misiyonariya a vule leswi: “Minkama hinkwayu ni rhanga hi ku khongela na ni nge se djondza Bibele. Loko ni yendle leswo, na swi vona swaku Yehovha a na mina hi nkama lowuyani naswona wa swi tsakela leswi ni swi yendlaka.” Ku hamba xikhongelo loko hi lava ku djondza Bibele, swi pfula mimpimiso ya hina ni mbilu ya hina leswaku yi swi yamukela hi ku helela swilo leswi hi swi djondzaka hi nkama wolowuyani.
Murindzi 09/16 paj. 5 mapar. 11-12
“Mavoko Ya Wena Ma Nga Tshuki Ma Hela Matimba”
11 Yehovha a hi tiyisa a tlhela a hi djondzisa hi ku tirhisa mintlhanganu ya bandla, masembleya, makongresu ni swikola swa nhlengeletanu. Leswi hi swi djondzaka ka tindhawu leti swi hi pfuna ku tama hi mu tirhela hileswi hi mu rhandzaka, hi tlhela hi tivekela swilo leswi hi nga swi yendlaka ka nhlengeletanu ya yena ni ku yi yendla kahle mintirho leyi hi nga na yona ka nhlengeletanu ya Yehovha. (Ps. 119:32) Yehovha a tirhisa swilo leswi hinkwaswu leswaku a hi tiyisa. Se wena ke, wa swi nyika lisima leswi Yehovha a swi tirhisaka swaku a hi djondzisa ni ku hi tiyisa?
12 Yehovha a pfune Vayisrayele swaku va hlula Vaamaleke ni Vaetiyopiya, naswona a nyike Nehemiya ni Vayuda van’wani matimba leswaku va swi kota a ku yaka mimuru ya Yerusalema anze va yi heta. Hilani ku fanaka, Yehovha a ta hi nyika matimba swaku hi lwisana ni ku xanisiwa, ku vilela ni loko vanhu va nga lavi ku twa nchumu loko hi va byela mahungu ya ku tsakisa. (1 Pe. 5:10) Phela Yehovha a nga ha yendli masingita namuntlha, kambe a nyimela leswaku mun’wani ni mun’wani wa hina a yendla xanchumu; ku nga ku lerha Bibele siku ni siku, ku lunghiselela mintlhanganu hi tlhela hi va kona ka yona vhiki ni vhiki, hi hamba djondzo ya Bibele ya munhu hi yexe, wugandzeli la ndjangu hi tlhela hi khongela ka yena minkama hinkwayu; naswona hi mu tshemba hi ku helela. Phela Yehovha a tirhisa minchumu leyo leswaku a hi tiyisa a tlhela a hi yendla hi tsaka. Kambe a hi fanelanga hi tshuka hi pfumelela nchumu xin’wani kumbe mintirho yin’wani yi hi phazamisa a ku yendla minchumu yoleyo, ku nga minchumu leyi Yehovha a yi tirhisaka swaku a hi pfuna leswaku hi tama hi tiya. Loko hi tshuka hi tsumbula leswaku a mavoko ya hina ma hele ntamu ka nchumu xin’we ka leswi Yehovha a hi pfunaka hi swona, hi fanele hi kombela Yehovha leswaku a hi nyika moya wa yena wa ku kwetsima lowu nga ta hi pfuna leswaku hi va ni ‘ku navela ni matimba ya ku yendla hinkwaswu leswi a swi lavaka.’ (Filp. 2:13) Kambe hi nga yendla yini leswaku hi tiyisa mavoko ya van’wani?
Lavetela Xuma Ka Rito La Xikwembu
Perspicaz vol. 1 paj. 479
Mbyana Ya Khwati
Ka Bibele, minkama yin’wani loko ku vulavuliwa hi mbyana ya khwati ku va na ku fanekiseliwa a nchumu wun’wani. Hi xikombiso, loko Yobo a vulavula hi xiyimu xa ku kala xi nga tsakisi lexi a a li ka xona hileswi a a kumana ni swikarhatu, a vule swaku a a fana ni “makwavu wa timbyana ta khwati.” (Yob 30:29) Na yena mupisalema, nkama lowu a nga vula marito lawa ma nge “u ni pfotlosile ka ndhawu leyi ku tshamaka timbyana ta khwati,” swi nga yendleka a a vulavula hi ndlela ya ku vavisa leyi vanhu va Xikwembu va nga hluliwa hi yona anyimpini, lani a timbyana ta khwati a ti tlhangana leswaku ti dla mintsumbu ya vanhu. (Ps 44:19; vona ni Ps 68:23.) A ku rhendzeliwa ka doropa la Yerusalema hi Babilona hi lembe la 607 A.E.C., swi yendle leswaku ku va ni ndlala yayikulu aYerusalema, leswi nga yendla swaku vamamani va va khoma hi ndlela ya ku biha hintamu vana va vona. Se ka mhaka leyi, Yeremiya a vule leswaku a mona lowu vanhu va Yehovha a va li na wona a wu li wukulu hintamu lakaku hambi hi timbyana ta khwati a ti yampsa. — Swir 4:3, 10.
3 KU YA KA 9 KA JUNHO
XUMA XI NGA KA RITO LA XIKWEMBU TIPISALEMA 45-47
Lisimu La Muchadu Wa Hosi
Murindzi 15/02/14 mapaj. 9-10 mapar. 8-9
Kulungela Muchadu Wa Xinyempfani
8 Lerha Tipisalema 45:13, 14a. Ka ndzimana leyi, mutekiwa a tlhamuseliwa na a ‘sasekile hintamu’ leswaku a chada ni Xinyempfani. Ka Nhlawutelo 21:2, mutekiwa a fanisiwa ni doropa la “Yerusalema wa Nyuwani” naswona a “tisasekisele nuna wa yena.” Doropa leli, la le tilweni li ni “ku phatima ka Xikwembu” ni ku phatima loku fanaka ni “ribye la lisima ngopfu ku fana ni ribye la jaxpe leli phatimaka ku fana ni vhidru.” (Nhl. 21:10, 11) Ku saseka ka Yerusalema wa Nyuwani ku tlhamuseliwa kahle ka buku la Nhlawutelo. (Nhl. 21:18-21) Se swa twala ku va mupisalema a vule swaku a mutekiwa a a “saseke hintamu.” Naswona swin’wani leswi yendlaka marito lawa ma twisiseka hileswaku a muchadu wa Xinyempfani ni mutekiwa wu ta yendliwa tilweni.
9 Mutekiwa a heleketiwa ka muteki, ku nga Kreste. Muteki a “lunghiselele mutekiwa hi ku mu basisa ni ku mu hlampsa hi mati na a tirhisa rito” leswaku a nga na “xivati.” (Efe. 5:26, 27) A wuprofeta leli li tlhela li tlhamusela mutekiwa na a yambale mpahla leyi fambisanaka ni muchadu. Leswo swa twala hikusa mutekiwa “a nyikiwe mpahla ya xiyimu xa le henhla, ya ku phatima yi tlhela yi basa leswaku a yi yambala, hikusa mpahla leyi yi fanekisela mintirho yayinene ya vakwetsimi.” A game a tekiwa a heleketiwa ka Hosi. — Nhl. 19:8.
Murindzi 05/22 paj. 17 mapar. 10-12
Li Ku Khumbisa Ku Yini Wuprofeta Leli Li Nga Ka Nhlawutelo?
10 Yehovha a ta yentxa yini loko a vona vanhu va yena va dumeliwa? Yena hi yexe a li: “Ni ta kwata hintamu.” (Ezek. 38:18, 21-23) Nhlawutelo ndzima 19 yi hi byela leswi nga ta gama swi yentxeka. Yehovha a ta rhuma N’wana wa yena Yesu swaku a vhikela vanhu va yena a tlhela a dlaya lava yentxaka minchumu ya ku biha. Yesu a ta lwa na a pfuniwa hi “masonchwa ya le tilweni” ku nga tintsumi ni lava va 144.000. (Nhla. 17:14; 19:11-15) A nyimpi ya Armajedoni yi ta gamisa ku yini? Yi to hela loko se ku dlayiwile hinkwavu lava yentxaka minchumu ya ku biha! — Lerha Nhlawutelo 19:19-21.
11 Pimisa hi leswi vanhu va ku tshembeka va nga ta titwisa xiswona loko va huluka nkama lowu Yehovha a nga ta helisa vanhu lava yentxaka swa ku biha! Phela swi ta tsakisa hintamu. Hambileswi ku nga ta tsakiwa atilweni nkama lowu Babilona wa Mukulu a nga ta helisiwa swa wugamu, leswi nga ta landzela swi ta yentxa swaku ku tsakiwa hintamu ku tlhela ku biwa ni minkulungwana. (Nhla. 19:1-3) Phela hi nkama wolowo ku ta va na ku yentxeka nchumu wa lisima hintamu, ku nga “muchadu wa Xinyempfana”. — Nhla. 19:6-9.
12 Muchadu wa Xinyempfana wu ta yentxeka nkama muni? Hinkwavu lava 144.000 va ta va tilweni na nyimpi ya Armajedoni yi nga se sungula, kambe wu ta va wu nga se fika nkama wa muchadu wa Xinyempfana. (Lerha Nhlawutelo 21:1, 2.) Muchadu wa Xinyempfana wu ta yentxeka loko nyimpi ya Armajedoni se yi helile, funtshi na vanhu lava yentxaka swa ku biha se va helisiwile. — Pis. 45:3, 4, 13-17
Perspicaz vol. 1 paj. 1099
Nyimpi
Nkama nyimpi ya Armajedoni yi nga ta hela, amisaveni hinkwayu ku ta va ni ku rhula ku ringana 1.000 wa malembe. Marito lawa ma nga ka buku la Tipisalema lawa ma vulaka swaku “[Yehovha] a ta helisa tinyimpi amisaveni hinkwayu, a tshova ligubu a tlhela a tshovelela ni tlharhi; a hisa tinyolo ta nyimpi hi ndzilu,” ma hetisekile hi khambi la ku sungula nkama Xikwembu xi nga tisa ku rhula aIsrayele hi ku va xi helisa matlharhi ya nyimpi ya valala. Loko Yesu se a ta va a hlule valala va yena ka nyimpi ya Armajedoni, ku ta va ni ku rhula ka ku helela amisaveni hinkwayu. (Ps 46:8-10) Phela lava va nga ta tikhorisa hi wutomi la ku kala li nga heli ku ta va vanhu lava va nga ta va va ‘txintxe swipada swa vona swi va swikomu, ni matlharhi ya vona ma va masikelo,’ va tlhela ‘va nga ha djondzeli ku lwa nyimpi,’ hikusa “Yehovha Murhangeli wa tintsumi a swi vulile.” — Esa 2:4; Mik 4:3, 4.
Lavetela Xuma Ka Rito La Xikwembu
Murindzi 04/17 paj. 11 par. 9
I Yini Leswi Nga Ta Kala Swi Nga Ha Li Kona Loko Mfumu Wa Xikwembu Wu Ta Fuma Misava?
9 Loko a nyimpi ya Armajedoni yi ta va se yi helile, ku ta va ni nhlengeletanu yin’wani leyi nga ta pfaleta mimfumu leyi nga kona swoswi. Hi vula leswo hikusa Bibele li li: “Hi ku ya hileswi a nga hi tshembisa swona, hi nyimele matilo ya nyuwani ni misava ya nyuwani lomu ku nga ta va ni ku lulama.” (2 Pe. 3:13) Loko ku vulavuliwa hi matilo ya khale, ku vulavuliwa hi mimfumu leyi nga kona swoswi leyi nga tala hi wukanganyisi; kasi a misava ya khale i vanhu lava fumiwaka hi mimfumu yoleyo. Phela swilo leswi swi ta helisiwa ka nyimpi ya Armajedoni, swi pfaletiwa hi “matilo ya nyuwani” ni “misava ya nyuwani.” A matilo ya nyuwani i mfumu wa nyuwani, kasi a misava ya nyuwani yona i vanhu lava va nga ta fumiwa hi mfumu wolowo wa nyuwani. Ka Mfumu wa Xikwembu lweyi a nga ta fuma ku ta va Yesu Kreste naswona a ta fuma hi ndlela yayinene hikusa a ta va a tekelela Papayi wa yena Yehovha lweyi i nga Xikwembu lexi yendlaka swilo hi ndlela yayinene ni hi nawu wa kona. (1 Ko. 14:33) Vanhu lava va nga ta fumiwa hi Mfumu wa Xikwembu va ta tshamiseka kahle naswona va ta hlayisiwa hi vavanuna va ku tshembeka lava va nga ta va va kongomisiwa hi Yesu. (Ps. 45:16) Leswaku vavanuna volavo va wu yendla kahle ntirho wa vona wa ku kongomisa vanhu va Xikwembu, va ta nyikiwa minkongomiso hi Yesu Kreste xikan’we ni vatotiwa lava 144.000 lava nga ta fuma na yena. Phela swi ta tsakisa hintamu loko hi ta hanya ka misava leyi kalaka yi nga ha na mimfumu leyi kanganyisaka vanhu!
10 KU YA KA 16 KA JUNHO
XUMA XI NGA KA RITO LA XIKWEMBU TIPISALEMA 48-50
Vapsali, Pfunani Vana Va N’wina Swaku Va Tshemba Nhlengeletanu Ya Yehovha
Murindzi 03/22 paj. 22 par. 11
Wugandzeli La Ntiyiso Li Ta Ku Yentxa U Tsaka
11 Hi gandzela Yehovha loko hi djondza Bibele hi tlhela hi djondzisa vana va hina. Yehovha a a byele Vayisrayele swaku hi Sabadu a va nga fanelanga va tirha, kambe a va fanele va tinyika nkama wa ku kulisa wunghanu la vona na Yehovha. (Ekso. 31:16, 17) Vayisrayele lava a va wu yingisa nawu lowo, a va tinyika nkama wa ku djondzisa vana va vona hi Yehovha va tlhela va va byela hi swilo swa swinene leswi a nga va yentxela swona. Na hina hi fanele hi tinyika nkama wa ku lerha hi tlhela hi djondza Rito la Xikwembu. Leswo na swona i ku gandzela Yehovha funtshi swi hi pfuna ku kulisa wunghanu la hina na yena. (Pis. 73:28) Nkama lowu hi vaka ni wugandzeli la ndjangu hi pfuna vana va hina swaku na vona va kulisa wunghanu la vona na Yehovha. — Lerha Tipisalema 48:13.
Murindzi 15/03/11 paj. 19 mapar. 5-7
Swa Fanela Leswaku U Tsaka
Leswaku mupisalema a kutxa Vayisrayele swaku va vona Yerusalema hi le kusuhi, a vule leswi: “Rhendzelekani ka doropa la Siyoni; kontelani maprediyu ya lona. Txuvukani makhumbi ya lona. Kambelani maprediyu ya lona, leswaku mi ta byela vanhu lava nga ta psaliwa.” (Ps. 48:12, 13) Pimisa hi ntsaku lowu mindjangu ya Vayisrayele a yi li na wona nkama lowu na yi yendza yi ya ka doropa la ku kwetsima swaku yi hamba mafexta ya lembe ni lembe yi tlhela yi vona tempele ya ku saseka. Phela ntsaku wolowo wu va yendle va kontarela vana va vona ni lava a va psaliwa hi minkama yoleyo ya ku tsakisa.
Pimisa hi hosi ya xisati ya le Xeba, leyi a ku sunguleni a yi nga kholwi leswi vanhu a va swi vula hi mfumu wa Solomoni ni swaku a a ni wutlharhi la ku hlamalisa. Se ina ka, i mpsini leswi nga yi yendla yi sungula ku kholwa swilo leswi yi nga swi twa? Yona yi te: “A ni swi kholwanga nkama va nga ni byela kambe se na kholwa leswi ni nga tivonela hi noxe.” (2 Tik. 9:6) Phela swilo leswi hi swi vonaka hi hoxe swi nga hi khumba hintamu swinene.
Vapsali va nga va pfunisa ku yini vana va vona swaku ‘va tivonela hi voxe’ swilo swa ku hlamalisa leswi yendliwaka ka nhlengeletanu ya Yehovha? Loko Betele li nga li kule hintamu ni lomu u tshamaka kona, u nga tshiki ku ya pfuxela. Hi xikombiso, Mandy na Bethany a va tshama kolomu ka 1.500 wa makilometru swaku va fika Betele la tiko la vona. Kambe vapsali va vona minkama hinkwayu a va hamba programa la ku ya pfuxela Betele nkama lowu tintombhi leti ta timbirhi a ta ha li titsongo hintamu. Tintombhi leti loko ti tlhamusela leswi a ti titwisa xiswona ti vula leswi: “Na hi nge se ya pfuxela Betele a hi pimisa swaku aBetele i ndhawu leyi yi nga tala hi minawu ya ku karhata funtshi a ko va ni vamadala ntsena. Kambe siku leli hi nga ya pfuxela, hi kume majovhem lawa a ma tirha hi matimba naswona a ma wu rhandza ntirho lowu a ma wu yendlela Yehovha. Hi vone swaku a vanhu lava nga ka nhlengeletanu ya Yehovha a hi lava va tshamaka lomu hi nga kona ntsena, funtshi ku ya pfuxela Betele makhambi ya manyingi swi hi pfune ku tinyimisela swaku hi tama hi mu tirhela hintamu Yehovha.” Ku swi vona hi kusuhi leswi nhlengeletanu ya Yehovha yi tirhisaka xiswona, swi pfune Mandy na Bethany swaku va va vapfuli va ndlela; naswona hi ku famba ka nkama va rhambiwile leswaku va ya pfunisa Betele.
Murindzi 15/08/12 paj. 12 par. 5
“Tikhomeni Hi Ndlela Leyi Fanelaka Mahungu Ya Ku Tsakisa Ya Kreste”
5 Ku djondza hi nhlengeletanu ya Yehovha. Loko munhu a lava ku lumba tiko la mfumu wun’wanyani swi nga yendleka swi lava a rhanga hi ku djondza hi xitoriya xa mfumu wolowo. Swa fana ni Mfumu wa Xikwembu; lava lavaka ku lumba a Mfumu wa Xikwembu va fanele va djondza hi swilo hinkwaswu leswi fambisanaka ni Mfumu wa Xikwembu. Hi xikombiso, vana va Kora lava a va tirha aIsrayele wa khale a va ku rhandza hintamu Yerusalema lani a ku gandzeliwa kona Yehovha, naswona a va swi rhandza ku vulavula hi xitoriya xa doropa leliyani. Hambileswo leswi a swi va hlamalisa a ku nga li tiyindlo, kambe a ku li leswi ndhawu yoleyo ya ku gandzela Yehovha a yi nyimela swona. Phela Yerusalema a a li “doropa la Hosi Leyikulu” Yehovha, hikusa a ku li kona lani a va gandzela Yehovha kona. Hi kona lani a va djondza nawu wa Xikwembu naswona Yehovha a a va komba timpsalu vanhu lava a a va fuma. (Lerha Tipisalema 48:1, 2, 9, 12, 13.) Se wena ke, ku nga va leswaku ku fana na vona wa swi rhandza ku djondza u tlhela u byela vanhu van’wanyani hi nhlengeletanu ya Yehovha lani misaveni? Phela loko u ya u djondza hi nhlengeletanu ya Yehovha ni ndlela leyi Yehovha a yi seketelaka ha yona, a Mfumu wa Xikwembu wu ta va wa hikakunene ka wena, naswona u ta ya u swi navela hintamu ku chumayela mahungu ya ku tsakisa ya Mfumu wolowo. — Yer. 9:24; Luk. 4:43.
Lavetela Xuma Ka Rito La Xikwembu
Perspicaz vol. 2 paj. 859
Ku Ganya
Leswi se a va ganyile, a Vayisrayele a va ta tikhorisa hi swakudla ni byala leli a va li na lona; naswona tshomba la vona a li va vhikela leswaku va nga ha vi wusiwanini. (1Tih 4:20; Ekl 5:18, 19; Swiv 10:15; Ekl 7:12) Hambileswi ku va Vayisrayele va va li ni swilo swa swinyingi a swi fambisana ni ku rhandza ka Yehovha ni hileswi a va tirhile leswaku va kuma swilo swoleswo, Yehovha a tlhele a va basopisa swaku va nga khohlwi swaku hi yena a nga va pfuna leswaku va swi kuma swilo swoleswo ni swaku a va nga fanelanga va swi tshemba. (Vona ni Swiv 6:6-11; 20:13; 24:33, 34; Det 8:7-17; Ps 49:6-9; Swiv 11:4; 18:10, 11; Yer 9:23, 24.) Yehovha a tlhele a khumbukisa Vayisrayele swaku swilo leswi a va li na swona a swi li swa nkamanyana naswona a va nga ta swi kota ku swi tirhisa swaku va swi nyika Xikwembu kuva va kutsula munhu swaku a nga fi. (Swiv 23:4, 5; Ps 49:6, 7) Funtshi hambi hi vona a va ta fa va swi siya. (Ps 49:16, 17; Ekl 5:15) Yehovha a tlhela a va khumbukisa swaku a va nga fanelanga va li nyika lisima hintamu tshomba la vona, hikusa leswo a swi ta yendla leswaku va yendla minchumu leyi a yi ta yendla swaku Yehovha a nga va tsakeli. (Swiv 28:20; vona ni Yer 5:26-28; 17:9-11.) A Vayisrayele va tlhele va kutxiwa swaku va hlonipha Yehovha ‘hi minchumu ya vona ya lisima.’ — Swiv 3:9.
17 KU YA KA 23 KA JUNHO
XUMA XI NGA KA RITO LA XIKWEMBU TIPISALEMA 51-53
I Mpsini Leswi U Nga Swi Yendlaka Leswaku U Nga Yendli Swihoxo Swaswikulu?
Murindzi 01/19 paj. 15 mapar. 4-5
Ungayi Sirhelelisa Kuyini Mbilu ya Wena?
4 Ka buku la Swivuriso 4:23, a rito lelinge “mbilu” li yimela “leswi hinga swona hi le ndzeni” kumbe “munhu wa le xihundleni”. (Lerha Tipisalema 51:6.) Hi marito man’wana, li yimela mimpimiso ya hina, ndlela leyi hi titwaka ha yona, leswi hiswi navelaka ni leswi susumetelaka swiboho swa hina. Li yimela leswi hinga xiswona hi le ndzeni kunga li leswi hi tikombisaka hi li swona hi le handle.
5 Hinga fananisa lisima la kukhatalela leswi hinga swona hi le ndzeni ni lihanyo la hina. Xosungula, leswaku mirhi wa hina wu tshama wu hlayisekile, hi fanele hi dla swakudla leswi nyikaka lihanyo ni kutiwolola minkama hinkwayo. Hi ndlela leyi fanaka, leswaku mbilu ya hina yofanekisela yi tshama yi hlayisekile, hi fanele hi djondza Bibele, mabuku lama seketeliweke ka lona ni kukombisa lipfumelo la hina ka Yehovha minkama hinkwayo. Hinga kombisa lipfumelo la hina loko hi hanya hikuya hi leswi hiswi djondzaka ni loko hi byela van’wana hi leswi hiswi kholwaka. (Rhom. 10:8-10; Yak. 2:26) Xawumbirhi, Loko hi cuvuka ndlela leyi mirhi wa hina wu tshamiseke xiswona hi le handle, hingaha pimisa leswaku hi ni lihanyo lelinene kuve ha vabya hi le ndzeni. Hilaha kufanaka, Hingaha pimisa leswaku leswi hi djondzaka Bibele, hi yaka minhlanganwini ni le kuchumayeleni, lipfumelo la hina li tiyile. Kambe swinga yendleka hi le ndzeni kunavela kobiha kuli karhi kukula. (1 Kor. 10:12; Yak. 1:14, 15) Hikolaho i swa lisima kunga rivali leswaku Sathana a lwela kukucetela mimpimiso ya hina. Aswi yendlisa kuyini leswo naswona hinga yendla yini leswaku hi tisirhelela?
Murindzi 15/06/15 paj. 14 mapar. 5-6
U Nga Swi Kota Ku Tama U Va Ni Mahanyelo Ya Ku Basa
5 I swa lisima ku tshemba Yehovha hi ku helela naswona hi kombisa leswaku ha mu tshemba Yehovha hi ku mu kombela swaku a hi pfuna hi lwa ni mimpimiso ya ku kala yi nga basanga. Loko hi mu kombela Yehovha swaku a hi pfuna, yena a tama a va kusuhi na hina. Phela a nyika mun’wani ni mun’wani hi ku swi rhandza moya wa yena wa ku kwetsima, lowu nga ta hi pfuna swaku hi tinyimisela ku lwa ni mimpimiso ya ku kala yi nga basanga hi tlhela hi tama hi va ni mahanyelo ya ku basa. Hi mhaka leyo, a hi kombeleni Yehovha leswaku a hi pfuna akuva mimpimiso ya hina yi mu tsakisa. (Ps. 19:14) Ku nga va swaku ha kombela leswaku Yehovha a hi kambela nkama ni nkama ku vona leswaku ‘hi ni ndlela ya ku biha’ kumbe ku navela ka ku biha loku nga yendlaka leswaku hi za hi wela ka xidjoho? (Ps. 139:23, 24) Ku nga va leswaku ha mu kombela Yehovha nkama ni nkama leswaku a hi pfuna leswaku hi swi kota ku tama hi tshembeka ka yena hambiloko hi kumana ni mindzingo? — Mat. 6:13.
6 Swi nga yendleka a mahanyelo ya hina ya ku biha ya khale ku patsa ni ndlela leyi hi nga kulisiwa hi yona swi hi yendla hi rhandza swilo leswi Yehovha a swi nyenyaka. Kambe hambiloko leswo swi pfana swi yendleka, Yehovha a nga hi pfuna leswaku hi txintxa hi tlhela hi tama hi mu tirhela ni ku mu tsakisa. Hosi Davhida a swi vonile leswo ka wutomi la yena. Loko se a mbuyetile na Batixeba a game a kombela Yehovha a ku: “Ni yendli ni va ni mbilu ya ku tenga ndzeni ka mina . . . yendla swaku ni ku yingisa hi ku swi rhandza.” (Ps. 51:10, 12) Leswi hi kalaka hi nga hetisekanga, minkama yin’wani hi nga ha navela ku yendla xidjoho kambe Yehovha a nga hi pfuna leswaku hi mu yingisa hi ku swi rhandza. Hambiloko minkama yin’wani hi swi navela hintamu ku yendla xidjoho hi tlhela hi pfana hi va ni mapimiselo ya ku kala ma nga basanga, Yehovha a nga hi pfuna a tlhela a hi kongomisa leswaku hi yingisa minawu ya yena siku lin’wani ni lin’wani. A nga swi kota ku hi pfuna leswaku hi nga fumiwi hi swilo swa ku biha. — Ps. 119:133.
Lavetela Xuma Ka Rito La Xikwembu
Perspicaz vol. 1 paj. 719
Dowegi
Dowegi a a li Muedomu naswona a a li murhangeli wa valusi va swifuyu swa Sawulo. Phela a a ni ntirho wa lisima hintamu. (1Sa 21:7; 22:9) Swi tikomba Dowegi a a li muprozelita. Leswi a a pfaleliwe “phambheni ka Yehovha aNobe” hileswi swi nga yendlekaka a a hambe xitshembiso kumbe a a nga basanga hileswi kumbexana a a ni mavabyi ya nhlokonho, Dowegi a swi vonile nkama lowu Ahimeleke lweyi a a li Muprista Wamukulu a nga nyika Davhida mapawu ni xipada xa Goliyadi. Hi ku famba ka nkama, nkama lowu Sawulo a nga vutisa vatirhi va yena swaku hi mani lweyi a a mu djikelile Dowegi a byele Sawulo leswi a nga swi vona na swi yendleka aNobe. Se Sawulo a game a vitana muprista wamukulu ni vaprista van’wani lava a va li Nobe leswaku a ta thethisa Ahimeleke. Loko ku yendleke leswo, Sawulo a game a rhumisa leswaku a vaprista hinkwavu lavo va dlayiwa. Kambe vatirhi van’wani va Sawulo va yalile ku yendla leswo; kambe Dowegi a tinyikelile naswona a dlaye 85 wa vaprista va Yehovha. Nkama lowu Dowegi a nga heta ku yendla leswo, a game helisa a doropa hinkwalu la Nobe hi ku dlaya vanhu hinkwavu lava a va hanya ka lona, ku patsa ni vana, vanhu va ku guga ku patsa ni swifuyu hinkwaswu leswi a swi li kona ka doropa leliyani. — 1Sa 22:6-20.
Hilani swi nga kombisiwa hi kona ka xingheniso xa Tipisalema 52, Davhida a tsale leswi hi Dowegi: “Lirimi la wena, li lotiwe ku fana ni xisingwani, li yendla maplanu ya ku biha naswona la kanganyisa. Wena u rhandza swa ku biha ku tlula swaswinene, mavunhwa ku tlula ku khuluma ntiyiso. U rhandza marito lama wonhaka. Wena lirimi la ku kanganyisa.” — Ps 52:2-4.
24 KU YA KA 30 KA JUNHO
XUMA XI NGA KA RITO LA XIKWEMBU TIPISALEMA 54-56
Yehovha A Na Wena
Murindzi 01/08/06 paj. 22 mapar. 10-11
Kombisa Leswaku U Ni Wutlharhi Hi Ku Chava Xikwembu
10 Siku lin’wani Davhida a ye a ya tumbela ka doropa la Vafilista ku nga Gati lani a ku fuma Hosi Akixi. Doropa leli, hi lani Goliyadi a a ta hi kona. (1 Samuwele 21:10-15) A vatirhi va hosi va ye va ya mangala va yi byela leswaku nala wa vona Davhida a a va nghenelile ka tiko la vona. I mpsini leswi Davhida a nga swi yendla ka xiyimu lexo? A pfule mbilu ya yena a khongela ka Yehovha. (Tipisalema 56:1-4, 11-13) Hambileswi swi nga lava leswaku Davhida a tiyendla ingaku i nhlanyi leswaku a baleka, Davhida a a swi tiva leswaku i Yehovha lweyi a nga mu ponisa hi ku va a katekise minzamu leyi a nga yi yendla. Ku va a khongele ka Yehovha a tlhela a mu byela hinkwaswu leswi a swi li ka mbilu ya yena ni ku va a mu tshembe hi ku helela, Davhida a swi kombisile leswaku impela a a mu chava Yehovha. — Tipisalema 34:4-6, 9-11.
11 Ku fana na Davhida, na hina hi nga kombisa swaku ha xi chava Xikwembu hi ku va hi tshemba swaku xi ta hi pfuna ku lwisana ni swikarhatu. Davhida a te: “Yandlala ndlela ya wena ka Yehovha; mu tshembi, a ta ku pfuna.” (Tipisalema 37:5) Phela leswo a swi vuli ntsena ku va hi khongela ka Yehovha hi mu byela swikarhatu swa hina hi gama hi khondla mavoko hi nyimela swaku yena a hi pfuna. Hambi hi Davhida a ngo yo kombela Yehovha swaku a mu pfuna a gama a khondla mavoko ntsena, yena a zame ku tirhisa a wutivi leli Yehovha a nga mu nyika lona ni matimba ya yena swaku a lwisana ni swikarhatu leswi a a kumana na swona. Hambileswo, a a swi tiva swaku a a nga fanelanga a tshemba wutivi la yena ntsena, kambe a a fanele a tshemba Yehovha. Leswo swa tirha ni ka hina. Loko se hi zame ku yendla hinkwaswu leswi hi nga swi kotaka, hi fanele hi tshika hinkwaswu ka mavoko ya Yehovha. Ku vula ntiyiso minkama yin’wani a xi kona lexi hi nga xi yendlaka loko ku nga li ku tshemba Yehovha ntsena. Se lanu hi kona swi nga ta lava hi kombisa swaku hikakunene ha mu chava Yehovha. Davhida a vule leswi: “Yehovha i munghanu wamukulu wa lava mu chavaka.” Impela marito lawa ma hi tiyisa. — Tipisalema 25:14.
Tshinela Ka Yehovha paj. 243 par. 9
A Ku Na Nchumu Lexi Nga Hi Hambanisaka Ni “Lirhandzu Leli Xikwembu Xi Nga Na Lona Hi Hina”
9 Yehovha a ku nyika lisima hintamu ku tiyisela ka hina. (Matewu 24:13) Khumbuka swaku Sathana a lava swaku hi tshika ku tirhela Yehovha; se loko ku hela siku na hi swi kotile ku tshembeka ka Yehovha hi va hi mu pfuna Yehovha swaku a nyikela nhlamulu ka leswi Sathana a mu lumbetaka hi swona. (Swivuriso 27:11) Phela a ku tiyisela a swi vevuki minkama yin’wani, hikusa swikarhatu swa ku fana ni ku vabya, ku pfumala male, ku vilela ni swin’wani swi nga ha ringa ku tshembeka ka hina. Xin’wani hileswaku loko hi nyimela nchumu xi gama xi nga yendleki hi nga ha hela ntamu. (Swivuriso 13:12) Se loko hi tiya nkama hi kumanaka ni swikarhatu swoleswo Yehovha a ya a ku nyika lisima hintamu a ku tiyisela ka hina. Hi leswo swi nga yendla Hosi Davhida a khongela a kombela Yehovha leswaku a “chela mihloti ya yena ka bolhela.” Nkama lowu Davhida a nga vula leswo a tlhele a ku: “Indjhe mahlomulu ya mina a ma tsaliwanga ka buku ya wena?” (Tipisalema 56:8) Leswo swi kombisa swaku Yehovha wa hi vona loko hi rila ni loko hi kumana ni swikarhatu hileswi hi lavaka ku tama hi tshembeka ka yena; funtshi a nge tshuki a swi khohlwa swilo leswi hi swi yendlaka swaku hi tama hi tshembeka ka yena hikusa i swa lisima hintamu ka yena.
Murindzi 06/22 paj. 18 mapar. 16-17
Lirhandzu Li Nga Hi Pfunisa Ku Yini Swaku Hi Nga Chavi?
16 Sathana wa swi tiva swaku wutomi i la lisima hintamu ka hina. A vula swaku hi nga pfumela hambi hi ku luzekeliwa hi wunghanu la hina na Yehovha swaku hi nga fi. (Yobo 2:4, 5) Phela leswo a hi ntiyiso. Se, leswi Sathana “a kotaka ku yentxa swaku ku fiwa”, a tirhisa ku chava lifu swaku a hi tshikisa ku tirhela Yehovha. (Heb. 2:14, 15) Minkama yin’wana, lava nyimaka na Sathana va dlaya vanhu va Yehovha hileswi va yalaka ku tshika ku yingisa minawu ya yena. Minkama yin’wana Sathana a nga ha tirhisa mavabyi swaku a hi yentxa hi nga yingisi minawu ya Yehovha. Vadotori ni maxaka ya hina va nga ha hi sindzisa ku pfumela ku cheliwa ngati kumbe hi pfumela madahelo lama lwisanaka ni minawu ya Bibele.
17 Hambileswi hi kalaka hi nga swi lavi ku fa, ha swi tiva swaku Yehovha a nga ta tshika ku hi rhandza hambiloko hi fa. (Lerha Varoma 8:37-39.) Yehovha wa va khumbuka vanghanu va yena lava va nga fa, ka yena swi fana ni loko va ha hanya. (Luk. 20:37, 38) Wa swi lava ku va pfuxa. (Yobo 14:15) A ze a nyikela hi N’wana wa yena Yesu swaku hi “kuma wutomi la ku kala li nga heli.” (Yoh. 3:16) Ha swi tiva swaku Yehovha a hi rhandza hintamu naswona a ni mhaka na hina. Hi mhaka leyo, loko hi vabya kumbe hi chava ku fa, hi fanele hi tshemba swaku Yehovha a ta hi tiyisa a tlhela a hi nyika wutlharhi. Leswo hi leswi Valéria ni nuna wa yena va nga swi yentxa. — Pis. 41:3.
Lavetela Xuma Ka Rito La Xikwembu
Perspicaz vol. 2 paj. 708
Ku Vona Swilo Na Swi Nga Se Yendleka, Ku Boha Swilo Leswi Nga Ta Yendleka
Leswi Yudasi a nga xavisa Yesu swi hetisise a wuprofeta la Xikwembu swi tlhela swi kombisa swaku Yehovha na Yesu va swi kota ku vona swilo na swi nge se yendleka. (Ps 41:9; 55:12, 13; 109:8; Min 1:16-20) Kambe a hi nge vuli swaku Xikwembu se a xi swi bohile khale swaku a ku ta va Yudasi lweyi a a ta xavisa Yesu. Phela wuprofeta li yo vula swaku mun’we wa vanghanu va Yesu a ku ta va yena lweyi a a ta xavisa Yesu, kambe a li zanga li kombisa swaku a a ta va mani munhu wa kona naswona leswo a swi ta lwa ni matshinya ya minawu ya Xikwembu, hikusa mupostolo mun’wani a te: “U nga hantliseli ku tlhateka munhu mavoko; naswona u nga tipatsi ka swidjoho swa van’wani; tshama na u tengile.” (1Tm 5:22; vona ni 1Tm 3:6.) Leswi Yesu a a lava ku langa 12 wa vapostolo va yena hi ndlela ya wutlharhi, a hete wusiku hinkwalu na a khongela ka Papayi wa yena a kombela leswaku a mu pfuna a yendla xiboho xa kahle. (Luk 6:12-16) Loko swi ku Xikwembu a xi bohile khale leswaku Yudasi a a ta va yena lweyi a a ta xavisa Yesu, a swi nga ta twala kuva Yesu a kombela ku kongomisiwa hi Yehovha swaku a langa vapostolo naswona a a ta va na a tipatsa ka swidjoho swa Yudasi.
Hinkwaswu leswi, swi hi komba swaku swi nga yendleka nkama lowu Yesu a nga langa Yudasi swaku a va mupostolo, a ku nga na nchumu ka mbilu ya yena lexi a xi kombisa swaku a ku ta va yena lweyi a a xavisa Yesu. Kambe Yudasi a yo pfumelela swaku ka mbilu ya yena ku mila “limitsu la vhenenu” leli li nga yendla leswaku a kanganyisiwa hi Sathana a tshika ku landzelela nkongomiso wa Yehovha se a sungula ku va muyivi a tlhela a xavisa Yesu. (Heb 12:14, 15; Yoh 13:2; Min 1:24, 25; Yak 1:14, 15) Se a nkama lowu mbilu ya yena yi nga sungula ku ngheniwa hi vhenenu, Yesu a kote ku swi vona swoleswo a tlhela a vula swaku Yudasi hi yena lweyi a a ta mu xavisa. — Yoh 13:10, 11.